1. Tamakgaxtokgat

Ni putum latamanin lakxtum tuku lakpuwankgo xlakata tamakgaxtokgat, chu tanu tanu tuku lakpuwankgo pi talakaskin xlakata tiku makgaxtokgkgo tlan napaxuwakgo.

TUKU KILHCHANIMA: Wa Dios tiku malakatsukilh tamakgaxtokgat. Wa xlakata liwana katsi tuku maklakaskinkgo tiku makgaxtokgkgo xlakata tlan napaxuwakgo (Marcos 10:​6-9). Xachixku chu xapuskat tlan napaxuwakgo komo wa tlakg nalilakgaputsakgo tuku tlan natlawakgo xpalakata tiku tamakgaxtokgkgo chu ni wa nalilakgaputsakgo tuku tlan xtlawalh xpuskat o xchixku xpalakata. Chixku limasiyani xpuskat pi paxki akxni tlan likatsini chu kuentajtlawa. Chu puskat limasiyani kakni xchixku akxni tataya tuku tlawa chu maklakaskin laktlan tachuwin akxni tachuwinan.

BIBLIA MAKGTAYANAN: Juan chu Tina a, akgtum tamakgaxtokgat xalak Vietnam, lu nitlan xmakgkatsikgo xlakata ni xpaxuwakgo kxtamakgaxtokgatkan. Juan lu nitlan xlikatsini xpuskat. Xla wan: «Ni xaklilakgaputsa tuku xmakgkatsi Tina chu lixkajni xaklikatsini». Tina xmakgxtakgputun xchixku. Xla wan: «Xakmakgkatsi pi nialhla xaklipawan chu nialhla xakmaxki kakni».

Titaxtulh kilhtamaku, Juan chu Tina tsukukgolh likgalhtawakgakgo Biblia chu tsukukgolh makgantaxtikgo tuku wan Efesios 5:33. ¿La kakitaxtunilh? Juan wan: «Tuku wan Biblia kimakgtayalh nakakxilha pi xtalakaskin tlan xaklikatsinilh Tina chu xaklimasiyanilh pi kpaxki. Na kʼakgatekgsli pi xtalakaskin xakkuentajtlawalh, uma kilhchanima pi xakmaxkilh putum tuku xmaklakaskin chu kuenta xaktlawalh tuku xmakgkatsi. Kmakgkatsi pi akxni ktlawa putum uma, xla tlakg kimpaxki chu tlakg kimaxki kakni». Tina wan: «Lu kliskuja xlakata tlakg nakmaxki kakni kinchixku, chuna la wan Efesios 5:33. Chu xla kilimasiyani pi kimpaxki chu kimakgtakgalha».

 2. Chuna la katalalinaw amakgapitsin

Lhuwa latamanin nitlan kalikatsinikgo amakgapitsin kaj xlakata tanu xcolorkan, xkachikinkan, xtakanajlakan, tanu tasiyakgo, o kaj xlakata lakgatikgo xtachixkukan o xtapuskatkan.

TUKU KILHCHANIMA: Biblia ni wan pi nakalakgmakganaw tiku tanu xcolorkan. Na ni wan pi nakaxkajniyaw o nakapekuaniyaw tiku xalak atanu kachikinin o tiku lakgati xtachixku o xtapuskat. Wata kinkamasiyaniyan pi nakamaxkiyaw kakni putum latamanin maski tanu xcolorkan, xkachikinkan, maski kgalhikgo tumin o ni kgalhikgo (Hechos 10:34). Asta maski tanu xtakanajlakan o asta maski ni lakgatiyaw xtayatkan, talakaskin tlan nakalikatsiniyaw chu nakamaxkiyaw kakni (Mateo 7:12).

BIBLIA MAKGTAYANAN: Daniel masiyanika pi latamanin xalak Asia lu lixkajni xlikatsikgo chu xtalatlawananin xpaís xlitaxtukgo. Wa xlakata nipara tsinu xkaʼakxilhputun tiku xalak Asia, chu asta lixkajni xkawani akxni wi niku xkatatanokglha. Daniel wan: «Xaklakpuwan pi tlan tuku xaktlawama xlakata kaj xaklitalatlawanama kimpaís. Nipara tsinu xaklilakpuwan pi tuku xaktlawa nitlan xwanit».

Titaxtulh kilhtamaku, Daniel tsukulh katsini tuku masiya Biblia. Xla wan: «Talakaskilh xaklakgpalilh putuminika kintapuwan. Kxlakatin Dios, putum latamanin lakxtum litaxtukgo maski tanu tanu xkachikinkan. Chu talakaskilh pi akit nachuna xakkaliʼakxilhli». Chu la uku, ¿tuku lakpuwan Daniel akxni lakgapasa tiku xalak atanu kachikin? Xla wan: «¡Nialh wa kuenta ktlawa niku minacha! Kkapaxki putum latamanin chu kkakgalhi amigos xalak tanu tanu kachikinin».

 3. Tumin

Lhuwa latamanin liskujtamakgankgo xlakata nakgalhikgo tumin, xlakata lakpuwankgo pi uma nakalimini tapaxuwan.

TUKU KILHCHANIMA: Xlikana pi tumin litamakgtayakan, pero uma ni wamputun pi nakinkaliminiyan tapaxuwan chu pi ankgalhin tlan nakinkakitaxtuniyan (Proverbios 18:11; 23:​4, 5). Komo xlikana paxuwaputunaw chu lakaskinaw pi tlan kakinkakitaxtunin, talakaskin nalilatamayaw xtastakyaw Dios nema min kBiblia (1 Timoteo 6:​17-19).

BIBLIA MAKGTAYANAN: Chatum chixku xalak Indonesia tiku wanikan Cardo lu liskujli xlakata namaʼakgstokgwili tumin. Xla wan: «Tlan xakkan paxialhnan niku xakkamputun chu xaktamawa tuku lu tapalaxla, putlaw, chiki… Xakkgalhi putum tuku latamanin kgalhiputunkgo». Pero uma kaj lakapala lakgsputli. Cardo wan: «Kiʼakgskgawimakglhtika tuku xakkgalhi, chu putum tumin nema akglhuwa kata lu kliskujli nakmaʼakgstokgwili kaj lakapala kmakgatsankgalh. Putuminika kilatamat xakliskujnit xlakata nakkgalhi lhuwa tumin, pero kaj lakapala kalakgwan ktamakgxtakgli; lu xaklipuwama chu xakmakgkatsi pi nitu xaklitaxtu».

Cardo tsukulh stalani xtastakyaw Biblia xlakata tumin chu la uku nialh wa lilakgaputsa namaʼakgstokgwili tumin, wata lipaxuwa tuku kgalhi maski ni lhuwa. Xla wan: «Kkatsilh pi tuku tlakg lhuwa xtapalh wa tuku xla kintakanajla. La uku nialh klilakgaputsa nakkgalhi lhuwa tumin, chu xlikana kpaxuwa».

 4. Talakgxtumit

Latamanin tanu tanu tuku lakpuwankgo xlakata talakgxtumit.

TUKU KILHCHANIMA: Biblia wan pi ni kilitlawatkan «talakgxtumit nema ni xlitatlawat». Tachuwin «talakgxtumit nema ni xlitatlawat» kilhchanima tiku akgskgawi tiku tamakgaxtokga, tiku sta xmakni, tiku talakgxtumikgo chu ni makgaxtokgkgo, tiku tatalakgxtumi xtachixku o xtapuskat chu tiku katatalakgxtumi animales (1 Corintios 6:​9, 10). Talakgxtumit akgtum xtamaskiwin Dios chu kajwatiya tlan natalakgxtumikgo chatum chixku chu chatum puskat tiku makgaxtokgkgo (Proverbios 5:​18, 19).

BIBLIA MAKGTAYANAN: Kylie, tiku lama kʼAustralia, wan: «Akxni nina xakmakgaxtokga, xaklakpuwan pi komo wi tiku xaktatalakgxtumilh tlan xakkama makgkatsi chu xakkama paxuwa. Pero nichuna lalh. Wata lu nitlan xakmakgkatsi chu lu xaklipuwan».

Titaxtulh kilhtamaku, Kylie tsukulh likgalhtawakga Biblia chu tsukulh lilatama tuku wan anta xlakata talakgxtumit. Xla wan: «Kkatsi pi xlimapakgsin Dios kinkamakgtayayan ni lu napatinanaw chu ni natitaxtuyaw lhuwa takatsanajwat. Xlakata ktlawama tuku Jehová wan, la uku kpaxuwa chu tlan kmakgkatsi. Tuku wan Biblia kimakgtayanit nialh naktlawa tuku nakilimini lhuwa talipuwan».