Maski Biblia ni maktum libro nema lichuwinan likuchun, kamaxki laktlan tastakyaw tiku kgalhikgo tajatat xla talipuwan o xla talakgaputsit. Kalichuwinaw makgapitsi liʼakxilhtit.

«Latamanin tiku ni tatatlakgo ni maklakaskinkgo makuchina, pero tiku tatatlakgo maklakaskinkgo makuchina» (MATEO 9:12).

Biblia kinkawaniyan pi min kilhtamaku talakaskin naputsayaw xtamakgtaykan makuchinanin. Lhuwa latamanin tiku kgalhikgo tajatat xla talipuwan tlakg tlan makgkatsikgonit xlakata makuchinanin kawanikgonit tuku tlan natlawakgo.

«Ejercicio […] makgtayanan» (1 TIMOTEO 4:8, nota).

Komo nalimaxtuyaw kilhtamaku xlakata natlawayaw tuku namakgtaya kimaknikan, tlakg tlan namakgkatsiyaw. Makgapitsi tuku tlan natlawayaw wa ejercicio, liwana nawayanaw chu akchan nalhtatayaw.

«Akgtum naku nema paxuwa mapaksanan, pero talipuwan makgaxlajwanan» (PROVERBIOS 17:22).

Komo nakalikgalhtawakgayaw textos xalak Biblia nema nakinkamakgpuwantiniyan chu nalakkaxwiliyaw natlawayaw tuku matlaniyaw, nakinkamakgtayayan tlakg napaxuwayaw. Komo ni kajwatiya nalilakpuwanaw tuku nitlan kinkakitaxtuniyan, wata  nalakpuwanaw pi tlan nakitaxtu tuku tlawamaw, max tlakg tlan namakgkatsiyaw maski kgalhiyaw akgtum tajatat xla talipuwan o xla talakgaputsit.

«Kgalhi liskgalala tiku ni lakpuwan pi putum tlan tlawa» (PROVERBIOS 11:2).

Max natalakaskin pi amakgapitsin namakgtayakgoyan xlakata wi tuku natlawaya, wa xlakata kamasta talakaskin namakgtayakana. Miʼamigos chu mifamilia max makgtayaputunkgoyan, pero ni katsikgo la chuna natlawakgo. Liwana kakawani tuku maklakaskimpat, pero ni kalakpuwanti pi natlawakgo putum tuku wix militlawat chu ankgalhin kakapaxtikatsini xlakata putum tuku tlawakgo mimpalakata.

«Nitlan xakmakgkatsi, wa xlakata kalh akxilha makuchina. Makuchina kiwanilh tuku xkiʼakgspulama chu uma kimakgtayalh nakkatsi pi xaktatatla. Na kiwanilh tukuya likuchun tlan xakmaklakaskilh xlakata kintajatat» (Nicole, a tiku kgalhi akgtum tajatat nema wanikan trastorno bipolar).

«Chali chali akxtum ktalikgalhtawakga Biblia kimpuskat chu uma lu kimakgtaya. Chuna kkgalhi tlan talakapastakni nema tlan kimamakgkatsini. Kakxilhnit pi akxni lu nitlan kmakgkatsi ankgalhin ktekgsa akgtum versículo xalak Biblia nema lakgchan kinaku» (Peter, tiku kgalhi tajatat xla talipuwan).

«Xapulana lu tuwa xakmakgkatsi nakkalitachuwinan amakgapitsin tuku nitlan xkiʼakgspulama. Pero chatum kiʼamiga lu tlan kimamakgkatsinilh chu kiʼakgatekgsnilh. Chu uma kimakgtayalh tlakg tlan nakmakgkatsi chu nakakxilha pi ni kiʼakstu xakwi» (Ji-yoo, tiku kgalhi akgtum tajatat nema wanikan trastorno alimentario).

«Biblia kimakgtayanit ni kajwatiya xlakaskinka nakakxilha taskujut, nachuna naklimaxtu kilhtamaku nakjaxa. Xtastakyaw Biblia lu kimakgtayanit ni nakimakgatlaja tuku nitlan kmakgkatsi» (Timothy, tiku kgalhi akgtum tajatat nema wanikan trastorno obsesivo compulsivo).