¡Ni kakinkaʼakgskgawin Akgskgawini!
¡Ni kakinkaʼakgskgawin Akgskgawini!
«Katsalanitit xakgsiyut akskgawini.» (2 TIM. 2:26, BIBLIA DEL NUEVO MILENIO)
¿LA XKGALHTINANTI?
¿Tuku kilitlawatkan komo akxilhaw pi nitlan kalichuwinanaw amakgapitsin?
¿La kinkamakgtayayan xliʼakxilhtit Pilato chu Pedro xlakata ni napekuanaw chu ni natlawayaw tuku nakinkamatlawiputunkanan?
¿Tuku natlawayaw xlakata talakgalhin nema tlawanitaw makgasa ni nakinkamakgalipuwanan?
1, 2. ¿Tuku xliʼakgsiyat Satanás naʼakxilhaw kʼuma artículo?
AKGSKGAWINI kaputsastalani xlakskujni Jehová. Pero ni kamakgniputun, chuna la tlawa chatum talatna. Wata xastakna kachipaputun xlakata nakatlawani tuku xla katlawaniputun (kalikgalhtawakga 2 Timoteo 2:24-26).
2 Akxni chatum talatna xastakna chipaputun tantum animal, tlan pulaklhuwa liʼakgsiyat limaklakaskin. Akgtum liʼakxilhtit, max uma animal nataxtu niku kalakgwan chu kaj naʼakgsiya, o wi tuku akgtlapawili chu akxni animal natokglha kaj lakapala natatantuchi. Akgskgawini na lhuwa tuku limaklakaskin xlakata nakinkaʼakgchipayan. Xlakata ni nakinkaʼakgchipayan talakaskin skgalalh natawilayaw chu kuenta natlawayaw akxni tasiya pi talakatsuwinimaw xliʼakgsiyat. Kʼuma artículo naʼakxilhaw la nalakgtaxtuniyaw pulaktutu tuku limaklakaskinit Satanás chu tlan kitaxtuninit: 1) akxni akglakgwa chuwinankan, 2) tapekua chu wi tuku nitlan kinkamatlawiputunkanan chu 3) akxni nitlan limakgkatsiyaw kintalakgalhinkan. Chu kʼatanu artículo naʼakxilhaw apulaktiy tuku limaklakaskima.
SIMAKGAT LA LHKUYAT NEMA KUENTA KILITLAWATKAN
3, 4. ¿Tuku max nala komo ni kuenta natlawayaw kisimakgatkan? Kawili akgtum liʼakxilhtit.
3 Akxni tantum animal tatsekga kxlhuku, makgapitsi talatnanin mapasikgo lhkuyat xlakata nataxtu chu alistalh chipakgo. Tlan nawanaw pi Akgskgawini nachuna tlawa. Xla «mapasiputun lhkuyat» kcongregación xlakata naxlajwanan kintakanajlakan chu tlan nakinkaʼakgchipayan. ¿La tlan max nakinkaʼakgchipayan chu nipara nakatsiyaw?
4 Santiago kstalanina Cristo wan pi «simakgat, [...] lhkuyat» (kalikgalhtawakga Santiago 3:6-8). Komo ni kuenta tlawayaw tuku wanaw, max namatsukiyaw «lhkuyat» kcongregación. ¿La chuna nala? Kalilakapastakwi uma. Kʼakgtum tamakxtumit makatsininankan pi chatum tala natsuku liskuja precursora regular. Akxni sputa tamakxtumit chatiy natalan tsukukgo lichuwinankgo uma. Xapulana lipaxuwa tuku wanka chu lakaskin pi tlan nakitaxtuni. Xlichatiy lakpuwan pi uma tala kaj lakaskin xlakaskinka kaʼakxilhka. ¿Tiku xtalalimputuw? ¿Tiku max tlakg lakapala nalimatsuki lhkuyat ksimakgat anta congregación? Katsiyaw xtakgalhtin.
5. ¿Tuku kilitlawatkan xlakata kisimakgatkan ni namatsuki lhkuyat?
5 ¿La natlawayaw xlakata kintachuwinkan ni nalimatsukiyaw lhkuyat? Jesús wa: «Chixku wa lichuwinan kxkilhni wantu xtalakapastakni kgalhiy kxnaku[...]» (Mat. 12:34, Hua Xasasti Talaccaxlan, 1999). Wa xlakata pulana kaʼakxilhwi tuku wi kkinakujkan. Nialh kakasitsiniw amakgapitsin xlakata nitlan nakalichuwinanaw. Akgtum liʼakxilhtit, komo nakatsiyaw pi chatum kintalakan liskujma xlakata wi tuku nalakgayawakan kcongregación, ¿lakpuwanaw pi xatapaxuwan tlawama o kaj xlakata wi tuku lakaskin? Komo ni kalipawanaw amakgapitsin, kalilakapastakwi pi Satanás na xlimasiyaputun pi Job ni xlikana kskujnaniputun Dios (Job 1:9-11). Ni xlilat nitlan tuku nalakpuwanaw xlakata kintalakan, kilikatsitkan tuku xlakata nitlan lichuwinanaw. ¿Xlikana wi tuku tlawanit nema tlawa pi ni nalipawanaw? ¿O max nialh paxkinanaw chuna la tiku lamakgolh kxaʼawatiya kilhtamaku? (2 Tim. 3:1-4.)
6, 7. 1) ¿Tuku max natlawa pi nitlan nakalichuwinanaw amakgapitsin? 2) ¿Tuku kilitlawatkan komo wi tiku nitlan nakinkalichuwinanan?
6 ¿Tuku na natlawa pi nitlan nalichuwinanaw amakgapitsin? Max na lakaskinaw pi na kaʼakxilhka tuku tlawamaw o tlakg xlakaskinka litaxtuputunaw nixawa amakgapitsin, max asta nakamaktujuyaw. O max lakputsamaw tuku nawanaw xlakata ni tlawamaw tuku kilitlawatkan. Komo chuna tlawamaw kaj xlakata tlanka kinkamakgkatsikanan, lakgkatsaninanaw o lakpuwanaw pi nila tuku tlawayaw, lu nitlan nakitaxtu.
7 Min kilhtamaku max nalakpuwanaw pi xlilat nitlan nakalichuwinanaw amakgapitsin, komo chatum tala nitlan tuku kinkawanin o akglakgwa chuwinalh. Pero kalakapastakwi pi akxni wi tiku namalakgaxokgeyaw alistalh nitlan kitaxtu, kaj tlakg lanka nawan taʼakglhuwit. Nachuna, ni tlawamaw xtalakaskin Dios wata tlawamaw xtalakaskin Satanás (2 Tim. 2:26). Tlakg tlan natlawayaw chuna la Jesús: «Akxni ntimaxkajwalikgolh, ni titalakgalhtinalh [...]; wampi paks anta ntiwililh kxmakan wanti lu wa xlilat mputsanan» (1 Ped. 2:21-23). Liwana xkatsi pi Jehová xʼama lakkaxtlawa akxni xla xlakaskilh chuna la xlilat. Akinin nachuna kalipawaw. Akxni tlan limaklakaskinaw kisimakgatkan, makgtayayaw “ntu makxtum kinkalitlawanitan espíritu” kcongregación (kalikgalhtawakga Efesios 4:1-3).
KAMAKGXTAKGWI TAPEKUA CHU TUKU NITLAN KINKAMATLAWIPUTUNKANAN
8, 9. ¿Tuku xlakata Pilato mapakgsinalh namakgnikan Jesús?
8 Akxni tantum animal pati kʼakgsiyat nialhla tatsuwi. Nachuna akxni tiku pekuan chu matlawikan tuku nitlan nialh xakstu pulalin xlatamat (kalikgalhtawakga Proverbios 29:25). Kalichuwinaw chatiy lakchixkuwin tiku pekuankgolh chu tlawakgolh tuku kamatlawika, chu kaʼakxilhwi tuku kinkamasiyanikgoyan.
9 Mapakgsina romano Poncio Pilato xkatsi pi Jesús nitu xtlawanit, chu nitu xtlawaniputun. Asta wa: «[Ni]tu ntalakgalhin mpala nalimakgnikan kmakglhtakgsnit». Maski chuna, mapakgsinalh pi kamakgnika. ¿Tuku xlakata? Xlakata kapekuanilh latamanin (Luc. 23:15, 21-25). Latamanin pixlanka wanikgolh: «Lapi namakgaxtakga yuma nchixku, ni tatayaya wix César» (Juan 19:12). Max Pilato xlakpuwan pi namakglhtikan xtamapakgsin o asta xlatamat komo xmakgtayalh Cristo. Wa xlakata tlawalh tuku skinikgolh amakgapitsin chu chuna tlawalh xtalakaskin Akgskgawini.
10. ¿Tuku xlakata Pedro wa pi ni xlakgapasa Cristo?
10 Apóstol Pedro lu tlan xtalalin Jesús. Lichuwinalh xlakatin amakgapitsi pi Jesús wa Mesías (Mat. 16:16). Ni makgxtakgli Jesús akxni amakgapitsin ni liwana akgatekgsnikgolh tuku wa chu makgxtakgkgolh (Juan 6:66-69). Chu akxni xtalamakgasitsin chipakgolh xMakgalhtawakgena, maxtulh xʼespada chu xmakgtayaputun (Juan 18:10, 11). Pero alistalh pekualh chu wa pi ni xlakgapasa. Uma kilhtamaku lakchixkuwin tlawakgolh pi xpekualh (Mat. 26:74, 75).
11. ¿Tuku nitlan max nakinkamatlawiputunkanan?
11 Akinin kstalaninanin Cristo lhuwa tiku kinkamatlawiputunan tuku Dios ni lakgati. Kputaskujut max kimalanakan o tiku taskujaw natlawaputunkgo pi nakgalhananaw. O max chatum tiku taʼanaw kʼescuela kinkawaniyan kacopiaxtunaw kʼexamenes, kaʼakxilhwi tiku ni lhakganankgonit, kaxkuliw, kawaw droga, kawaw kuchu o katlawaw talakgxtumit nema ni xlitatlawat. ¿Tuku natlawayaw xlakata ni napekuanaw chu ni nakinkamatlawikanan tuku nitlan?
12. ¿Tuku kinkamasiyaniyan tuku tlawakgolh Pilato chu Pedro?
12 ¿Tuku kinkamasiyaniyan xlakata tuku tlawakgolh Pilato chu Pedro? Pilato ni lhuwa xkatsi xlakata Jesús, kaj watiya xkatsi pi ni xtachuna xwanit la amakgapitsin chu nitu xtlawanit. Pero uma mapakgsina tlankajwa xmakgkatsikan chu ni xpaxki xaxlikana Dios, wa xlakata Satanás lakapala akgskgawilh. Pero Pedro liwana xkatsi tuku xaxlikana chu xpaxki Dios. Pero milh kilhtamaku, lakpuwa pi putum tlan xtlawa chu ni xpekuan, wa xlakata ni tayanilh akxni kgalhilh taʼakglhuwit. Akgtum liʼakxilhtit, akxni xamakaja chipakan Jesús xla wa: «Maski paks lhtuj namakgaxtakkgoyan, [...] ni chuna nkit kakintiakgspulalh» (Mar. 14:29). Pedro tlan xtitayanilh taʼakglhuwit komo xtilipawa Jehová chuna la salmista tiku wa: «Kintikukan Dios kintalamaj, ni kjikuan. ¿Tuku tlan nakintatlawani lakchixkuwin?» (Sal. 118:6). Xaʼawatiya katsisni akxni latamalh unu kKatiyatni, Jesús taʼalh Pedro chu amakgapitsi xʼapóstoles kjardín xalak Getsemaní. Pero ni skgalalh tawilakgolh, wata xchatutukan lhtatakgolh. Jesús kamalakastakwanilh chu kawanilh: «Skgalalh katawilatit; chu na katlawatit mioraciónkan, lakimpi ni nakatokglhan wantu nitlan» (Mar. 14:38). Pero Pedro amakgtum lhtatapa chu alistalh pekualh chu nitlan tuku tlawalh.
13. ¿Tuku maklakaskinaw xlakata ni nakinkamatlawikgoyan tuku nitlan?
13 Tuku lichuwinankan xlakata Pilato chu Pedro wi atanu tuku lu xlakaskinka kinkamasiyaniyan: xlakata ni natlawayaw tuku nitlan talakaskin nakgalhiyaw xatakgatsin takatsin, ni tlankajwa nawanaw, ni nalakpuwanaw pi putum tlan tlawayaw, napaxkiyaw chu napekuaniyaw Jehová, chu ni lakchixkuwin. Komo kintakanajlakan takilhti kxatakgatsin takatsin, ni napekuanaw akxni nalichuwinanaw kintakanajlakan. Chuna ni nakinkamatlawikanan tuku nitlan chu ni napekuanaw. Xlikana, nikxni nalakpuwanaw pi kgalhiyaw lhuwa litliwakga, wata ni tlankajwa nawanaw, chu nalimasiyayaw pi maklakaskinaw xtamakgtay Dios. Kaskiniw Jehová kakinkamaxkin xʼespíritu chu tlakg kapaxkiw, uma natlawa pi nakgalhakgaxmataw xlimapakgsin chu natatayayaw xtukuwani. Na talakaskin pulana nalakpuwanaw tuku natlawayaw akxni nakinkamatlawiputunkanan tuku nitlan. Natlatni tlan natatlawakgo oración xkamanan chu nakamasiyanikgo tuku nakawanikgo xcompañeros akxni nakamatlawiputunkgo tuku nitlan (2 Cor. 13:7). *
NI KAMASTAW TALAKASKIN PI TUKU NITLAN TLAWAW MAKGASA NATLAWA PI NI TLAN NAMAKGKATSIYAW
14. ¿Tuku lakaskin Satanás nalakpuwanaw xlakata tuku nitlan tlawanitaw makgasa?
14 Min kilhtamaku, talatna chiwaka talhman akgtum chiwix o kiwi niku titaxtu tuku chipaputun. Akxni animal liʼakgchakgxa tasiw, kiwi o chiwix takta chu lakxkiti. Nachuna, akxni chatum kstalanina Cristo nitlan limakgkatsi tuku nitlan tlawanit tlawa pi lu “patinan” (kalikgalhtawakga Salmo 38:3-5, 8). Satanás lakaskin nalakpuwanaw pi Jehová nikxni nakinkatapatiyan chu nikxni tlan namakgantaxtiyaw xlimapakgsin.
15, 16. ¿Tuku natlawayaw xlakata ni nalakpuwanaw pi Dios ni kinkatapatiyan?
15 ¿La natlawayaw xlakata nialh nitlan nalimakgkatsiyaw talakgalhin nema tlawanitaw makgasa? Komo wix tlawanita akgtum lanka talakgalhin, kalakkaxtlawa xlakata tlan natalalipina Jehová. Kakaskini lakgkgolotsin namakgtayakgoyan (Sant. 5:14-16). Katlawa tuku natalakaskin xlakata nalakkaxtlawaya taʼakglhuwit (2 Cor. 7:11). Chu komo nastakyawakana, ni kaxlajwananti, xlakata tastakyaw limasiya pi paxkiyan Jehová (Heb. 12:6). Liwana kalakkaxwili pi nialh chuna natlawaya chu kaliskujti. Akxni makgxtakga tuku nitlan chu tlawaya tuku xatlan, kakanajla pi xtamakamastan Jesucristo tlan naxapa tuku nitlan tlawanita (1 Juan 4:9, 14).
16 Wilakgolh tiku chuntiya nitlan limakgkatsikgo talakgalhin nema tlawakgolh maski katapatikaja. Komo wix chuna titaxtupat, kalakapastakti pi Jehová tapatilh Pedro chu amakgapitsi apóstoles tiku makgxtakgkgolh xKgawasa akxni xla tlakg xkamaklakaskin. Chu na tapatilh chixku tiku xtamakxtukanit kcongregación xalak Corinto xlakata xtlawanit talakgxtumit nema ni xlitatlawat pero alistalh makgxtakgli (1 Cor. 5:1-5; 2 Cor. 2:6-8). Anta kxTachuwin Dios talichuwinan latamanin tiku maski tlawakgolh lanka talakgalhin, makgxtakgkgolh tuku nitlan xtlawamakgolh chu Dios katapatilh (2 Crón. 33:2, 10-13; 1 Cor. 6:9-11).
17. ¿La kinkamakgtayayan talakgmaxtut?
17 Komo xlikana nitlan limakgkatsiyaw chu makglhtinanaw xtalakgalhaman, Jehová nakinkatapatiyan chu nialh nalakapastaka kintalakgalhinkan. Nikxni kalakpuwaw pi xtalakgmaxtun Jesús nila kinkamakgtayayan. Komo chuna nalakpuwanaw, kinkaʼakgskgawiman Satanás. Maski Akgskgawini tanu tuku nawan, talakgmaxtut mapanu talakgalhin komo xlikana makgxtakgaw tuku nitlan tlawamaw (Prov. 24:16). Akxni kanajlaniyaw talakgmaxtut natlawa pi tlan namakgkatsiyaw chu nakinkamatliwakglhan xlakata xliputum kinakujkan, kilatamatkan chu kintalakapastaknikan naskujniyaw Dios (Mat. 22:37).
«MPALA KAJ NI KATSIYAW XTAKGSKGAWIMIN»
18. ¿Tuku kilitlawatkan xlakata ni nakinkaʼakgskgawiyan Satanás?
18 Satanás katuwa liʼakgsiyat limaklakaskin, xlakata kinkaʼakgchipaputunan. Pero nikxni kaj lakapala nakinkaʼakgskgawiyan xlakata «katsiyaw xtakgskgawimin» (2 Cor. 2:10, 11). Komo skiniyaw Jehová kakinkamaxkin liskgalala xlakata nalakkaxtlawayaw taʼakglhuwit, Akgskgawini nila nakinkaʼakgskgawiyan. Santiago wa: «Lapi ti wixin mpala tsankganiy [liskgalala], kaskinilh Dios, wa namaxkiy, wa cha nti ni xatalhkan maxkiy nkaxati kawaj, na ni nakinkakilhniyan ntu naskiniyaw» (Sant. 1:5). Xlakata Jehová nakinkamaxkiyan tuku skiniyaw, talakaskin naliskujaw chuna la tlawayaw oración, nalikgalhtawakgayaw xTachuwin chu nalilatamayaw tuku katsinimaw. Likgalhtawakga nema kinkamaxkiyan skujni xatalipaw chu xaskgalala liwana kinkamasiyanikgoyan tukuya taʼakgsiyat limaklakaskin Akgskgawini chu kinkawaniyan la ni napatiyaw.
19, 20. ¿Tuku xlakata naxkajniyaw tuku nitlan?
19 Akxni tlawayaw oración chu likgalhtawakgayaw Biblia, katsiniyaw paxkiyaw tuku xatlan chu xkajniyaw tuku nitlan (Sal. 97:10). Na kinkamakgtayayan nalakapastakaw tuku nitlan nakitaxtu akxni tlawayaw tuku nitlan (Sant. 1:14, 15). Chuna ni natalakatsuwiniputunaw xliʼakgsiyat Satanás wata naxkajniyaw.
20 ¡Lu paxtikatsiniyaw Jehová xlakata kinkamakgtayayan xlakata ni nakinkaʼakgskgawiyan Satanás! Dios limaklakaskin xʼespíritu santo, xTachuwin chu xkachikin, xlakata nakinkalakgmaxtuyan «ntu nitlan» (Mat. 6:13). Kʼatanu artículo naʼakxilhaw akgtiy liʼakgsiyat nema limaklakaskin Akgskgawini xlakata xastakna nakachipa xlakskujni Jehová.
[Nota nema wi kpágina]
^ párr. 13 Pulaktum tuku tlan natlawaya wa akxni nakatakakninaniya Dios kfamilia nakatalikgalhtawakgaya recuadro: «Estrategia contra la presión de grupo», kpáginas 132 chu 133 xla libro Lo que los jóvenes preguntan. Respuestas prácticas (volumen 2).
[Takgalhskinin]
[Dibujo xla página 21]
Komo ni kuenta tlawayaw tuku wanaw, max namatsukiyaw «lhkuyat» kcongregación
[Dibujo xla página 24]
Ni nalakpuwanaw pi Dios ni kinkatapatiyan
