«Kgantaxtulh tuku xaklakaskin»

Titaxtunita akgkukitsis kata, Emilia precusora xwanit, pero wi tuku titaxtulh chu nialh precursora wa. Nina makgas tsukulh lilakapastaka la lu tlan xwi xlatamat akxni precursora wa, chu tsukulh lakpuwan pi precursora xwamputun amakgtum.

Pero lhuwa kilhtamaku xkskuja, chu ni xkatsi tuku natlawa. Makgtum, Emilia wa uma kxlakatin xcompañeros: «¡Lu xaklakgatilh nialh lhuwa horas xakskujli!». Akxni puskat tiku xpulalin taskujut katsilh xlakata uma, lakgalh niku xwi chu kgalhskilh, komo xlikana tuku xlichuwinanit. Emilia wanilh pi chuna xwanit. Pero xtalakaskin pi tala xwanilh tiku xpulalin empresa, xlakata kskin pi kskujnin putum kilhtamaku kskujkgolh. Wa xlakata Emilia liwana lakkaxwililh tuku natlawa chu skinilh Jehová litliwakga xlakata ni xpekualh.

Akxni kgalhilh tamakxtumit kxtaskujut, Emilia skilh nialh lhuwa kilhtamaku naskuja, liwana lakapastakli tuku wa chu ni pekualh. Wanilh tiku xpulalin taskujut pi kilhtamaku nema xʼakgataxtunilh xʼama kalimakgtaya xtalatamanin. Xla wa: «Akit xtatayana Jehová chu kamakgtaya latamanin nakatsikgo xlakata Dios. La uku lhuwa latamanin nialh linkgo xlatamatkan chuna la xlilat, wa xlakata lu lakaskinkgo nakamasiyaniyaw la Biblia tlan nakamakgtaya. Ni klakaskin pi uma tuku ktlawa akxni ni kskuja natlawa pi nialh liwana naktlawa kintaskujut unu, pero klakaskin tlakg kilhtamaku xakkgalhilh xlakata nakkalimakgtaya latamanin. Wa xlakata nialh lhuwa hora kskujputun».

Tiku xpulalin taskujut liwana kgaxmatnilh chu wanilh pi xminit kilhtamaku na xlakapastaknit nakamakgtaya latamanin. Chu na wa: «Xlakata tuku wanti, klakpuwan pi tlan nakmaxkiyan tuku skimpa. Pero katsiya pi uma natlawa pi ni lhuwa tumin natlajaya». Emilia wa pi xkatsi chu wanilh pi lhuwa tuku xʼama makgxtakga. Chu na wa: «Tuku tlakg ktlawaputun wa tuku xlikana nakkalimakgtaya amakgapitsin». Chu xpuxku wa: «Lu kaks klilakawan xlakata latamanin tiku kamakgtayakgo amakgapitsin chu nitu makglhtinankgo».

La uku, Emilia kaj akgtati kilhtamaku skuja, chu nipara chatum skujni chuna xmakikanit talakaskin kʼuma empresa. Chu nila xkanajla pi limawakanika la kxokgonikan, wa xlakata watiya tumin makglhtinama la uku. Emilia wan: «Kgantaxtulh tuku xaklakaskin. Amakgtum precursora klitaxtu».

Chu wix, ¿lakapastakpat wi tuku nalakgpaliya kmilatamat xlakata precursor nawana?

[Tuku wan página 32]

Tiku xpulalin taskujut wa: «Lu kaks klilakawan xlakata latamanin tiku kamakgtayakgo amakgapitsin chu nitu makglhtinankgo».