«Anan akgtum talakgalhaman xlakata mintaskujutkan»

MAPAKGSINA Asá kalima ksoldados xlakʼitat sipi. Taxtukgocha ksipi xalak Judea chu amakgolh xakaxtum lakatsu kpupunu. Akxni chankgo niku tlakg xakaxtum, Asá tachokgo, chu kaks lilakawan tuku akxilha. ¡Lhuwa soldados etíopes anta wilakgolh! Max akgtum millón soldados tiku xtalamakgasitsinkan, pero Asá kaj itat millón soldados kalin.

Xlakata liwana tasiya pi naʼanan guerra, ¿tuku pulana tlawa Asá? ¿Kamapakgsi xgenerales? ¿Kamatliwakglha xsoldados? ¿Nakamalakgachani carta xfamilia? Ni chuna tlawa. Xlakata lu tuwa tuku titaxtuma, tlawanilh oración Dios.

Pulana naʼakxilhaw la xlikatsi Asá, tuku xlakata tlawalh oración chu tuku lalh alistalh. ¿Tuku xlakata putsalh Dios? ¿Tlan xlipawan pi xʼama makgtaya? ¿Tuku kinkamasiyaniyan uma xlakata tasikulunalin nema kamaxki Jehová xlakskujnin?

¿LA XLIKATSI ASÁ?

Xtitaxtunita akgpuxam kata la xtapitsinit Judá chu Israel, akgtiy tamapakgsin xwankgonit, xalak Judá xkakninanikgo ídolos. Kkata 977 akxni nina xmin Cristo, Asá mapakgsina wa, tiku na xmakgtayanankgo kpumapakgsin xkakninanikgo dioses xla talakgxtumit xalak Canaán. Pero Biblia wan pi Asá «tlawalh tuku tlan, chu tuku xaʼakgstitum kxlakatin Jehová xDios. Wa xlakata kamapanulh pumakamastan xalak alakatanu kachikinin, niku katalhman chu laktukxli xasanto columnas chu katankamilh xasanto postes» (2 Crón. 14:2, 3). Chu katamakxtulh «lakchixkuwin tiku kstakgo xmakni ktemplo», chu xtatalakgxtumikgo xtachixkukan akxni xkakninanikgo xdioskan. Pero ni kajwatiya masputulh ni xaxlikana takanajla, na kalimapakgsilh kachikin pi «kaputsakgolh Jehová xDioskan xnatlatni xalamakgasa chu xmakgantaxtikgolh limapakgsin» (1 Rey. 15:12, 13; 2 Crón. 14:4).

Jehová lu tlan xakxilha pi Asá xtataya xaxlikana takanajla, chu sikulunatlawalh, akglhuwa kata ni kgalhilh taʼakglhuwit. Wa xlakata Asá wa: «Putsanitaw Jehová kiDioskan. Putsanitaw, chu xla tlawa tlan natawilayaw». Kachikin limaklakaskilh uma kilhtamaku xlakata xkaxtlawakgolh xpatsaps Judá. Biblia wan: «Tsukukgolh patsapsnankgo chu matlanikgolh» (2 Crón. 14:1, 6, 7).

GUERRA NEMA TLAWALH

Chuna la xlin xlatamat, ni kaks lilakawanaw pi putsalh Jehová akxni nina xʼan katalachipa lhuwa soldados nema talichuwinan kBiblia. Xkatsi pi Jehová kasikulunatlawa tiku kanajlanikgo. Tasaskinilh pi xmakgtayalh, xlakata xkatsi pi komo xlipawalh chu xmakgtayalh, nitu xtlawanikgolh maski lanka o tliwakga xtalamakgasitsin xwakgolh. Na xkatsi pi wa xtukuwani Jehová nitlan xʼamaka lichuwinankan, wa xlakata tlawalh uma oración: «Kakinkamakgtaya, oh Jehová kiDioskan, xlakata kkalipawanan, chu kmintukuwani nakatalachipayaw umakgolh lhuwa latamanin. Oh Jehová, wix kiDioskan. Ni kamasta talakaskin pi tiku kaj latamanin natlajakgoyan» (2 Crón. 14:11). Kitaxtulh la xwa: «Jehová, wix tiku talachipamakgon etíopes. Ni kamasta talakaskin pi tiku kaj lakchixkuwin natlajakgo minkachikin chu namamaxanikgo min tukuwani». Dios kgalhtilh xʼoración xlakata Biblia wan pi  «Jehová katlajalh etíopes kxlakatin Asá chu kxlakatin Judá, chu etíopes tsalakgolh» (2 Crón. 14:12).

La uku xlakskujnin Jehová na katalachipayaw lhuwa lu lakgtliwakga talamakgasitsin. Ni tiyayaw kilikankan chu anaw kʼguerra, pero liwana katsiyaw pi Jehová nakinkamakgtayayan natlajananaw komo ni makgxtakgaw chu malankiyaw xtukuwani. Akinin max na kgalhiyaw akgtum lanka talachipat, xlakata latamanin lixkajni linkgo xlatamatkan, akxni wi tuku nitlan tlawaputunaw o akxni wi tuku tlawaputun pi kaxlajwanalh xtakanajlakan kifamiliajkan. Maski tanu tanu la naliʼakxilhkan kintakanajlakan, oración nema tlawalh Asá kinkamatliwakglhan. Wa Jehová tiku tlajanalh, chu uma kinkamasiyaniyan pi Dios kamakgtaya tiku lipawankgo. Nipara chatum lataman tlan natlaja Jehová.

TACHUWIN NEMA MATLIWAKGLHNAN CHU AKGTUM TASTAKYAW

Akxni Asá xkitaspitma kʼguerra, palakachuwina Azarías alh lakgpaxtokga chu wanilh tachuwin nema matliwakglhnan chu akgtum tastakyaw: «¡Kakgaxpatti, o Asá chu putum Judá chu Benjamín! Jehová nakatatawilayan, kaj akxni wixin ni namakgxtakgatit; chu komo naputsayatit, namasta talakaskin natekgsatit; pero komo namakgxtakgatit, xla na nakamakgxtakgan». Alistalh wa: «Tliwakga kawantit chu ni kamajaxatit mimakankan, xlakata anan akgtum talakgalhaman xlakata mintaskujutkan» (2 Crón. 15:1, 2, 7).

Umakgolh tachuwin matliwakglha kintakanajlakan. Chuna, akxni skujnaniyaw chu ni makgxtakgaw Jehová nakinkatatawilayan. Akxni skiniyaw xtamakgtay liwana katsiyaw pi nakinkakgaxmatniyan. Azarías wa: «Tliwakga kawantit». Makglhuwa, talakaskin wi tiku nakinkamatliwakglhan chu ni napekuanaw xlakata natlawayaw tuku tlan, pero xlakata Jehová kinkamakgtayayan tlan natlawayaw.

Xlakata xnana o xtsiyuna Asá, tiku xwanikan Maacá, «xtlawaninit xalixkajni ídolo xasanto poste», Asá tlawalh pi xmakglhtika tuku xlakgaya kpumapakgsin. Chu lhkuyulh ama ídolo (1 Rey. 15:13). Jehová sikulunatlawalh xlakata ni pekualh akxni chuna tlawalh. Akinin na ni namakgxtakgaw Jehová chu namakgantaxtiyaw xlimapakgsin maski kifamiliajkan ni chuna natlawakgo. Komo ni makgxtakgaw Jehová nakinkasikulunatlawayan.

Tasikulunalin nema makglhtinalh Asá, akxilhli lhuwa israelitas tiku xwilakgolh ktamapakgsin xalak norte ankgolh kJudá. ¿Tuku xlakata chuna tlawakgolh? Xlakata akxilhkgolh pi Jehová xmakgtayama Asá. Lu xlakaskinka xʼakxilhkgo xaxlikana takanajla, wa xlakata makgxtakgkgolh xchikkan chu akxtum xkatatawilakgolh xlakskujnin Jehová. Wa xlakata, Asá chu putum Judá xatapaxuwan «lakkaxwilikgolh pi xʼamakgolh putsakgo Jehová, xDioskan xnatlatnikan xala makgasa xliputum xnakujkan chu xlatamatkan». Tuku tlan kitaxtulh, Dios «mastalh talakaskin natekgskgo; chu Jehová tlawalh pi tlan xtawilakgolh» (2 Crón. 15:9-15). ¡Lu lipaxuwayaw akxni akxilhaw pi latamanin tiku paxkikgo tuku xaʼakgstitum tatayakgo xaxlikana takanajla!

 Pero xtachuwin palakachuwina Azarías na kgalhi akgtum tastakyaw: «Komo namakgxtakgatit [Jehová], na nakamakgxtakgan». Nikxni chuna katlawaw, xlakata lu nitlan kitaxtu alistalh (2 Ped. 2:20-22). Biblia ni wan tuku xlakata chuna wanilh Asá, pero mapakgsina ni kgalhakgaxmatninalh.

«LU NITLAN TUKU TLAWANITA»

Akxni Asá puxamakuchaxan kata xmapakgsinamaja, mapakgsina Baasá xalak Israel lu nitlan tuku katlawanilh Judá. Akgtum liʼakxilhtit, stiliwililh kachikin Ramá nema wi akgtsayan kilómetros kxnorte Jerusalén, max xlakata tiku xtapakgsinikgo ni xtatayakgolh Asá chu xaxlikana takanajla. Ni skinilh xtamakgtay Jehová chuna xla xtlawanit akxni etíopes xkatalachipama, wata putsalh xtamakgtay latamanin. Malakgachanilh tamaskiwin mapakgsina xalak Siria chu wanilh pi xkatalachipalh tamapakgsin Israel. Akxni Siria makglhuwata xkatatlawanit guerra, Baasá makgxtakgli Ramá (2 Crón. 16:1-5).

Jehová limaklakaskilh Hananí xlakata nawani tuku nitlan tlawalh Asá. Asá xtilakapastakli la Jehová katlajalh etíopes chu pi «xlakgastapu lakputsama kxlikalanka katiyatni, la nalimaklakaskin xlitliwakga xlakata nakamakgtaya tiku xliputum xnaku [o anima] skujnanikgo». Max wi tiku nitlan stakyawalh Asá. O max lakpuwa pi Baasá chu xsoldados ni lu lakgtliwakga xwankgonit chu tlan xakstu xlakkaxtlawalh uma. Maski ni liwana katsiyaw, Asá ni lipawalh Jehová, wata kaj xtalakapastakni. Hananí wanilh: «Lu nitlan tuku tlawanita, la uku chu naʼanan lhuwa tiku natatlawakgoyan guerra» (2 Crón. 16:7-9).

Asá lu lisitsilh, asta tlawalh pi palakachuwina xwilika kcepo (2 Crón. 16:10). ¿Lakpuwa pi xlakata lhuwa kata lu tlan kskujnaninit Jehová, nila tiku kstakyawalh? ¿Xlakata kgolota xwanit nialh liwana xlakapastaknan? Biblia ni liwana wan.

Xtitaxtunita puxamakunajatsa kata la xmapakgsinanit Asá, pasalh tajatat kxtantun. Biblia wan «maski xtatatla ni putsalh Jehová, wata kaj makuchinanin». Uma litasiya pi nialh tliwakga xwi xtakanajla. Chu max asta chuna nilh, akxni xmapakgsinanita tipuxamatum kata (2 Crón. 16:12-14).

Pero xlakata lu tlan tayat xkgalhi chu lu xtataya xaxlikana takanajla, wa tuku tlan akxilhli Dios chu ni wa tuku nitlan tlawalh. Chuntiya skujnanilh Jehová (1 Rey. 15:14). Wa xlakata ¿tuku kinkamasiyaniyan xlatamat? Pi nalilakapastakaw la kinkamakgtayanitan Jehová makgasa, uma natlawa pi naputsayaw akxni nakgalhiyaw taʼakglhuwit. Na ni kalakpuwaw pi xlakata akglhuwata kata skujnaninitawa Dios, ni talakaskin nakinkalistakyawakanan Biblia. Komo tlawaw talakgalhin, Jehová nakinkastakyawayan, maski akglhuwata kata skujnanimaw. Xlakata nalitamakgtayayaw xtastakyaw, talakaskin namakgamakglhtinanaw chu ni tlanka namakgkatsiyaw. Chu kinTlatkan xalak akgapun akxtum nakinkatatawilayan komo ni namakgxtakgaw. Xlakgastapu Jehová akxilhma kKatiyatni chu putsama tiku ni makgxtakgkgo. Jehová limaklakaskin xlitliwakga xlakata nakamakgtaya. Chuna la makgtayalh Asá, nachuna natlawa kimpalakatakan.

[Tuku wan página 9]

Jehová natlawa pi natayaniyaw komo ni namakgxtakgaw

[Tuku wan página 10]

Talakaskin wi tiku nakinkamatliwakglhan chu ni napekuanaw xlakata natlawayaw tuku Jehová lakgati