Jehová kamamakxtumi xapaxuwana xkachikin
Jehová kamamakxtumi xapaxuwana xkachikin
«Kamamakxtumi kachikin, lakchixkuwin chu lakpuskatin chu kamanan chu tiku makgwi kmimpulataman.» (DEUT. 31:12)
¿LA XKGALHTINANTI?
¿Tuku xlakata wanaw pi laklanka tamakxtumit lu lakapastakkan xkachikin Jehová?
¿Tuku xmakgxtakgkgo lhuwa israelitas xlakata tlan xʼankgolh kpaskua nema xtatlawa kJerusalén?
¿Tuku xlakata kiliʼanatkan putum klaklanka tamakxtumit?
1, 2. ¿Tuku naʼakxilhaw xlakata laklanka tamakxtumit xla kstalaninanin Cristo?
AKGLHUWATA kata, xtatayananin Jehová tlawakgo laklanka tamakxtumit xaʼakgtutu kilhtamaku chu xaʼakgtati kilhtamaku. Max makglhuwa kilanitaw kʼumakgolh tamakxtumit akglhuwata kata.
2 Akglhuwata mil kata, xkachikin na xtlawakgo xasanto tamakxtumit. Akxni naʼakxilhaw tuku wan Biblia xlakata tamakxtumit nema kgalhiyaw la uku, kaʼakxilhwi tuku xtatlawa makgasa nema na tatlawa la uku chu la kinkamakgtayakgoyan akxni anaw (Sal. 44:1; Rom. 15:4).
LAKLANKA TAMAKXTUMIT XALA MAKGASA CHU XALA UKU NEMA KALAKAPASTAKAW
3. 1) ¿Tuku lalh kxapulana tamakxtumit kxkachikin Jehová nema takatsi pi tatlawalh? 2) ¿La xkamamakxtumikan israelitas?
3 Tamakxtumit nema tatlawalh xtantun sipi nema wanikan Sinaí, max wa xapulana nema tlawalh xkachikin Dios, tamakxtumikgolh xlakata xmakgamakglhtinankgolh xtamasiyat chu uma tamakxtumit wa nema tlakg xlakaskinka tatlawalh kxaxlikana takanajla. Uma lu xatapaxuwan kilhtamaku, Jehová kamaxkilh xLimapakgsin israelitas akxni limasiyalh xlitliwakga (Éx. 19:2-9, 16-19; kalikgalhtawakga Éxodo 20:18 chu Deuteronomio 4:9, 10). Uma tuku lalh tlawalh pi Jehová tlakg tlan xtalalilh Israel. Ni lhuwa kilhtamaku titaxtulh, Jehová lakkaxwililh la xʼamaka mastokgkan xkachikin: mapakgsilh Moisés pi xtlawalh akgtiy trompetas xla plata nema xʼamaka maklakaskinkan xlakata «putum» israelitas xtamakxtumikgolh «niku laktanukan niku tamakxtumikan» (Núm. 10:1-4). ¡Lu xpaxuwakgo tiku xʼankgo chu ni xmakgxtakgkgo Dios!
4, 5. ¿Tuku xlakata xlakaskinka tamakxtumit nema tlawakgolh Moisés chu Josué?
4 Akxni atsinu xmakgatsikgo tipuxum kata nema Israel latapulilh kdesierto, wi tuku lu xlakaskinka xtitaxtuma uma xasasti kachikin, Moisés kamamakxtumilh xnatalan israelitas. Nialh lhuwa xtsankga xtanukgolh kTiyat nema xKawanikanit Nakamaxkikan, chu xtalakaskin xkamalakapastaknika putum tuku Jehová xtlawanit xpalakatakan chu tuku aku xʼama tlawa (Deut. 29:1-15; 30:15-20; 31:30).
5 Max kʼuma tamakxtumit, Moisés lichuwinalh limapakgsin niku xwan pi kachikin xtamakxtumikgolh xlakata xkatsinikgolh xlimapakgsin Dios. Paskua xla Laktsu Chiki nema xtatlawa kata xla sábado, lakchixkuwin chu lakpuskatin chu tiku xalak atanu kachikinin tiku xmakgwilakgo kʼIsrael xlitamakxtumitkan xwanit niku Jehová xkawanilh. ¿Tuku xlakata? Biblia wan: «Xlakata nakgaxpatatit, wi tuku nakatsiniyatit, xlakata talakaskin nakgalhiniyatit tlan tapekua Jehová miDioskan chu natlawayatit putum tuku wan xlimapakgsin» (kalikgalhtawakga Deuteronomio 31:1, 10-12). Chuna, akxni lakatsukulh kachikin Israel liwana xtakatsi pi putum xlitamakxtumitkan xlakata xlikgalhtawakgakgolh xtachuwin chu tuku xlakaskin Dios. Akxni xwilakgolha kTiyat nema xkawanikanit pi xʼamaka Kamaxkikan, kachikin chuntiya xlimakgstilikgo kachikinin nema ni xkakninanikgo Jehová, Josué kamamakxtumilh israelitas xlakata xkawanilh pi nikxni xmakgxtakgkgolh Dios. Xlakan wankgolh pi putum kilhtamaku xʼamakgolh skujnikgo Jehová (Jos. 23:1, 2; 24:1, 15, 21-24).
6, 7. ¿Tuku xlakata lu xlakaskinka tamakxtumit nema kgalhikgonit xtatayananin Jehová xala uku?
6 Xkachikin Jehová xala uku na kgalhikgonit tamakxtumit nema lu lakapastakkan xlakata taskujut nema tatlawama xkachikin o wi tuku tlakg takatsilh xlakata Biblia (Prov. 4:18). Xapulana lanka tamakxtumit nema tlawakgolh xlikgalhtawakgenanin Biblia tatlawalh kkata 1919 kCedar Point (Ohio, Estados Unidos) akxni xtitaxtunita xapulana guerra nema tatlawalh xlikalanka katiyatni. Max kilakgolh akgtujun mil latamanin, chu anta tsukuka lichuwinankan Dios xlikalanka katiyatni. Kata 1922, akxni xtatlawama akgtum lanka tamakxtumit nema makgapalalh akgnajatsa kilhtamaku, kʼuma kachikin, Joseph F. Rutherford tlawalh pi tlakg natalichuwinan Dios akxni kawanilh tiku xtamakgstokgkgonit: «Nikxni kamakgxtakgtit chu xlikana xtatayananin Jehová kawantit. Chuntiyaku katlawatit taskujut asta akxni nialh tuku naʼan xlakata Babilonia xalanka. Kalichuwinantit Dios niku tlakg lakgamakgat chu tlakg kalichuwinantit. Kakilhtamaku xlikatsit pi Jehová wa Dios chu Jesucristo wa Mapakgsina xla mapakgsinanin chu xMalana malananin. Uma kilhtamaku tlakg xlakaskinka. ¡Kaʼakxilhtit, Mapakgsina mapakgsinamaja! Wixin tiku namakatsininanatit. Wa xlakata, kalichuwinantit, kalichuwinantit, kalichuwinantit Mapakgsina chu xtamapakgsin». Wa xlakata tiku anta xwilakgolh chu xlakskujnin Dios xlikalanka kakilhtamaku xatapaxuwan tlawakgolh uma taskujut.
7 Kkata 1931, kColumbus (Ohio), xLikgalhtawakgananin Biblia kawilinika xtukuwani xtatayananin Jehová. Kkata 1935, kWashington, tala Rutherford, lichuwinalh tiku xlitaxtukgo «lhuwa ntachixkuwitat» o latamanin, nema kʼApocalipsis wan pi wilakgolh «kxlakatin laktawilh mpumapakgsin, chu na kxlakatin nkalhnilu» (Apoc. 7:9-17). Kkata 1942 akxni xtlawamaka xliʼakgtiy lanka guerra xlikalanka kakilhtamaku, Nathan H. Knorr mastalh akgtum lu tlan taʼakgchuwin nema wanika, «Takaksni... ¿namakgapala?», anta lichuwinalh tiku «animal nkaj makgtsutsokgo», nema lichuwinan capítulo 17 xla Apocalipsis chu na lichuwinalh pi akxni ksputli guerra xtalakaskin lhuwa xlichuwinanka Dios.
8, 9. ¿Tuku xlakata makgapitsi lu laklanka tamakxtumit lu lhuwa analh tapaxuwan?
8 Lanka tamakxtumit nema wanika «Kachikinin nema Paxuwakgo», nema tatlawalh kkata 1946 kCleveland (Ohio), wa uma taʼakgchuwin nema tlakg xlakaskinka «Taʼakglhuwit xlakata wi tuku lakkaxtlawakan chu malankikan», nema mastalh Knorr. Chatum tiku kilalh ktamakxtumit uma tuku wa xlakata tapaxuwan nema analh: «Kkgalhilh talakgalhaman pi xakwi xchakgen tala Knorr ama katsisni, chu akxni xla xlichuwinama la kstakma taskujut chu xlichuwinama la namalankikan betel chu fábrica kBrooklyn, putum tiku xwilakgolh lhuwa tsukukgolh makgapakgxnankgo. Maski kplataforma ni xtasiya xlakankan, xtakgaxmata pi lu xpaxuwakgo». Kkata 1950, kʼakgtum tamakxtumit xaʼakgtutu kilhtamaku nema tatlawalh kNueva York, tiku kilakgolh kamaxkika Traducción del Nuevo Mundo de las Escrituras Griegas Cristianas, xapulana Biblia nema xtatlawama kʼatanu tachuwin chu wiliparaka xtukuwani Jehová nema xlitawilat kxTachuwin Dios (Jer. 16:21).
9 Na analh tapaxuwan kʼamakgapitsi tamakxtumit nema tlawakgolh xtatayananin Jehová akxni xkaputsastalanimaka chu xkamaxkikan talakaskin nalichuwinankgo Dios. Akgtum liʼakxilhtit, kʼAlemania, Adolf Hitler wa pi xʼama kamalakgsputu xtatayananin Jehová. Pero kkata 1955 tatlawalh kNúremberg akgtum lanka tamakxtumit niku 107,000 xtatayananin Jehová tamakxtumikgolh anta niku Adolf Hitler xkatatamakxtumi xsoldados. ¡Lhuwa tiku anta xwilakgolh lu paxuwakgolh! Anta kPolonia tatlawalh akgtutu tamakxtumit kata 1989 nema kawanika «Kakakninanitit Dios». Kilakgolh 166,518 tiku xala lakalhuwa kachikinin nema pulana xtapakgsikgo kʼUnión Soviética chu Checoslovaquia, chu na ankgolh tiku xala atanu kachikinin xala Europa del Este. Lhuwa nikxni xʼakxilhkgonit makxtum xwilakgo kgalhkukitsis o puxam xlakskujnin Dios. Kata 1993 tatlawalh akgtum lanka tamakxtumit xla akgtati kilhtamaku kKiev (Ucrania) nema wanika «Xtamasiyat Dios». Kaj kalakpuwanti la lipaxuwakgolh akxni tamunukgolh 7,402 latamanin, ¡uma kilhtamaku tlakg lhuwa tamunukgolh xtatayananin Jehová! (Is. 60:22; Ageo 2:7.)
10. ¿Tuku laklanka tamakxtumit lu kalakapastaka chu tuku xlakata?
10 Max anankgo laklanka tamakxtumit xaʼakgtutu o xaʼakgtati kilhtamaku nema tlakg lakapastaka. Xlikana, xapulana tamakxtumit nema kila o akxni tamunu wa nema tlakg xlakaskinka akxilha kmilatamat la kstalanina Cristo. ¡Putum kilhtamaku kalakapastakti uma tuku tlan titaxtu! (Sal. 42:4.)
LU XLIPAXUWAKGO TUKU XTLAWAKGO AKGATUNU KATA
11. ¿Tukuya paskua lakkaxwililh Dios pi xtlawakgolh israelitas akgatunu kata?
11 Jehová kawanilh israelitas pi xʼankgolh Jerusalén akgatunu kata xlakata xtlawakgolh akgtutu paskua: xla Tortas nema ni xkgalhi limaxkutin, xla Semanas (alistalh limapakuwika Pentecostés) chu xla Laktsu Chiki. Limapakgsin uma tuku xwan: «Makgtutu akgatunu kata putum lakchixkuwin naminkgo xlakatin Malana, Jehová» (Éx. 23:14-17). Lhuwa tiku xpulalinkgo familia xkatsikgo pi uma tamakxtumit lu xkamakgtaya kxtakanajlakan, wa xlakata putum xʼankgo (1 Sam. 1:1-7; Luc. 2:41, 42).
12, 13. ¿Tuku xtlawakgo lhuwa israelitas xlakata tlan xʼankgolh paskua nema xtatlawa akgatunu kata?
12 Kaj kalakpuwanti tuku xtalakaskin xtlawakgolh akgtum familia xalak Israel xʼankgolh niku xtamakxtumikgo. Akgtum liʼakxilhtit, José chu María xtalakaskin xtlawankgolh 100 kilómetros lata Nazaret asta Jerusalén. ¿La akglit kilhtamaku xtitamakgapali wix komo akxtum xkatapi laktsu kamanan? Tuku wan Biblia xlakata kilhtamaku akxni Jesús kajku kgawasa xwanit chu alh Jerusalén limasiya pi familias chu atanu tiku xlalakgapaskgo akxtum xʼankgo. Max lu tlan xtamakgkgatsi pi akxtum xʼankgolh, xtlawakgolh lhuwa liwat chu xtekgskgolh niku natamakgxtakgkgo niku ni xlakgapasnankgo. Pero ni katuwa xwanit uma kilhtamaku xlakata chatum aktsu kgawasa tiku xkgalhi 12 kata xmakgxtakgka xlakata xakstu xlatamalh. ¡Lu lhuwa tuku tlan xlakapastakkgolh, pero tlakg xʼamakgolh lakapastakkgo tiku lakgkgawasanku xwankgonit! (Luc. 2:44-46.)
13 Lhuwa israelitas xʼankgonit alakatanu kachikinin. Wa xlakata, tiku xʼankgo paskua xminkgo xala lakalhuwa kachikinin. Pentecostés xla kata 33 akxni xminita Jesús, judíos chu tiku xkanajlakgo chuna la judíos chankgolh kJerusalén chu xala makgat xwankgonit, makgapitsi xalak Italia, Libia, Creta, Asia Menor chu Mesopotamia (Hech. 2:5-11; 20:16).
14. ¿Tuku tasikulunalin xmakglhtinankgo israelitas akxni xʼankgo paskua akgatunu kata?
14 Israelitas tiku nikxni makgxtakgkgolh Dios, tuku tlakg xlakgatikgo wa pi xtakakninanikgo Dios akglhuwa mil tiku na xpaxkikgo. ¿La xmakgkatsikgo? Tlan katsiyaw tuku xmakgkatsikgo akxni likgalhtawakgayaw tuku Jehová xkawaninit pi xtlawakgolh kpaskua xla Laktsu Chiki: «Milipaxuwat kʼuma paskua, wix chu minkgawasa chu mintsumat chu miskujni chu puskat tiku skujniyan chu levita chu tiku kaj makgwi kmimpulatamat chu tiku ninit xtlat chu tiku ninit xchixku chu tiku wi xpulakni minchik. Akgtujun kilhtamaku napaskuajniya Jehová Dios niku Jehová nalaksaka, xlakata Jehová miDios nasikulunatlawayan xlakata putum tuku namakgalaya chu tuku mimakan litlawanita, chu xatapaxuwan militawilat» (Deut. 16:14, 15; kalikgalhtawakga Mateo 5:3).
LU XLAKASKINKA KAʼAKXILHWI LAKLANKA TAMAKXTUMIT
15, 16. ¿Tuku limakgxtakgnita wix xlakata tlan napina laklanka tamakxtumit? ¿Tuku xlakata tlan kitaxtulh?
15 Xlakskujni Dios xala uku tlan lhuwa tuku katsiniyaw xtachuna la laklanka tamakxtumit kpulana siglo. Xlikana, lhuwa tuku talakgpalinit pero tuku tlakg xlakaskinka chuntiya tatlawa. Kilhtamaku akxni xtsokgmakga Biblia lhuwa tuku xtalakaskin xlimakgxtakgkgolh xlakskujni Dios xlakata tlan xʼankgolh chu nachuna la uku; pero lu tlan kitaxtu akxni chuna tlawakan. Lu xlakaskinka xwanit xlakata nakakninanikan Dios chu la uku nachuna. Kinkamaxkiyan liskgalala chu takatsin nema maklakaskinaw xlakata tlan natalalinaw Dios. Kinkamakgtayayan nalilatamayaw tuku katsiniyaw, ni nakgalhiyaw taʼakglhuwit chu nalilakapastakaw wi tuku namakgantaxtiyaw nema natlawa pi tlan nalimakgkatsiyaw chu nikaj nalilipuwanaw (Sal. 122:1-4).
16 Tiku ankgo lu paxuwakgo. Tuku talichuwinalh xlakata akgtum lanka tamakxtumit kata 1946 wan: «Lu lipaxuw akxilhwi akglhuwa mil xtatayananin Jehová tiku liwana xtawilakgonit, chu tlakg lipaxuw akxni kgaxmatwi orquesta nema xtlawa xmakgkatsiw pi xtachiki niku xwilaw akxni xatapaxuwan xkilhtlikgo Jehová». Chu na wan: «Departamento xla Tiku xatapaxuwan Skujkgo lhuwa tiku xʼankgonit tatsokgtawilakgolh xlakata naskujkgo departamentos xlakata lipaxaw kskujnaniputunkgo xnatalan». ¿Wix na makgkatsinita uma tapaxuwan akxni anan laklanka tamakxtumit xaʼakgtutu o xaʼakgtati kilhtamaku? (Sal. 110:3; Is. 42:10-12.)
17. ¿Tuku talakgpalinit xlakata la tatlawa laklanka tamakxtumit la uku?
17 Wi tuku talakgpalinit xlakata la xtlawakan laklanka tamakxtumit. Akgtum liʼakxilhtit, makgapitsi kstalaninanin Cristo lakapastakkgo akxni tamakxtumit xmakgapalakgo akgtsayan kilhtamaku. Pulaktutu la xmakgpitsikan tsitsa, kakgotanun, o smalankgan, chu katsisni. Na xʼankan lichuwinankan Dios. Makgapitsi taʼakgchuwin xtsukukgo makgnajatsa hora tsisa, chu asta makgnajatsa hora katsisni xkgalhsputa. Tiku xmakgtayanankgo lhuwa skujkgo xlakata xtlawakgo liwat tsisa, tastunut chu kakgotanun xlakata xwayankgolh tiku xʼankgo. La uku laklanka tamakxtumit nialh lhuwa makgapalakgo, chu putum linkgo tuku nawakgo, chuna tlakg kuenta tlawakan tuku lichuwinamaka.
18, 19. ¿Tuku tlakg lakgatiya xlakata tamakxtumit chu tuku xlakata?
18 Tuku chuntiya tamatitaxti klaklanka tamakxtumit nema lu katsiputunaw. «Kxkilhtamaku nakamaxki tuku nawakgo» xlakata takanajla nema tlawa pi tlakg tlan naʼakgatekgsaw tuku xwankanit pi xʼama la chu tuku masiya Biblia, ni kaj kinkamaxkikanan akxni mastakan taʼakgchuwin klaklanka tamakxtumit, na kinkawanikanan klikgalhtawakga nema anta kinkamaxkikanan (Mat. 24:45). Uma likgalhtawakga makgtayakgo latamanin xlakata napaxkikgo tuku xaxlikana masiya Biblia. Dramas makgtayakgo lakgkgawasan chu tiku laklankata naʼakxilhkgo tuku nakamakgtaya ni nakgalhikgo taʼakglhuwit xla uma kakilhtamaku. Chu taʼakgchuwin xla tamunut kamakgtaya putum tiku anta wilakgo naʼakxilhkgo tuku pulana wilimakgolh xlatamatkan chu na lipaxuwakgo akxni akxilhkgo pi atanu latamanin tamakamastanikgo Jehová.
19 Makgasa asta la uku klaklanka tamakxtumit kakninanikan Dios. Kamakgtaya xlakskujni Jehová xlakata ni namakgxtakgkgo Jehová akxni kgalhikgo lhuwa taʼakglhuwit. Nachuna, matliwakglha kintakanajlakan, kalakgapasaw amigos, kinkamakgtayayan lu xlakaskinka naʼakxilhaw kinatalankan xlikalanka kakilhtamaku chu wa tuku limaklakaskin Jehová xlakata nakinkasikulunatlawayan chu nakinkakuentajtlawayan. Xlikana, putum akinin nalakkaxwiliyaw tuku natalakaskin xlakata naʼanaw tamakxtumit chu nalitamakgtayayaw (Prov. 10:22).
[Takgalhskinin]
[Dibujo xla página 30]
Lanka tamakxtumit xaʼakgtati kilhtamaku kata 1950 kNueva York
[Dibujo xla página 32]
Mozambique
[Dibujo xla página 32]
Corea del sur
