AKGATUNU kata, liwaka akgchaxan millón latamanin lu makgat ankgo kʼakgtum bosque niku yakgo puksnankiwi kxpenínsula Shima, Japón. Ankgo niku xasanto liʼakxilhkan nema wi kʼIse, anta kakninanikanit max akgtiya mil kata xdiosakan sintoístas, diosa xla Chichini, Amaterasu Omikami. Akxni chankgo, tiku kakninanikgo pulana makgachakgankgo chu kgalhchakgankgo xlakata ni xataxkajwani nawankgo. Alistalh, tayakgo kxlakatin haiden (cuarto niku mastakan kakni), chu tlawakgo akgtum talismanin: takilhputakgo, makgapakgxnankgo, chu tlawanikgo oración diosa. * Sintoísmo kamaxki talakaskin tiku makgtapakgsikgo nakgalhikgo atanu takanajla, chu makgapitsi budistas, chu tiku kaj wankgo pi kstalaninanin Cristo chu xalak atanu takanajla tiku lakpuwankgo pi nitu wamputun na natlawakgo tuku tlawakgo sintoístas.

Atsinu ni putum takanajla kxlikalanka katiyatni kgalhikgo niku xasanto liʼakxilhkgo, chu lhuwa millón tiku ankgo kalakgapaxialhnankgo. * Kkachikinin niku wankgo pi kstalaninanin Cristo, anankgo lhuwa sikulan chu niku xasanto nema tlawanikanit Jesús, María chu tiku santos kaliʼakxilhkgo. Atanu katlawakanit niku lalh tuku Biblia lichuwinan o niku nina makgas wankanit pi lalh «milagros» o niku kamakikan tuku xlakaskinka liʼakxilhkan ktakanajla. Lhuwa ankgo anta xlakata lakpuwankgo pi anta max nakgaxmatkan xʼoracioneskan. Amakgapitsin, akxni chankgo niku xasanto liʼakxilhkgo anta masputukgo peregrinación xlakata nalimasiyakgo pi kakninanikgo Dios.

¿Talakaskin natlawayaw niku xasanto liʼakxilhkan xlakata nakakgaxmatkan oraciones chu nakakgalhtikan? ¿Makgamakglhtinan Dios xtakakninkan tiku ankgo niku xasanto liʼakxilhkan? Tuku tlakg xlakaskinka, ¿xlikakninanitkan Dios niku xasanto liʼakxilhkan, kstalaninanin Cristo? Xtakgalhtin umakgolh takgalhskinin ni kajwatiya nakinkamasiyaniyan la kiliʼakxilhatkan nakakninanaw niku xasanto liʼakxilhkan, na nakinkamakgtayayan naʼakgatekgsaw la lakgati Dios nakakninaniyaw.

Tuku lichuwinankgolh Jesús chu chatum puskat limasiya la akxilha Dios nakakninanikan niku «xasanto» liʼakxilhkan. Jesús xtitaxtuma kSamaria chu  tachokgolh xlakata najaxa kʼakgtum pozo, lakatsu kkachikin Sicar chu tsukulh tachuwinan puskat tiku alh xkgata. Puskat wa: «Xalakgmakgan kinatlatnakan [...] xminkgoy lakgatakilhputakgoy Dios anta unu kkgastin, wampi wixin judíos wanatit pi xman wa mininiy pi anta kJerusalén nalakgatakilhputayaw Dios» (Juan 4:5-9, 20).

Sipi, nema xlichuwinama puskat wa sipi Guerizim, nema wi 50 kilómetros xlimakgat kxnorte Jerusalén. Anta samaritanos xkgalhikgo templo niku xtlawakgo fiestas, akgtum wa Paskua xwanit. Pero Jesús ni lu kuenta tlawalh tuku xlitaʼakglhuwikgo, wata wanilh: «Puskat, kakinkanajlani, mpi namin nkilhtamaku akxni ni mpala anta yanu nkgastin, chu na ni mpala anta kJerusalén nalakgatakilhputayatit xaTlat» (Juan 4:21). ¡Lu kaks malakawaninan tuku wanilh, xlakata judío tiku chuna xwanima! ¿Tuku xlakata nialh xʼamaka kakninanikan Dios kJerusalén?

Jesús wampa: «Pero namin kilhtamaku, akxni xaxlikana kakninanin nalikakninanikgo xaTlat espíritu chu xaxlikana, xlakata xaTlat kaputsama tiku chuna likatsikgo xlakata nakakninanikgo» (Juan 4:23, TNM). Akglhuwa siglos, judíos lu xlakaskinka akxilhkgolh templo xalak Jerusalén niku xkakninanikan Dios. Xlakan xʼankgo makgtutu akgatunu kata xlakata xtlawanikgolh tamakamastan Dios, Jehová (Éxodo 23:14-17). Pero Jesús wa pi putum uma xʼama talakgpali chu pi «tiku xlikana kakninankgo» xʼamakgo likakninankgo «espíritu chu xaxlikana».

Xtemplojkan judíos tlan xʼakxilhkan chu liwana xtakatsi niku xwi. Pero espíritu chu xaxlikana nila kaʼakxilhkan chu nila xamakan chu ni kaj lakatum niku wilakgolh. Wa xlakata, Jesús lichuwinalh pi xaxlikana kstalaninanin Cristo ni lakatum niku xʼamakgolh kakninankgo o niku lakatum niku tlan xtasiyalh, nipara ksipi Guerizim, ktemplo Jerusalén chu nipara alakatanu niku xasanto liʼakxilhkgo.

Akxni tachuwinalh samaritana, Jesús na wa pi «namin kilhtamaku» xʼama talakgpali la kakninanikan Dios. ¿Tukuya kilhtamaku chuna xʼama la? Akxni Jesús makamastalh xlatamat, masputulh tuku judíos xmaklakaskinkgo xlakata xkakninankgolh nema xtakilhti kxlimapakgsin Moisés (Romanos 10:4). Pero ¿tuku xlakata Jesús na wa «hora, [...] tsukunita». Xlakata Mesías xkamamakxtumimaja kstalaninanin tiku xʼamakgolh kgalhakgaxmatkgo uma limapakgsin: «Dios chatum Espíritu, chu tiku kakninanikgo talakaskin nalikakninanikgo espíritu chu xaxlikana» (Juan 4:24, TNM). ¿Tuku kilhchanima nalikakninanikgo espíritu chu xaxlikana?

Akxni Jesús wa pi xʼamaka likakninankan espíritu, ni wamputun pi lu xatapaxuwan o lu pixlanka xlimasiyakgolh pi kakninanikgo Dios. Wata xlichuwinama pi xkapulalilh xʼespíritu santo Dios, nema na kinkapulalinan xlakata naʼakgatekgsniyaw Biblia (1 Corintios 2:9-12). Chu tuku xlichuwinama Jesús, wa tuku  masiya Biblia. Wa xlakata, niku kakninaniyaw Dios ni wa tuku tlakg xlakaskinka, kintakakninkan namakgamakglhtinan Dios komo natlawayaw la masiya Biblia chu namastayaw talakaskin nakinkapulalinan espíritu santo.

Wa xlakata, ¿la xliʼakxilhatkan kstalaninanin Cristo peregrinación chu kakninankan niku xasanto liʼakxilhkan? Komo naʼakxilhaw tuku Jesús kalimapakgsilh kstalaninanin xlakata xlikakninankgolh espíritu chu xaxlikana, liwana tasiya pi takaknin nema tamasta niku xasanto liʼakxilhkan, ni makgamakglhtinan kintlatkan xalak akgapun. Nachuna, Biblia wan la akxilha Dios akxni maklakaskinkan ídolos ktakaknin. Anta wan: «Katamakgatlinitit ntalakgatakilhputan wa ntu mpi ni [...] wa Dios» chu «ni nalakgatakilhputayatit wa ntu xtachuna xpuxokgo Dios xʼanalh» (1 Corintios 10:14; 1 Juan 5:21). Wa xlakata, kstalanina Cristo ni kakninani Dios niku xasanto liʼakxilhkan o tuku tlawa pi nakakninanikan ídolos. Xlakata katsikgo pi chuna tlawakan niku xasanto liʼakxilhkan, kstalaninanin Cristo ni kakninankgo Dios anta.

Pero, uma ni wamputun pi xTachuwin Dios wan pi ni kilikgalhitkan niku natlawayaw oración, nakgalhtawakgayaw o nalilakapastakaw. Niku tamakxtumikan nema tlan wi chu kaskulunku, makgtayanan xlakata tlan nakatsinikan chu nalichuwinankan tuku xla Dios. Na nila wankan pi nitlan komo wi tuku nakaxtlawanikan xlakata nalilakapastakkan tiku ninit, la akxni wilikan chiwix. Uma max limasiya pi kaj lilakapastakkan o xpaxkikan tiku nilh. Pero, komo anta xasanto naliʼakxilhkan o nakakninanikan imágenes lakatsala tuku masiyalh Jesús.

Wa xlakata, ni talakaskin napina niku xasanto liʼakxilhkan xlakata Dios tlakg nakgaxmatniyan miʼoración. Nipara namakgapaxuwaya Dios o tlakg nasikulunatlawayan komo namakgtlawaya peregrinación xlakata napina niku xasanto liʼakxilhkan. Biblia kinkawaniyan pi Jehová Dios, «wa xmalana akgapun, chu nkatiyatna, na ni anta xla wi kchiki ntani nkaj xatamakanitlaw». Pero uma ni wamputun pi Dios makgat kinkawilanin. Tlan natlawaniyaw oración niku natlawaniputunaw chu xla nakinkakgaxmatniyan xlakata «ni makgat kinkawilanin nchatunu nkin» (Hechos 17:24-27).