Kaskujniw Dios tiku lakgmaxtunan

«Xampi wa yuma liwi lantla napaxkiyaw Dios, mpi natlawayaw ntu wan xlimapakgsin, na wa xlimapakgsin, ni tuwa.» (1 JUAN 5:3)

¿TLAN XKGALHTINANTI?

¿Tuku lakaskin Satanás nalakpuwanaw xlakata xlimapakgsin Dios?

¿Tuku xlakata kuenta kilitlawatkan akxni laksakaw tiku nakatalalinaw?

¿Tuku nakinkamakgtayayan xlakata ni namakgxtakgaw Dios chu xlakgtaxtut?

1. ¿La limaklakaskin Jehová lakgtaxtut chu la limasiyalh xlakata Adán chu Eva?

KAJWATIYA Jehová tiku niti wani tuku natlawa. Pero, ni malakatsali chu ni xafuerza tlawa pi nakgalhakgaxmatnikgo kskujnin. Wata kamaxki talakaskin nalaksakkgo tuku natlawakgo, uma wamputun pi kamaxki talakaskin natlawakgo tuku lakgatikgo chu tuku nalakaskinkgo. Akgtum liʼakxilhtit, Dios kaj pulaktum tuku xkawaninit pi ni xtlawakgolh Adán chu Eva, pi ni xwakgolh xtawakat «kiwi nema lilakgapaskan tuku xatlan chu nixatlan» (Gén. 2:17). Chuna tlan makgantaxtikgo tuku lakaskin xMalakatsukinakan chu nachuna lipaxuwakgo lanka lakgtaxtut.

2. ¿Tuku xlakata xapulana kinatlatnikan makgatsankgakgolh lakgtaxtut nema xkamaxkinit Dios?

² ¿Tuku xlakata Jehová lhuwa tuku xkamaxkinit talakaskin xtlawakgolh xapulana kinatlatnikan? Xlakata katlawalh xtachuna la xla chu kamaxkilh xtalakapastaknikan. Jehová xlakpuwan pi tapaxkit nema xkgalhikgo xkapulalilh kxlatamatkan (Gén. 1:27; Rom. 2:15). Pero Adán chu Eva ni paxtikatsinikgolh chu lakgmakgankgolh uma tamaskiwin, kuenta tlawanikgolh Satanás chu xakstu laksakkgolh tuku tlan o nitlan. Lakpuwankgolh pi chuna tlan xtlawakgolh tuku xlakaskinkgolh pero nichuna kitaxtulh. Kaj xakstukan tapakgsikgolh ktalakgalhin chu putum xkamanan na tapakgsinikgolh, lu nitlan tuku kakitaxtunilh (Rom. 5:12).

3, 4. ¿La tlawa Satanás xlakata nalakpuwanaw pi lu tuwa tuku kinkaskiniyan Jehová?

³ Xlakata Satanás tlawalh pi chatiy lataman tiku ni xkgalhikgo talakgalhin chu chalhuwa ángeles ni xtapakgsinikgolh Dios, Satanás na tlan chuna nakinkaʼakgskgawiyan. Watiya tuku limaklakaskin la uku, xla kinkamalakpuwaniputunan pi lu tuwa tuku kinkaskiniyan Dios, pi akinin nila tuku nalipaxuwayaw (1 Juan 5:3). Pero komo katalalinaw tiku chuna lakpuwankgo max na chuna  nalakpuwanaw. Chatum tsumat tiku kgalhi 24 kata chu tlawalh talakgxtumit nema ni xlitatlawat wa: «Tiku xakkatalalin lakpalikgolh la xaklakapastaka, chuna lalh xlakata ni xaklakaskin pi kincompañeros xkilakgmakgankgolh». ¿Ni xlikana pi lhuwa nachuna xkinkamatlawiputunkanan?

⁴ Lu nitlan, pero min kilhtamaku anta kcongregación wilakgo tiku nitlan tuku lakpuwankgo. Chatum kgawasa tiku xtatayana Jehová wa: «Makgapitsi kiamigos xtataxtukgo tiku ni xtatayananin Jehová. Akxni tlakg lhuwa kilhtamaku akxtum xakkatatawila, nachuna xaklikatsi la xlikatsikgo. Tsukulh taxlajwani kintakanajla: nialh xaklakgati tuku xlichuwinankan ktamakxtumit chu nialh lu xakan lichuwinan Dios. Uma kimasiyanilh pi xtalakaskin xakkamakgxtakgli tiku xakkatalalin. Chu chuna ktlawalh». Tiku katalalinaw nalakgpalikgo la lakapastaknanaw. Kaʼakxilhwi akgtum liʼakxilhtit xalak Biblia nema chuna masiya (Rom. 15:4).

«TSUKULH KAKGALHANI XNAKUKJKAN LAKCHIXKUWIN»

5, 6. 1) ¿Tuku kaliʼakgskgawilh Absalón lhuwa israelitas? 2) ¿Tlan kitaxtunilh tuku xtlawama Absalón?

⁵ Biblia lichuwinan lhuwa liʼakxilhtit xlakata latamanin tiku nitlan xkatalalinkan. Chatum wa Absalón xkgawasa mapakgsina David. Absalón lu stlan chixku xwanit. Xla tsukulh makgkatsi chuna la Satanás, tanulh kxnaku nitlan tapuwan, xlakata xmakglhtiputun xtamapakgsin xtlat, nema ni wa xlakgchan. * Absalón xmakglhtinamputun tamapakgsin, wa xlakata kamalakpuwanilh israelitas pi xlakaskin tlan xkakitaxtunilh chu xtamapakgsin xtlat nitu xkamakgtayama. Nachuna, tlawalh la Akgskgawini kJardín xaʼEdén, Absalón kalimasiyanilh pi tlan xlikatsi, pero nitlan la xlichuwinama xtlat (2 Sam. 15:1-5).

⁶ ¿Tlan kitaxtunilh tuku xtlawa Absalón? Tlan wanaw pi chuna xlakata Biblia wan: «Tsukulh kakgalhani xnakukjkan lakchixkuwin xalak Israel» (2 Sam. 15:6). Alistalh, lu nitlan la kitaxtunilh Absalón xlakata lu lanka xmakgkatsikan. Absalón chu lhuwa mil lakchixkuwin tiku xtatayakgo nikgolh (2 Sam. 18:7, 14-17).

7. ¿Tuku kinkamasiyaniyan xlakata tuku tlawalh Absalón? (Kaʼakxilhti dibujo xalak página 14).

⁷ ¿Tuku xlakata lu lakapala kaʼakgskgawika israelitas? Max xlakata xlakaskinkgo tuku xkamalaknuni Absalón o max xʼakxilhkgo pi xkgalhi limapakgsin. Maski wa o ni wa, liwana katsiyaw uma: xlakan makgxtakgkgolh Jehová chu mapakgsina tiku xlaksaknit. La uku, Satanás chuntiya maklakaskima latamanin tiku la Absalón xlakata nakakgalhanikgo xnakujkan kskujnin Jehová. Makgapitsi wankgo: «Xlimapakgsin Dios lu tuwa», o: «¡Tiku ni skujnikgo Jehová lu paxuwakgo!». ¿Ni makgxtakgaw Jehová akxni anan uma talakapastakni? ¿Akxilhaw pi kaj kinkaliʼakgskgawiputunkgoyan? ¿Liwana katsiyaw pi kajwatiya Jehová masta «xaʼakgstitum xlimapakgsin», xlimapakgsin Cristo, wantuku xlikana nakinkalakgmaxtuyan? (Sant. 1:25). Kalimasiyaw pi xlakaskinka akxilhaw uma limapakgsin chu nikxni kamalakatsaliw tuku Jehová kinkamaxkiyan talakaskin natlawayaw (kalikgalhtawakga 1 Pedro 2:16).

8. ¿Tuku liʼakxilhtit limasiya pi ni katipaxuwaw komo nalakatsalayaw xlimapakgsin Jehová?

⁸ Satanás tlakg kaputsa tiku lakgkgawasanku. Chatum tala tiku la uku kgalhi 30 kata lichuwinalh xlakata akxni kgawasaku xwanit: «Akit xakkaxilha pi Jehová lu nitu xkimaxki talakaskin xaktlawa, chu ni kaj xkimakgtaya». Chu lu nitlan kitaxtunilh xlakata tlawalh talakgxtumit xalimaxana. ¿Tlakg paxuwalh chuna? Ni chuna. Xla wa: «Lu nitlan xaklimakgkatsi chu akglhuwa kata kintalakapastakni xkimalakapastaka pi nitlan tuku xaktlawanit». Atanu tala wan xlakata tuku  titaxtulh akxni kajku tsumat xwanit: «Akxni xaktlawanita talakgxtumit xalimaxana nitlan xaklimakgkatsi. Asta la uku, maski titaxtunita akgkunajatsa kata min kkintalakapastakni uma tuku nitlan ktlawalh». Achatum tala puskat wa: «Akxni kkatsilh pi tuku nitlan ktlawalh tlawanilh tuku nitlan tiku kapaxki, ni tlan kmakgkatsilh, kintalakapastakni, kintakanajla. Ni tlan tamakgkatsi akxni Jehová nialh tlan kinkaʼakxilhan». Lakgkgawasan chu laktsuman ni kamaxkitit talakaskin Satanás nakaʼakgskgawiyan: akxni wi tuku natlawaya pulana kalakpuwanti tuku nitlan nakitaxtu.

9. 1) ¿Tukuya takgalhskinin natlawayaw xlakata Jehová, xlimapakgsin chu xtastakyaw? 2) ¿Tuku xlakata xlakaskinka liwana nalakgapasaw Dios?

⁹ Lu nitlan pi lhuwa lakgkgawasan tiku xtatayananin Jehová chu tiku laklankata katsikgonit pi nitlan limakgkatsikan akxni chuna titaxtukgonita (Gál. 6:7, 8). Kilitlawatkan uma takgalhskinin: «¿Kkatsi tuku kiliʼakgskgawiputun Satanás? ¿Kliʼakxilha Jehová la kiʼamigo, tiku kiwani tuku xaxlikana chu lakaskin pi tlan kakinkitaxtunilh? ¿Liwana kkatsi pi xla nakimaxki tuku tlan chu tuku nakimakgapaxuwa?» (kalikgalhtawakga Isaías 48:17, 18). Komo wamputunaw pi chuna, ni kaj talakaskin tsinu nalakgapasaw Jehová. Talakaskin pi liwana nalakgapasaw chu nakanajlayaw pi wilinit limapakgsin chu tastakyaw xlakata kinkapaxkiyan chu ni kaj xlakata ni natlawayaw putum tuku akinin lakaskinaw (Sal. 25:14).

KASKINIW JEHOVÁ AKGTUM NAKU XASKGALALA CHU NEMA NAKGALHAKGAXMATA

10. ¿Tuku xlakata kilitlawatkan chuna la mapakgsina Salomón akxni kgawasaku xwanit?

¹⁰ Akxni kajku kgawasaku xwanit, Salomón  tlawanilh oración Dios: «Kajku kgawasa akit. Nikkatsi la naktanu chu la naktaxtu». Xla skilh kʼoración naku nema xaskgalala chu nema xkgalhakgaxmatnalh (1 Rey. 3:7-9, 12). Jehová kgalhtilh tuku skinilh. Chu nachuna nakgaxmata kioracionkan maski kgawasaku akinin o linaw kata. Pero Jehová ni lakapala natlawa pi skgalala nawana. Pero natlawa pi skgalala nawana komo xlikana nalikgalhtawakgaya xTachuwin, naskiniya xʼespíritu santo, chu namakglhtinana tamakgtay nema namaxkikana kcongregación (Sant. 1:5). Kalakapastakwi pi Jehová limaklakaskin uma xlakata skgalala nawankgo tiku kgawasaku nixawa tiku ni kgalhakgaxmatkgo xtastakyaw, asta «nti akgskalalan» xla uma kakilhtamaku (Luc. 10:21; kalikgalhtawakga Salmo 119:98-100).

11-13. 1) ¿Tuku lu tlan tastakyaw kinkamasiyaniyan Salmo 26:4, Proverbios 13:20, chu 1 Corintios 15:33? 2) ¿La tlan xmakgantaxtiw umakgolh tastakyaw xalak Biblia?

¹¹ Chuna la akxilhaw, komo liwana lakgapasputunaw Jehová, talakaskin nalikgalhtawakgayaw Biblia chu nalilakapastakaw tuku kgalhtawakgayaw. Xlakata nalimasiyayaw, kaʼakxilhwi makgapitsi textos xalak Biblia nema lichuwinankgo xlakata la nakalaksakaw kiʼamigoskan. Salmo 26:4 wan: «Ni kkatatamakxtuminit lakgakgskgawinanin lakchixkuwin, nipara ti akgtuy tatlawa ixlakankan». Anta kProverbios 13:20 wan: «Wantiku katalalin xalakgskgalalan latamanin, xaskgalala nawan, pero tiku katalalin tiku xalak tontos nitlan katikitaxtunilh». Chu 1 Corintios 15:33 kBiblia Traducción del Nuevo Mundo wan: «Tiku nitlan nakatalalinaw natlawakgo pi namakgxtakgaw xatlan talismanin».

¹² Umakgolh textos wi tuku lu xlakaskinka kinkamasiyanikgoyan. Pulana pi Jehová lakaskin liwana nakalaksakaw tiku kiʼamigoskan nawankgo, lakaskin tlan nalinaw kilatamatkan chu tlan natawila kintakanajla. Chu xliʼakgtiy, tiku katalalinaw kinkamatlawikgoyan tuku tlan o tuku nitlan. Umakgolh versículos limasiyakgo pi Jehová champutun kkinakujkan. ¿Tuku xlakata chuna wanaw? Umakgolh textos ni kinkawanikgoyan uma, «Wix ni militlawat uma o ni katlawa uma» kaj wan tuku xaxlikana. Jehová xtachuna la xkinkawanin: «Uma chuna xlitatlawat. ¿Tuku natlawaya wix? ¿Tuku wi kminaku?».

¹³ Chu xaʼawatiya, xlakata umakgolh akgtutu textos wankgo tuku xaxlikana, kinkamakgtayakgoyan la uku chuna la akxni katsokgka chu tlan nakamakgtaya latamanin maski katuwa tuku titaxtumakgolh. Katlawaw umakgolh takgalhskinin: «¿La naktlawa xlakata ni nakkatalalin tiku “akgtuy tatlawa ixlakan”? ¿Tuku max natlawa pi nakkatalalin tiku chuna likatsikgo? (Pro. 3:32; 6:12.) ¿Tiku umakgolh «xaskgalala latamanin» tiku Jehová lakaskin nakkatalalin chu tiku «xalak tonto»? (Sal. 111:10; 112:1; Pro. 1:7.) ¿Tuku uma «xatlan talismanin» nema max namakgatsankgayaw komo ni liwana nalaksakaw tiku nakatalalinaw? ¿Kaj kkakilhtamaku wilakgolh tiku nitlan nakkatalalin? (2 Ped. 2:1-3.)». Kalilakapastakwi xtakgalhtin.

14. ¿La tlakg tlan natlawayaw akxni nakakninaniyaw Dios kfamilia?

¹⁴ Na tlan nalilakapastakaw amakgapitsi textos, nema nakinkamakgtayayan naʼakgatekgsaw la lakapastaka Jehová xlakata tuku tlakg xlakaskinka kkilatamatkan chu xla kifamiliajkan. * Natlatni kalichuwinantit umakgolh textos akxni kakninaniyatit Dios kfamilia, akxni natlawaya kalilakapastakti pi kamakgtayaputuna chatunu chatunu xalak familia naʼakgatekgskgo xlimapakgsin Dios chu xtastakyaw nema limasiya la xlilhuwa kinkapaxkiyan (Sal. 119:72). Komo wix chuna nakatakgalhtawakgaya mifamilia, namakgtayayan tlakg tlan nalatalalin chu natalalinkgo Jehová.

15. ¿La nakatsiya pi xlikana skgalalama chu kgalhakgaxmatnan kinakujkan?

 ¹⁵ ¿La nakatsiyaw komo skgalalama chu kgalhakgaxmatnan kinakujkan? Pulaktum wa akxni natamalakxtumiyaw kintalakapastaknikan la xlakapastaknankgo xlakskujni Dios xala makgasa. Akgtum liʼakxilhtit tuku mapakgsina David tsokgli: «Oh Dios, akit snun klakgati ktlawa tu wix lakgatiya, milimapakgsin kkgalhi nak kinaku» (Sal. 40:8). Nachuna tiku tsokgli Salmo 119 wa: «Akit snun klakgati tlawa tu wan milimapakgsin, wakg kilhtamaku wa klakapastakmaj» (Sal. 119:97). Xlakata chuna napaxkiyaw talakaskin nalikgalhtawakgayaw Biblia, natlawayaw oración chu nalilakapastakaw tuku nakgalhtawakgayaw, chu tuku natitaxtutilhayaw, uma wamputun tasikulunalin nema namakglhtinanaw xlakata kgalhakgaxmataw xlimapakgsin Dios (Sal. 34:8).

NALISKUJAW XLAKATA NALAKGTAXTUYAW

16. ¿Komo tlajanamputunaw chu lakgtaxtuputunaw tuku kililakapastakatkan?

¹⁶ Lata makgasa chu asta la uku lhuwa kachikin tlawakgo guerra xlakata nialh natapakgsinikgo atanu kachikin. ¡Wa xlakata tlakg xlakaskinka nalakgtaxtuyaw knixaxlikana takanajla! Kalakapastakwi pi tiku kinkatlawaniputunan tuku nitlan nikaj wa Satanás chu nixatlan xtalakapastakni kakilhtamaku, na talakaskin natalatlawayaw tuku nitlan tlawaputunaw chu kinakujkan nema kinkaʼakgskgawiyan (Jer. 17:9; Efe. 2:3). Xlakata Jehová kinkamakgtayayan tlan natlajananaw. Putum kilhtamaku akxni wix laksaka natlawaya tuku tlan, pulaktiy tuku tlan kitaxtu. Pulana natlawaya pi napaxuwa Jehová (Pro. 27:11). Xlipulaktiy, chuna la naʼakxilhtilhaya xlitliwakga nema lilakgmaxtunan «xaʼakgstitum xlimapakgsin Dios nema masta lakgtaxtut», wix tlakg liwana nalilakapastaka nalatapaya ktiji niku namakglhtinana latamat nema ni kgalhi lisputni. Alistalh tlakg xatlan lakgtaxtut nema nakamaxki Jehová putum tiku ni makgxtakgkgo (Sant. 1:25; Mat. 7:13, 14).

17. Komo tlawayaw tuku nitlan ¿tuku xlakata ni nalilipuwanaw chu la kinkamakgtayayan Jehová?

¹⁷ Xlikana, kimputumkan minkilhtamaku lakgalhinanaw (Ecl. 7:20). Akxni chuna la ni nalipuwanaw o nalakpuwanaw pi nitu litaxtuyaw. Komo tlawayaw akgtum talakgalhin katlawaw tuku natalakaskin xlakata nalakkaxtlawayaw, maski nakawaniyaw lakgkgolotsin kakinkamakgtayakgon. Santiago tsokgli «oración namatliwakglha xtakanajla, chu Jehová namakipara. Nachuna komo xtlawanit talakgalhin, natapatikan» (Sant. 5:15, NM). Kalakapastakwi pi Jehová xlikana xalakgalhamana chu lakaskin pi natawilayaw kcongregación xlakata akxilhli pi wi tuku tlan kkinakujkan (kalikgalhtawakga Salmo 103:8, 9). Jehová putum kilhtamaku nakinkamakgtayayan komo xliputum kinakujkan skujnaniyaw (1 Cró. 28:9).

18. Chuna la wan xʼoración Jesús nema wi kJuan 17:15, ¿tuku kilitlawatkan xlakata Jehová nakinkakuentajtlawayan?

¹⁸ Akxni xʼamakaja makgnikan Jesús, tlawanilh oración Jehová xlakata xkakuentajtlawalh kgalhkawitu xʼapóstoles: «Kuintaj natlawakgoya, mpi nitu namakgspulikgo akgskgawini» (Juan 17:15). Chuna la Cristo kakuentajtlawalh xʼapóstoles, la uku na kakuentajtlawa putum kstalaninanin. Wa xlakata tlan nakanajlayaw pi Jehová nakinkakuentajtlawayan akxni tuwa tuku titaxtumaw xlakata Jesús chuna skinilh. Biblia kinkawaniyan «Jehová la akgtum escudo nema kamakgtaya tiku kanajlanikgo, [...] chu xla kakuentajtlawa tiku ni makgxtakgkgo» (Pro. 2:7, 8). Pero minkilhtamaku tuwa makgkatsiyaw nakgalhakgaxmataw Jehová, pero kajwatiya akxni chuna tlawayaw tlan nakgalhiyaw latamat nema ni kgalhi xlisputni chu xlikana nakgalhiyaw lakgtaxtut (Rom. 8:21). ¡Ni kamasta talakaskin wi tiku naʼakgskgawikgoyan!

[Notas nema wilakgo kpágina]

[Takgalhskinin]

[Dibujos xla página 14]

¿Tiku litaxtu la Absalón uku, chu tuku nakinkamakgtayayan ni nalakpalikgo kintapuwankan?