Kalikatsitit la tiku tapakgsinikgo xTamapakgsin Dios
Kalikatsitit la tiku tapakgsinikgo xTamapakgsin Dios
«Akgstitum kalatapatit chuna lantla miniy.» (FILIP. 1:27, HUA XASASTI TALACCAXLAN, 1999)
¿TUKU XKGALHTINANTI?
¿Tiku tlan tapakgsinikgo xTamapakgsin Dios?
Xlakata xTamapakgsin Dios, ¿tuku xlakata kilikatsinitkan xtachuwin, la lakatsukulh chu xlimapakgsin?
¿La limasiyakgo tiku tapakgsinikgo Tamapakgsin pi paxkikgo xtastakyaw Dios?
1, 2. ¿Tuku xlakata xtastakyaw Pablo lu xlakaskinka xʼakxilhkgo congregación xalak Filipos?
APÓSTOL Pablo katsokgnanilh natalan xalak Filipos: «Akgstitum kalatapatit chuna lantla miniy nalatamakgoy wanti xlikana lipawankgoy Kimpuchinakan» (kalikgalhtawakga Filipenses 1:27). Tachuwin xagriego nema tamatitaxti xatotonaco «akgstitum kalatapatit» na kilhchanima tiku tlawa tuku taskin kkachikin niku tapakgsi. Uma tachuwin wi tuku xlakaskinka xkilhchanima xlakata ama congregación, xalak Filipos na xkamaxkikan talakaskin xtapakgsikgolh kRoma. Tiku xalak Filipos chu xtapakgsikgo kRoma, lu tlan xlimakgkatsikgo xlakata wi tuku tlan xkgalhikgolh nema ni xkgalhikgo atanu kachikin.
2 Pero natalan xalak Filipos wi tuku tlakg xlakaskinka xlipaxuwakgo. Pablo kamalakapastaknilh, natalan tiku xatalaksakni, xʼamakgolh tapakgsikgo «kʼakgapun» (Filip. 3:20). Xtapakgsinikgo xTamapakgsin Dios chu ni kaj xtamapakgsin chixku. Xlakata chuna lhuwa tuku tlan xkgalhikgolh (Efes. 2:19-22).
3. 1) ¿Tiku tlan tapakgsinikgo xTamapakgsin Dios? 2) ¿Tuku na akxilhaw kʼuma artículo?
3 Akxni kawanilh Pablo pi xtapakgsinikgolh xTamapakgsin Dios wa xkilhchanima tiku natamapakgsinankgo Cristo kʼakgapun (Filip. 3:20). Pero, na kilhchanima tiku natapakgsinikgo xTamapakgsin Dios kKatiyatni. ¿Tuku xlakata? Xlakata putum kstalaninanin Cristo tiku tamunukgonita, kaj chatum Mapakgsina skujnikgo, Jehová, chu na watiya limapakgsin nakgalhakgaxmatkgo (Efes. 4:4-6). La uku, lhuwa latamanin lu liskujkgo xlakata tlan natapakgsikgo kʼakgtum país niku tlakg anan tumin. Wa xlakata, ¡lu kapaxtikatsiniw pi kinkamaxkikanan talakaskin natapakgsiyaw kxTamapakgsin Dios! Xlakata tlakg napaxtikatsiniyaw uma talakgalhaman, kaʼakxilhwi tuku xtachuna taskin xlakata tlan tapakgsikan kʼakgtum país chu tapakgsikan kxTamapakgsin Dios. Alistalh naʼakxilhaw pulaktutu tuku kilitlawatkan xlakata tlan chuntiya natapakgsiyaw kxTamapakgsin Dios.
TUKU TASKIN XLAKATA TLAN NATAPAKGSIYAW KʼAKGTUM KACHIKIN
4. ¿Tuku uma xatlan tachuwin chu la «chuwinanaw»?
4 Nakatsiniyaw xtachuwinkan. Makgapitsi mapakgsinanin kaskinikgo tiku tapakgsiputunkgo kxkachikin, kachuwinankgolh tachuwin nema tlakg chuwinankan kpaís. Chu akxni tapakgsikgoya, makgapitsi akglhuwa kata kalini xlakata nakatsinikgo uma tachuwin. Max lakapala katsinikgo la tsokgkan, pero tuwa makgkatsikgo liwana nachuwinankgo. Na chuna, xTamapakgsin Dios kaskini tiku natapakgsinikgo kakatsinikgolh tuku Biblia wani «xatlan tachuwin» (kalikgalhtawakga Sofonías 3:9). ¿Tuku uma tachuwin? Wa xaxlikana xlakata Dios chu tuku lakapastaknit natlawa, nema wi kBiblia. “Nachuwinanaw” kilhchanima akxni kgalhakgaxmataw xlimapakgsin chu xtastakyaw Dios. Tiku tapakgsinikgo xTamapakgsin Dios max lakapala nakatsinikgo tuku tlakg xlakaskinka masiya Biblia. Pero akxni tamunukgonita, putum chuntiya naliskujkgo xlakata tlakg tlan nachuwinankgo xatlan «tachuwin». ¿La natlawayaw? Talakaskin pi putum chuntiya nalilatamayaw xtastakyaw Biblia.
5. ¿Tuku xlakata liwana kilikatsinitkan la kilhtsukulh xkachikin Jehová?
5 Nakatsiniyaw la kilhtsukulh. Tiku tapakgsiputunkgo kʼakgtum kachikin max xlikatsinitkan la kilhtsukulh. Na chuna tiku tapakgsiputunkgo kxTamapakgsin Dios, lu tlan pi lhuwa kakatsinikgolh xlakata uma Tamapakgsin. Kalakapastakwi akgtum liʼakxilhtit xlakata xamakgan Israel. Xkamanan Coré lu xpaxkikgo Jerusalén chu niku xkakninanikgo Dios chu xlakgatikgo xlichuwinankgo xkilhtsukut kachikin. Tuku kaks xlilakawankgo ni wa xlakata lu lilakgatit xtasiya, wata tuku xkilhchanima Jerusalén. Jerusalén wa xkachikin xwanit “lanka Rey” Jehová, xlakata anta xkakninanikan. Anta xmasiyakan xLimapakgsin chu wa Jehová xmapakgsina xwanit uma kachikin chu wa tiku limasiyanilh xtapaxkit nema ni makgxtakgnan (kalikgalhtawakga Salmo 48:1, 2, 9, 12, 13). ¿Na chuna likgalhtawakgaputuna chu lichuwinamputuna la kilhtsukulh xkachikin Jehová kKatiyatni? Akxni tlakg nakatsiniya xlakata xkachikin chu la Jehová makgtaya, tlakg nakanajlaniya xTamapakgsin Dios chu tlakg nalichuwinamputuna xalakwan xalaksasti xla xTamapakgsin (Jer. 9:24; Luc. 4:43).
6. ¿Tuku xlakata Jehová lakaskin pi nakatsiniyaw chu nakgalhakgaxmataw xlimapakgsin chu xtastakyaw?
6 Nalakgapasaw xlimapakgsin. Mapakgsinanin lakaskinkgo pi tiku tapakgsinikgo nakatsikgo chu nakgalhakgaxmatkgo xlimapakgsin país. Wa xlakata, Jehová na lakaskin pi nakatsiniyaw chu nakgalhakgaxmataw xlimapakgsin chu xtastakyaw, putum tiku natapakgsiniyaw kxTamapakgsin (Is. 2:3; Juan 15:10; 1 Juan 5:3). Makglhuwa xlimapakgsin latamanin ni makgtayanankgo chu ni akgstitum. Pero «ixlimapakgsin [Jehová] snun tlan» (Sal. 19:7). ¿Lipaxuwaya wix xlimapakgsin Dios chu chali chali likgalhtawakgaya Biblia? (Sal. 1:1, 2.) Kajwatiya nakatsiniyaw xlimapakgsin Dios akxni kiʼakstukan nalikgalhtawakgayaw. Nila achatum natlawa kimpalakatakan.
TIKU TAPAKGSINIKGO TAMAPAKGSIN PAXKIKGO XLIMAPAKGSIN DIOS
7. ¿Tukuya tlakg xatlan limapakgsin kinkapulalinan tiku tapakgsiniyaw Tamapakgsin?
7 Xlakata chuntiya natapakgsiniyaw xTamapakgsin Dios, ni kajwatiya nalakgapasaw xlimapakgsin, na napaxkiyaw. Kʼuma kakilhtamaku lhuwa latamanin wankgo pi kgalhakgaxmatkgo limapakgsin niku lamakgo. Pero akxni ni lakgatikgo chu lakpuwankgo pi niti kaʼakxilhma, lakatsalakgo limapakgsin. Makglhuwa kaj chuna tlawakgo xlakata “namakgapaxuwakgo” lakchixkuwin (Col. 3:22). Pero tiku tapakgsiniyaw xTamapakgsin Dios tlakg xatlan limapakgsin kinkapulalinan. Xatapaxuwan kgalhakgaxmataw xlimapakgsin Dios maski niti kinkaʼakxilhman. ¿Tuku xlakata? Xlakata paxkiyaw Tiku mastalh (Is. 33:22; kalikgalhtawakga Lucas 10:27).
8, 9. ¿La tlan nakatsiya komo xlikana paxkiya xlimapakgsin Dios?
8 ¿La nakatsiya wix komo xlikana paxkiya xlimapakgsin Dios? Kalakapastakti la makgkatsiya akxni maxkikana tastakyaw niku lakpuwana pi kajwatiya wix nalaksaka, xlakata la nalhakganana chu la natakaxtayaya. Akxni nina xtapakgsiniya Tamapakgsin, max ni kuenta xtlawaya la xlhakganana o komo xtlawa pi nitlan xlakapastakkgolh amakgapitsin. Pero akxni tlakg paxki Dios, tsuku lhakganana chuna la xmalankika xtukuwani (1 Tim. 2:9, 10; 1 Ped. 3:3, 4). La uku max akxilha pi tlan lhakganana. Pero komo chatum kgolotsin nawaniyan pi nitlan limakgkatsikgo la lhakganana makgapitsi natalan kcongregación, ¿tuku natlawaya? ¿Nalisitsiya? ¿Nalakgpaliya o chuntiya nalhakganana? Akgtum limapakgsin, tiku tapakgsinikgo Tamapakgsin nachuna xlitlawatkan la Cristo (1 Ped. 2:21). Chu xlakata uma apóstol tsokgli: «Chatunu nkin, wantu ntlan xlilat nkalimakgapaxuwalh wanti lakatsu litawi, lakimpi wa nalistaka kxtakanajla. Xampi wa nCristo, ni wa xakstu mpala tu xlimakgapaxuwakaj» (Rom. 15:2, 3). Xlakata ni naʼanan taʼakglhuwit, kstalanina Cristo tiku tliwakga wi xtakanajla xatapaxuwan lakgpali tuku wanikan chu tlakg xlakaskinka akxilha ni nasakgali xtalakapastakni natalan (Rom. 14:19-21).
9 Kaʼakxilhwi pulaktiy niku xlakaskinka kuenta natlawayaw: xlakata la akxilhaw talakgxtumit chu tamakgaxtokgat. Tiku ni tapakgsinikgo xTamapakgsin Dios max tlan akxilhkgo tiku tatalakgxtumi xtachixku o xtapuskat, o nalakpuwankgo pi akxilhkan tiku ni lhakganankgonit kaj lipaxuwakgo chu wankgo pi tiku akgskgawi xchixku o xpuskat chu lakxtlawakan tamakgaxtokgat chatunu chatunu nalaksaka. Pero tiku tapakgsinikgo xTamapakgsin Dios nialh kgalhikgo uma nitlan talakapastakni. Maski lhuwa xtlawakgo talakgxtumit xalimaxana akxni nina kstalanina Cristo xwankgonit, la uku akgatekgskgo, o tamakgachakgxi pi talakgxtumit chu tamakgaxtokgat xtamaskiwin Jehová. Lhuwa xtapalh akxilhkgo xlimapakgsin Dios chu liwana katsikgo pi tiku tlawakgo talakgxtumit xalimaxana nila natapakgsinikgo xTamapakgsin Dios (1 Cor. 6:9-11). Pero na katsikgo pi kinakujkan kinkaʼakgskgawiyan (Jer. 17:9). Wa xlakata paxtikatsinikgo pi kamaxkikan tastakyaw nema nakamakgtaya tlan nalinkgo xlatamatkan.
TIKU TAPAKGSINIKGO XTAMAPAKGSIN DIOS XLAKASKINKA AKXILHKGO TUKU KAWANIKAN
10, 11. ¿Tuku lu tlan tastakyaw masta xTamapakgsin Dios, chu la akxilha wix?
10 Mapakgsinanin makatsininankgo akxni nitlan wakan makgapitsi liwat chu likuchun nema kinkatlawaniyan tuku nitlan. Xlikana pi ni putum nitlan. Pero komo wi pulaktum nema lu nitlan, mapakgsina makatsininan xlakata nitu nalanikgo latamanin. Komo nichuna xtlawalh, xkuenta nawan mapakgsina tuku nala. Na chuna, xTamapakgsin Dios masta tastakyaw xlakata tuku ni kilitlawatkan kkilatamatkan chu kkintakanajlakan. Akgtum liʼakxilhtit, skujni xatalipaw akglhuwata kata kinkawaniman pi páginas xla Internet niku tasiya tiku ni lhakganankgonit, laktlawa xtakanajla tiku tapakgsinikgo xTamapakgsin Dios. ¡Lu paxtikatsiniyaw umakgolh tamakatsinin!
11 Nina makgas taxtukgolh makgapitsi páginas kʼInternet nema tlan limaklakaskinkan pero kuenta natlawayaw. Wa redes sociales, komo ni kuenta natlawayaw nitlan kinkakitaxtuniyan max xlakata nakalakgapasaw tiku nitlan nakatalalinaw (1 Cor. 15:33). Wa xlakata, xkachikin Jehová kinkamaxkiyan tastakyaw xlakata Internet. ¿Likgalhtawakganitata putum likgalhtawakga nema tlawakgonit skujni xatalipaw xlakata Internet? Komo xtanuw kʼuma página chu ni pulana likgalhtawakganitaw, kitaxtu la xwaw lu tliwakga likuchun chu ni pulana likgalhtawakgaw la wakan. *
12. ¿Tuku xlakata lu nitlan nalakatsalayaw tastakyaw?
12 Tiku ni kuenta tlawa xtastakyaw skujni xatalipaw nitlan kitaxtuni chu tiku kapaxki. Makgapitsi nialhla makgxtakgkgo akxilhkgo tiku ni lhakganankgonit o tlawakgo talakgxtumit xalimaxana chu lakpuwankgo pi Jehová ni kaʼakxilhma. ¡Lu nitlan komo lakpuwanaw pi tlan matsekgniyaw tuku tlawayaw! (Prov. 15:3; kalikgalhtawakga Hebreos 4:13.) Xtachuna la mapakgsinanin ni kamaxkikgo talakaskin natapakgsinikgo xkachikin tiku natlawa tuku nitlan, Jehová na ni katikamaxkilh talakaskin natapakgsinikgo tiku nalakatsalakgo xlimapakgsin chu ni namakgxtakga tuku nitlan tlawama (1 Cor. 5:11-13). * Pero xlakata lu lakgalhamanan, maklakaskin lakgkgolotsin xlakata nakamakgtaya tiku lakgalhinankgonit (Gál. 6:1). Tiku nialh tlawakgo tuku nitlan, tlan nakaʼakxilhpara Dios chu tapakgsiparakgo kxTamapakgsin (2 Cor. 2:5-8). ¡Lu tlan skujnikan Mapakgsina tiku lu paxkinan!
TIKU TAPAKGSINIKGO XTAMAPAKGSIN DIOS LU XLAKASKINKA AKXILHKGO TAKGALHTAWAKGA
13. ¿La limasiyakgo tiku tapakgsinikgo xTamapakgsin Dios pi xlakaskinka akxilhkgo takgalhtawakga?
13 Lhuwa mapakgsinanin liskujkgo xlakata namakgalhtawakgekgo tiku tapakgsinikgo. Akgtum liʼakxilhtit, tlawakgo escuelas xlakata nakamasiyanikgo nakgalhtawakgakgo, nakatsinikgo tsokgnankgo chu la naskujkgo xlakata natlajakgo tumin. Kstalaninanin Cristo xlakaskinka akxilhkgo uma tuku kamasiyanikan chu lakapala katsinikgo, pero tlakg xlakaskinka akxilhkgo tuku kamasiyanikan xlakata tlan natapakgsinikgo xTamapakgsin Dios. Kcongregación, Jehová tlawa pi kakatsiniw kgalhtawakgayaw. Chuna natlatni kawanikan pi kakgalhtawakganikgolh laktsu xkamanan. Chu akgatunu papaʼ skujni xatalipaw maxtukgo revistas Makatsinina chu ¡Despertad! nema takilhtinit kBiblia. Komo wix nalikgalhtawakgaya akgtutu o akgtati páginas chali chali, nalitamakgtayaya umakgolh likgalhtawakga nema masta Dios.
14. 1) ¿La kinkamakgalhtawakgekanan? 2) ¿Tuku tamakgtay limaklakaskinitata xlakata nakakninaniya Dios kfamilia?
14 Akgatunu semana kamakgalhtawakgekan tiku tapakgsinikgo xTamapakgsin Dios ktamakxtumit kcongregación. Akgtum liʼakxilhtit, Niku Masiyakan xlakata la Lichuwinankan Dios, liwaka tutupuxam kata, kamakgtayama tiku kgalhtawakgakgo xlakata tlan namasiyakgo xTachuwin Dios. ¿Tatsokgtawilanitata? Xaʼawatiya umakgolh kata, skujni xatalipaw chu xaskgalala wan pi lu xlakaskinka nakakninanikan Dios kfamilia. Uma takgalhtawakga tlawa pi tlan nalatalalinkgo familia. ¿Maklakaskinitata wix tuku lichuwinankgo likgalhtawakga xlakata uma? *
15. ¿Tuku lanka talakgalhaman kgalhiyaw?
15 Lhuwa tiku tapakgsinikgo mapakgsinanin tatayakgo akgtum partido político, chu ankgo skinkgo akgatunu chiki kakatatayaka. Pero tiku tapakgsinikgo Tamapakgsin, tlakg lhuwa chu xatapaxuwan ankgo lichuwinankgo Dios ktiji chu akgatunu chiki. Chuna la akxilhwi kxapulana kʼartículo, revista Makatsinina wa nema tlakg tamaʼakgpitsi, xlakata lichuwinan xTamapakgsin Jehová. Lanka talakgalhaman akxilhaw kalitachuwinanaw latamanin xTamapakgsin Dios. ¿Na lu makglichuwinana Dios? (Mat. 28:19, 20.)
16. ¿La nalimasiyayaw pi tapakgsiniyaw xTamapakgsin Dios?
16 Nialh makgas, kajwatiya xTamapakgsin Dios namapakgsinan kKatiyatni. Wa uma limapakgsin nakinkapulalinan kkilatamatkan. ¿Xatapaxuwan natapakgsiniyaw uma kilhtamaku? La uku talakaskin nalimasiyayaw. Putum tuku laksakaw natlawayaw kalimalankiw Jehová chu kalimasiyaw pi tapakgsiniyaw (1 Cor. 10:31).
[Notas nema wilakgo kpágina]
^ párr. 11 Kaʼakxilhti revista ¡Despertad! xla julio kata 2011, kpáginas 24 asta 27; xla agosto kata 2011, kpáginas 10 asta 13, chu xla febrero kata 2012, kpáginas 3 asta 9.
^ párr. 12 Kaʼakxilhti La Atalaya 15 xla marzo kata 2012, kpágina 30 chu 31.
^ párr. 14 Kaʼakxilhti Makatsinina 1 xla agosto kata 2011, páginas 30 chu 31, chu La Natlawayaw xTaskujut Dios xla enero kata 2011, kpáginas 3 asta 6.
[Takgalhskinin]
[Tuku wan página 14]
¿Kgalhakgaxpata wix tastakyaw nema masta Biblia xlakata Internet?
[Dibujo xla página 12]
Chuna la xkamanan Coré, ¿na paxkiya xaxlikana takaknin chu xkilhtsukut?
[Dibujo xla página 15]
Kakninanikan Dios kfamilia nakamakgtayayan xlakata natapakgsiniyatit Tamapakgsin
