«Akit akxtum ktawilan»
«Akit akxtum ktawilan»
«Lhuwa naputsananankgo, chu xaxlikana takatsin tlakg natalhuwi.» (DAN. 12:4)
¿TUKU XKGALHTINANTI?
¿La talakgatuminit «xaxlikana takatsin» kʼuma kakilhtamaku?
¿La katsinikgonit tuku xaxlikana lhuwa latamanin?
¿La talhuwinit xaxlikana takatsin?
1, 2. 1) ¿Tuku limasiya pi Jesús akxtum katawi kstalaninanin uku chu na nakatatawila kilhtamaku nema aku mima? 2) Xlakata tuku wan Daniel 12:4, ¿tuku xkitaxtulh komo liwana xlikgalhtawakgakgolh Biblia?
KALAKPUWANTI pi wila kParaíso. Chali chali takiya tlan makgkatsiya chu tsukuputuna tanu kilhtamaku. Nitu katsaniyan, xlakata nialh anan tajatat nema xʼanan pulana. Lu tlan akxilha, kgaxpata, kgankgawanana, kgalhwanana chu putum tlan xamaya. Kgalhiya lhuwa litliwakga xatapaxuwan tlawaya mintaskujut, kgalhiya lhuwa amigos chu nitu lilipuwana. Wa uma tuku nalipaxuwayaw xTamapakgsin Dios. Cristo Jesús, Mapakgsina tiku laksakkanit, nakasikulunatlawa tiku natapakgsinikgo chu nakamasiyani xtakatsin Jehová.
2 Dios nakatatawila xlakskujnin tiku nikxni makgxtakgkgo kilhtamaku nema aku mima akxni namasiyanikgo latamanin xlikalanka kakilhtamaku. Jehová chu xKgawasa nikxni makgxtakgkgonit xlakskujnin. Akxni nina xʼan kʼakgapun, Jesús kawanilh kstalaninanin pi akxtum xʼama katatawila (kalikgalhtawakga Mateo 28:19, 20). Xlakata nakanajlayaw uma tuku wa Jesús, kaʼakxilhwi tuku xlichuwinanit Biblia, liwaka akgtiy mil akgkitsis ciento kata kxamakgan Babilonia. Xlakata «xlikgalhsputat kilhtamaku» nema lamaw, palakachuwina Daniel tsokgli: «Lhuwa naputsananankgo, chu xaxlikana takatsin tlakg natalhuwi» (Dan. 12:4). Tachuwin xahebreo nema tamatitaxti «lhuwa naputsananankgo» kilhchanima akxni wi tuku liwana lakputsananiya. Wa xlakata, tiku liwana xkgalhtawakgakgolh Biblia xkgalhikgolh tasikulunalin pi xkatsikgolh tuku xaxlikana xlakata xTachuwin Dios. Tuku xlichuwinankanit na wan pi lhuwa tiku xʼama katsinikgo. Nachuna, uma takatsin lhuwa xʼama staka, xʼama takatsi kaniwa chu ni tuwa la xʼama katsinikan. Akxni naʼakxilhtilhayaw la nakgantaxtu uma tuku xlichuwinankanit, na naʼakxilhaw pi la uku Jesús akxtum katawi kstalaninanin chu pi Jehová tlan makgantaxti putum tuku lichuwinanit pi natlawa.
KGALHIKAN «XAXLIKANA TAKATSIN»
3. ¿Tuku akgspulalh «xaxlikana takatsin» akxni nikgolh apóstoles?
3 Akxni nikgolh apóstoles, tuku xlichuwinankanit xlakata tiku makgxtakgkgolh xaxlikana takanajla tlakg talhuwilh chu talakgatumilh la lhkuyat (Hech. 20:28-30; 2 Tes. 2:1-3). Siglos nema titaxtulh ni xʼanan «xaxlikana takatsin», nipara tiku xwankgo pi kstalaninanin Cristo. Maski xwankgo pi xkanajlakgo tuku wan Biblia, xpulalinanin tiku kaj wankgo pi kstalaninanin Cristo malakgatumikgolh taʼakgsanin, «xtamasiyunkan akgskgawinanin» nema ni tlan xlichuwinankgo Dios (1 Tim. 4:1). Chuna latamanin ni katsikgolh tuku xla Dios. Makgapitsi tuku nixaxlikana masiyakgolh wa pi Dios akgtum Trinidad, pi akxni niyaw wi tuku taxtu nema ni niy chu pi makgapitsi latamanin kamapatinikan kpupatin.
4. ¿La tsukukgolh putsakgo «xaxlikana takatsin» makgapitsi kstalaninanin Cristo kata 1870?
4 Pero akxni xtitaxtuma kata 1870, akxni xtsankga tipuxum kata xtsukulh «xaʼawatiya kilhtamaku», ni lhuwa kstalaninanin Cristo xalak Pensilvania (Estados Unidos) tamakxtumikgolh xlakata xkgalhtawakgakgolh Biblia chu xputsakgolh «xaxlikana takatsin» (2 Tim. 3:1). Akstu kalimapakuwika Xlikgalhtawakgananin Biblia, chu ni xlitaxtukgo «[xa]lakgskgalalan chixkuwin» tiku Jehová ni kamaxkilh uma tamasiyat, la wa Jesús (Mat. 11:25). Wa latamanin tiku ni lanka xkamakgkatsikan chu xtlawaputunkgo xtalakaskin Dios. Liwana likgalhtawakgakgolh, lilakapastakkgolh chu lichuwinankgolh Biblia. Na malakxtumikgolh tuku lichuwinan chu akxilhkgolh tuku xtsokgkgonit atanu latamanin tiku na xputsananikgonit Biblia. Tsinu tsinu, umakgolh Xlikgalhtawakgananin Biblia akgatekgskgolh tuku lhuwa siglos niti xkatsinit.
5. ¿Tuku xlakata tlawaka tratados nema xwanikan The Old Theology (Tuku xamakgan xlakata Dios)?
5 Maski Xlikgalhtawakgananin Biblia lu xpaxuwakgo xlakata tuku xkatsitilhamakgolh, ni mastakgolh talakaskin pi uma tuku aku xtakatsinimana xtlawalh pi lanka xkamakgkatsika chu ni wankgolh pi wi tuku xasasti xkatsinimakgolh (1 Cor. 8:1). Wata tlawakgolh makgapitsi tratados nema xkawanikan The Old Theology (Tuku xamakgan xlakata Dios) xlakata tiku xkgalhtawakgakgolh xkatsinikgolh tuku xaxlikana nema talichuwinan kBiblia. Xapulana tratado xlimin «tuku xlimakgtayanan nakgalhtawakgakan Biblia, xlakata nialh xkgalhika ni xatlan talismanin chu xkatsikgoka tuku xamakgan xlakata kiMalanakan chu xʼapóstoles» (The Old Theology, número 1 abril kata 1889, página 32).
6, 7. 1) Kkata 1870 asta la uku, ¿tuku xaxlikana kinkamakgtayanitan Jehová naʼakgatekgsaw? 2) ¿Tuku tlakg lakgati akxni lakgapasti tuku xaxlikana?
6 ¡Lhuwa tuku xatlan takatsinit uma liwaka akgtum ciento kata! * Uma tuku xaxlikana ni kajwatiya xlakata tiku kaj kgalhtawakgakgo tuku xla Dios. Wata tuku xatlan chu kinkalakgmaxtuyan, tlawakgo pi tlan namakgkatsiyaw, napaxuwayaw chu kinkamaxkiyan takgalhkgalhin. Kinkamakgtayakgoyan tlakg nalakgapasaw Jehová, chu tuku xla lakapastaknit natlawa. Nachuna kinkawaniyan tuku litaxtu Jesús, tuku xlakata latamalh la chixku chu nilh, chu tuku tlawama la uku. Uma tuku xaxlikana kinkamasiyaniyan tuku xlakata Dios masta talakaskin kaʼanalh tuku nitlan, tuku xlakata niyaw, la natlawayaw oración chu la tlan xlikana napaxuwayaw.
7 La uku akgatekgsaw tuku xlichuwinankanit nema «niti katsi[lh]» lhuwa mil kata chu kgantaxtumakgolh kʼuma xaʼawatiya kilhtamaku (Dan. 12:9). Wilakgo xliputum Biblia, pero tlakg talichuwinan kʼEvangelios chu libro xla Apocalipsis. Jehová kinkawaninitan tuku akinin nila akxilhaw, la akxni Jesús mapakgsina tlawaka, guerra nema analh kʼakgapun chu la tamakxtuka Satanás chu makaminka kKatiyatni (Apoc. 12:7-12). Dios na kinkamaxkinitan talakaskin naʼakgatekgsaw tuku akxilhaw, la guerras, la akxni tachiki tiyat, tajatat, ni anan lhuwa liwat chu latamanin tiku lixkajni likatsikgo tlawakgo pi nalatamayaw «xaʼawatiya kilhtamaku lu tuwa nawan» (2 Tim. 3:1-5, NM; Luc. 21:10, 11).
8. ¿Tiku malankiyaw xlakata putum tuku mastanit talakaskin nakgaxmataw chu naʼakxilhaw?
8 Akinin na makgkatsiyaw chuna la Jesús kawanilh kstalaninanin: «Taskulunatlawan milakgastapukan, xpalakata ntu wixin liʼukxilhatit. Xampi kkawaniyan, mpi lhuwa xpalakachuwinanin Dios, chu reyes, ukxilhputunkgolh wa ntu wixin ukxilhatit, na ni ukxilhkgolh; chu na tikgaxmatputunkgolh wa ntu wixin nkgaxpatatit, na ni tikgaxmatkgolh» (Luc. 10:23, 24). Kstalaninanin Jesús malankiyaw Jehová xlakata kinkamaxkiyan talakaskin naʼakxilhaw chu nakgaxmataw uma, chu na paxtikatsiniyaw xlakata kinkamalakgachanin «stakyawana» o makgtayana, espíritu santo xlakata nakinkapulalinan «ntu ntalulokgtat» (kalikgalhtawakga Juan 16:7, 13). Wa xlakata lu xlakaskinka kaʼakxilhwi «xaxlikana takatsin» chu kakamasiyaniw amakgapitsin.
LHUWA NAKATSINIKGO «XAXLIKANA TAKATSIN»
9. ¿Tuku tamakatsin taxtulh krevista xla abril kata 1881?
9 Abril kata 1881, akxni nina xchan akgtiy kata lata xtaxtunit xapulana revista, uma revista makatsininalh pi xtalakaskin akgtum mil tiku nalichuwinankgo Dios. Uma revista xwan: «Tiku tlan nalimaxtukgo itat xkilhtamakujkan xlakata naskujnikgo kiMalanakan, kkawaniputunaw [...] uma: kapitit klaklanka kachikinin chu laktsu kachikinin, chuna la wixin namatlaniyatit chu kalitaxtutit colportores o tiku lichuwinankgo Dios; chu kakaputsatit tiku xaxlikana kstalaninanin Cristo, umakgolh lu paxkikgo Dios, pero lhuwa tuku ni katsikgo; kakaputsatit xlakata nakamasiyaniyatit tuku lhuwa xtapalh xlakata xtalakgalhaman kinTlatkan chu tuku lu stlan masiya xTachuwin».
10. ¿Tuku tlawakgolh lhuwa latamanin akxni wanka pi xtalakaskin tiku xlichuwinankgolh Dios?
10 Uma tamakatsin limasiyalh pi Xlikgalhtawakgananin Biblia xkatsikgo pi tuku tlakg xlakaskinka xlitlawatkan kstalaninanin Cristo wa nalichuwinankgo xalakwan xalaksasti. Pero xlakata makatsininanka pi xtalakaskin akgtum mil tiku xlichuwinankgolh Dios lu lhuwa xwanit xlakata ama kilhtamaku kaj ni lhuwa cientos tiku xtamakxtumikgo. Pero akxni xlikgalhtawakgakgo maktum tratado o revista, lhuwa katsikgolh pi xaxlikana chu xatapaxuwan makgamakglhtinankgolh uma invitación. Kawiliw akgtum liʼakxilhtit, chatum chixku xalak Londres tiku likgalhtawakgalh nema la uku talilakgapasa Makatsinina chu maktum folleto nema xtlawakgonit Xlikgalhtawakgananin Biblia tsokgli uma kkata 1882: «Kakiwanitit tuku chu la naktlawa uma xasanto taskujut nema Dios lakaskin katatlawalh».
11, 12. 1) ¿Tuku xlakata tlan wanaw pi colportores na wa taskujut tlawakgolh la akinin? 2) ¿La xmatsukikgo colportores «clases» o congregaciones?
11 Kkata 1885 max xʼanan akgtutu ciento tiku Xlikgalhtawakgananin Biblia nema colportadores xwankgonit (o tiku xmakgpitsikgo likgalhtawakga la alistalh kalilakgapaska xaʼespañol). Umakgolh tiku xliputum kilhtamaku xlichuwinankgo Dios xtlawakgo taskujut nema akinin tlawayaw, xlakata latamanin kstalaninanin Jesucristo xwankgolh. Pero ni xtlawakgo la akinin tlawayaw. La uku chatunu chatunu tiku makgalhtawakgayaw chu alistalh kawaniyaw kaʼankgolh ktamakxtumit kcongregación. Kʼama kilhtamaku tiku colportores xwankgonit xmakgpitsikgo libros chu xkamamakxtumikgo putum tiku xkatsiputunkgo xlakata akxtum xkgalhtawakgakgolh Biblia. Ni xmakgalhtawakgekan chatunu chatunu, xtlawakgo tuku kalilakgapaska «clases» uma kilhchanima congregaciones.
12 Akgtum liʼakxilhtit, kata 1907, makgapitsi tiku xkalilakgapaskan colportores tlawakgolh akgtum campaña kʼakgtum kachikin niku putsakgolh tiku xkgalhikgoya colección xla libros La Aurora del Milenio (nema na xwanikan Estudios de las Escrituras). Uma revista wa: «Tiku katsiputunkgo xlakata Dios kamamakxtumika kʼakgtum aktsu tamakxtumit kʼakgtum chiki. Tantaku akgtum domingo colportor kawanilh tuku xlakapastaknit Dios xpalakata latamanin, chu atanu domingo kawanilh pi xtlawakgolh tamakxtumit akgatunu semana». Kkata 1991 talakgpalilh uma. Tipuxamakutsayan viajantes xmastakgo taʼakgchuwin xlikalanka Estados Unidos chu Canadá, xkamaxkikan xtukuwanikan chu xdireccionkan xla latamanin tiku xʼankgo tamakxtumit. Chu xlakkaxwilikgo xlakata xtamakxtumikgolh xchik chatum chu xtaxtukgolh xasasti «clases». Kkata 1914, xlikalanka Katiyatni xʼanankgo akgtum milh akgtiy ciento congregaciones xla Xlikgalhtawakgananin Biblia.
13. ¿Tuku lakgatiya xlakata la talakgatuminit «xaxlikana takatsin»?
13 La uku anankgo 109,400 congregaciones xlikalanka katiyatni, chu anta skujkgo 895,800 precursores. Atsinu ni chan akgtsayan millón latamanin katsikgonit «xaxlikana takatsin» chu makgantaxtimakgolh kxlatamatkan (kalikgalhtawakga Isaías 60:22). * Umakgolh números tlawakgo kaks nalilakawanaw akxni lilakapastakaw tuku wa Jesús xlakata kstalaninanin «na paks nakaxkajnikgoyan» kaj xpalakata xtukuwani chu xʼamaka kaputsastalanikgokan, xʼamaka katamaknukan kpulachin chu asta xʼamaka kamakgnikan (Luc. 21:12-17). Maski Satanás, xdemonios chu latamanin ni lakaskinkgo natatlawa uma, xlakskujni Jehová chuntiya tlawamakgo pi tlakg lhuwa latamanin kstalaninanin Jesús nawankgo. La uku lichuwinankan Dios «xlikatlanka nkatuxawat», kʼselvas, niku lu senan, niku lu lonkgnan chu niku tlakg lakgamakgat (Mat. 24:14). Nikxni chuna xtitlawaka komo ni xkamakgtayalh Dios.
«XAXLIKANA TAKATSIN» TALHUWI
14. ¿La talakgatuminit «xaxlikana takatsin» xlakata likgalhtawakga?
14 «Xaxlikana takatsin» talhuwinit xlakata lhuwa tiku lichuwinankgo xalakwan xalaksasti, pero na makgtayananit likgalhtawakga nema imprimirlikan. Julio xla kata 1879, Xlikgalhtawakgananin Biblia maxtukgolh xapulana revista nema wanika Zionʼs Watch Tower and Herald of Christʼs Presence (La Torre del Vigía de Sión y Heraldo de la Presencia de Cristo). Tatlawalh 6,000 likgalhtawakga xla uma revista nema kaj taxtulh kʼinglés. Tiku xpulalin uma taskujut Charles Taze Russell, tiku kaj 27 kata xkgalhi, chu namakgtayanankgolh kgalhkitsis tiku Xlikgalhtawakgananin Biblia tiku tliwakga xwi xtakanajla. Makatsinina taxtu 195 tachuwin. Wa revista nema tlakg tamakgpitsi xlikalanka kakilhtamaku uma tatlawa 42,182,000 xliʼakgtiy wa revista ¡Despertad! nema tatlawa 41,042,000 chu tatlawa 84 tanu tanu tachuwin. Nachuna akgatunu kata max imprimirliyaw 100 millón libros chu biblias.
15. ¿La taxokgo kilikgalhtawakgakan?
15 Uma lu lanka taskujut lixokgokan tumin nema xatapaxuwan maskiwinankan (kalikgalhtawakga Mateo 10:8). Uma tlawa pi kaks nalilakawankgo tiku lakgapaskgo la xlilhuwa tumin talakaskin xlakata imprentas, kapsnat, tintas chu atanu tuku tamaklakaskin. Chatum tala tiku tamawa tuku talakaskin kʼimprentaskan xla sucursales wan: «Lakchixkuwin tiku akxilhkgo imprentas nema kgalhiyaw kaks lilakawankgo akxni akxilhkgo xasasti máquinas nema kgalhiyaw chu laktlan edificios nema liwana tatlawanit chu kaj litlawakanit tumin nema xatapaxuwan maskiwinankan. Na kaks lilakawankgo akxni akxilhkgo pi tiku skujkgo kBetel lhuwa lakgkgawasan tiku lu paxuwakgo».
XTAKATSIN DIOS NAMATSAMA KATIYATNI
16. ¿Tuku xlakata tamalakgatumima «xaxlikana takatsin»?
16 «Xaxlikana takatsin» lu talhuwinit xlakata wi tuku tlan natatlawa. Xtalakaskin Dios wa pi «paks naʼakgaputaxtukgoy, chu nalakgapaskgoy wa ntalulokgtat», o tuku xaxlikana (1 Tim. 2:3, 4). Dios lakaskin pi latamanin nalakgapaskgo tuku xaxlikana xlakata nakakninanikgo chuna la xla lakaskin chu nakasikulunatlawa. Jehová kamastokga tiku wilakgolhku kkatiyatni nema naʼankgo kʼakgapun akxni masta «xaxlikana takatsin». Chu «tanu tanu kachikinin, laklanka kachikinin chu tanu tanu tachuwin» mamakxtumima «lhuwa tachixkuwitat» o lhuwa latamanin tiku kgalhkgalhimakgolh xliputum kilhtamaku nalatamakgo kʼakgapun (Apoc. 7:9).
17. ¿Tuku limasiya la xlilhuwa staknit xaxlikana takanajla?
17 Xlakata stakli xaxlikana takanajla uma akgtum ciento puxamakaw kata, liwana litasiya pi Dios chu Mapakgsina nema laksaknit, Jesucristo, kamakgtayama kstalaninanin chu kapulalima, kakuentajtlawama, kalakkaxwili chu kamasiyanima. Xlakata talhuwimakgolh na limasiya pi Jehová xlikana namakgantaxti uma tuku wanit: «Katiyatni nalitatsama xtamasiy Jehová chuna la chuchut litsama pupunu» (Is. 11:9). ¡Lu lanka tasikulunalin namakglhtinankgo latamanin ama kilhtamaku!
[Notas nema wilakgo kpágina]
^ párr. 6 Lu tlan nawan komo naʼakxilha DVD Los testigos de Jehová: una historia de fe viva. Parte 1: Salen de la oscuridad chu Los testigos de Jehová: una historia de fe viva. Parte 2: Dejan brillar su luz.
^ párr. 13 Kakxilhti página 320 xla libro Las profecías de Isaías, una luz para toda la humanidad II.
[Takgalhskinin]
[Dibujo xla página 6]
Xlikgalhtawakgananin Biblia ni lanka xmakgkatsikan chu xtlawaputunkgo xtalakaskin Dios
[Dibujo xla página 7]
Jehová xlakaskinka akxilha tuku tatlawa xlakata namalakgatumiyaw «xaxlikana takatsin»
