¿La nachin xlisputni uma kakilhtamaku?
¿La nachin xlisputni uma kakilhtamaku?
«Wixin [...], ni kapakglhtuta [o kapukswa] lapatit mpala kaj ni katikatsitit nakalakgchinan xtachuna nkgalhana.» (1 TES. 5:4)
¿TLAN XLICHUWINANTI UMA?
¿Tuku lichuwinankgo umakgolh versículos xlakata tuku aku nala?
Daniel 2:44
1. ¿Tuku nakinkamakgtayayan skgalalh natawilayaw chu natayaniyaw taʼakglhuwit?
XLAKATA kgantaxtumakgolh tuku xlichuwinanit Biblia, limasiya pi nialh makgas nala tuku lipekua kkakilhtamaku. ¿Tuku nakinkamakgtayayan skgalalh natawilayaw? Apóstol Pablo kinkawaniyan pi «ni wa nkin nkuintaj natlawayaw wa yuma nkatuwa ntu ntasiyuy, wampi wata wa yuma ntu nkaj ni tasiyuj». Xlikana, talakaskin nalilakapastakaw takgalhkgalhin nema kgalhiyaw, pi namakglhtinanaw latamat nema ni kgalhi xlisputni, kʼakgapun o kKatiyatni. Tuku Pablo tsokgli pulana chu alistalh limasiya pi xlakaskin kstalaninanin Cristo xlilakapastakkgolh tasikulunalin nema namakglhtinankgo tiku ni makgxtakgnankgo. Komo xlilakapastakkgolh uma, tlan xtayanikgolh taʼakglhuwit chu taputsastalanit (2 Cor. 4:8, 9, 16-18; 5:7).
2. 1) ¿Tuku kilitlawatkan xlakata kintakgalhkgalhinkan tliwakga natawila? 2) ¿Tuku naʼakxilhaw kʼuma artículo chu atanu?
2 Xtastakyaw Pablo wi tuku lu xlakaskinka kinkamasiyaniyan: xlakata kintakgalhkgalhinkan tliwakga natawila talakaskin pi ni kaj nalilakapastakaw tuku akxilhaw wata nalilakapastakaw tuku ni tasiya (Heb. 11:1; 12:1, 2). Wa xlakata, kʼuma artículo chu nema aku mima naʼakxilhaw pulakkaw tuku aku nala nema nakinkamakgtayayan namakglhtinanaw latamat nema ni kgalhi xlisputni.
¿TUKU NALA AKXNI ATSINU NATSANKGA NAMIN LISPUTNI?
3. 1) ¿Tuku lichuwinan 1 Tesalonicenses 5:2, 3 xlakata tuku aku nala? 2) ¿Tuku natlawakgo políticos chu tiku max nakamakgtayakgo?
3 Kʼakgtum carta nema Pablo kamalakgachanilh Tesalonicenses, lichuwinalh tuku pulana xʼama la (kalikgalhtawakga 1 Tesalonicenses 5:2, 3). Apóstol lichuwinan xlakata «xkilhtamaku nkimPuchinakan» Jehová, nema kilhchanima akxni namasputukan nixaxlikana takanajla chu nalisputa guerra xla Armagedón. Akxni atsinu tsanka nachin «xkilhtamaku nkimPuchinakan» Jehová, políticos tiku pulalinkgo kakilhtamaku nawankgo: «Anan ntakaksni, ni tu ntamakpuwan anan», max kilhchanima pulaktum o pulaklhuwa tuku nala. Laklanka kachikinin max nalakpuwankgo pi lakkaxtlawamakgolha taʼakglhuwit nema tlakg laktuwa kgalhikgo. ¿Chu tuku natlawakgo tiku pulalinkgo takanajla? Xlakata makgtapakgsikgo kkakilhtamaku, max nachuna nawankgo la políticos (Apoc. 17:1, 2). Komo chuna natlawakgo, nalitaxtukgo la nixaxlikana palakachuwinanin xalak Judá, tiku Jehová wa pi xwankgo: «¡Anan takaksni! ¡Anan takaksni!» (Jer. 6:14; 23:16, 17).
4. ¿Tuku liwana akgatekgsaw akinin nema latamanin ni akgatekgskgo?
4 Maski ni katsiyaw tiku nawankgo «anan ntakaksni, ni tu ntamakpuwan anan», uma tuku nala nalitasiya pi xkilhtamaku Jehová atsinu tsankga natsuku. Wa xlakata Pablo wa: «Natalanin, ni kapakglhtuta [o kapukswa] lapatit mpala kaj ni katikatsitit nakalakgchinan xtachuna nkgalhana akxni yama nkilhtamaku. Xampi paks xala kaxkgakgana wixin» (1 Tes. 5:4, 5). Akinin akgatekgsaw, o makgachakgxiya, tuku lu xlakaskinka lichuwinan Biblia xlakata tuku lama nixawa amakgapitsi latamanin. Pero ¿la nakgantaxtu uma tuku wankanit pi nala «anan ntakaksni, ni tu ntamakpuwan anan»? Talakaskin nakgalhiyaw xlakata naʼakxilhaw. Wa xlakata, “skgalalh katawilaw, chu liwana kalakapastakwi” (1 Tes. 5:6; Sof. 3:8).
CHATUM MAPAKGSINA NEMA LAKPUWAN PI NITU NAʼAKGSPULA
5. 1) ¿La natsuku «ntlanka takatsanajwat»? 2) ¿Tiku «tlanka puxku» ni liwana xlakkaxwilinit xlakata tlan nalakgtaxtu?
5 ¿Tuku nala alistalh? Pablo wa: «Akxni nawankgoy: “Anan ntakaksni, ni tu ntamakpuwan anan,” pus akxni lakapala nalakchinkgoy ntalakgsputni, xtachuna nkaj xalan min xtakatsanajwat». Xapulana tuku nala akxni «xalan min xtakatsanajwat» o lisputni wa pi namalakgsputukan «mpuskat» tiku sta xmakni «xatlanka Babilonia», uma kilhchanima nixaxlikana takanajla (Apoc. 17:5, 6, 15). Akxni natsukukan kamasputukan putum nixaxlikana takanajla chu na kilhchanima tiku kaj wankgo pi kstalaninanin Cristo, chuna nalitsuku «ntlanka takatsanajwat» (Mat. 24:21; 2 Tes. 2:8). Lhuwa nipara katikatsikgolh akxni nachin. ¿Tuku xlakata? Xlakata uma kilhtamaku puskat nema sta xmakni nitu lilipuwan, xlakata lakpuwan pi chatum «tlanka puxku» chu wan «na ni ukxni kaktilipuwaj». Pero kaj xalan nakatsi pi ni liwana xlakkaxwilinit xlakata tlan nalakgtaxtu. Kaj lakapala namalakgsputukan, «watiya akgtum kilhtamaku» (Apoc. 18:7, 8).
6. ¿Tiku namasputu nixaxlikana takanajla?
6 ¿Tiku natalachipa puskat tiku sta xmakni? Biblia wan pi wa «animal [o lapanit]» nema kgalhi «kgankaw xakgalokgot». Akxni likgalhtawakgaka libro xla Apocalipsis limasiya pi uma lapanit wa ONU, «kgankaw xakgalokgot» kilhchanima laklanka tamapakgsin nema tatayakgo uma «animal nkaj maktsutsokgo» (Apoc. 17:3, 5, 11, 12). * Xlikana namalakgsputukgo. Países tiku tapakgsinikgo ONU, namakgkgalhanankgo uma puskat, chu namasiyakgo la xlikana likatsi, nawakgo chu «na nalhkuyukan». Chu xlikana namasputukan (kalikgalhtawakga Apocalipsis 17:16).
7. ¿La namatsuki lapanit talachipat?
7 Biblia na lichuwinan la natsuku talachipat. Tlan nawanaw pi wa Jehová tiku natlawa pi mapakgsinanin «natlawakgo wa ntu Xla lakaskin» namasputukgo puskat tiku sta xmakni (Apoc. 17:17). Takanajla nema anankgo la uku wa tiku malakatsukikgo guerra xlikalanka kakilhtamaku, wa xlakata max laklanka kachikinin nakamasputuputunkgo. Tiku pulalinkgo política na lakpuwankgo pi xakstukan chuna lakpuwamakgo natlawakgo. Pero wa Dios tiku nakalimaklakaskin xlakata namasputukgo nixaxlikana takanajla. Kaj xalan tuku natalakgpali, pulaktu xkachikin Satanás namasputu apulaktu chu Akgskgawini nila tuku katitlawalh (Mat. 12:25, 26).
NAMASPUTUPUTUNKAN XKACHIKIN DIOS
8. ¿Tuku talachipat namatsuki «Gog xla xtiyat Magog»?
8 Akxni masputukanita nawan nixaxlikana takanajla, natasiya pi xlakskujni Dios «lu tlan la lamakgolh» chu «ni wi tuku kalimakgstiliwili» (Ezeq. 38:11, 14). ¿Tuku nakaʼakgspula umakgolh latamanin nema tasiyakgo pi niti kamakgtaya chu chuntiyaku nakakninanikgo Jehová? Max «lhuwa kachikinin» natalachipakgo uma kachikin. Biblia wan pi tiku matsuki uma guerra wa «Gog xla xtiyat Magog» wa kilhchanima Satanás (kalikgalhtawakga Ezequiel 38:2, 15, 16). ¿Pi xlilat nalilipuwanaw uma tuku nala?
9. 1) ¿Tuku tlakg xlakaskinka akxilhaw kstalaninanin Cristo? 2) ¿Tuku kilitlawatkan la uku xlakata namatliwakglhaw kintakanajlakan?
9 Xlakskujnin Dios ni lipekuanaw maski katsiyaw pi nakinkaputsastalanikanan. Ni wa lilakgaputsayaw xlakata la nalakgtaxtuyaw tuku tlakg xlakaskinka akxilhaw wa nasantujtlawayaw xtukuwani Jehová chu natakatsi pi wa lakgchan namapakgsinan. Jehová liwaka tutupuxam wa: «Xlikatsitkan pi akit Jehová» (Ezeq. 6:7; nota). Wa xlakata lakaskinaw pi kakgantaxtulh uma tuku lichuwinalh Ezequiel chu nachuna kanajlayaw pi Jehová katsi «lantla malakgtaxtikgoy ni tlan ktatlawaputu nti maxkikgoy nkakni» (2 Ped. 2:9). Pero la uku kamatliwakglhwi kintakanajlakan xlakata tlan nikxni namakgxtakgaw Jehová maski katuwa tuku natitaxtuyaw. Wa xlakata ¿tuku kilitlawatkan? Natlawayaw oración, nalikgalhtawakgayaw xTachuwin Dios, nalilakapastakaw chu nalichuwinanaw xalakwan xalaksasti xlakata Tamapakgsin. Chuna takgalhkgalhin pi nalatamayaw xliputum kilhtamaku tliwakga natawila la akgtum ancla (Heb. 6:19; Sal. 25:21).
KACHIKININ NAKATSIKGO TIKU JEHOVÁ
10, 11. ¿La natsuku Armagedón chu tuku nala kʼuma guerra?
10 Akxni nakatalachipakan xkachikin Dios uma nalitsuku tuku nitlan nala kkakilhtamaku. Jehová nalimaklakaskin Jesús chu ángeles xlakata nakamakgtaya xkachikin (Apoc. 19:11-16). Chuna natsuku guerra xla «ntlanka [x]kilhtamaku xliminat Dios nti mpaks kgalhiy xlitliwakga», nema na wanikan Armagedón (Apoc. 16:14, 16).
11 ¿Tuku nala kʼuma guerra? Jehová limaklakaskin Ezequiel xlakata nakimakatsiniyan: «Jehová tiku lakgchan namapakgsinan wan, naktalachipa akgtum espada [Gog] xliputum kinkasipijni. Tiku linatalan xakstukan nalalimakgnikgo xʼespadajkan». Lu napekuankgo tiku tatayakgo Satanás wa xlakata nialh nakatsikgo tuku natlawakgo chu xakstukan nalamakgnikgo. Akgskgawini na ni katilakgtaxtulh, xlakata Jehová wan: «Lhkuyat chu azufre nakkamalakgachani xla chu tiku tatayakgo chu lhuwa kachikinin tiku natatayakgo» (Ezeq. 38:21, 22). ¿Tuku nala xlakata Dios namakgtanu?
12. ¿Tuku nawankgo kachikinin?
12 Kachikin nakatsikgo pi tiku nakatlaja wa Jehová. Xtachuna la soldados xalak Egipto tiku kaputsastalanikgolh israelitas kXaspinini pupunu, xsoldados Satanás max nawankgo: «Jehová xlikana kamakgtayama» (Éx. 14:25). Kachikinin nakatsikgo tiku Jehová (kalikgalhtawakga Ezequiel 38:23). ¿La xlilhuwa kilhtamaku tsankga xlakata natsuku uma?
NI KATIʼANALH ATANU LANKA TAMAPAKGSIN
13. ¿Tuku katsiyaw xlakata xtantun imagen nema lichuwinan Daniel?
13 Pulaktum tuku lichuwinalh libro xla Daniel, kinkamakgtayayan nakatsiyaw tukuya kilhtamaku wilaw. Palakachuwina lichuwinan akgtum imagen nema tasiya la chixku chu litatlawanit tipalhuwa likan (Dan. 2:28, 31-33). Uma imagen kilhchanima lanka tamapakgsin nema xʼamakgolh tawilakgo chu wi tuku katlawanikgonit xkachikin Dios, Babilonia, Medopersia, Grecia, Roma chu xaʼawatiya wi la uku. Tuku xlichuwinankanit wan pi uma lanka tamapakgsin litamalakxtumikan xtantun o xtujun chu xlakstu tantun imagen. Akxni tlawaka xapulana guerra xlikalanka kakilhtamaku, Gran Bretaña chu Estados Unidos akxtum lakgolh. Wa xlakata xlipulakkitsis tuku litatlawanit imagen nema lichuwinalh Daniel kilhchanima lanka tamapakgsin angloamericana. ¿Tuku kilhchani pi tantun wa tuku awatiya kgalhi uma imagen? Pi nialh katilakatsukulh atanu lanka tamapakgsin. Nachuna tantun chu laktsu tantun nema litatlawanit hierro chu tiyat limasiya pi uma lanka tamapakgsin angloamericana ni lu tliwakga.
14. Akxni natsuku Armagedón, ¿tukuya lanka tamapakgsin namapakgsinan?
14 Daniel na lichuwinan pi ksipi kaktikan akgtum lanka chiwix. Chiwix kilhchanima xTamapakgsin Dios chu sipi kilhchanima pi Jehová lakgchan namapakgsinan. Chiwix kaktika kkata 1914, chu lakapala talakatsuwinima kxtantun uma imagen. Anta kʼguerra xla Armagedón, nalakxtlawakan tantun chu putum imagen (kalikgalhtawakga Daniel 2:44, 45). Wa xlakata akxni natsuku Armagedón, lanka tamapakgsin nema natawila wa angloamericana. ¡Lu nalipaxuwayaw akxni naʼakxilhaw la nakgantaxtu uma tuku xwankanit! * Pero ¿tuku natlawani Jehová Satanás?
LA NAMASPUTU JEHOVÁ XAPUXKU XTALAMAKGASITSIN
15. ¿Tuku natlawanikan Satanás chu demonios akxni nasputa Armagedón?
15 Pulana, Satanás naʼakxilha la namasputukan putum tuku lakkaxwilinit kKatiyatni. Alistalh xla na namalakgaxokgekan. Apóstol Juan wan tuku naʼakgspula (kalikgalhtawakga Apocalipsis 20:1-3). Jesucristo ángel tiku kgalhi «limalakkin ntu limalakkikan mpulhman» nachipa Satanás chu xdemonios, nakamalakgacha niku kapulhman chu anta nakamakgxtakga akgtum mil kata (Luc. 8:30, 31; 1 Juan 3:8). Chuna natsukukan akxkitikan luwa (Gén. 3:15). *
16. ¿La natawila Satanás akxni namalakgachakan niku «mpulhman»?
16 ¿Tuku kilhchanima «mpulhman» niku namalakgachakan Satanás chu xdemonios? Tachuwin xagriego nema limaklakaskilh Juan kʼuma texto wa ábys-sos nema kilhchanima «niku nila katsikan la xlikapulhman» o «niku nila chankan kxtampun». Wa xlakata kilhchanima niku niti la chan kajwatiya Jehová chu ángel tiku maxkinit «limalakkin ntu limalakkikan mpulhman». Anta Satanás nila tuku natlawa xtachuna la xanin natawila xlakata nialh nakamatlawi latamanin tuku nitlan. ¡«Xatsinksni lapanit» nialh la tuku natlawa! (1 Ped. 5:8.)
WANTUKU PULANA NALA XLAKATA ALISTALH NAʼANAN TAKAKSNI
17, 18. 1) ¿Tuku akxilhnitaw nema aku nala? 2) Akxni titaxtunita nawan uma, ¿tuku xasasti latamat natsuku?
17 Nialh makgas wi tuku nala nema kakilhtamaku kaks nalilakawan. Akxilhputunaw akxni nawankan: «Anan ntakaksni, ni tu ntamakpuwan anan». Alistalh naʼakxilhaw la namalakgsputukan Babilonia xaLanka, guerra nema namatsuki Gog xla Magog chu guerra xla Armagedón. Alistalh Satanás chu xdemonios nakamalakgachakan niku kapulhman. Akxni nialh naʼanan tuku nitlan, xasasti latamat natsuku: akxni Cristo Namapakgsinan Akgtum Mil Kata chu ama kilhtamaku xlikana «snun lipaxaw natalatamaj» (Sal. 37:10, 11).
18 Akxilhnitawa pulakkitsis «ntu nkaj ni tasiyuj» pero talakaskin «nkuintaj natlawayaw» umakgolh. Kʼartículo nema aku mima naʼakxilhaw a pulakkitsis tuku aku nala.
[Notas nema wilakgo kpágina]
^ párr. 6 Kaʼakxilhti libro Apocalipsis... ¡se acerca su magnífica culminación!, páginas 251 asta 258.
^ párr. 14 Anta kDaniel 2:44 wan: «Nakamasputu putum tamapakgsin», unu tachuwin «tamapakgsin» kilhchanima putum laklanka tamapakgsin nema litatlawanit imagen. Pero tuku na watiya lichuwinan Biblia wan pi «reyes lantla xlikatlanka nkatuxawat» natalachipakgo Jehová «ntlanka [x]kilhtamaku [...] Dios nti mpaks kgalhiy xlitliwakga» (Apoc. 16:14; 19:19-21). Chuna, kʼArmagedón nakamasputukan putum tamapakgsin xalak kakilhtamaku, chu ni kajwatiya tiku kilhchanima imagen nema akxilhli Daniel.
^ párr. 15 Liwana naʼakxkitikan Satanás akxni nakgalhsputa akgtum mil kata, akxni namalakgachakan Satanás chu xdemonios «ktakgayawana ntu mpaks lhkuyat laklhkuj, chu xawa azufre» (Apoc. 20:7-10; Mat. 25:41).
[Takgalhskinin]
[Recuadro chu dibujo xla páginas 4 chu 5]
PULAKKITSIS TUKU AKU NALA:
1 Tsukukan wankan pi «anan ntakaksni, ni tu ntamakpuwan anan»
2 Kachikin talachipakgo chu malakgsputukgo «xatlanka Babilonia»
3 Namasputuputunkan xkachikin Dios
4 Tlawakan guerra xla Armagedón
5 Satanás chu xdemonios nakamalakgachakan niku kapulhman
