ARTÍCULO NEMA NATALIKGALHTAWAKGA 14
«Wa uma tuku nalitalakgapasatit»
«Wa uma tuku nalitalakgapasatit pi wixin kintamakgalhtawakgen: komo lapaxkiyatit» (JUAN 13:35).
TAKILHTLIN 106 Tapaxkit wa tlakg xatlan tayat
TUKU NATALICHUWINAN a
¿Tuku lakpuwankgo makgapitsi latamanin akxni akxilhkgo tapaxkit nema anan kxkachikin Jehová? (Kaʼakxilhti párrafo 1).
1. ¿Tuku lakgatikgo lhuwa latamanin akxni xlimakgtumku ankgo ktamakxtumit? (Na kaʼakxilhti dibujo).
KALILAKPUWAW akgtum tamakgaxtokgat nema xlimakgtumku ankgo ktamakxtumit kPukgalhtawakga. Lu kaks lilakawankgo akxni akxilhkgo pi natalan lu tlan kamakgamakglhtinankgo chu tapaxkit nema lalimasiyanikgo. Akxni taspitmakgo kxchikkan, xapuskat wani xchixku: «Xtatayananin Jehová ni chuna likatsikgo la amakgapitsi takanajla, chu uma klakgati».
2. ¿Tuku xlakata makgapitsi nialh skujnanikgo Jehová?
2 Tapaxkit nema anan kcongregación xla kstalaninanin Cristo ni anan tuku xtachuna. Pero akinin xtatayananin Jehová na makglakgalhinanin (1 Juan 1:8). Wa xlakata, akxni tlakg kalakgapasaw natalan, max tlakg ni tuwa naʼakxilhaw tuku nitlan tlawakgo (Rom. 3:23). Lu kinkamakgalipuwanan pi makgapitsi natalan mastakgonit talakaskin pi tuku nitlan tlawakgo amakgapitsin natlawa pi nialh naskujnanikgo Jehová.
3. ¿Tuku litalakgapaskgo xaxlikana kstalaninanin Cristo? (Juan 13:34, 35).
3 Kaʼakxilhparaw texto niku takilhtiyanit uma artículo (kalikgalhtawakga Juan 13:34, 35). ¿Tuku xʼamakgo litalakgapaskgo xaxlikana kstalaninanin Cristo? Ni wa pi nialh xʼamakgo kgalhikgo talakgalhin, wata wa pi xʼamakgo lapaxkikgo. Nachuna, kaʼakxilhwi pi Jesús ni wa: «Wa uma tuku wixin nalikatsiyatit pi wixin kintamakgalhtawakgen», wata wa: «Wa uma tuku nalitalakgapasatit pi wixin kintamakgalhtawakgen». Wa xlakata, Jesús liwana wa pi kstalaninanin chu amakgapitsi latamanin, xʼamakgo kalilakgapaskgo xaxlikana kstalaninanin Cristo xlakata tapaxkit nema xlalimasiyanilh xchatunukan.
4. ¿Tuku max xʼakstu kakgalhskinkan makgapitsi latamanin?
4 Makgapitsi tiku ni xtatayananin Jehová max xʼakstu kakgalhskinkan: «¿Tuku xlakata tapaxkit wa tuku litalakgapaskgo xaxlikana kstalaninanin Cristo? ¿La kalimasiyanilh Jesús tapaxkit xʼapóstoles? ¿Chu la tlan nastalaniyaw xliʼakxilhtit Jesús?». Tiku tamununitawa na lu xlakaskinka pi akstu nakinkatlawanikanan umakgolh takgalhskinin. Uma nakinkamakgtayayan tlakg nalimasiyayaw tapaxkit, liwaka akxni amakgapitsin tlawakgo tuku nitlan (Efes. 5:2).
¿TUKU XLAKATA TAPAXKIT WA TUKU LITALAKGAPASKGO XAXLIKANA KSTALANINANIN CRISTO?
5. ¿Tuku tapaxkit xlichuwinama Jesús anta kJuan 15:12, 13?
5 Jesús liwana masiyalh pi tapaxkit nema xʼamakgo litalakgapaskgo kstalaninanin ni anan tuku xtachuna (kalikgalhtawakga Juan 15:12, 13). Kaʼakxilhwi limapakgsin nema kamaxkilh: «Nalapaxkiyatit minchatunukan chuna la akit kkapaxkinitan». ¿Tuku tapaxkit xlichuwinama Jesús? Xla wa pi uma tapaxkit wa tuku makgpuwantini chatum kstalanina Cristo namakamasta xlatamat xlakata nalakgmaxtu xtala. b
6. ¿La limasiya xTachuwin Dios pi tapaxkit lu xlakaskinka?
6 Xtachuwin Dios masiya pi tapaxkit lu xlakaskinka. Lhuwa tiku wankgo pi umakgolh textos wa nema tlakg lakgatikgo: «Dios tapaxkit» (1 Juan 4:8); «Milipaxkit mintalataman chuna la miʼakstu paxkikana» (Mat. 22:39); «Tiku paxkinan putum kilhtamaku tapatiputun achatum» (1 Ped. 4:8), chu «Tapaxkit nikxni sputa» (1 Cor. 13:8). Umakgolh textos chu lhuwa amakgapitsi limasiya pi lu xlakaskinka nakgalhiyaw chu nalimasiyayaw uma lu xastlan tayat.
7. ¿Tuku xlakata Satanás nila tlawa pi latamanin makxtum natawilakgo chu nalapaxkikgo?
7 Lhuwa latamanin akstu kakgalhskinkan: «¿La nakkatsi tuku xaxlikana takanajla? Putum wankgo pi masiyakgo xaxlikana, pero tanu tanu tuku masiyakgo xlakata Dios». Satanás kamalakatsukinit lhuwa ni xaxlikana takanajla, chu uma tlawa pi latamanin ni nakatsikgo tuku nakanajlakgo. Pero xla nila tlawa pi latamanin xalak tanu tanu kachikinin akgtum familia nalitaxtukgo chu nalalimasiyanikgo tapaxkit. Kajwatiya Jehová tlan tlawa uma. Chu katsiyaw uma xlakata wa Jehová masta tapaxkit. Kajwatiya tiku kgalhikgo xʼespíritu chu xtasikulunalin Jehová tlan lalimasiyani xaxlikana tapaxkit (1 Juan 4:7). Wa xlakata Jesús wa pi tapaxkit wa tuku xʼamakgo litalakgapaskgo xaxlikana kstalaninanin.
8, 9. ¿Tuku kitaxtunit akxni latamanin akxilhkgo tapaxkit nema lalimasiyani xtatayananin Jehová?
8 Chuna la wa Jesús, lhuwa latamanin katsikgonit tiku xaxlikana kstalaninanin Cristo xlakata tapaxkit nema lalimasiyani. Akgtum liʼakxilhtit, chatum tala tiku wanikan Ian lakapastaka xapulana asamblea nema kilalh, nema tlawaka kʼakgtum estadio lakatsu kxchik. Nina lhuwa kilhtamaku xtitaxtunit, xkilanit kwatiya uma estadio xlakata naʼakxilha akgtum takgaman. Xla wan: «Uma tamakxtumit lu tanu xwanit. Xtatayananin Jehová lu tlan kilikatsinikgolh, lu tlan klhakganankgonit chu xkamanankan lu tlan xlikatsikgo». Chu wampara: «Tuku tlakg kaks kimalakawanilh wa pi putum xpaxuwamakgolh chu lu tlan xlatalalin, wa uma tuku xakputsama. Ni klakapastaka nipara akgtum taʼakgchuwin nema mastaka, pero xatlan xtayatkan xtatayananin Jehová nikxni kpatsankgalh». c Xaxlikana tapaxkit wa tuku tlawa nakgalhiyaw tayat nema Ian akxilhli. Xlakata lu kapaxkiyaw kinatalankan, tlan kalikatsiniyaw chu kamaxkiyaw kakni.
9 Chatum tala tiku wanikan John na lu kaks lilakawa akxni xlimakgtumku kilalh ktamakxtumit kPukgalhtawakga. Lu kaks lilakawa pi putum tlan xlikatsikgo chu wa: «Xaxlikana tapaxkit nema lalimasiyani kimakanajlilh pi uma xaxlikana takanajla xwanit». d Anan lhuwa amakgapitsi liʼakxilhtit nema limasiya pi xtatayananin Jehová wa xaxlikana kstalaninanin Cristo.
10. ¿Tuku kilhtamaku nalitasiya pi paxkinanaw? (Na kaʼakxilhti nota).
10 Chuna la lichuwinaw xapulana, putum kinatalankan makglakgalhinanin. Wa xlakata namin kilhtamaku nawankgo o natlawakgo tuku nitlan nakinkamamakgkatsiniyan (Sant. 3:2). e Akxni chuna nala nalitasiya komo xlikana paxkinanaw. ¿Tuku nakinkamakgtayayan ni nasitsiyaw chu nalimasiyayaw tapaxkit? Kaʼakxilhwi tuku tlawalh Jesús (Juan 13:15).
¿LA LIMASIYALH JESÚS PI XKAPAXKI XʼAPÓSTOLES?
Jesús kalimasiyanilh tapaxkit xʼapóstoles maski milh kilhtamaku tlawakgolh tuku nitlan (Kaʼakxilhti párrafos 11 asta 13).
11. ¿Tuku nitlan tayat limasiyakgolh Santiago chu Juan? (Na kaʼakxilhti dibujos).
11 Jesús ni xkgalhkgalhi pi kstalaninanin nialh xkgalhikgolh talakgalhin. Wata kalimasiyanilh tapaxkit chu kamakgtayalh nalakgpalikgo nixatlan tayat nema xkgalhikgo xlakata tlan xmakgapaxuwakgolh Jehová. Akgtum kilhtamaku, apóstoles Santiago chu Juan skinikgolh xtsekan pi xwanilh Jesús pi wi tuku lu xlakaskinka xkalakgayawalh kxTamapakgsin (Mat. 20:20, 21). Umakgolh chatiy apóstoles limasiyakgolh pi laktlankajwa xwankgonit chu xlakaskinka xlitaxtuputunkgo (Prov. 16:18).
12. ¿Tuku xlakata wanaw pi ni kajwatiya Santiago chu Juan limasiyakgolh nixatlan tayat?
12 Pero ni kajwatiya Santiago chu Juan limasiyakgolh nixatlan tayat uma kilhtamaku. Kaʼakxilhwi tuku tlawakgolh amakgapitsin apóstoles: «Akxni amakgapitsi xkgalhkawkan kgaxmatkgolh uma, kasitsinikgolh umakgolh chatiy linatalan» (Mat. 20:24). ¿Tlan lilakpuwanaw la max xlasitsinima? Max makgapitsin apóstoles kawanikgolh Santiago chu Juan: «¿Lakpuwanatit wixin pi tlakg xlakaskinka litaxtuyatit chu wa xlakata skimpatit xlakaskinka taskujut kTamapakgsin? Ni kajwatiya wixin lu lhuwa taskujnitantit Jesús. Akinin na kinkalakgchanan nakinkalakgayawakanan xlakaskinka taskujut chuna la wixin». Uma kilhtamaku apóstoles nialh lalimasiyanilh tapaxkit.
13. ¿La kalikatsinilh Jesús xʼapóstoles maski xmin kilhtamaku xtlawakgo tuku nitlan? (Mateo 20:25-28).
13 ¿La kalikatsinilh Jesús? Xla ni sitsilh. Ni wa pi xʼama kaputsa atanu lakchixkuwin tiku tlakg xtaktujukgolh, tiku putum kilhtamaku xlalimasiyanilh tapaxkit chu tlakg tlan apóstoles xlitaxtukgolh. Wata liwana katachuwinalh xlakata xkatsi pi umakgolh lakchixkuwin tlan xlikatsikgo (kalikgalhtawakga Mateo 20:25-28). Maski apóstoles ni kaj makgtum litaʼakglhuwikgolh tiku tlakg xlakaskinka xwanit, Jesús putum kilhtamaku kalimasiyanilh tapaxkit (Mar. 9:34; Luc. 22:24).
14. ¿La xlikatsikgo latamanin niku stakkgolh xʼapóstoles Jesús?
14 Jesús liwana xkatsi la xlikatsikgo latamanin niku xʼapóstoles stakkgolh (Juan 2:24, 25). Uma kilhtamaku, xpulalinanin takanajla lu xlakaskinka xliʼakxilhkgo nakgalhikgo tumin chu nakgalhikgo limapakgsin (Mat. 23:6; katamalakxtupi video Asientos del frente en la sinagoga, xla nota de estudio xla Mateo 23:6). Judíos tiku xpulalinkgo takanajla xlakpuwankgo pi tlakg xlakaskinka xlitaxtukgo nixawa amakgapitsin latamanin (Luc. 18:9-12). f Jesús xkatsi pi uma tapuwan max na xkamalakpuwanilh apóstoles pi tlakg xlakaskinka xwankgonit nixawa amakgapitsin (Prov. 19:11). Xla xkatsi pi makglakgalhinanin xwankgonit chu ni ksitsi akxni xmin kilhtamaku xtlawakgo tuku nitlan. Xlakata xkatsi pi umakgolh lakchixkuwin tlan xlikatsikgo, kamakgtayalh tsinu tsinu nalakgmakgankgo tatlankit chu nialh lhuwa tuku nakgalhiputunkgo, wata kamasiyanilh nalimasiyakgo tataktujut chu tapaxkit.
¿LA TLAN NASTALANIYAW XLIʼAKXILHTIT JESÚS?
15. ¿Tuku kinkamasiyaniyan tuku tlawakgolh Santiago chu Juan?
15 Tuku tlawakgolh Santiago chu Juan lhuwa tuku kinkamasiyaniyan. Nitlan pi xlakan skinkgolh pi wi tuku lu xlakaskinka xkalakgayawaka kTamapakgsin. Pero na nitlan pi amakgapitsin apóstoles mastakgolh talakaskin pi uma xkamapapitsilh. Pero Jesús tlan kalikatsinilh chu kalimasiyanilh tapaxkit kgalhkutiy xʼapóstoles. ¿Tuku kinkamasiyaniyan? Ni kajwatiya kiliʼakxilhatkan tuku nitlan tlawakgo amakgapitsin, wata na kuenta kilitlawatkan tuku tlawayaw akxni chuna tlawakgo. Wa xlakata, akxni nalisitsiyaw tuku nitlan tlawalh chatum tala, kiʼakstukan kakinkakgalhskinkan: «¿Tuku xlakata lu kimakgasitsilh tuku tlawalh? ¿Akit wi tuku kililakgpalit? ¿Wi tuku tuwa titaxtuma uma tala? ¿Ni tlakg tlan xwa xaklimasiyanilh tapaxkit chu xaktapatilh maski klakpuwan pi xlilat tuku nitlan klimakgkatsima?». Komo putum kilhtamaku nakalimasiyaniyaw tapaxkit amakgapitsin, nalimasiyayaw pi akinin xaxlikana kstalaninanin Cristo.
16. ¿Tuku atanu kinkamasiyaniyan xliʼakxilhtit Jesús?
16 Xliʼakxilhtit Jesús na kinkamasiyaniyan pi kiliskujatkan xlakata nakaʼakgatekgsniyaw kinatalankan (Prov. 20:5). Xlikana pi akinin nila katsiyaw tuku wi kxnakujkan kinatalankan chuna la xtlawa Jesús. Pero tuku tlan natlawayaw wa pi ni nakasitsiniyaw kinatalankan akxni tlawakgo tuku nitlan (Efes. 4:1, 2; 1 Ped. 3:8). Pulaktum tuku nakinkamakgtayayan wa pi tlakg nakalakgapasaw. Kalichuwinaw akgtum liʼakxilhtit.
17. ¿Tuku lalh akxni chatum superintendente de circuito liskujli xlakata tlakg nalakgapasa chatum tala?
17 Chatum superintendente de circuito tiku xmakgtayanama kʼÁfrica oriental lakgapasli chatum tala tiku lu xasitsin xtasiya. ¿Tuku tlawalh uma superintendente? Xla wan: «Ni ktamakgatlinilh, wata ktachuwinalh xlakata tlakg xaklakgapasli». Uma superintendente katsilh pi tuku xtitaxtunit uma tala wa tuku xtlawa pi chuna xlikatsilh. Xla wan: «Akxni kʼakgatekgsli putum tuku xtitaxtunit xlakata xmakgxtakgli nixatlan xtayat chu la kstaktilhanit xtakanajla, lu kaks klilakawa. Lu tlan ktsukuw latalalinaw». Komo naliskujaw xlakata tlakg tlan nakalakgapasaw chu nakaʼakgatekgsniyaw kinatalankan, tlakg ni tuwa katimakgkatsiw nakalimasiyaniyaw tapaxkit.
18. ¿Tuku takgalhskinin tlan akstu nakinkatlawanikanan komo chatum tala nitlan kinkamamakgkatsinin? (Proverbios 26:20).
18 Max min kilhtamaku lakpuwanaw pi talakaskin natachuwinanaw chatum tala tiku nitlan kinkamamakgkatsinin. Pero akxni nina chuna tlawayaw, talakaskin akstu nakinkatlawanikanan umakgolh takgalhskinin: «¿Kkatsi putuminika tuku lalh?» (Prov. 18:13). «¿Xlikana nitlan xkimamakgkatsiniputun?» (Ecl. 7:20). «¿Minit kilhtamaku akit na wi tiku nitlan kmamakgkatsininit?» (Ecl. 7:21, 22). «Komo naktachuwinan uma tala, ¿naklakkaxtlawa uma taʼakglhuwit o tlakg nakmastaka?» (kalikgalhtawakga Proverbios 26:20). Komo nalimaxtuyaw kilhtamaku nalilakpuwanaw umakgolh takgalhskinin, max naʼakxilhaw pi tlakg tlan nalimasiyayaw tapaxkit chu nialh nalakapastakaw tuku nitlan limakgkatsiw.
19. ¿Tuku talakaskin chuntiya naliskujaw?
19 Kimputumkan xtatayananin Jehová, limasiyayaw pi xaxlikana kstalaninanin Cristo litaxtuyaw. ¿Pero la tlan nalimasiyayaw kinchatunukan pi kstalaninanin Cristo litaxtuyaw? Nakalimasiyaniyaw xaxlikana tapaxkit kinatalankan maski min kilhtamaku tlawakgo tuku nitlan. Komo chuna natlawayaw, max amakgapitsin naʼakxilhkgo pi makgtapakgsiyaw kxaxlikana takanajla, chu nakakninaniputunkgo Jehová, Dios tiku lu paxkinan. Wa xlakata lu kaliskujwi chuntiya nalimasiyayaw tapaxkit nema litalakgapaskgo xaxlikana kstalaninanin Cristo.
TAKILHTLIN 17 «Klakaskin»
a Lhuwa latamanin katsiniputunkgo xaxlikana akxni akxilhkgo tapaxkit nema lalimasiyaniyaw chatunu akinin. Pero xlakata makglakgalhinanin akinin, max min kilhtamaku tuwa makgkatsiyaw nalimasiyayaw tapaxkit. Kʼuma artículo, nalichuwinanaw tuku xlakata tapaxkit lu xlakaskinka chu la tlan nastalaniyaw xliʼakxilhtit Jesús akxni amakgapitsin tlawakgo tuku nitlan.
b Kaʼakxilhti libro “Ven, sé mi seguidor”, capítulo 17, párrafos 10 chu 11.
c Kaʼakxilhti artículo “Al fin mi vida tiene sentido”, krevista La Atalaya 1 xla noviembre kata 2012, páginas 13 chu 14.
d Kaʼakxilhti artículo “Mi vida parecía ideal”, krevista La Atalaya 1 xla mayo kata 2012, páginas 18 chu 19.
e Uma artículo ni wa kilhchanima laklanka talakgalhin chuna la tuku lichuwinan 1 Corintios 6:9, 10. Akxni wi tiku tlawa umakgolh talakgalhin wa lakgkgolotsin kalakgchan nalakkaxtlawakgo.
f Wankan pi lhuwa kilhtamaku alistalh chatum judío tiku xpulalin takanajla, wa: «Kkakilhtamaku anan max tipuxamakaw lakchixkuwin tiku lu xaʼakgstitum litaxtukgo chuna la Abrahán. Komo anan puxamakaw, kinkgawasa chu akit anta kmakgtanumaw; komo anan kgalhakaw, kinkgawasa chu akit anta kmakgtanumaw; komo anan kgalhakitsis, kinkgawasa chu akit anta kmakgtanumaw; komo anan chatiy, kinkgawasa chu akit wa tiku chuna klikatsiyaw; komo kaj chatum anan, akit tiku chuna klikatsi».
