Jehová kamamakxtumi xfamilia
Jehová kamamakxtumi xfamilia
«Kuintaj kakatlawakantit [...] makxtum kalitlawanitan spiritu.» (EFE. 4:1, 3)
¿TLAN XLICHUWINANTI UMA?
¿Tuku namakgantaxti tuku lakkaxwilinit Jehová?
¿Tuku wamputun “makxtum nakinkatlawayan espíritu”?
¿Tuku nakinkamakgtayayan xlakata “tlan nakalikatsiniyaw amakgapitsin”?
1, 2. ¿Tuku lakpuwanit natlawa Jehová xlakata Katiyatni chu latamanin?
FAMILIA. ¿Tuku lakpuwana akxni kgaxmata uma tachuwin? ¿Tapaxkit? ¿Tapaxuwan? ¿Lakapastaka pi akxtum taskujpat mi familia xlakata wi tuku namakgantaxtiyatit? ¿Lilakapastaka lakatum niku tlan makgkatsiya, tlan nawana tuku lakpuwana? Max wix chuna limakgkatsiya komo kgalhiya akgtum familia tiku lu tlan likatsi. Jehová malakatsukilh familia (Efe. 3:14, 15). Dios xlakaskin pi putum tiku lamakgolh kʼakgapun chu kKatiyatni, nitu xlipekuankgolh, xlalipawankgolh chu makxtum xlakgolh.
2 Akxni Adán chu Eva xlakgalhinankgonita, latamanin nialh xfamilia Dios xwankgonit pero uma ni lakgpalilh tuku xlakapastaknit. Xla natlawa pi akxni katiyatni akgtum paraíso nawan nalitatsama xkamanan Adán chu Eva (Gén. 1:28; Isa. 45:18). Xla lakkaxwililh tuku talakaskin xlakata nakgantaxtu xtalakaskin chu lhuwa tuku lakkaxwilinit nema lichuwinan klibro xla Efesios, nema lichuwinan pi akxtum natawilayaw. Kaʼakxilhwi makgapitsi textos xalak Biblia nema nakinkamakgtayayan nakatsiyaw la tlan namakgtayananaw xlakata akxtum natawilapara tuku kamalakatsukinit Jehová.
TUKU LAKKAXWILINIT CHU TUKU TLAWANIT
3. ¿Tuku lakkaxwilinit Dios nema talichuwinan kʼEfesios 1:10, chu tukuya kilhtamaku tsukulh talakkaxwili?
3 Jehová tlawa tuku talakaskin xlakata nakgantaxtu xtalakaskin. Wa xlakata «akxni nakikgantaxtuy nkilhtamaku», Dios nalimaklakaskin tuku “lakkaxwilinit»,uma wamputun pi nakamamakxtumi putum xkachikin (kalikgalhtawakga Efesios 1:8-10). Uma tuku lakkaxwilinit pulaktiy tuku namakgantaxti. Pulana, kamakgtaya tiku kalaksakkanit naʼankgo kʼakgapun xlakata tlan natatawilakgo Jesucristo tiku xPulalinakan. Uma tsukulh Pentecostés xla kata 33 akxni xminita Jesús, akxni Jehová tsukulh kamamakgstokga tiku natamapakgsinankgo Cristo kʼakgapun (Hech. 2:1-4). Xlakata xtamakamastan Cristo, tiku kalaksakkanit tlan kaʼakxilha Dios wa xlakata tlan natalatamakgo xliputum kilhtamaku. Wa xlakata xatapaxuwan litaxtukgo «xlakgskgatan Dios» (Rom. 3:23, 24; 5:1; 8:15-17).
4, 5. ¿Tuku kilhchanima xlipulaktiy tuku natlawa Dios nema talichuwinan kʼEfesios 1:10?
4 Xlipulaktiy, Dios lakkaxwili tiku nalatamakgo kParaíso kkatiyatni chu natapakgsinikgo xTamapakgsin Mesías o Cristo. Latamanin tiku tapakgsikgo litaxtukgo «lhuwa tachixkuwitat» o latamanin (Apo. 7:9, 13-17; 21:1-5). Chu akxni Cristo namapakgsinan Akgtum Mil Kata lhuwa nalakastakwanakgo chu akxtum nakatalatamakgo (Apo. 20:12, 13). ¡Kaj kalakapastakti pi pulaklhuwa la tlan nalimasiyayaw akinin makxtum wilaw akxni nalakastakwanankgo tiku nikgonita! Chu akxni nakgalhsputa akgtum mil kata, tiku litaxtukgo «ntu anan nkatuxawat» wi tuku nakaliʼakxilhkan chu tiku ni namakgxtakgkgo «xlakgskgatan Dios» nalitaxtukgo unu kKatiyatni (Rom. 8:21; Apo. 20:7, 8).
5 La uku Jehová kamamakxtumima uma pulaktiy: tiku kalaksakkanit naʼankgo kʼakgapun chu tiku nalatamakgo unu kkatiyatni. Pero ¿la tlan namakgtayananaw xlakata nakgantaxtu tuku lakkaxwilinit Dios?
«NITU NAKALAKTLAWANIYAN WANTU MAKXTUM KALITLAWANITAN SPIRITU»
6. ¿La limasiya Biblia pi talakaskin natamakxtumiyaw?
6 Biblia wan pi kstalaninanin Cristo xlitamakxtumitkan (1 Cor. 14:23; Heb. 10:24, 25). Pero natamakxtumiyaw ni kilhchanima, kaj makxtum natawilayaw xtachuna latamanin tiku ankgo kmercado o kʼakgtum estadio niku kgamanankan. Makxtum layaw akxni makgantaxtiyaw tuku Jehová kinkamasiyaniyan chu mastayaw talakaskin pi espíritu santo nakinkapulalinan.
7. ¿Tuku wamputun tachuwin «makxtum kalitlawanitan spiritu»?
7 Xlakata akinin kanajlaniyaw xtamakamastan Cristo, Jehová akgstitum kinkaʼakxilhan, chu xkamanan kaʼakxilha tiku kalaksakkanit xlakata naʼankgo kʼakgapun chu xʼamigos kaliʼakxilha tiku litaxtukgo atanu borregos. Pero xlakata lamaw kʼuma kakilhtamaku, min kilhtamaku nakatakgalhiyaw taʼakglhuwit atanu latamanin (Rom. 5:9; Sant. 2:23). Komo ni chuna xlalh ni xtitsokgka tastakyaw nema kamaxkika kstalaninanin Cristo “nalapaxkiyatit”. ¿Pero tuku kilitlawatkan xlakata tlan nakatalalinaw kinatalankan? Talakaskin nakatsiniyaw «ntataktujun, chu ntasmalhwan». Pablo wan pi lhuwa naliskujaw xlakata naʼanan takaksni chuna la «makxtum kalitlawanitan spiritu, xaliankgalhin katapinitit ni namakgaxtakgatit ntatanksni» (kalikgalhtawakga Efesios 4:1-3). Xlakata namakgantaxtiyaw namastayaw talakaskin pi xʼespíritu Dios nakinkapulalinan chu nakinkamakgtayayan namasiyayaw xtatlaw. Nachuna, tuku nitlan tlawaputun kimaknikan, tlawa pi ni makxtum natawilayaw, pero xtatlaw espíritu santo kinkamakgtayayan nalakkaxtlawayaw taʼakglhuwit nema nakgalhiyaw.
8. ¿La xtatlaw liwa tlawa pi ni tlan nakatalalinaw amakgapitsin?
8 Kaʼakxilhti la «xtatlawaputu ntiyatliwa» tlawa pi ni makxtum natawilayaw (kalikgalhtawakga Gálatas 5:19-21). Akgtum liʼakxilhtit tiku tlawa talakgxtumit nema ni xlitatlawat nialh talalin Jehová chu congregación chu tiku akgskgawi xpuskat o chixku tlawa pi xfamilia lhuwa napatinankgo chu tlawa pi kamanan nialh makxtum nakatatawilakgo xnatlatni chu tlawa pi tiku nitu tlawanit na napatinan. Tiku tlawakgo tuku xalixkajni nila tlan talalinkgo Dios, chu xfamilia. Xtachuna la akxni wi tuku slamaputunaw talakaskin pi pulana naxakayaw anta niku slamaputunaw xlakata liwana nataslama. Tiku limasiya pi ni kgalhakgaxmata xlimapakgsin Dios xlikana pi ni lakgachixkuwili. Nachuna amakgapitsi xtatlaw liwa tlawa pi nitlan nalatalalinkgo atanu latamanin chu nila natalalinkgo Dios. Chu uma talismanin Jehová ni akxilhputun.
9. ¿Tukuya takgalhskinin natlawanikan kstalanina Cristo xlakata «makxtum kalitlawanitan spiritu, xaliankgalhin katapinitit ni namakgaxtakgatit ntatanksni»?
9 Talakaskin pi chatunu akinin natlawayaw uma takgalhskinin: «¿La xlilhuwa kskujma xlakata “makxtum [kin]kalitlawanitan spiritu, xaliankgalhin katapinitit ni namakgaxtakga[w] ntatanksni”? ¿Tuku ktlawa akxni kgalhi taʼakglhuwit? ¿Kkawani lhuwa kiʼamigos xlakata nalakpuwankgo pi tlan tuku ktlawama? ¿Klakaskin pi lakgkgolotsin nalakkaxtlawakgo kintaʼakglhuwit chu ni ktachuwinan tiku ktakgalhi taʼakglhuwit? ¿Ni kkatalalin amakgapitsi xlakata ni nalakapastakkgo tuku nitlan kkatlawaninit?». Putum uma tlawa pi ni makxtum natawilayaw la akgtum familia tiku mapakgsima Cristo.
10, 11. 1) ¿Tuku xlakata xlakaskinka tlan nakatalalinaw kinatalankan? 2) ¿Tuku kilitlawatkan xlakata tlan nakatalalinaw kinatalankan chu tlan nastaka kintakanajlakan?
10 Jesús wa: «Pus chuna, wa mpala pi xlita milikaxtlawan nkʼaltar, na anta xlakapastakti mintala mpi talamakgasitsiya, anta nkamakgaxtakgti milikaxtlawan kxlakatin altar, kapit, na pulanaj kamakgapaxuwa mintala lantla sitsinit, akxniku natana, nalikaxtlawanana milikaxtlawan. Lakapalaj tunkan katalakkaxla nti malakgsiyuyan» (Mat. 5:23-25). Santiago tsokgli: «Xatawakat ntu mastay xaʼakstitum latamat, wa lichankgoy xatalhtsi tapaxuwan wa nti nkgalhikgoy ntapaxuwan» (Sant. 3:17, 18). Wa xlakata ni tlawamaw tuku xaʼakgstitum komo katakgalhiyaw taʼakglhuwit amakgapitsin.
11 Akgtum liʼakxilhtit. Kmakgapitsi países niku anan guerras, tlan xchananankgolh komo latamanin ni xlilipuwankgolh xlakata minas. Akxni pankga akgtum mina, tiku chananankgo nila maklakaskinkgo tiyat, chu laktsu kachikinin nialh la chananankgo chu laklanka kachikinin ni anan liwat. Nachuna, tlakg tuwa makgkatsiyaw nakgalhiyaw tayat nema xlikgalhitkan kstalaninanin Cristo komo tuwa makgkatsiyaw nakatalalinaw kinatalankan. Komo lakapala nialh nalakapastakaw chu naliskujaw xlakata tlan nakakitaxtuni amakgapitsin, uma makgtayanan xlakata akxtum natawilayaw.
12. ¿La makgtayanankgo lakgkgolotsin xlakata akxtum natawilayaw?
12 Nachuna, «maxkikgolh xlipaxkatsinit nchixkuwin» nema tlawa pi tlan akxtum natawilakgo. Uma makgtayanan «nakgalhiyaw [...] ntipatum ntakanajla» (Efe. 4:8, 13). Akxni lakgkgolotsin chu akinin akxtum skujniyaw Jehová chu kinkamaxkikgoyan tastakyaw nema takilhtikgonit kBiblia kinkamakgtayakgoyan xlakata nalakgpaliyaw kintayatkan (Efe. 4:22-24). ¿Akxilha wix tastakyaw nema kinkamaxkikgoyan wa tuku Jehová kinkamaxkiyan xlakata nalatamayaw kxasasti kakilhtamaku nema aku mima? Lakgkgolotsin, ¿akxni kastakyawayatit natalan wa tuku lakapastakatit? (Gal. 6:1.)
«TLAN NKALAKATSINITIT NCHATUNU AMAKGAPITSIN»
13. ¿Tuku nala komo akinin ni kgalhakgaxmataw tastakyaw nema wan Efesios 4:25-32?
13 Efesios 4:25-29 wan tuku ni kilitlawatkan. Ni na akgskgawinanaw, ni nasitsiyaw, ni nalhkititnanaw chu ni natlawayaw tuku nitlan. Talakaskin namasiyayaw tuku xatlan chu nema tlan kinkamamakgkatsiniyan (Efe. 4:30). Xlakata nalipaxuwayaw takaksni chu tlan nakatatawilayaw amakgapitsin talakaskin kuenta natlawayaw tastakyaw nema mastalh Pablo: «Kakatamakgatlinin xlipaks ntalaxkajnin, chu ntasitsin, chu ntakgaw, chu ntaxkajwachuwin, chu xlipaks ntaskgawit. Chi wampi tlan nkalakatsinitit nchatunu amakgapitsin, nalalakgalhamanatit, chu nalamatsankgananiyatit nchatunu amakgapitsin xtachuna lantla wixin nkamatsankgananin Dios xpalakata nCristo» (Efe. 4:31, 32).
14. 1) ¿Tuku kinkamatlawiyan tachuwin «tlan nkalakatsinitit»? 2) ¿Tuku nakinkamakgtayayan xlakata tlan nakalikatsiniyaw amakgapitsin?
14 Tachuwin «tlan nkalakatsinitit» kilhchanima pi max minit kilhtamaku wi tiku nitlan likatsiniw chu max talakaskin chuntiya naliskujaw xlakata tlan nakalikatsiniyaw amakgapitsin. ¡Talakaskin nalakpuwanaw pi tuku makgkatsikgo amakgapitsin tlakg xlakaskinka ni xawa tuku akinin maklakaskinaw! (Fili. 2:4.) Max wi tuku lakapastakmaw nawanaw nema natlawa pi amakgapitsi nalilitsiyankgo o natlawa pi nalakpuwankgo pi akinin tlakg skgalala ¿pero tlan chuna natlawayaw? Akxni lakapastakaw uma nakinkamakgtayayan natlawayaw xtastakyaw Pablo.
KAKATSINIW NALAPAXKIYAW CHU NALAMAXKIYAW KAKNI KFAMILIA
15. ¿Tuku lichuwinalh Pablo kʼEfesios 5:28 xlakata la Cristo talalin Congregación?
15 Biblia tamalakxtumi la talalin Cristo congregación chuna la chixku talalin xpuskat. Xliʼakxilhtit Cristo makgtaya xachixku naʼakgatekgsa la napulalin, napaxki xpuskat chu la nakuentajtlawa chu na makgtaya xapuskat nakatsi la natapakgsini xchixku (Efe. 5:22-33). Akxni Pablo tsokgli: «Chatunu wixin, chuna nkatlawalh, na kapaxkilh xpuskat, xtachuna mpala wa akstu paxkikan» (Efe. 5:28). ¿Tuku xlakata wa «chuna nkatlawalh»? Aku xlichuwinanit la «mpaxkilh nCristo nkamputum nkanajlanin chu na tiakstu mastalh xpalakatakan [...] namasantujlikgoy lantla nalichakgakgoy ntachuwin ntu xtachuna mpala chuchut». Xlakata tlan naskujaw chuna la lakaskin Jehová pi makxtum natapakgsiniyaw Cristo, xachixku liwana nakuentajtlawa xlakata xfamilia tlan natawila xtakanajla.
16. ¿Tuku kitaxtu akxni xanatlatni makgantaxtikgo kxchikkan tuku Biblia wan pi xlitlawat?
16 Natlatni xlilakapastakatkan pi kgalhikgo akgtum taskujut nema kalakgayawanit Jehová. Pero kʼuma kakilhtamaku lhuwa latamanin ni «kgayaj nakatsankgoy» (2 Tim. 3:1, 3). Lhuwa lakchixkuwin ni makgantaxtikgo tuku lakgayakgo xlakata la nakuentajtlawakgo xkamanankan, chu wa xlakata xkamanan ni tlan tuku titaxtukgo. Pablo kawanilh natlatni tiku kstalaninanin Cristo: «Ni [...] mpala makgasitsiyatit milakgskgatankan, chi wampi kaj lakatsukuj kaks namamakgxtakgakgoyatit, nitu natlawakgoy, chu na namasiyunikgoyatit ntu xatlan xtachuna lantla xtalakaskin nkimPuchinakan» (Efe. 6:4). ¿Niku xapulana naʼakxilhkgo tapaxkit chu kakni kamanan? Natlatni tiku masiyanikgo uma xkamanan liskujmakgo, xlakata natlawakgo tuku Jehová lakgati. Tlawakgo pi kxchikkan naʼanan tapaxkit, ni nalasitsinikgo chu ni lixkajni nachuwinankgo, na kamasiyanikgo xkamanan la lu xlakaskinka nalimasiyakgo tapaxkit chu la namastakgo kakni. Uma nakamakgtaya xlakata nalatamakgo kxasasti kakilhtamaku nema Dios kinkamalaknuniyan.
17. ¿Tuku talakaskin xlakata tlan natlajayaw Akgskgawini?
17 Talakaskin nakatsiyaw pi Akgskgawini, wa tiku tlawalh ni kaʼanalh takaksni kkakilhtamaku chu natlawa tuku natalakaskin xlakata ni naskujnaniyaw Dios. Xlikana Satanás lakaskin pi lhuwa kalakxtlawakgolh xtamakgaxtokgatkan kxlakatin mapakgsinanin, kalatatawilakgolh maski nina tamakgaxtokgkgo, chu nalatatawilakgo tiku xtachixku o xtapuskat. Akinin ni kilitlawatkan la tlawakgo latamanin xala uku chu ni chuna lakapastakaw la xlakan. Wata wa Cristo tiku nastalaniyaw (Efe. 4:17-21). Wa xlakata, Biblia kinkawaniyan «nkalilhakganantit wa ntu xlipaks xmaklakaskinat Dios» xlakata tlan natlajayaw Akgskgawini chu xdemonios (kalikgalhtawakga Efesios 6:10-13).
«KALILATAPATIT TAPAXKIT»
18. ¿Tuku kinkamakgtayayan kstalaninanin Cristo xlakata makxtum natawilayaw?
18 Tuku tlakg makgtayanan xlakata makxtum natawilayaw kstalaninanin Cristo wa tapaxkit. Akxni kinakujkan lu paxki kiMalanakan Dios chu na paxkiyaw kinatalankan uma tlawa pi liwana nalakapastakaw “nitu nalakxtlawa wa ntu makxtum kinkalitlawanitan spiritu, xaliankgalhin katapinitit ni namakgaxtakgaw ntatanksni” (Efe. 4:3-6). Jesús tlawanilh oración xTlat niku chuna lichuwinalh tapaxkit: «Wampi ni xman wa yuma kpalakaskinkgoy litlan, wampi na xawa wanti alistalh nakilikanajlanikgo xpalakata xtachuwinkan ntu nawanikgoy. Mana watiya ntipatu kawankgolh. Lantla wix tataj, kiwilani, chanchu nkit wix kwilanin, mpi nachuna xlakan kakinkatatawilakgon [...]. Kmasiyunikgolh mintukuwini, na chunaku naktimasiyunikgoy; lakimpi wa ntapaxkit ntu nkilipaxki, kaʼananikgolh; chuj chi nkit kaktawilanikgolh» (Juan 17:20, 21, 26).
19. ¿Tuku liwana lakpuwanita natlawaya?
19 Komo nakgalhiyaw akgtum taʼakglhuwit xlakata kintalakgalhinkan, tapaxkit nakinkamakgtayayan natlawayaw oración la salmista: «Kamakamajti kinaku xlakata naktlawa tu makgapaxawayan» (Sal. 86:11). Wa xlakata liwana kalakpuwaw natayaniyaw tuku Satanás natlawa xlakata natamakgatliniyaw xapaxkina kinTlatkan chu natamakgatliniyaw xkachikin. Lhuwa kaskujwi kfamilia, akxni lichuwinanaw Dios chu kcongregación xlakata natlawayaw chuna la Pablo wa: «Katlawatit chuna la Dios, chuna la xkamanan tiku lu kapaxki, kalilatapatit tapaxkit» (Efe. 5:1, 2).
[Takgalhskinin]
[Dibujo xla página 29]
Kamakgaxtakgti milikaxtlawan kxlakatin altar, kapit, na pulanaj kamakgapaxuwa mintala
[Dibujo xla página 31]
Natlatni kakamasiyanitit minkamanan la nalimasiyakgo kakni
