¿Tuku xlakata «Chixku» wa pi xʼama “makgatsankga” xʼherencia komo xtatamakgaxtokgli Rut? (Rut 4:1, 6).

Makgasata, komo chatum chixku tiku xtamakgaxtokgnit xniy pero niti xkgalhi xkamanan, xlilakpuwankan umakgolh takgalhskinin: ¿tuku xʼama akgspula tiyat nema xtapakgsini? ¿Xʼama lakgsputa xtukuwani xfamilia? Putum uma xtalichuwinan kLimapakgsin nema maxkika Moisés.

Komo chatum chixku xniy o ksta tiyat nema xtapakgsini xlakata xtalimaxkgenit, xtala o chatum xtalilakgapasni tlan xtamawaxtu uma tiyat. Chuna familia ni xʼama makgatsankga tuku xtapakgsini (Lev. 25:23-28; Núm. 27:8-11).

¿Tuku xtlawakan xlakata xtukuwani tiku xninita ni xlakgsputli? Xtala xtatamakgaxtokga xyasta xlakata xtakgalhilh kamanan chu chuna ni xlakgsputli xtukuwani tiku xninita chu ni xmakgatsankgalh xʼherencia. Uma talismanin nema xlimapakuwikan tamakgaxtokgat xla levirato o tatamakgaxtokgkan yasta, na xmakgtayanan xlakata puskat tlan xkitaxtunilh (Deut. 25:5-7; Mat. 22:23-28). Chuna lalh xpalakata Rut.

Kalilakpuwaw tuku titaxtulh Noemí. Xla xtatamakgaxtokgnit Elimélec. Pero akxni Elimélec chu chatiy xlakgkgawasan nikgolh, nialhti tiku xkuentajtlawa Noemí (Rut 1:1-5). Akxni Noemí taspitli kJudá wanilh Rut pi kskinilh Boaz, chatum xtalilakgapasni Elimélec, pi xtamawaxtulh tiyat nema xkatapakgsini (Rut 2:1, 19, 20; 3:1-4). Pero Boaz xkatsi pi xʼanan atanu xtalilakgapasnikan tiku xlakgchan natamawaxtunan (Rut 3:9, 12, 13). Biblia limapakuwi «Chixku».

Xapulana, Chixku wa pi xʼama tamawaxtu tiyat (Rut 4:1-4). Maski xkatsi pi lhuwa tumin xʼama limakgasputa, na xkatsi pi Noemí xlina kata chu nialhla xʼama kgalhi kamanan xlakata xkalakgchalh tuku xtapakgsini Elimélec. Umakgolh tiyat wa xʼama tapakgsini uma Chixku. Wa xlakata xtasiya pi tlan xkitaxtulh maski xlimakgasputli xtumin.

Pero akxni uma Chixku katsilh pi na xlitatamakgaxtokgat xwanit Rut, wa pi nialh xʼama tamawaxtu tiyat. Wa: «Nila ktamawaxtu, xlakata nakmakgatsankga kiʼherencia» (Rut 4:5, 6). ¿Tuku xlakata nialh tamawaxtuputulh?

Komo uma chixku o atanu xtalilakgapasni Noemí xtatamakgaxtokgli Rut chu xla xkgalhilh chatum kgawasa, uma kgawasa xʼama tapakgsini tiyat nema xkgalhi Elimélec. ¿Tuku xlakata uma xʼama lilaktlawa xʼherencia uma Chixku? Biblia ni kinkawaniyan, pero kaʼakxilhwi makgapitsi tuku max xlakata.

• Pulana, max uma Chixku lakpuwa pi kaj xʼama limakgatsankga tumin, xlakata tiyat nema xtapakgsini Elimélec wa xʼama tapakgsini xkgawasa Rut.

• Xlipulaktiy, xtalakaskin pi xkakuentajtlawalh Noemí chu Rut.

• Xlipulaktutu, komo Rut chu uma Chixku tlakg xkgalhikgolh kamanan, umakgolh kamanan na xʼamaka katatapapitsikan herencia nema xkalakgchan amakgapitsi xkamanan uma Chixku.

• Xlipulaktati, komo uma Chixku ni xkgalhi atanu kamanan, kgawasa nema xtakgalhilh Rut xʼama tapakgsini tiyat nema xkgalhi Elimélec chu tiyat nema xkgalhi uma Chixku. Wa xlakata xʼherencia xʼama tapakgsini kgawasa nema xʼama lin xtukuwani Elimélec, chu ni wa xla uma Chixku. Uma Chixku ni makgatsankgaputulh xʼherencia kaj xlakata namakgtaya Noemí. Wata mastalh talakaskin pi wa Boaz xtamawaxtulh uma tiyat, tiku na xtalilakgapasni Elimélec xwanit. Chu Boaz tamawaxtulh. ¿Tuku xlakata? Xla wa: «Xlakata putum tuku xkgalhi chixku tiku ninit chuntiya nalin xtukuwani» (Rut 4:10).

Chuna la akxilhaw, tuku tlakg xlakaskinka xʼakxilha uma Chixku wa pi xtukuwani ni xlakgsputli chu ni xmakgatsankgaputun xʼherencia. ¡Kaj xʼakstu xpaxkikan! Pero putum tuku tlawalh nitu litaxtulh, xlakata xtukuwani nialhti lakapastaka. Nachuna, makgatsankgalh talakgalhaman nema Boaz makglhtinalh: xtukuwani talhkatawilanit klista niku talhkatawilakgonit xtukuwanikan tiku makgtapakgsikgolh kfamilia niku mincha Mesías, Jesucristo. Uma Chixku lhuwa tuku makgatsankgalh kaj xlakata xʼakstu paxkika chu ni makgtayaputulh tiku xmaklakaskin (Mat. 1:5; Luc. 3:23, 32).