1, 2. Komo nina makgatsiya tuku talakaskin xlakata natamunuya, ¿tuku xlakata ni militaxlajwanit? (Kaʼakxilhti xmakni revista).

 KOMO wix tamunuputuna, lu tlan tuku tlawaputuna. ¿Tlantiya natamunuya? Komo lakpuwana pi chuna chu lakgkgolotsin na lakpuwankgo pi tlantiya natamunuya, ni kamakgapala. Komo chuna natlawaya, tlan xatapaxuwan naskujnaniya Jehová.

² Pero ¿tuku natlawaya komo nawanikana pi nina makgatsiya tuku talakaskin xlakata tlan natamunuya? O ¿tuku tlan natlawaya komo makgkatsiya pi nina makgatsiya tuku talakaskin? Ni kalitaxlajwani uma, maski kgawasaku wix o lankata, tlan chuntiya naliskuja xlakata nalakgchipina uma.

3. ¿Tuku kgalhskininalh chatum chixku xalak Etiopía chu tuku takgalhskinin max nalilakpuwanaw? (Hechos 8:36, 38).

³ (Kalikgalhtawakga Hechos 8:36, 38). Chatum kskujni mapakgsina xalak Etiopía kgalhskilh Felipe: «¿Tuku tlawa pi nila naktamunu?». Liwana tasiya pi uma chixku xtamunuputun. Pero ¿tlantiya xtlawalh uma tuku lu xlakaskinka?

4. ¿La limasiyalh chixku xalak Etiopía pi tlakg xkatsiniputun?

⁴ Chixku xalak Etiopía «xʼanit kJerusalén xlakata nakakninani Dios» (Hech. 8:27). Max chatum prosélito xlitaxtu, uma wamputun pi xmakgamakglhtinanit xtakanajlakan judíos. Xla xlakgapasa Tatsokgni xaHebreo chu anta xkatsininit xpalakata Jehová. Pero tlakg xkatsiputun. ¿Tuku xtlawama akxni Felipe tatanokglhli ktiji? Xlikgalhtawakgama xtatsokgni  palakachuwina Isaías (Hech. 8:28). Uma tatsokgni lu tuwa xwanit naʼakgatekgskan. Uma chixku tlakg xkatsiniputun, ni kajwatiya xkatsiputun xapulana tamasiy.

5. Xlakata tuku xkatsininit chixku xalak Etiopía, ¿tuku makgpuwantinilh natlawa?

⁵ Uma chixku kskujni mapakgsina Candace xlitaxtu, mapakgsina xalak Etiopía. «Xla xlakgayawakanit putum tuku lhuwa xtapalh nema xkgalhi» mapakgsina (Hech. 8:27). Max lhuwa tuku xlitlawat xwanit. Pero limaxtulh kilhtamaku xlakata nakakninani Jehová. Ni kajwatiya katsinilh xaxlikana; wata tuku katsinilh makgpuwantinilh wi tuku natlawa. Mincha lata kʼEtiopía xlakata nakakninani Jehová kJerusalén. Max lu makgat chu lu tapalaxla kitaxtunilh uma, pero uma chixku xkakninaniputun Jehová maski xtalakaskin lhuwa tuku xlimakgxtakgli.

6, 7. ¿Tuku tlawalh chixku xalak Etiopía xlakata tlakg xpaxkilh Jehová?

⁶ Felipe litachuwinalh chixku xalak Etiopía tuku xla ni xkatsi, tuku lu xlakaskinka, pi Jesús wa Mesías xwanit (Hech. 8:34, 35). Akxni uma chixku katsinilh putum tuku Jesús xtlawanit xpalakata, lakgchalh xnaku. ¿Tuku xʼama tlawa? Tlan chuntiya xtamakgxtakgli chu chuntiya prosélito xlitaxtulh tiku xmaxkikan kakni. Pero tapaxkit nema xkgalhini Jehová chu Jesús lu xtatliwakglhnit chu wa xlakata laksakli natamunu chu kstalanina Jesús nalitaxtu. Felipe akxilhli pi tlantiya xtamunulh, wa xlakata munulh.

⁷ Xliʼakxilhtit chixku xalak Etiopía namakgtayayan naliskuja xlakata tlan natamunuya. Chu chuna la xla, tlan nawana: «¿Tuku tlawa pi nila naktamunu?». La uku, naʼakxilhaw la tlan natlawaya la uma chixku: chuntiya nakatsiniya, nalilatapaya tuku katsinipat chu namatliwakglha tapaxkit nema kgalhiniya Jehová.

8. Chuna la wan Juan 17:3, ¿tuku militlawat?

⁸ (Kalikgalhtawakga Juan 17:3). ¿Makgpuwantinin xtachuwin Jesús natsukuya likgalhtawakgaya Biblia? Wa uma tuku kamakgpuwantininit lhuwa latamanin. Pero umakgolh tachuwin na kinkamakgpuwantiniyan chuntiya nakgalhtawakgayaw. Nikxnila katilakgapaskgow «xaxlikana Dios» (Ecl. 3:11). Natalakaskin chuntiya nalakgapasaw putum kilhtamaku. Akxni tlakg nalakgapasaw Jehová, tlakg tlan natalalinaw (Sal. 73:28).

9. ¿Tuku kilitlawatkan akxni katsinitawa tuku pulana masiya Biblia?

⁹ Akxni chatum lataman tsuku lakgapasa Jehová, tsuku katsini xapulana tamasiy. Ktatsokgni nema apóstol Pablo kamalakgachanilh hebreos limapakuwilh uma: tuku  pulana katsinitit xlakata «xtachuwin Dios». Pablo ni xwamputun pi ni xlakaskinka «tuku pulana katsiniw xpalakata Cristo»; wata xkilhchanima pi uma xtachuna la leche nema liwayankgo lakgskgatan (Heb. 5:12; 6:1). Xla na kamakgpuwantinilh pi ni kajwatiya xtalakaskin xkatsinikgolh tuku pulana masiya Biblia chu kawanilh pi xkatsinikgolh tuku tlakg tuwa masiya xTachuwin Dios. ¿Lu katsiputuna wix uma? ¿Liskujputuna xlakata chuntiya namatliwakglha mintakanajla chu tlakg nalakgapasa Jehová chu tuku lakpuwanit natlawa?

10. ¿Tuku xlakata makgapitsin lu tuwa makgkatsikgo nakgalhtawakgakgo?

¹⁰ Makgapitsin tuwa makgkatsikgo nakgalhtawakgakgo. ¿Chu wix? ¿Masiyanika kʼescuela nakgalhtawakgaya? ¿Xlakgatiya kgalhtawakgaya? ¿O xlakpuwana pi lu tuwa naʼakgatekgsa tuku xmasiyakgo libros? Komo tuwa makgkatsiya nakgalhtawakgaya, ni mi’akstu chuna makgkatsiya. Pero Jehová tlan namakgtayayan. Xla ni kgalhi talakgalhin chu wa tlakg xatlan makgalhtawakgena nema anan.

11. ¿Tuku xlakata wa Jehová “Tlakg xaLanka Makgalhtawakgena”?

¹¹ Jehová wan pi wa tiku “Tlakg xaLanka Makgalhtawakgena” (Is. 30:20, 21). Akxni xla masiya ni lakapala sitsi, tlan likatsi chu akgatekgsninan, chu putum kilhtamaku akxilha xatlan tayat nema kgalhikgo xtamakgalhtawakgen (Sal. 130:3). Xla nikxni kintikaskinin tuku nila katitlawaw. Kalakapastakwi pi wa tiku malakatsukilh kiʼakskititkan, akgtum lu tlan tamaskiwin (Sal. 139:14). Nachuna, xla kinkamalakatsukin xlakata wi tuku nakatsiniputunaw, chu lakaskin pi chuntiya kakatsiniw putum kilhtamaku chu kalipaxuwaw. Wa xlakata, lata uma kilhtamaku lu kiliskujatkan xlakata nakatsiputunaw tuku xaxlikana masiya Biblia (1 Ped. 2:2). ¿Tuku namakgtayayan chuna natlawaya? Kalakkaxwili wi tuku nalakgchipina chu ankgalhin kalikgalhtawakga Biblia (Jos. 1:8). Jehová namakgtayayan xlakata tlakg nalipaxuwaya akxni nakatsiniya xpalakata.

12. ¿Tuku xlakata kilikatsinitkan xlakata xlatamat chu tuku tlawalh Jesús?

¹² Kalimaxtu kilhtamaku xlakata nalilakpuwana xlatamat chu tuku tlawalh Jesús. Xlakata tlan naskujnaniya Jehová, liwaka kʼuma xatuwa kilhtamaku, lu xlakaskinka nastalaniya xliʼakxilhtit Cristo (1 Ped. 2:21). Jesús liwana kawanilh kstalaninanin tuku tuwa xʼamakgo titaxtukgo (Luc. 14:27, 28). Pero xkatsi pi chuna la xla, ni xʼamakgo makgxtakgkgo Dios (Juan 16:33). Kalikgalhtawakga tuku tlawalh Jesús kxlatamat chu kaliskujti nastalaniya xliʼakxilhtit chali chali.

13. ¿Tuku chuntiya miliskinit Jehová, chu tuku xlakata?

¹³ Akxni kgalhtawakgayaw, ni kajwatiya lhuwa tuku katsiniputunaw. Wata lakgapasputunaw Jehová, paxkiputunaw chu kgalhiniputunaw takanajla (1 Cor. 8:1-3). Tlakg kakatsinitilha xlakata Jehová, chu chuntiya kaskini pi kamakgtayan tlakg namatliwakglha mintakanajla (Luc. 17:5). Xla xatapaxuwan namakgtayayan. Komo wix kanajlaniya Dios xlakata liwana lakgapasnita, tlan chuntiya namastakaya mintakanajla (Sant. 2:26).

14. ¿La limasiyalh Pedro pi lu xlakaskinka nalilatamayaw tuku katsinimaw? (Na kaʼakxilhti dibujo).

¹⁴ Apóstol Pedro lichuwinalh la xlilakaskinka pi kstalaninanin Cristo nalilatamakgo tuku katsinikgo. Limaklakaskilh xliʼakxilhtit Noé xlakata nalichuwinan uma. Jehová wanilh Noé pi xʼama makamin Munkaklat xlakata xkamasputulh putum latamanin tiku lixkajni xlikatsikgo. Pero ni kajwatiya xtalakaskin pi  Noé chu xfamilia xkatsikgolh uma, wi tuku xlitlawatkan xwanit xlakata xlakgtaxtukgolh. Pedro limaklakaskilh tachuwin «nina xtlawakgokan arca» xlakata nalichuwinan kilhtamaku akxni nina xmin Munkaklat (1 Ped. 3:20). Noé chu xfamilia tlawakgolh chuna la xkawaninit Jehová chu tlawakgolh akgtum arca (Heb. 11:7). Pedro lichuwinalh pi tamunut xtachuna tuku tlawalh Noé. Wa: «Tlan natamalakxtumiyaw tuku lalh ama kilhtamaku uma tamunut nema kalakgmaxtuman» (1 Ped. 3:21). Xtachuna la uma, tuku wix tlawapat xlakata natamunuya tatalakxtumi tuku tlawakgolh Noé chu xfamilia akglhuwa kata xlakata natlawakgo arca. Wa xlakata, ¿tuku militlawat xlakata tlan natamunuya?

15. ¿Tuku kilhchanima nitlan nalimakgkatsiya mintalakgalhin?

¹⁵ Pulaktum tuku kilitlawatkan wa pi xliputum kinakujkan nitlan nalimakgkatsiyaw kintalakgalhinkan (Hech. 2:37, 38). Uma kilhchanima natlawayaw talakgpalit. ¿Makgxtakgnita tuku Jehová ni lakgati chuna la talakgxtumit nema ni xlitatlawat, lixkuli chu nixatlan tachuwin? (1 Cor. 6:9, 10; 2 Cor. 7:1; Efes. 4:29). Komo nina chuna tlawaya, kaliskujti chuna natlawaya. Tlan natachuwinana tiku limakgalhtawakgeman Biblia o lakgkgolotsin xalak congregación komo maklakaskina tamakgtay chu tastakyaw. Chu komo aktsujku wix chu katawilaku minatlatni, tlan nakawaniya pi kamakgtayakgon xlakata namakgxtakga kaxatukawa tayat nema tlawama pi nila natamunuya.

16. ¿Tuku kilitlawatkan xlakata namatliwakglhaw kintakanajlakan?

¹⁶ Na lu xlakaskinka pi wix naliskuja xlakata namatliwakglha mintakanajla. Talakaskin napina ktamakxtumit chu namastaya mintakgalhtin (Heb. 10:24, 25). Chu akxni publicador nalitaxtuya, talakaskin pi ankgalhin nalichuwinana Dios. Naʼakxilha pi akxni tlakg nalichuwinana Dios, tlakg nalipaxuwaya uma taskujut (2 Tim. 4:5). Komo wix aktsujku chu katawilaku minatlatni, kalakpuwanti: «¿Ankgalhin kimalakapastakakgo pi kiliʼanat ktamakxtumit chu nakkan lichuwinan Dios? ¿O chuna ktlawa xlakata chuna ktlawaputun?». Akxni chuna tlawaya xlakata  wix chuna tlawaputuna, limasiyaya pi kgalhiya takanajla, pi paxkiya Jehová chu paxtikatsiniya. Komo chuntiya namatliwakglha mintakanajla nalimasiyaya pi “tamakamastaninita Dios”; xtachuna la komo maxkipat tamaskiwin Jehová (2 Ped. 3:11; Heb. 13:15). Xla lakgati pi kamaxkiw tamaskiwin xlakata chuna tlawaputunaw chu ni xlakata kinkamafuerzajlinimakan (katamalakxtupi 2 Corintios 9:7). Chu akinin lu paxuwayaw akxni maxkiyaw tuku tlakg tlan kgalhiyaw.

17, 18. ¿Tuku tayat namakgtayayan natamunuya, chu tuku xlakata? (Proverbios 3:3-6).

¹⁷ Akxni lakkaxwilipat pi natamunuya, max lhuwa tuku tuwa natitaxtuya. Max makgapitsin nalikgalhkgamanankgoyan o asta naliputsastalanikgoyan mintakanajla (2 Tim. 3:12). O max liskujpat xlakata namakgxtakga pulaktum tuku nitlan, pero min kilhtamaku tlawaparaya uma tuku nitlan. O max lakpuwana pi nikxnila katitamunu, chu uma maxlajwaniyan. ¿Tuku namakgtayayan chuntiya naliskuja? Pulaktum tuku lu namakgtayayan wa tapaxkit nema kgalhiniya Jehová.

¹⁸ Tapaxkit nema kgalhiniya Jehová wa tuku tlakg tlan kgalhiya (kalikgalhtawakga Proverbios 3:3-6). Komo wix paxkiya Jehová xliputum minaku, tlan natayaniya kaxatukawa tuku tuwa natitaxtuya kmilatamat. Biblia makglhuwa wan pi Jehová kalimasiyani xlakskujnin tapaxkit nema ni makgxtakgnan. Uma wamputun pi nikxni kamakgxtakga chu putum kilhtamaku kapaxki (Sal. 100:5). Chu wix malakatsukika xlakata tlan nalimasiyaya tayat nema kgalhi Dios (Gén. 1:26). Wa xlakata, ¿la tlan nalimasiyaya uma tapaxkit?

19. ¿Tuku tlan natlawaya xlakata napaxtikatsiniya Jehová putum tuku tlawa mimpalakata? (Gálatas 2:20).

¹⁹ Tuku pulana militlawat wa pi napaxtikatsiniya Jehová (1 Tes. 5:18). Chali chali miʼakstu kakgalhskinka: «¿La kilimasiyanilh Jehová la uku pi kimpaxki?». Chu akxni natlawaniya oración kapaxtikatsini tuku tlawanit mimpalakata. Putum tuku Jehová tlawa mimpalakata kaliʼakxilhti pi chuna tlawa xlakata lu paxkiyan. Katlawa chuna la tlawalh apóstol Pablo (kalikgalhtawakga Gálatas 2:20). Akstu kakgalhskinka: «¿Klimasiyaniputun Jehová pi na kpaxki?». Tapaxkit nema wix kgalhiniya, namakgtayayan natayaniya kaxatukawa taputsan chu taʼakglhuwit nema nalakgchinan chu namakgtayayan chuntiya  namatliwakglha mintakanajla. Chuna nalimasiyaya chali chali pi paxkiya minTlat xalak akgapun.

20. ¿Tuku kilhchanima natamakamastaniya Jehová, chu tuku xlakata uma lu xlakaskinka?

²⁰ Chuna la natitaxtu kilhtamaku, tapaxkit nema kgalhiniya Jehová namakgpuwantiniyan natlawaniya akgtum lu xlakaskinka oración niku natamakamastaniya. Chu akxni tamakamastaninita nawan, uma tamakamastan namakgtayayan natapakgsiniya Jehová putum kilhtamaku. Akxni tamakamastaniya Jehová, malaknuniya pi naskujnaniya putum kilhtamaku maski natitaxtuya tuku tuwa. Uma tamalaknun kaj makgtum tlawakan. Xlikana pi tamakamastanikan Dios ni kaj akgtum takgaman. Pero kalakapastakti: xliputum tuku tlan nalaksaka kmilatamat, natamakamastaniya Dios wa tuku tlakg tlan natlawaya (Sal. 50:14). Satanás namasputuputun tapaxkit nema kgalhiniya Jehová xlakata nialh naskujnaniya. Pero ni kamasta talakaskin pi chuna natlawa (Job 27:5). Tapaxkit nema kgalhiniya minTlat xalak akgapun namakgtayayan namakgantaxtiya tuku malaknuni chu tlakg natalakatsuwiniya.

21. ¿Tuku xlakata wanaw pi akxni tamunuyaw aku matsukimaw kintaskujutkan?

²¹ Akxni tamakamastaninitata nawan Jehová, kakatachuwinanti lakgkgolotsin xlakata tlan natamunuya. Pero kalakapastakti pi akxni tamunuyaw ni anta kiʼakgasputa kintaskujutkan, wata aku matsukimaw chuna la naskujnaniyaw Jehová putum kilhtamaku. Wa xlakata kamatliwakglhti tapaxkit nema kgalhiniya minTlat xalak akgapun chu kalakkaxwili wi tuku nalakgchipina xlakata uma tapaxkit chuntiya nastaka chali chali. Uma namakgtayayan tlan natamunuya. Nikxni katipatsankga uma kilhtamaku. Pero uma aku tsukuma. Klakaskinaw pi tapaxkit nema kgalhiniya Jehová chu xKgawasa chuntiya katatliwakglhli.