«¿Tiku nakpekuani?»
«¿Tiku nakpekuani?»
«Maski ixkintlawanika guerra, akit talipaw naktawilaj.» (SAL. 27:3)
CHUNA LA WANKGO UMAKGOLH VERSÍCULOS, ¿TUKU TLAN NAMAKGTAYAYAN NI NAPEKUANA?
Salmo 27:1
Salmo 27:4
Salmo 27:11
1. ¿Tukuya takgalhskinin kgalhtinan Salmo 27?
¿TUKU xlakata tlakg lichuwinamaw Dios maski kakilhtamaku tlakg katuwa wi? ¿Tuku xlakata paxuwayaw akxni maklakaskinaw kinkilhtamakujkan chu tuku kgalhiyaw xlakata tlakg nalichuwinanaw Dios maski ni anan lhuwa tumin kkakilhtamaku? ¿La tlan ni napekuanaw kakilhtamaku niku putum latamanin pekuankgo xlakata kilhtamaku nema aku mima? Mapakgsina David kilhtlilh tuku wan Salmo 27 nema kgalhtinan umakgolh takgalhskinin.
2. ¿Tuku tlawa pi latamanin nitlan nalimakgkatsikgo, pero tuku tlan nakanajlayaw akinin?
2 David chuna limatsukilh salmo nema tsokgli: «Kintiku Dios [Jehová] kimaxki ixtaxkgakget, y wa kilakmaxtu akxni taskinij, ¿tiku akit nakjikuanij? Niti. Wa kimakgtakgalha kanikxniwaj, ¿tiku tlan nakimakgaklhaj?» (Sal. 27:1). Tapekua uma tlawa pi chatum lataman namakgkatsi pi ni kgalhi litliwakga. Pero tiku lipawankgo Jehová nitu pekuankgo (1 Ped. 3:14). Komo lipawanaw Jehová tlan kanajlayaw pi xla «wantiku nakinkgaxmatni tlan natawila chu nitu katilipekualh xlakata max wi tuku naʼakgspula» (Pro. 1:33; 3:25). Kaʼakxilhwi tuku xlakata.
«[JEHOVÁ] KIMAXKI IXTAXKGAKGET, Y WA KILAKGMAXTU»
3. ¿La litaxtu Jehová taxkgakget kkintijikan, pero tuku kilitlawatkan?
3 Akxni Biblia wan: «[Jehová] kimaxki ixtaxkgakget» kilhchanima tuku limaklakaskin Jehová xlakata nakatsiyaw xaxlikana (Sal. 27:1). Taxkgakget tlan kinkamasiyaniyan tuku anan ktiji xlakata nitu nakinkaʼakgspulayan. Pero taxkgakget ni makgenu tuku wi ktiji wa xlakata akinin kiliʼakxilhatkan ni natalakatsuwiniyaw niku wi tuku xkinkatlawanin tuku nitlan. Na xtachuna la uma Jehová kinkamasiyaniyan tuku lama kkakilhtamaku, chu kBiblia kinkawaniyan lhuwa tastakyaw nema putum kilhtamaku kinkamakgtayakgoyan, pero talakaskin nalilatamayaw tuku katsinimaw. Akxni chuna natlawayaw tlakg skgalala nawanaw chuna la tsokgli salmista: «Milimapakgsin [...] tlakg skgalala kintlawanit kituni ti kintasitsinij. [...] Akit kmakgachakgxinit tlan talakapastakni tlakg liwaka kituni wakg kimakgalhtawakgenanin» (Sal. 119:98, 99, 130).
4. 1) ¿Tuku xlakata David tlan wa «[Jehová] [...] kilakgmaxtuna»? 2) ¿Tuku kilhtamaku Jehová kilakgmaxtunakan nawan?
4 Xlakata tuku wan Salmo 27:1, max David xlakapastakaku tuku xtlawanit Jehová xpalakata. Akgtum liʼakxilhtit, Jehová lakgmaxtulh «xmakan león chu xmakan oso». Jehová namakgtayalh xlakata tlan xmakgnilh lanka Goliat. Alistalh lakgmaxtulh akxni mapakgsina Saúl xmakgniputun (1 Sam. 17:37, 49, 50; 18:11, 12; 19:10). ¡Wa xlakata David tlan wan pi Jehová xlakgmaxtunit: «[Jehová] [...] kilakgmaxtuna»! Akxni natawila «ntlanka tapatin» nema lakatsu wi, Jehová nakalakgmaxtu xlakskujnin chuna naʼakxilhkgo la David akxilhli: la xlakgmaxtuna (Apo. 7:14; 2 Ped. 2:9).
KALAKAPASTAKWI KILHTAMAKU AKXNI JEHOVÁ KINKAMAKGTAYAN
5, 6. 1) ¿La kinkamatliwakglhan akxni lilakapastakaw tuku titaxtunitaw? 2) ¿Tuku xlakata kinkamatliwekglhan akxni lakapastakaw la Jehová kamakgtayanit xkachikin makgasa?
5 Pulaktum tuku nakinkamakgtayayan nitu napekuanaw wa tuku wan Salmo 27:2, 3 (kalikgalhtawakga). David xlakapastaka kilhtamaku nema Jehová xmakgtayanit (1 Sam. 17:34-37). Akxni xlakapastaka uma xmatliwakglha akxni xtitaxtu tuku lu tuwa. ¿Chu wix? ¿Lakapastaka la Jehová makgtayanitan? ¿Matliwekglhkgoyan uma? Kawiliw akgtum liʼakxilhtit, ¿minit kilhtamaku tlawa lhuwa oración xlakata akgtum lanka taʼakglhuwit chu alistalh makgkatsi la Jehová maxkin liskgalala o litliwakga xlakata tlan xlakkaxtlawa? ¿O lakapastaka la lakkaxlalh tuku xtlawa pi nila skujni Dios, chu la uku tlan “lu naskujnaniya” xlakata tlakg nalichuwinana Dios? (1 Cor. 16:9.) ¿Tuku makgkatsiya akxni lilakapastaka uma tuku titaxtu? ¿Ni xlikana pi uma tlawa nakanajlaya pi Jehová tlan namakgtayayan xlakata nalakkaxtlawaya chu natayaniya akxni nakgalhiya lu tuwa taʼakglhuwit? (Rom. 5:3-5.)
6 ¿Tuku kilitlawatkan komo laklanka mapakgsinanin malakgsputuputunkgo xkachikin xtatayananin Jehová? Makgapitsi chuna tlawaputunkgo la uku, pero ni matlanikgo. Komo lakapastakaw la Jehová makgtayanit xkachikin makgasa, uma nakinkamakgtayayan natayaniyaw katuwa tuku nakinkaʼakgspulayan (Dan. 3:28).
LU XLAKASKINKA KAʼAKXILHTI XAXLIKANA TAKANAJLA
7, 8. 1) Chuna la wan Salmo 27:4, ¿tuku skinilh David Jehová? 2) ¿Tuku litaxtu templo xaʼespiritual xla Jehová chu la tamasta takaknin anta?
7 Atanu tuku na talakaskin wa napaxkiyaw xaxlikana takanajla (kalikgalhtawakga Salmo 27:4, NM). Akxni xlama David «xchik Jehová» tabernáculo xwanit. David lakkaxwililh putum tuku xtalakaskin xlakata xkgawasa Salomón tlan xtlawalh akgtum lu stlan chu lu lanka templo. Akglhuwa ciento kata alistalh, Jesús wa pi nialh xʼamaka kakninanikan Dios ktemplo (Juan 4:21-23). Hebreos capítulo 8 asta 10 apóstol Pablo wa pi tawi akgtum lanka templo xaʼespiritual kata 29 akxni xminita Jesús, akxni Jesús tamunulh xlakata natlawa xtalakaskin Jehová (Heb. 10:10). Uma lanka templo xaʼespiritual wa tuku Dios lakkaxwilinit xlakata tlan natalakatsuwiniyaw xlakata nakanajlaniyaw xtamakamastan Jesús nema kinkalakgmaxtuyan. ¿La kakninaniyaw Dios kʼuma templo? Akxni tlawaniyaw oración Jehová «xlipaks kinakujkan nkalilakgtalakatsuwiw» chu akxni nakalitachuwinanaw Dios amakgapitsin chu ni pekuanaw, akxni kamakgtayayaw amakgapitsin xlakskujni Dios ktamakxtumit chu akxni kakninaniyaw Dios kfamilia (Heb. 10:22-25). Xlakata paxkiyaw xaxlikana takanajla nakinkamakgtayayan naskujnaniyaw Dios kʼuma katuwa kakilhtamaku.
8 Xlikalanka Katiyatni, anankgo lhuwa xlakskujnin Jehová tiku ni makgxtakgkgo nema tlakg limaklakaskinkgo kilhtamaku xlakata nalichuwinankgo Dios, katsinikgo atanu tachuwin, chu ankgo alakatanu niku ni lhuwa latamanin lichuwinamakgolh xTamapakgsin Dios. Xlakata tuku tlawakgo limasiyamakgo chuna la salmista, chu kaj pulaktum tuku skinikgo Jehová: nakasikulunatlawa, chu chuntiya skujnaniputunkgo maski tuwa tuku natitaxtukgo (kalikgalhtawakga Salmo 27:6).
NALIPAWANAW XTAMAKGTAY JEHOVÁ
9, 10. ¿Tuku kinkawaniyan Salmo 27:10 pi nakinkamaxkiyan Dios?
9 Tuku wa David masiya la tlan nalipawanaw pi Jehová tlan nakinkamakgtayayan. Xla wa: «Maski kintiku y kintse ixkintamakgxtakgli, pero Kintiku Dios nakimakglhtinan y nakimakgtakgalha» (Sal. 27:10). Xlakata akxni likgalhtawakgayaw 1 Samuel capítulo 22, akinin katsiyaw pi xnatlatni David nikxni makgxtakgkgolh. Pero la uku lhuwa xlakskujni Dios kalakgmakgankgonit xfamiliajkan, chu tekgskgonit tamakgtay chu tiku nakakuentajtlawa anta kcongregación.
10 Jehová putum kilhtamaku skgalalh wi xlakata nakamakgtaya xlakskujnin chu maski wi tiku nakamakgxtakga xla nikxni chuna natlawa. Akgtum liʼakxilhtit, akxni lilipuwanaw xlakata la nakamaxkiyaw tuku maklakaskinkgo kifamiliajkan, kililakapastakatkan pi Jehová kinkamakgtayayan (Heb. 13:5, 6). Xla katsi tuku titaxtukgo chu tuku maklakaskinkgo xlakskujnin tiku nikxni makgxtakgkgo.
11. ¿Akxni lipawanaw Jehová tuku tlan naʼakxilhkgo amakgapitsin? Kawili akgtum liʼakxilhtit.
11 Kaʼakxilhwi tuku titaxtulh Victoria, tiku makgalhtawakgemakga kʼLiberia. Akxni xkgalhtawakgama xlakata tlan xtamunulh, xchixku makgxtakgli chu nachuna kgalhtutu xkamanan. Maski nialh xkgalhi chiki chu taskujut, chuntiya staktilha xtakanajla chu tamunulh. Ni lhuwa kilhtamaku titaxtulh, xtsumat nema kgalhi 13 kata tekgsli akgtum cartera nema xkgalhi lhuwa tumin. Xlakan ni xtiyaputunkgo, ni putlakgaputunkgolh uma tumin wata tunkun lakgankgolh soldado tiku xla xwanit. Soldado wa, komo putum latamanin xlikatsikgolh la xtatayananin Jehová tlakg tlan xtawilalh kakilhtamaku chuna ni xʼanalh taʼakglhuwit. Victoria masiyanilh soldado tuku wan Biblia xlakata la Dios nalimin akgtum xasasti kakilhtamaku. Xlakata soldado akxilhli pi nitu xtiyanit, tiyalh tumin chu maxkilh Victoria xlakata xmaspitnit tumin. Xlikana, tlan kalichuwinankan xtatayananin Jehová xlakata ni kgalhanankgo, chu lipawankgo pi Jehová tlan kamaxki tuku maklakaskinkgo.
12. ¿La limasiyayaw pi chuntiya lipawanaw Jehová maski namakgatsankgayaw tuku kgalhiyaw? Kawili akgtum liʼakxilhtit.
12 Kalakpuwanti tuku titaxtunit chu tuku makgkatsinit Thomas, chatum tiku lichuwinan Dios chu ni tamununit xalak Sierra Leona. ¿Tuku xtalakaskin xlakata kxokgonika? Xtalakaskin xtachuwinalh sacerdote tiku xpulalin taskujut kʼescuela. Xla wanilh pi tuku xkanajlakgo xtatayananin Jehová ni watiya tuku xkanajlakgo tiku xʼankgo kʼuma escuela chu wanilh Tomás pi xlaksakli xtaskujut o tuku xkanajla xlakata Biblia. Thomas makgxtakgli xtaskujut chu makgatsankgalh tumin nema ni xokgonikanit akgtum kata, chu tekgsli atanu taskujut, niku xkaxtlawakan radios chu teléfonos. Uma chu amakgapitsi liʼakxilhtit, limasiyakgo pi akxni lipawanaw kiMalakatsukinakan, Tiku kuenta tlawa xkachikin tlakg tliwakga nixawa tiku nakinkamakgapekuamputunkgoyan.
13. ¿Tuku xlakata tlakg talichuwinan Dios niku ni lhuwa tumin anan?
13 Lhuwa tiku lichuwinankgo Dios lamakgo niku lu tuwa pero chuntiya lu lhuwa skujnikgo Dios. ¿Tuku xlakata? Akgtum sucursal xla xtatayananin Jehová tsokgli: «Lhuwa tiku kalimakgalhtawakgekan Biblia ni kgalhikgo taskujut wa xlakata kgalhikgo lhuwa kilhtamaku xlakata nakgalhtawakgakgo. Natalan na tlakg kilhtamaku kgalhikgo xlakata nalichuwinankgo Dios. Latamanin tiku lamakgo kachikinin niku ni lu anan tumin, katsikgo pi lamaw xaʼawatiya kilhtamaku, xlakan akxilhkgo tuku nitlan lama». Kʼakgtum país, chatunu tiku lichuwinankgo Dios makgalhtawakgekgo kgalhtutu latamanin. Chatum misionero tiku akgkutiy kata lichuwinama Dios anta, tsokgli: «Xlakata tiku lichuwinankgo Dios ni lhuwa tuku kgalhikgo, tlakg limaklakaskinkgo xkilhtamakujkan xlakata nalichuwinankgo Dios chu xlakata nalimakgalhtawakganankgo Biblia».
14. ¿La nakamakgtaya Dios lhuwa latamanin tiku nalakgtaxtukgo?
14 Jehová wanit pi namakgtayanan, nakuentajtlawa chu nakalakgmaxtu xkachikin komo lipawankgo (Sal. 37:28; 91:1-3). Xlikana lhuwa latamanin tiku nalakgtaxtukgo akxni na sputa «ntlanka tapatin» (Apo. 7:9, 14). Wa xlakata katsiyaw pi umakgolh latamanin tiku nalakgtaxtukgo nakakuentajtlawakan xlakata ni nakamasputukan kxaʼawatiya kilhtamaku. Nakamaxkikan tuku maklakaskinkgo xlakata tlan natayanikgo tuku namin chu chuntiya tlan natalalinkgo Dios. Chu akxni natawila xaʼawatiya kilhtamaku Jehová nakuentajtlawa xkachikin.
«DIOS, KAKIMASINI TIJIA LATANI LAKASKINA NAKTLAWAN»
15, 16. ¿La kinkamakgtayayan tuku katsiniyaw kBiblia? Kalichuwinanti akgtum liʼakxilhtit.
15 Xlakata nitu napekuanaw talakaskin chuntiya kuenta natlawayaw tuku Dios kinkamasiyaniyan, chuna la kinkamasiyaniyan David kʼoración nema tlawalh: «Dios, kakimasini tijia latani lakaskina naktlawan, kakimpakgachipalipi nak xatlan tijia, latani ni kalijikua, porque lhuwa ti kintasitsinij» (Sal. 27:11). Akxni tlawayaw la skinaw kioracionkan chu kuenta tlawayaw tuku wan Biblia xlakata la Jehová pulalin xkachikin ni lu tuwa namakgkatsiyaw nakgalhakgaxmataw. Lhuwa natalan ni sakuakgo tumin akxilhkgonit la tlan kakitaxtuninit akxni kuenta tlawakgo, tastakyaw nema kinkawaniyan pi ni lhuwa tuku nakgalhiyaw kʼuma kakilhtamaku niku anan taʼakglhuwit xlakata tumin. Tiku ni lhuwa tuku kgalhiputunkgo, tlakg kgalhikgo kilhtamaku xlakata nalichuwinankgo Dios. Kinchatunukan kilitlawatkan uma takgalhskinin: «¿Tlan kstalani tastakyaw nema klikgalhtawakga kBiblia chu kʼamakgapitsi likgalhtawakga nema kinkamaxkiyan skujni xatalipaw chu xaskgalala maski natalakaskin wi tuku nakmakgxtakga?» (Mat. 24:45).
16 Komo mastayaw talakaskin Jehová nakinkamasiyaniyan chu nakinkapulalinan kxtiji nitu nalipekuanaw. Chatum precursor xalak Estados Unidos tsukulh skuja chu xkamakgtayalh putum xfamilia xlakata xlichuwinankgo Dios putum kilhtamaku, xpuxku wanilh pi nikxni xʼama tekgsa uma taskujut komo ni xʼalh universidad. Komo chuna xtiwanikanti, ¿xlakpuwanti pi ni tlan pi ni kgalhtawakga kaj xlakata limaklakaskinti uma kilhtamaku xlakata tlakg xlichuwinanti Dios? Titaxtukgolh akgtiy semanas, tiku xpulalin taskujut nialh anta skujli chu atanu tiku pulalilh taskujut chu uma kgalhskilh tala tuku xlakpuwanit natlawa. Wanilh pi xla chu xpuskat xlichuwinankgo Dios putum kilhtamaku xlakata xtatayananin Jehová xwankgonit chu chuntiya xtlawaputun. Akxni tala ni atanu tuku xwa xpuxku tunkun wanilh: «¡Xakkatsiya pi wix tanu la xlakapastaka! Akxni kintlat xnimaja, chatiy tiku na kanajlakgo la wix chali chali xʼankgo chu xkgalhtawakganikgo Biblia. Wa xlakata akit lakpuwa pi komo tlan xakmakgtayalh chatum xtatayana Jehová chuna xakama tlawa». Lichali tsisa, maxkika taskujut nema xapulana puxku ni maxkiputulh. Xlikana, akxni pulana wiliyaw xTamapakgsin Dios kilatamatkan, Jehová nakinkamaxkiyan tuku maklakaskinaw (Mat. 6:33).
TAKANAJLA CHU TAKGALHKGALHIN LU XLAKASKINKA
17. ¿Tuku nakinkamakgtayayan natayaniyaw tuku aku namin?
17 David limasiyalh pi takanajla chu takgalhkgalhin lu xlakaskinka akxni wa: «Kninita ixwaj, para ni xaktikanajlalh xlakata amakgtum nakpaxkatlikatsini ixtalakgalhaman kiDios, tiwalh klamajku nak kakilhtamaku» (Sal. 27:13). Wa xlakata, ¿la xwa kilatamatkan komo ni xkgalhiw takgalhkgalhin nema Dios kinkamaxkiyan chu ni xpatikatsiniw tuku lichuwinan Salmo 27? Tlan chuntiya natlawaniyaw oración Dios xlakata naskiniyaw kakinkamaxkin litliwakga chu nakinkakuentajtlawayan akxni namin Armagedón (kalikgalhtawakga Salmo 27:14).
[Takgalhskinin]
[Dibujo xla página 23]
David tatliwakgli akxni xlakapastaka la Jehová xlakgmaxtunit
[Dibujo xla página 25]
¿Akxnilhnita komo tlan limawakaya la lichuwinana Dios maski ni lhuwa tuku kgalhiya?
