Biografía

Jehová kimasiyanilh naktlawa xtalakaskin

Kinkawaniyan Max Lloyd

Akgtum katsisni kkata 1955, kincompañero tiku na misionero chu akit xaklichuwinamaw Dios kParaguay, kchiki niku xakwilaw stilikgolh latamanin tiku lu ksitsikgonit chu kinkawanikgon: «¡Kidioskan waputun lhuwa kgalhni, chu lakaskin xkgalhni gringos!». ¡Chu «gringos» nema xlichuwinamakgo, akinin! Pero ¿la kchaw anta?

UMA tsukulh kʼAustralia niku akit kstakli, niku Jehová kimasiyanilh naktlawa xtalakaskin. Kkata 1938, kintlat makgamakglhtilh maktum libro chatum xtatayana Jehová nema wanikan Enemigos xaʼinglés. Kintse chu kintlat nialh xlakgatikgo la sacerdote xalak kachikin, xlichuwinan Biblia la akgtum cuento. Titaxtulh akgtum kata kinatlatni tamunukgolh xlakata tamakamastanikgolh Jehová. Ama kilhtamaku ktsukuw tlawayaw xtalakaskin Jehová kkilatamatkan. Kintala Lesley, tiku xkimpulani akgkitsis kata, alistalh tamunulh. Chu akit ktamunulh kkata 1940 akxni xakkgalhi akgnajatsa kata.

Chu akxni xtsukunita xliʼakgtiy guerra nema tatlawalh xlikalanka kakilhtamaku, kʼAustralia nialh mastaka talakaskin natatlawa chu natamaʼakgpitsi xlikgalhtawakgakan xtatayananin Jehová. Wa xlakata lata akxni aktsujku xakwanit, kkatsinilh la naklichuwinan kintakanajla chu kaj xaklimaklakaskin Biblia. Xaklismaninit naklin kiBiblia kʼescuela chu xakkalimasiyani tuku xlakata ni xakkakninani bandera chu ni xakmakgtanu kʼguerra (Éxo. 20:4, 5; Mat. 4:10; Juan 17:16; 1 Juan 5:21).

Kʼescuela lhuwa ni xkintalalimputunkgo xlakata xwankgo pi akit skgalana xalak Alemania xakwanit. Ama kilhtamaku xwilikan películas kʼescuela, chu akxni nina xtsuku xtalakaskin pi putum xaktayaw chu xaktliw himno xla uma país. Pero akxni akit ni xaktaya, chatiy o chatutu lakgkgawasan xkilichipakgo kinchixit xlakata xaktayalh. Chu alistalh kimaxtuka kʼescuela xlakata kintakanajla pero akit kkinchik xakkgalhtawakga chu kaj xakmalakgacha kiʼexamen.

KMAKGANTAXTILH TUKU XAKLAKAPASTAKNIT

Xaklakapastaknit pi xliputum kilhtamaku xakskujniputun Dios la precursor, akxni xakmakgatsilh 14 kata. Pero kinatlatni kiwanikgolh pi pulana xtalakaskin naktekgsa akgtum taskujut. ¡Lu nitlan klimakgkatsilh! Xlakan kiwanikgolh pi xakkalakgaxokgonilh cuarto niku xaktawila kkinchik, pero kiwankgolh pi xʼamakgolh kimaxkikgo talakaskin precursor nakwan akxni xakmakgatsilh 18 kata. Makglhuwa xaklichuwinanaw tumin nema xaktlajama. Akit xakawani pi xakmaʼakgstokgputun tumin xlakata precursor xakwa, pero xlakan xkimakglhtikgo.

Akxni precursor kwa, kinatlatni kiwanikgolh pi tumin nema xkimakglhtikgo xmakikgo kʼakgtum  cuenta kbanco. Uma kilhtamaku kimaxkikgolh xlakata xaktamawalh kilhakgat o atanu tuku xakmaklakaskin. Chuna kimasiyanikgolh kiʼakstu nakputsa tuku kmaklakaskin chu ni nakkgalhi pi amakgapitsin nakimaxkikgo tuku kmaklakaskin. ¡Lu tlan tuku kimasiyankgolh!

Xmin kilhtamaku kinatlatni xwanikgo precursores xtamakgxtakgolh kkinchikkan, Lesley chu akit lu xaklipaxuwayaw akxni xakkataʼanaw lichuwinan Dios. Sábados chu domingos akinin xakanaw lichuwinanaw Dios akgatunu chiki, ktiji chu xakkamakgalhtawakgayaw latamanin. Tiku xlichuwinan Dios kcongregación xlimakgatsit xwanit tutupuxam hora akgatunu papaʼ. Kintse akgtum lu tlan liʼakxilhtit kinkawilinin xlakata putum kilhtamaku xmakgatsi umakgolh horas.

KLISKUJA LA PRESCURSOR KTASMANIA

Xapulana niku kliskujli la precursor kTasmania kʼakgtum isla kʼAustralia, niku kskujmakgolha kintala chu xchixku. Pero kaj ni makgas kilhtamaku kawanika xʼankgolh 15 clase, Escuela xla Galaad. Xlakata akit lu xakmaxanan chu nikxni xaktaxtunit kkinchik makgapitsi lakpuwankgolh pi max kaj akgtutu papaʼ xakama tawila anta. Pero akxni nina xakmakgatsi akgtum kata, kkata 1950, kilakgayawaka naklitaxtu siervo de companía, nema uku kawanikan tiku kamakgtaya nalakkaxwilikgo xtaskujutkan amakgapitsi lakgkgolotsin. Chu alistalh precursor especial klitaxtulh, chu chatum tala tiku kajku kgawasaku xwanit malakgachaka xlakata kincompañero xwa.

Lakgamakgat kinkamalakgachakan kʼakgtum kachikin niku xmaxtukan cobre chu ni xʼanankgo xtatayananin Jehová. Kʼautobús kchaw kʼuma kachikin kakgotanun, o smalankgan, chu ktamakgxtakwi kʼakgtum xalakgwan hotel. Lichali lichuwinaw Dios kʼakgatunu chiki, na xakkakgalhskinaw komo xkatsikgo pala wi tiku xrentarli akgtum cuarto. Akxni xtsiwamaja, wi tiku kiwanilh pi xchik chatum tiku xpulalin takanajla nema xwi xpaxtun iglesia presbirteriana niti xwi. Chu ktlawaw tuku xkinkawanikanitan ktachuwinaw diácono, xla lu tlan likatsilh chu kinkamaxkin chiki. Lu tanu xtasiya xlakata xaktaxtuyaw kxchik tiku xpulalin atanu takanajla chu xakaʼanaw lichuwinanaw Dios.

Lhuwa xkgaxmatkgo xlakata Dios, lhuwa tiku tlan xakkatachuwinanaw chu lhuwa tiku ktsukuw kamakgalhtawakgayaw xlakata Biblia. Akxni tiku xpulalinkgo uma takanajla katsikgolh pi xakwilaw kʼuma kachikin, mapakgsikgolh diácono lakapala xkinkatamakxtun. ¡Amakgtum nialh xakgalhiyaw niku naktamakgxtakgaw!

Lichali xaklichuwinamaw Dios asta kakgotanun, alistalh kputsaw niku tlan xaktamakgxtakgwi katsisni. Ktekgswi akgtum lanka estadio niku kgamanankan chu anta ktamakgxtakgwi, anta kmatsekgwi kimaletaskan chu kamparaw lichuwinanaw Dios. Maski xtsiswamaja, klakapastawi naklichuwinanaw Dios putum chiki nema xwilakgolh ni ksputa kcalle. Chu kʼakgtum chiki chatum chixku kinkawanin pi tlan xtamakgxtakgwi kʼakgtiy aktsu cuarto nema xkgalhi xchakgen xchiki.

 SUPERINTENTE XLA CIRCUITO CHU ESCUELA XLA GALAAD

Akxni xaklichuwinanitawa Dios akgtsayan papaʼ, kmakglhtinalh akgtum invitación xla sucursal xalak Australia xlakata superintendente xla circuito xakwa. Klipekualh xlakata kajku 20 kata xakkgalhi. Alistalh akgtiy semana kimasiyanika la naktlawa uma taskujut, chu ktsukulh kalakgapaxialhnan congregaciones xlakata nakamatliwakglha xtakanajlakan natalan. Atsinu ni putum tlakg xlinkgoya kata nixawa akit, pero niti xkilakgmakgan wata lu xlakaskinka xʼakxilhkgo kintaskujut.

Tanu tanu la xakan xlakata nakkalakgapaxialhnan congregaciones: akgtum semana xakan kʼautobús, atanu semana ktren, atanu semana kcarro chu xmin kilhtamaku kʼakgtum motocicleta, makgatu xaklin kimaleta chu amakgatu xaklin kimportafolio. Akxni xaktawila kxchikkan natalan lu xlikana xaklipaxuwa. Klakapastaka pi chatum siervo de companía lu xlakaskin kaktamakgaxtakgli kxchik maski nina liwana xtakaxtawilanit. ¡Ama semana klhtatalh niku paxkan! Pero maski chuna lu tatliwakglhli kintakanajlakan.

Kimaxkika atanu tasikulunalin kkata 1953 akxni kiwanika pi tlan xakalh clase 22 xla Escuela de Galaad. Pero maski lu kpaxuwalh na ktsukulh lilipuwan. ¿Tuku xlakata? Kintala chu xchixku taxtukgolh kʼEscuela xla Galaad 30 xla julio kata 1950, chu kamalakgachaka kPakistán. Pero akxni nina xmakgatsi akgtum kata, Lesly tatatlalh chu nilh anta. Xlakata aku xninit, ¿la xʼamakgolh makgkatsikgo kinatlatni komo akit xakalh atanu país? Pero xlakan kiwanikgolh: «Kapit chu kaskujnani Jehová kaniwa niku xla namalakgachayan». Chu nikxni kakxilhpa kintlat, xla nilh akxni xkgalhsputmaja kata 1950.

Ni makgas kilhtamaku titaxtulh akit chu kgalhkitsis tiku xalak Australia, xakamaw kʼakgtum barco kNueva York. Akxni anta xakamaw klikgalhtawakgaw Biblia, chu xakalitachuwinanaw Dios tiku na xʼankgo kbarco. Akxni nina xakanaw niku xwi Escuela South Lansing (Nueva York), pulana kilaw akgtum klanka tamakxtumit xaʼakgtati kilhtamaku, kʼEstadio Yankees kjulio xla kata 1953, anta tamakxtumika 165,829 latamanin.

Kimputumkan 120 natalan xalak lhuwa países tiku kilaw kʼGalaad, kinkawanikan niku xakamaw lichuwinanaw Dios asta xaʼawatiya kilhtamaku akxni ktaxtuw kʼuma escuela. Akxni katsiw niku xakamaw lakapala kilaw kbiblioteca xla Galaad xlakata xakkatsiw la xwanit países niku kinkalakgchan. Akit kimalakgachaka kParaguay, kkatsilh pi kʼuma país xʼanan lhuwa taʼakglhuwit xlakata política. Akxni nina makgas kilhtamaku xakchanit katsisni kkgaxmatli pi lhuwa xtachilimaka. Lichali kakgalhskilh amakgapitsi misioneros tuku «paskua» xtlawakanit. Lilitsiyankgolh chu kiwanikgolh: «Wix kgalhi xapulana guerra. Kataxtu chu kaʼakxilhti». ¡Kaniwa xʼanankgo soldados!

LHUWA TUKU KKATSINILH

Akgtum kilhtamaku ktaʼalh superintendente xla circuito kʼakgtum lakgamakgat congregación  xlakata xakamasiyaniw película La Sociedad del Nuevo Mundo en acción. Max akgtsayan o akgnajatsa hora kliaw: pulana chipaw tren, alistalh akgtum carreta nema xwatalinkgo kawayu, chu carreta nema xwatalinkgo wakax chu xaklinaw akgtum generador chu tuku tlan xliʼakxilhka película. Lichali akinin kalakgapaxialhnaw tiku xwilakgo kgranjas chu xkawaniyaw pi komo xlakaskinkgolh tlan xʼankgolh akxilhkgo película uma katsisni. Max akgkukitsis latamanin ankgolh.

Akxni xtitaxtunita akgpuxam minuto película, wi tiku kinkawanin pi tunkun xaktanuw kchiki chu ktiyaw tuku liʼakxilhkan película chu ktlawaw tuku kinkawanin. Ama kilhtamaku makgapitsi lakchixkuwin tsukukgolh talatnankgo chu xwankgo: «¡Dios nema skujniyaw lakgati wa xkgalhni gringos!». Chu anta kaj chatiy «gringos» xwilakgo, chu akit chatum. Tiku xʼankgonit akxilhkgo película ni mastakgolh talakaskin pi tiku xkinkamakgniputunan chuna xtlawakgolh maski xlakan xtanuputunkgo kchiki. Uma latamanin taspitparakgolh akgtutu hora lakatsitsa chu talatnankgo chu xwankgo pi kilhtamaku akxni xtaspitparaw kachikin xʼamakgo kinkatamakxtukanan.

Natalan putsakgolh tiku xpulalin policía chu kakgotanun limilh tantiy kawayu xlakata tlan xtaspitwi kkachikin. Akxni xaktitaxtuyaw niku xwilakgo lhuwa kiwi, xla xmaxtu xpistola chu xpula xʼakxilha la xwi tiji. Kkatsilh la makgtayanan nakgalhiya tantum kawayu, wa xlakata alistalh ktamawalh tantum.

CHINKGO TLAKG MISIONEROS

Maski sacerdotes ni xlakaskinkgo xaktlawaw uma taskujut, lhuwaku xtalichuwinama xlakata Dios. Kkata 1995 chinkgolh kgalhkitsis misioneros, niku na xʼan chatum tala tsumat xalak Canadá nema wanikan Elsie Swanson, tiku xʼanit clase 25 xla Galaad. Xla xtamakamastaninit Jehová maski xnatlatni ni xmakgtayakgo chu nikxni xtatayananin Jehová wankgolh. Elsie chu akit akxtum kskujwi ksucursal asta akxni malakgachaka alakatanu kachikin. Ktamakgaxtokgwi 31 xla diciembre kata 1957, chu kiskujwi la misioneros ksur xla Paraguay.

Kkinchikkan ni xʼanan chuchut, wa xlakata ni xakgalhiyaw niku nakpaxaw, ni kgalhiyaw baño, chu nipara lavadora. Pero xkilhtin kinchikkan xwi akgtum pozo. Xlakata, ni xkgalhiyaw refrigerador xaktamawayaw liwat chali chali. Lu lipaxuwaw uma kilhtamaku kkintamakgaxtokgatkan, xlakata ni lhuwa tuku xakgalhiyaw chu lu xakapaxkiyaw natalan xalak congregación.

Kkata 1963 klakgapaxialhnalh kintse kʼAustralia. Xlakata xtitaxtunita akgkaw kata ni xkiʼakxilhnit  kintse lu lipaxuwalh chu alistalh tachokgolh xnaku. Akxni xakamaw taspitparayaw Paraguay, wi tuku xʼamaw laksakaw nema xʼama lakgpali kilatamatkan: ¿Xʼamaw laksakaw komo xakama makxtakga kintse kʼhospital, xlakata anta wi tiku xkuentajtlawalh, chu tlan xaktaspitwi kParaguay niku lu xpaxkiyaw taskujut nema xtlawayaw? Akxni lhuwa oración xtlawanitaw Elsie chu akit lakksakwi pi xkamaw kuenta tlawayaw kintse. Xla nilh kkata 1966, chu chuntiya klimaklakaskiw kinkilhtamakujkan xlakata xaklichuwinaw Dios.

Lu lanka tasikulunalin pi tlan kskujnit la superintendente xla circuito chu distrito kʼAustralia chu kkamasiyanit kʼEscuela xla Lakgkgolotsin xalak Congregación. Alistalh atanu tuku lakgpalipa kilatamatkan: kiwanika pi xakama skuja la tiku pulalinkgo sucursal kʼAustralia. Chu tlawaka xasasti sucursal, chu kilaksakka xlakata xakpulalilh taskujut nema xtatlawama. Xlakata makgtayanankgolh lhuwa natalan tiku xkatsinikgo tlawakgo uma taskujut, tatlawalh lu lilakgatit sucursal.

Atanu niku kskujli wa kDepartamento xla Servicio, niku akxilhkan la talichuwinan Dios. Na kkgalhinit lanka tasikulunalin xlakata klakgapaxialhnanit atanu sucursales la superintendente xla zona chu tlan kkamakgtayananit amakgapitsi. Lu tatliwakglhnit kintakanajla xlakata kalakgapasnit natalan tiku tawilakgolh kpulachin chu campos de concentración lhuwa kata xlakata nikxni makgxtakgkgolh Jehová. Xliʼakxilhtitkan matliwakglhli kintakanajla.

KBROOKLYN KSKUJMAW LA UKU

Akxni xakkitaspitma xlakata xaklakgapaxialhnanit akgtum sucursal kkata 2001 ktekgsli akgtum invitación niku xkiwanikan pi xakkalh kʼBrooklyn (Nueva York) xlakata xakskujli kComité xla Sucursal xalak Estados Unidos. Elsie chu akit tlawaniw oración Jehová, liwana lakpuwaw xlakata tuku xkinkawanimakan chu xatapaxuwan kmakgamakglhtinaw. Titaxtukgonit liwaka akgkawitu kata lata chiw kBrooklyn, ¡chu unu kwilaw!

Akit lu kpaxuwa xlakata kkgalhi chatum puskat tiku xatapaxuwan tlawa xtalakaskin Jehová. Kgalhiyawa liwaka 80 kata chu ni lu tatatlayaw. Akinin lu kpaxuwayaw tlan nakatsiniyaw xtamasiyat Jehová putum kilhtamaku chu lipaxuwaputunaw putum tasikulunalin nema nakamaxki tiku natlawakgo xtalakaskin.

[Tuku wan página 19]

Akgtum semana xakan kʼautobús, atanu semana ktren, atanu semana kcarro chu xmin kilhtamaku kʼakgtum motocicleta, makgatu xaklin kimaleta chu amakgatu xaklin kimportafolio

[Tuku wan página 21]

Akinin lu kpaxuwayaw tlan nakatsiniyaw xtamasiyat Jehová putum kilhtamaku

[Dibujos xla página 18]

Pakxuki: Akxni superintendente xla circuito xakwanit kʼAustralia Pakgkana: Kinatlani chu akit

[Dibujo xla página 20]

Akxni ktamakgaxtokgwi 31 xla diciembre kata 1957