Dios makgtakgalhputunan
ANTA kBiblia tekgsaw lu xatlan tastakyaw xlakata wa Dios kinkamaxkinitan. Xlikana pi Biblia ni maktum libro nema lichuwinan likuchun, pero kinkamaxkiyan lu tlan tastakyaw xlakata tlan natayaniyaw nixatlan talakapastakni, tuku nitlan kinkamamakgkatsiniyan, tuku tuwa titaxtuyaw nema tlawa pi nalakgaputsayaw chu akxni tatatlayaw.
Nachuna, wi tuku lu xlakaskinka kinkamasiyaniyan Biblia: pi kiMalakatsukinakan, Jehová a Dios, liwana akgatekgsa tuku lakpuwanaw chu tuku makgkatsiyaw. Xla kinkamakgtakgalhputunan chu akxtum kinkatatawilaputunan akxni titaxtuyaw tuku tuwa. Akgtum liʼakxilhtit, kalilakpuwanti umakgolh akgtiy textos xalak Biblia. Lu namatliwakglhan.
«Jehová lakatsu katawi tiku lu lipuwamakgolh; chu kalakgmaxtu tiku makgkatsikgo pi katlajama xtaʼakglhuwitkan» (SALMO 34:18).
«Akit, Jehová miDios, kchipanit mimpakgastakat; akit tiku waniyan: “Ni kapekuanti. Akit nakmakgtayayan”» (ISAÍAS 41:13).
Pero ¿tuku tlawa Jehová xlakata nakinkamakgtayayan natayaniyaw tajatat xla talipuwan chu xla talakgaputsit? Kʼatanu artículos naʼakxilha pi Jehová xlikana kinkamakgtakgalhputunan, chu wa xlakata lhuwa tuku kinkalimakgtayayan.
a Jehová wa xtukuwani Dios (Salmo 83:18).
