KALILAKPUWANTI pi tlawampat ktiji katsisni. Maski titaxtunita kilhtamaku la tsankganit Chichini, ni lilakgaputsaya xlakata lipina akgtum lámpara nema tliwakga makgskgo. Akxni limakgskgoya katutsu aktanks akxilha tuku wi kmilakatin. Chu akxni limakgskgoya kmilakatin, lakgamakgat akxilha tiji xlakata tliwakga makgskgo.

Tlan nawanaw pi Biblia la akgtum lámpara. Chuna la akxilhwi kʼamakgapitsi artículos, xTachuwin Dios kinkamakgtayayan natayaniyaw taʼakglhuwit nema kinkalakgchinan chali chali kʼuma kakilhtamaku nema talakgpalitilha. Pero tlakg lhuwa tuku tlawa. Na maxkgakge kilhtamaku nema aku mima, xlakata kinkamakgtayayan naʼakxilhaw chu nastalaniyaw tiji nema linan ktapaxuwan nema ni katisputli (Salmo 119:105). ¿La tlawa?

Kaʼakxilhwi pulaktiy la kinkamakgtayayan Biblia tlakg tlan nalatamayaw kilhtamaku nema aku mima: 1 Tlawa pi nalipaxuwayaw kilatamatkan chu 2 kinkamasiyaniyan la tlan natalalinaw kiMalakatsukinakan putum kilhtamaku.

Biblia kinkamaxkiyan lakwan tastakyaw xlakata natayaniyaw taʼakglhuwit, pero tlakg tlan nixawa maktum libro nema kaj makgtayanan. Kinkamasiyaniyan ni kaj kintaʼakglhuwitkan nalilakgaputsayaw, wata na nakalilakgaputsayaw amakgapitsin. Komo chuna natlawayaw, nalipaxuwayaw kilatamatkan.

Akgtum liʼakxilhtit, kalilakpuwanti uma xtastakyaw Biblia: «Xaliwaka tlan [nalipaxuwaya, TNM] tu natakinana, nixawa tu namakgamakglhtinana» (Hechos 20:35). ¿Minit kilhtamaku makgtayanita tiku xmaklakaskima tumin? ¿Kaks kgaxpatni chatum miʼamigo tiku xlakaskin xkgaxmatnika? ¿Ni xlikana  pi lipaxuwa akxni tlan mamakgkatsini atanu lataman?

Tlakg paxuwayaw akxni maskiwinanaw chu ni kgalhkgalhiyaw pi nakinkaxokgonikanan. Chatum tsokgna wa: «Akxni wi tuku maskiwinanaw tlakg lhuwa tuku makgamakglhtinanaw, komo akxni mastaw ni xkgalhkgalhimaw nakinkaxokgonikanan». Pero akxni wi tuku tlawayaw xpalakata amakgapitsin, liwaka xpalakata tiku nila kinkaxokgonikgoyan, wi tukumakglhtinanaw. Kgalhiyaw talakgalhaman pi akxtum taskujmaw kiMalakatsukinakan, xla makgkatsi pi kinkalakliniyan xlakata tuku tlawayaw xpalakata amakgapitsin (Proverbios 19:17). Dios lu xtapalh akxilha tuku tlawayaw xpalakata amakgapitsin chu kinkawaniyan pi nakinkalixokgoniyan tuku lu stlan, latamat nema nikxni katisputli k’akgtum paraíso unu kKatiyatni. ¡Lu tlan takgalhkgalhin! (Salmo 37:29; Lucas 14:12-14). *

Pero Biblia kinkamasiyaniyan pi xlakata tlan nalipaxuwayaw kilatamatkan talakaskin nakakninaniyaw xaxlikana Dios, Jehová. Wa xTachuwin kinkamakgpuwantiniyan namalankiyaw, namaxkiyaw kakni chu nakgalhakgaxmataw (Eclesiastés 12:13; Apocalipsis 4:11). Akxni chuna tlawayaw, wi tuku lu xlakaskinka makgantaxtiyaw: makgapaxuwayaw Malakatsukina. Xla kinkaskiniyan: «Xaskgalala kawanti, kinkgawasa, chu kamakgapaxuwa kinaku, xlakata tlan naktalakgalhti tiku lixkajni kiwanima» (Proverbios 27:11). ¿Xlilakpuwanita uma? Akxni stalaniyaw xtastakyaw Biblia chu laksakaw tuku tlan, makgapaxuwayaw xapaxkina kinTlatkan xalak akgapun. ¿Tuku xlakata? Xlakata xla kinkalilakgaputsayan chu lakaskin pi kastalaniw xtastakyaw xlakata tlan nakinkakitaxtuniyan (Isaías 48:17, 18). Naskujniyaw xmalana putum tuku anan chu namakgapaxuwayaw xnaku, wa tuku tlakg makgapaxuwa kilatamatkan.

Biblia na kinkamasiyaniyan la natalalinaw kiMalakatsukinakan. Akgtum liʼakxilhtit, wan: «Wa Dios nti nkatalakatsuwinitit, na nakatalakatsuwiniyan xla» (Santiago 4:8). Max tuwa nakanajlayaw pi tlan natalalinaw Malakatsukina tiku kgalhi putum litliwakga. Pero Biblia kinkawaniyan pi komo naputsayaw Dios, natekgsaw, xlakata «ni makgat kinkawilanin nchatunu nkin» (Hechos 17:27). Komo nastalaniyaw xtastakyaw Biblia pi tlan natalalinaw Dios, nakinkamakgtayayan nakatsiyaw tuku natlawayaw kilhtamaku nema aku mima. ¿Tuku xlakata?

Kalilakpuwanti uma: maski lu naliskujaw, nila tsalaniyaw linin, tiku tlakg xatliwakga kintalamakgasitsinkan (1 Corintios 15:26). Pero Dios, putum kilhtamaku wi. Xla nikxni katinilh chu lakaskin pi xʼamigos na putum kilhtamaku kalatamakgolh. Jehová limaklakaskin uma lakstlan tachuwin xlakata nakawani tiku putsakgo: «Putum kilhtamaku kalipaxuwatit milatamatkan» (Salmo 22:26).

Pero ¿la tlan natalalipina Dios putum kilhtamaku? Chuntiya kakatsini xlakata Dios kxTachuwin (Juan 17:3; 2 Timoteo 3:16). Kaskini tamakgtay xlakata naʼakgatekgsa. Biblia kinkawaniyan pi komo xliputum kinakujkan naskiniyaw Dios liskgalala, xla nakinkamaxkiyan * (Santiago 1:5). Chu xaʼawatiya, kaliskujti namakgantaxtiya tuku nakatsiniya; komo chuna natlawa, xTachuwin Dios nalitaxtu la «lámpara» nema namakgskgo mintatukit la uku chu akgtum makgskgot nema «maxkgakge» mintiji putum kilhtamaku (Salmo 119:105).