Xatapaxuwan ankgolh skujkgo kʼEcuador

CHATUM kgawasa xalak Italia, tiku xtatayana Jehová, wanikan Bruno ni xkatsi tuku xʼama tlawa. Aku xtaxtunit kʼescuela chu lu tlan calificaciones maxtulh, wa xlakata xparientes chu xmakgalhtawakgenanin tsukukgolh wanikgo pi xʼalh kʼuniversidad. Pero nina makgas akxni xtamakamastaninit Jehová, liwana xlakapastaknit pi naskujni Dios wa tuku tlakg xlakaskinka xʼama wili kxlatamat. ¿Tuku tlawalh? Xla wan: «Ktlawanilh oración Jehová pi xakama lin kilatamat chuna la kwanilh akxni ktamakamastanilh, chu wa tiku pulana xakama wili kilatamat. Pero na kwanilh pi ni kaj pulaktum tuku xaktlawaputun, kwanilh pi pulaklhuwa la xakskujniputun».

 Ni lhuwa kata titaxtulh, Bruno alh kʼEcuador, anta kSudamérica. ¿Chu la kitaxtunilh? Xla wan: «Chuna la Jehová kgalhtilh kiʼoración tlakg tlan wa nixawa tuku xakskininit». Kaks lilakawa akxni chalh kʼEcuador, kalakgapasli lhuwa tiku na anta xʼankgonit xlakata tlan naskujnikgo Jehová.

LAKGKGAWASAN TIKU TLAWAKGO TUKU JEHOVÁ SKIN

Bruno, chuna la akglhuwa mil lakgkgawasan xlikalanka kakilhtamaku, tlawalh uma tuku Jehová wan: «Kakilaliʼakxilhwi, katlawatit litlan [...], nakmalaki akgapun chu xlikana nakkamaxkiyan tasikulunalin» (Mal. 3:10). Xlakata paxkikgo Jehová, tlan nawanaw pi liʼakxilhkgolh, akxni limaxtukgolh xkilhtamakujkan chu tuku kgalhikgo xlakata naskujnanikgo kʼakgtum país niku tlakg talakaskin nalichuwinankan Dios.

Akxni chankgo niku naskujnanikgo Dios, umakgolh natalan lakapala akxilhkgo pi «lhuwa tachananat, pero lakskujnin ni lu chalhuwa» (Mat. 9:37, NM). Kalichuwinaw Jaqueline, xalak Alemania, tiku lu xatapaxuwan tsokgnalh ksucursal xalak Ecuador: «Liwaka akgtiy kata kʼskujma unu chu kgalhkututu tiku kkamakgalhtawakge, chu kgalhatati ankgoya ktamakxtumit. ¡Lu klipaxuwa!» Chantal, xalak Canadá, kinkawaniyan: «Kkata 2008 kkalh kʼEcuador lakatsu kpupunu niku kaj akgtum congregación xʼanan. La uku wilakgolh akgtutu congregación chu liwaka puxamakaw precursores. ¡Lu lipaxuwakan akxni akxilhkan  la latamanin katsikgo xlakata Jehová! Nina makgas ktalakgpalilh chu kkalh atanu kachikin nema wi 2,700 metros xlitalhman chuna la wi pupunu. Maski anta lamakgolh 75,000 latamanin, kaj akgtum congregación wi. Latamanin lakgatikgo tamakatsin xlakata Dios chu akit lu klipaxuwa taskujut nema ktlawama».

TAYANIKGOLH TUKU TUWA TITAXTUKGOLH

Xlikana, skujkan kʼalakatanu país tuwa tuku titaxtukan. Asta makgapitsi lakgkgawasan titaxtukgolh tuku tuwa akxni xkachikin xwilakgolhku. Kayla, xalak Estados Unidos, wan: «Makgapitsi natalan xkiwanikgo pi max nitlan xʼama kinkitaxtuni. Ni xʼakgatekgskgo, o xtamakgachakgxi tuku xlakata xakamputun alakatanu país. Wa xlakata xmin kilhtamaku xaklakpuwan komo tlan tuku xaktlawaputun». Pero maski chuna, Kayla alh kʼEcuador. Xla wan tuku makgtayalh: «Lhuwa ktlawanilh oración Jehová chu kkatachuwinalh natalan lakpuskatin chu lakchixkuwin tiku tliwakga wi xtakanajlakan, chu uma kimakgtayalh nakatsi pi Jehová sikulunatlawa tiku xatapaxuwan ankgo skujnikgo niku tlakg talakaskima».

Amakgapitsi tuwa makgkatsikgo nakatsinikgo atanu tachuwin. Siobhan, xalak Irlanda, wan: «Lu nitlan xakmakgkatsi xlakata nila xakchuwinan. Kkatsinilh nakkgalhkgalhinan, tlakg klimaxtulh kilhtamaku nakkatsini tachuwin chu naklilitsin akxni wi tuku nitlan xakwan». Anna, xalak Estonia, wan: «Tuwa kmakgkatsilh naklismani lhkakna, pokgxni chu naklipaxa xakgawiwi chuchut, pero tuku tlakg tuwa kmakgkatsilh wa nakkatsini español. Makglhuwa ktaspitputulh kinpaís. Talakaskilh naklilakapastaka tuku tlan xaktlawama chu ni wa tuku nitlan xaktlawama».

Nachuna makgapitsi xlakapastakkgo xfamilia. Jonathan, xalak Estados Unidos, wan: «Akxni aku xakchanit niku kimalakgachaka, ktsukulh kalakapastaka kifamilia chu kiʼamigos. Pero xlakata lu xaklichuwinan Dios chu xakkgalhtawakga uma kimakgtayalh xlakata ni naklipuwan. Tuku tlan xaktitaxtu akxni xaklichuwinan Dios chu xasasti amigos nema ktekgsli kcongregación kimakgtayalh xlakata nakpaxuwapara».

Chuna la lamaka kkachikin niku ankgo na akgtum taʼakglhuwit. Beau, chatum tala xalak Canadá, wan: «Akxni wila kminkachikin, nipara kuenta tlawaya komo kgalhiya luz chu chuchut. Pero unu, makglhuwa ni kgalhiyaw chuchut chu  luz». Ni anan tumin, ni anan lakwan putlaw chu lhuwa ni ankgonit kʼescuela uma taʼakglhuwit anan klhuwa kachikinin nema aku stakmakgolh. Tuku makgtayanit Ines, xalak Austria, wa naʼakxilha xatlan tayat nema kgalhikgo latamanin. Xla wan: «Latamanin tlan kinkamakgamakglhtinankgoyan, tlan likatsikgo, makgtayanankgo, chu ni laklanka kamakgkatsikan. Chu tuku tlakg tlan lu katsiputunkgo xlakata Dios».

TASIKULUNALIN «ASTA AKXNI NIALH NAMAKLAKASKINA»

La akxilhnitaw umakgolh lakgkgawasan wi tuku makgxtakgkgolh xlakata tlan xʼankgolh skujnikgo Dios kʼEcuador. Pero akxilhkgonit pi Jehová tlan nakinkamaxkiyan «tlakg [...] ni xawa wantu skinaw, su akgatakgsaw» (Efe. 3:20). Xlakan wankgo pi Jehová makgantaxtinit tuku wan xlakata namasta lhuwa tasikulunalin «asta akxni nialh namaklakaskina» (Mal. 3:10). Kaʼakxilhwi tuku lakpuwankgo xlakata la skujnimakgolh Dios.

Bruno: «Akxni kchalh kʼEcuador, pulana kskujli niku lu lilakgatit kakiwin amazonas. Alistalh, makgtayanalh xlakata natamalanki sucursal, chu la uku anta kskujma. Akxni xakwi kʼItalia, klakapastakli pi pulana xakama wili Jehová, chu xla kimaxkinit akgtum lu lilakgatit latamat chu pulaklhuwa la kskujnit».

Beau: «Tlakg tlan ktalalin Jehová, xlakata kʼEcuador tlakg lhuwa kilhtamaku kskujni. Atanu tasikulunalin wa pi lakalhuwa niku klakgapasnanit chu wa uma tuku putum kilhtamaku xaklakaskin».

Anna: «Ni xaklakpuwan pi chatum tsumat la akit tlan xlilh xlatamat la chatum misionera. Pero la uku kkatsi pi tlan. Jehová kisikulunatlawanit, chu kpaxuwa xlakata tlan kamakgalhtawakge latamanin, chu kmakgtayanan akxni tlawakan Pukgalhtawakga xla xTatayananin Jehová chu kkgalhi xasasti amigos».

Elke: «Anta Austria, niku xala akit kskinilh Jehová xkimakgtayalh naktekgsa chatum tiku nakmakgalhtawakge. ¡Chu unu kgalhkukitsis tiku kamakgalhtawakge! Akxni kakxilha la latamanin lipaxuwakgo xlakata tlakg lakgapaskgo Dios lu tlan klimakgkatsi».

Joel: «Lu lilakgatit naskujniya Jehová niku ni lakgapasnana. Katsiniya tlakg nalipawana, chu lipaxuwaya akxni akxilha la Jehová sikulunatlawa mintaskujut. Akxni kmincha Estados Unidos, kaj kgalhchaxan tiku xlichuwinankgo Dios kgrupo niku kchilh; titaxtulh akgtum kata tipuxumatum xwanitaw, chu akxni talakapastakni akxni nilh Cristo 110 tamakxtumiw».

CHU WIX, ¿TUKU NATLAWAYA?

Komo wix xtatayana Jehová chu tlan skujniya Dios niku tlakg talakaskin tiku nalichuwinankgo Dios, ¿napina? Xlikana pi talakaskin liwana nalakpuwana akxni chuna natlawaya. Pero tuku tlakg talakaskin wa napaxkiya Jehová chu mintalataman. Komo paxkiya Jehová chu makgatsiya tuku taskin, wa uma tuku kawani kmioración Jehová. Nachuna, ¿tuku xlakata ni kawaniya minatlatni chu lakgkgolotsin xalak congregación? Max naʼakxilha pi wix na tlan namakgtayanana kʼuma lu xatlan chu xasanto taskujut.

[Tuku wan página 3]

«Ktlawalh lhuwa oración chu kkatachuwinalh natalan tiku tliwakga xwi xtakanajlakan, chu uma kliʼakxilhli pi Jehová kasikulunatlawa tiku skujniputunkgo.» (Kayla, xalak Estados Unidos)

[Dibujo chu recuadro xla página 6]

Tuku pulana militlawat xlakata tlan napina skujniya Dios kʼatanu país

• Kalismani akstu nakgalhtawakgaya

• Kaʼakxilhti tuku wan La Natlawayaw xTaskujut Dios xla agosto kata 2011, páginas 4 asta 6

• Kakatachuwinanti tiku skujkgonit kʼatanu país

• Kakatsini xlakata la lamaka ktama kachikin chu tuku titaxtukgonit

• Kakatsini tsinu tachuwin nema chuwinankan

[Dibujo chu recuadro xla página 6]

La tlan naxokgoya tuku tamaklakaskin

• Kaskujti makgapitsin papaʼ kminkachikin

• Karentarli minchik, o minegocio

• Kalimaklakaskinti Internet xlakata naskuja

[Dibujos xla páginas 4 chu 5]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)