Tuku makgapitsin lipawankgo
Lhuwa latamanin liwana katsikgo pi wi tuku nitlan chu wi tuku tlan. Akgtum liʼakxilhtit, latamanin katsikgo pi nitlan akxni wi tiku likgamanankan, makgninankan chu kalikgamanankan laktsu kamanan. Pero katsikgo pi tlan akxni wi tiku tlan likatsi, limasiya pi kaʼakgatekgsni amakgapitsin chu tlawa tuku xaʼakgstitum. Pero ¿tuku lakpuwankgo xlakata atanu tuku laksakkan tlawakan, chuna la tiku natatalakgxtumikan, o la nakamakgastakkan kamanan? Lhuwa tiku lakpuwankgo pi chatunu xlilaksakat tuku lakpuwan pi tlan, chu pi kaxatukawa tuku nalaksakkan putum tlan. Wa xlakata lhuwa latamanin akxni wi tuku laksakkgo, tlawakgo tuku xlakan lakpuwankgo pi tlan o tuku amakgapitsin kawanikgo pi tlan. Pero ¿ankgalhin tlan kitaxtu uma?
TUKU CHATUNU LAKPUWAN PI TLAN
Akxni wi tuku laksakaw, mastayaw talakaskin pi kintalakapastaknikan kakinkapulalin: pi wa kakinkawanin tuku tlan chu tuku nitlan (Romanos 2:14, 15). Asta laktsu kamanan akxilhkgo akxni wi tuku nitlan chu makgkatsikgo pi linkgo kuenta akxni tlawakgo tuku nitlan. Chuna la staktilhayaw, kintalakapastaknikan listaktaya tuku katsiniyaw kfamilia, kʼescuela, kkinkachikinkan, kkintakanajlakan chu talismanin nema kinkalimakgastakkanan. Wa xlakata, akxni wi tuku laksakaw, kintalakapastaknikan kinkawaniyan komo tlan tuku laksakwi chu ni lakatsalama tuku listakyawanitaw.
Kintalakapastaknikan na tlan nakinkamakgpuwantiniyan namakgkatsiyaw tuku makgkatsimakgo amakgapitsin, napaxtikatsininanaw, xaʼakgstitum nalikatsiyaw chu nalakgalhamananaw. Na nakinkamakgtayayan ni natlawayaw tuku nitlan nakamamakgkatsini tiku kapaxkiyaw o ni natlawayaw tuku nakinkamamaxaniyan chu nitlan nakinkamamakgkatsiniyan.
¿Ankgalhin tlan kitaxtu akxni tlawayaw tuku lakpuwanaw pi tlan? Chatum chixku tiku wanikan Garrick, wan pi akxni kgawasaku xwanit tlawalh tuku xlakpuwan pi tlan. Pero chuna la titaxtulh kilhtamaku, akxilhli pi tuku xla xlakpuwan pi tlan nichuna xwanit. Tuku laksakli matlawilh talakgxtumit nema ni xlitatlawat, smanipasalh drogas, kuchu chu lu xaluku xwanit.
TUKU AMAKGAPITSIN LAKPUWANKGO PI TLAN
Atanu tuku kinkapulalinan akxni wi tuku laksakaw, wa tuku lakpuwankgo amakgapitsin pi tlan. Uma min kilhtamaku tlan kitaxtu xlakata listaktayayaw tuku amakgapitsin titaxtukgonit chu litamakgtayayaw xliskgalalakan. Akxni tlawayaw tuku kifamiliajkan, kiʼamigoskan chu tuku latamanin xalak kinkachikinkan lakpuwankgo pi tlan, tlawa pi nakinkamaxkikgoyan kakni.
¿Ankgalhin tlan kitaxtu lipawankan tuku amakgapitsin lakpuwankgo pi tlan? Akxni tsumatku xwanit, Priscila xtlawa tuku xʼamigos xtlawakgo. Xlakan xlakpuwankgo pi ni talakgalhin natatalakgxtumikan tiku ni tamakgaxtokgkan. Pero akxilhli pi akxni xtlawa tuku amakgapitsin xlakpuwankgo pi tlan, ni xmakgapaxuwa. Xla wan: «Akxni xaktlawa tuku amakgapitsin xtlawakgo, nitlan xaklimakgkatsi. Lhuwa tuku nitlan klaksakli chu kalipekua kwililh kilatamat».
¿ANAN TUKU TLAKG TLAN NAKINKAPULALINAN?
Akxni kililaksakatkan tuku tlan, tuku lakpuwankgo amakgapitsin chu tuku lakpuwanaw akinin xlakaskinka. Pero komo kajwatiya uma kuenta natlawayaw, ni ankgalhin tlan kintikakitaxtunin. Min kilhtamaku, akxni wi tuku laksakaw ni pulana lilakpuwanaw tuku nitlan kintikakitaxtunin o tuku nitlan katikakitaxtunilh amakgapitsin (Proverbios 14:12). Nachuna, maski lakpuwanaw pi tuku kinkalimakgastakkanitan o tuku kalimakgastakkanit amakgapitsin xatlan, min kilhtamaku uma ni wa tuku tlakg xatlan. ¡Chu ni katsiyaw komo umakgolh tapuwan o tayat ni natalakgpali chuna la natitaxtu kilhtamaku! Kalilakpuwaw pi lhuwa tuku makgasa nitlan xʼakxilhkan, la uku latamanin makgamakglhtinankgo. Chu lhuwa tuku makgasa xlakpuwankan pi tlan, la uku latamanin ni makgamakglhtinankgo.
¿Ankgalhin tlan kitaxtu lipawankan tuku amakgapitsin lakpuwankgo pi tlan?
¿Anan tuku tlakg tlan nakinkapulalinan xlakata nakatsiyaw tuku tlan chu tuku nitlan? ¿Wi tuku nakinkamakgtayayan nalaksakaw tuku ankgalhin tlan nakinkakitaxtuniyan?
¡Chuna! Anan tuku nakinkapulalinan nema tlan nalipawanaw chu tlan nakinkakitaxtuniyan kaxanikawa niku lamaw. Atanu artículo nakinkamakgtayayan nakatsiyaw tuku tlan nakinkapulalinan xlakata ankgalhin natlawayaw tuku tlan.