¿Lakapastaka?

¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

¿Tuku pulana nala akxni nina min Armagedón?

Mapakgsinanin xalak kKatiyatni nawankgo uma tachuwin «ntakaksni [o tlan wilaw], nitu ntamakpuwan anan» (1 Tes. 5:1-3). Mapakgsinanin nakamasputukgo putum nixaxlikana takanajla (Apoc. 17:3, 15-18). Satanás natlawa pi mapakgsinanin na namalakgsputuputunkgo xtatayananin Jehová. Akxni uma kilhtamaku namin lisputni (1/3, página 9).

¿Wa xchixit Sansón xmaki litliwakga?

Ni wa xchixit xmaxki litliwakga. Xchixit xlimasiya pi Nazareo xwanit chu tlan xtalalin Jehová. Chu nialh tlan talalilh Jehová akxni Dalila akgsitli (1/4, página 15).

Chuna la kuenta tlawayaw nitu nalani kinakujkan, ¿tuku pulaktutu kilitlawatkan xlakata nakuentajtlawayaw naku nema lichuwinan Biblia?

1) Liwat. Xlakata kinakujkan ni natatatla talakaskin nawayaw tuku nakinkamatliwakglhan, nachuna talakaskin natlawayaw xlakata natatliwakglha kintakanajlakan. 2) Ejercicio. Akxni lu lichuwinanaw Dios makgtayanan tliwakga natawila kintakanajlakan. 3) Ni natlakgwan kintalakapastaknikan. Xlakata ni natlakgwan kintalakapastaknikan talakaskin lu tlan nakatalalinaw kinatalankan tiku lu kinkapaxkikgoyan (1/4, página 22).

¿Tukuya kilhtamaku limapakgsilh Jehová Noé katlawalh arca?

Biblia lichuwinan pi xkamanan Noé laklankata xwankgonit chu xtamakgaxtokgkgonita akxni Dios limapakgsilh Noé pi katlawalh arca. Jehová wanilh: «Ktatlawaman akgtum talakkaxlan, chu militanut kʼarca wix chu minkamanan chu mimpuskat chu xlakpuskatin min kamanan» (Gén. 6:9-18). Wa xlakata akxni Noé wanikan pi xtlawalh arca xtsankga max tipuxum o tipuxamakaw kata xlakata xmilh Munkaklat (1/4, página 25).

¿Tuku xlakata ni nalichuwinankan Salmo 116:15, akxni mastakan taʼakgchuwin akxni wi tiku niy?

Traducción del Nuevo Mundo wan: «Lhuwa xtapalh akxilha Jehová akxni nikgo tiku nikxni makgxtakgkgo». Uma wamputun pi Jehová lhuwa makgatsankganan akxni nikgo xlakskujnin tiku ni makgxtakgkgo. Xla ni katimastalh talakaskin pi putum xlakskujnin nakamasputukan unu kKatiyatni (1/5, página 12).

¿Tuku xlakata makgapitsi kstalaninanin Cristo ni tamakgaxtokgkgo?

Maski minkilhtamaku lhuwa latamanin lakpuwankgo natamakgaxtokgo, makgapitsi kskujni Jehová ni tamakgaxtokgkgo xlakata ni tekgskgo tiku xlakan tlan naʼakxilhkgo chu nachuna Dios. Amakgapitsi ni tamakgaxtokgkgo, chu uma kamaxki talakaskin tlakg naskujnikgo Jehová (1/5, página 17).

¿Tiku umakgolh «putum tamapakgsin» nema lichuwinan Daniel 2:44?

Wa tamapakgsin o mapakgsinanin, nema tanu tanu likan tuku litatlawanit imagen nema akxilhli Daniel (1/6, página 19).

¿Tuku masiya pi Biblia ni kaj atanu libro nema tsokgkgolh lakchixkuwin?

Biblia lhuwa lichuwinan tuku xwankanit pi nakgantaxtu. Tuku lanit masiya pi Biblia ni kaj cuento. Xlakata tuku lanit nachuna lichuwinan ciencia chu makgapitsi libros. Chu kinkamakgtayayan lu uku (1/7, páginas 4-8).

¿Tiku chuwinankgo Náhuatl chu tuku tatlawanit xpalakatakan?

Wa xtachuwin xalakgmakgan aztecas, chu akgtum millón aitat latamanin tiku chuwinankgo kMéxico. Xtatayananin Jehová lichuwinankgo xtachuwin Dios knáhuatl, chu makgapitsi kilikgalhtawakgakan na tlawakanit knáhuatl (1/7, páginas 13-14).

¿La tapati Dios tiku makgxtakga xtalakgalhin?

Jehová kawani: «Naktapati tuku nitlan tlawalh chu nialh naklakapastaka xtalakgalhin» (Jer. 31:34). Jehová tlan katapati xtalakgalhinkan xlakata xtamakamastan Cristo. Akxni Dios tapatinan nialh lakapastaka xlakata nalimalakgaxokgenampara (1/10, página 18).