«Ni katsiyatit nkilhtamaku, su tu hora»
«Ni katsiyatit nkilhtamaku, su tu hora»
«Skgalalh katawilatit, xampi ni katsiyatit nkilhtamaku, su tu hora.» (MAT. 25:13)
¿LA XKGALHTINANTI?
¿La kinkamakgtayayan akxni ni katsiyaw tukuya kilhtamaku chu hora namin lisputni?
¿La skgalalh tawilakgonit tiku kalaksakkanit naʼankgo kʼakgapun?
¿La tlan nalimasiyayaw pi skgalalh wilaw xlakata akxni namin Cristo?
1-3. 1) ¿Tukuya liʼakxilhtit kinkamakgtayayan nakatsiyaw tuku kilhchanima akgtiy parábolas nema lichuwinalh Jesús? 2) ¿Tukuya takgalhskinin namastayaw xtakgalhtin?
KALILAKPUWANTI pi chatum chixku tiku kgalhi lhuwa limapakgsin skiniyan kalipi kʼakgtum lu xlakaskinka tamakxtumit. Pero akxni nialh lhuwa minutos tsankga nalipina, akxilha pi nialh kgalhiya lhuwa gasolina, wa xlakata lakapala pina tamawaya. Pero uma chixku lakpuwan pi nialh nachipina. Wa xlakata skini achatum kalilh. Chu akxni wix chipina nialhtu wi. ¿Tuku natlawaya?
2 Chu kalilakapastakti pi wix uma chixku tiku kgalhi lhuwa limapakgsin chu laksaknita chatutu lakchixkuwin tiku kalipawana xlakata natlawakgo tuku tlakg xlakaskinka. Kawaniya tuku xlitlawatkan chu xchatutukan tunkun wankgo pi natlawakgo. Pero akxni kitaspita akxilha pi kaj chatiy tlawakgolh tuku kaskini. Achatum nitu tlawalh chu lhuwa tuku limawaka xlakata ni tlawalh taskujut. ¿Tuku xtlawa?
3 Jesús nawatiya tuku lichuwinalh kparábolas xla kgalhakaw laktsuman chu talentos. Uma liʼakxilhtit Jesús limasiyalh pi kxaʼawatiya kilhtamaku xʼamakgolh tawilakgo kstalaninanin Cristo tiku kalaksakkanit skgalalh xtawilakgolh chu xmakgxtakgnankgolh pero amakgapitsin ni (Mat. 25:1-30). * Wa xlakata uma tuku wa: «Skgalalh katawilatit, xampi ni katsiyatit nkilhtamaku, su tu hora» lichuwinalh kilhtamaku akxni Dios namalakgaxokge xkakilhtamaku Satanás (Mat. 25:13). Uma tuku wa Jesús lu xlakaskinka akxilhaw la uku. ¿La kinkamakgtayayan nakgalhakgaxmataw Jesús chu skgalalh natawilayaw? ¿Tiku limasiyakgonit pi skgalalh wilakgolh xlakata nalakgtaxtukgo? ¿Chu tuku kilitlawatkan xlakata skgalalh natawilayaw?
LA KINKAMAKGTAYAYAN SKGALALH NATAWILAYAW
4. ¿Tuku xlakata ni talakaskin «naʼakxilhaw reloj» xlakata skgalalh natawilayaw?
4 Wilakgolh taskujut nema talakaskin kuenta natlawayaw hora, la akxni skujaw kʼakgtum fábrica, naʼanaw kpumakuchin o natiyayaw autobús. Pero wilakgolh atanu taskujut nema ni talakaskin naʼakxilhaw reloj la bomberos o tiku kalakgmaxtukgo latamanin, xlakata komo chuna natlawakgo katuwa nawilikgo xlatamatkan amakgapitsin. Komo kgalhiyaw uma taskujut ni xlakaskinka naʼakxilhaw reloj wata nalilakapastakaw tuku tlawamaw. Nachuna xlakata tlakg talakatsuwima xlisputni uma kakilhtamaku, taskujut nema tlakg xlakaskinka, wa nalichuwinanaw tuku natlawa Jehová xlakata nalakgtaxtuyaw. Pero akinin kstalaninanin Cristo ni talakaskin «naʼakxilhaw reloj» xlakata skgalalh natawilayaw. Chu xlakata ni katsiyaw tukuya kilhtamaku chu tukuya hora namin lisputni, pulakkitsis la kimakamakgtayayan.
5. ¿La kinkamakgtayayan nalimasiyayaw tuku wi kkinakujkan akxni ni katsiyaw tukuya kilhtamaku chu tukuya hora namin lisputni?
5 Pulana, akxni ni katsiyaw tukuya kilhtamaku namin lisputni limasiyayaw tuku wi kkinakujkan. Jehová kinkamaxkiyan kakni wa xlakata kinkamaxkiyan talakaskin nalaksakaw komo ni namakgxtakgaw. Xlikana, putum lakgtaxtuputunaw akxni namalakgsputukan uma kakilhtamaku, pero ni skujnaniyaw Jehová kaj xlakata xliputum kilhtamaku latamaputunaw, wata skujnaniyaw xlakata paxkiyaw (kalikgalhtawakga Salmo 37:4). Xatapaxuwan tlawayaw tuku kinkamapakgsiyan chu katsiyaw pi tuku kinkamasiyaniyan kaj kilitlankan (Is. 48:17). Xlimapakgsin ni akgtum takuka liʼakxilhaw (1 Juan 5:3).
6. Akxni skujniyaw xlakata paxkiyaw, ¿la makgkatsi Jehová chu tuku xlakata?
6 Xlipulaktiy, akxni ni katsiyaw tukuya kilhtamaku namin lisputni kinkamakgtayayan namakgapaxuwayaw xnaku Jehová. Akxni skujnaniyaw xlakata paxkiyaw chu ni kaj xlakata nalilakapastakaw kʼakgtum kilhtamaku o tuku namakglhtinanaw, makgtayananaw xlakata Dios nalimasiya pi ni xlikana tuku limawaka Satanás (Job 2:4, 5; kalikgalhtawakga Proverbios 27:11). Xlakata Akgskgawini lhuwa tapatin chu talipuwan malakatsukinit, xatapaxuwan tatayayaw pi Jehová lakgchan namapakgsinan chu ni tatayayaw Satanás.
7. ¿Tuku xlakata lakpuwana pi talakaskin wi tuku nalimakgxtakgaw?
7 Xlipulaktutu, xlakata ni katsiyaw tukuya kilhtamaku namin lisputni wi tuku limakgxtakgaw. La uku wilakgolh tiku ni kanajlanikgo Dios, pero lakpuwankgo pi uma kakilhtamaku wi tuku nitlan namalakgsputu. Wa xlakata wankgo: «Kawayaw, chu [kakgotnaw], xampi ni katsiyaw pala chali, usu tuxama naniyaw» (1 Cor. 15:32). Pero akinin ni pekuanaw. Makgwilaw kkakilhtamaku pero ni makgtlawayaw tuku nitlan tlawakgo (Prov. 18:1). Wata mastayaw kinkilhtamakujkan, kilitliwakgakan chu tuku kgalhiyaw xlakata nalichuwinanaw xalakwan xalaksasti tamakatsin xla Tamapakgsin (Mat. 16:24). Xatapaxuwan skujnaniyaw Dios chu kamakgtayayaw latamanin nalakgapaskgo.
8. ¿Tukuya liʼakxilhtit xalak Biblia kinkamasiyaniyan nalipawanaw Jehová chu xTachuwin?
8 Xlipulaktati, xlakata ni katsiyaw tukuya kilhtamaku namin lisputni kinkamakgtayayan tlakg nalipawanaw Jehová chu nalilatamayaw xTachuwin. Tuku tlakg litasiya pi kgalhiyaw talakgalhin wa pi akstu kinkalipawankanan. Pablo kawanilh kstalaninanin Cristo: «Wa nti mpuwan akgstitum lama, kuintaj katlawakaj, ni naʼakgtsankgatayay». Akxni Josué nina xpulalin xkachikin Dios kTiyat nema xKawanikanit Nakamaxkikan, puxamatutu mil israelitas nialh tlan kaʼakxilhli Jehová. Pablo wa: «Wa yuma [...] litatsokgnit mpi nalistaktayayaw, kin wa nti awatiya nalatamayaw yunu nkakilhtamaku» (1 Cor. 10:8, 11, 12).
9. ¿La kinkamakgtayakgoyan taʼakglhuwit natatliwakglha kintakanajlakan chu tlakg natalakatsuwiniyaw Dios?
9 Xlipulakkitsis, xlakata ni katsiyaw tukuya kilhtamaku namin lisputni, masta talakaskin xlakata taʼakglhuwit nakinkamakgtayayan nakgalhiyaw lakwan tayat (kalikgalhtawakga Salmo 119:71). Xlikana, xaʼawatiya kilhtamaku xla uma kakilhtamaku «lu tuwa nawan» (2 Tim. 3:1-5, NM). Atsinu ni putum xkakilhtamaku Satanás ni kinkaʼakxilhputunkgoyan, wa xlakata max nakinkaputsastalanikanan xlakata kintakanajlakan (Juan 15:19; 16:2). Pero komo ni tlankajwa nawanaw chu putsayaw xtamakgtay Jehová, taʼakglhuwit nema nakgalhiyaw nakinkamakgtayayan natatliwakglha kintakanajlakan. Ni namakgxtakgaw Jehová wata tlakg natalakatsuwiniyaw nixawa la xlakpuwanitaw (Sant. 1:2-4; 4:8).
10. ¿Tuku tlawa namakgkatsiyaw pi lakapala titaxtu kilhtamaku?
10 Kilhtamaku titaxtuma. Akxni wi tuku liskujmaw, nipara lakapastakaw reloj chu kilhtamaku lakapala titaxtu. Nachuna, komo tlawayaw lu tlan taskujut nema Jehová kinkalakgayawanitan, max kilhtamaku chu hora akxni namin lisputni kaj lakapala nachin. Chuna tlawamakgolh lhuwa tiku kalaksakkanit naʼankgo kʼakgapun. Tsinu kalichuwinaw tuku lalh akxni Jesús mapakgsina tlawaka kkata 1914. Naʼakxilhaw pi makgapitsi skgalalh xwilakgolh pero amakgapitsi ni.
TIKU KALAKSAKKANIT LIMASIYAKGONIT PI SKGALALH WILAKGOLH
11. Akxni titaxtulh kata 1914, ¿tuku xlakata makgapitsin tiku xkalaksakkanit lakpuwankgolh pi Malana xtamakgapalima?
11 Kalichuwinamparaw xparábolas Jesús. Komo laktsuman o lakskujni xtikatsikgolh tukuya kilhtamaku xʼama min litatawilat o malana, ni xtalakaskilh skgalalh xtawilakgolh. Pero xlakata ni xkatsikgo, xtalakaskin skgalalh xtawilakgolh. Akxni nina xchan kata 1914, tiku xkalaksakkanit xkatsikgo pi wi tuku lu xlakaskinka xʼama la. Akxni chalh uma kata chu ni kgantaxtulh tuku xkgalhkgalhimakgolh, makgapitsin lakpuwankgolh pi Malana xtamakgapalima. Titaxtulh kilhtamaku chatum tala wa: «Makgapitsin liwana xakkanajlayaw pi xapulana semana xla octubre [kata 1914] xakamaw kʼakgapun».
12. ¿La limasiyakgolh tiku xkalaksakkanit pi ni xmakgxtakgnankgo chu skgalalh xwilakgolh?
12 Kaj kalakpuwaw la nitlan makgkatsikgolh akxni akxilhkgolh pi ni milh lisputni akxni xkgalhkgalhimakgolh. Chu tuku tlakg nitlan, tsukulh xapulana guerra nema tatlawalh xlikalanka kakilhtamaku, chu kaputsastalanika. Uma tlawalh pi kxlajwanalh xtakanajlakan, chu kitaxtulh la lhtatakgolh. Pero kata 1919 tsukuparakgolh skujnanikgo Dios. Jesús milh akxilha xtemplo xaʼespiritual xla Dios. Makgapitsi nitlan tuku xtlawamakgolh, wa xlakata nialh kamaxkika talakaskin naskujnikgo Jesús (Mat. 25:16). Chuna la laktsuman tiku ni skgalalh xwilakgolh ni kuentajtlawakgolh komo tliwakga xwi xtakanajlakan. Chu xtachuna la xalhkitit skujni, nitu limakgxtakgputunkgolh xlakata Tamapakgsin. Pero tlakg lhuwa tiku xkalaksakkanit limasiyakgolh pi ni xmakgxtakgnankgo chu lu kskujniputunkgo Malana, maski tuwa tuku xtitaxtumakgolh akxni xlama guerra.
13. ¿Tuku tlawakgolh tiku xatalaksakni akxni xtitaxtunita kata 1914, chu tuku tlawamakgolh la uku?
13 Kkata 1916 uma tuku tsokga kʼuma revista: «Natalan, akinin tiku tlan lakapastakniyaw Dios ni kinkamakgalipuwanan tuku Xla lakkaxwilinit. Ni xtlawaputunaw tuku akinin xlakaskinaw, wa xlakata akxni katsiw pi nichuna xwanit tuku xkgalhkgalhimaw octubre kkata 1914, lipaxuwaw pi Malana ni lakgpalilh tuku Lakkaxwilinit xlakata xlalh tuku akinin xlakaskinaw. Ni xlakaskinaw pi chuna Xtlawalh. Kaj katsiputunaw tuku Lakkaxwilinit chu tuku lakapastaknit natlawa». La uku tiku kalaksaknit Dios chuntiyaku limasiyakgo pi ni tlankajwa chu lu kakninanikgo. Ni wankgo pi Dios kawani tuku natlawa, wata liwana lakapastakkgonit nakuentajtlawakgo tuku xla Malana unu kKatiyatni. Nachuna, la uku «lhuwa tachixkuwitat» o latamanin xla «amakgapitsi borregos», kstalaninanin Cristo tiku kgalhimakgolh nalatamakgo xliputum kilhtamaku unu kKatiyatni, na lhuwa skujmakgolh chu skgalalh wilakgolh (Apoc. 7:9; Juan 10:16, NM).
ATANU BORREGOS LIMASIYAKGO PI SKGALALH WILAKGO
14. ¿Tuku xlakata tlan kitaxtu akxni kgalhakgaxmataw tuku masiya skujni xalipaw chu xaskgalala?
14 Xtachuna tiku kalaksakkanit xlakata naʼankgo kʼakgapun chu tiku makgtapakgsikgo klhuwa latamanin skgalalh wilakgo xlakata tuku limaklakaskin Jehová nakamaxki tuku nalitatliwakglha xtakanajlakan. Chuna, kuenta tlawakgo xlakata nakgalhikgo lhuwa tuku takilhtinit kxTachuwin Dios chu xʼespíritu (kalikgalhtawakga Salmo 119:130 chu Juan 16:13). Chuna tliwakga wi xtakanajlakan chu skgalalh wilakgolh xlakata akxni namin Cristo, chu skujmakgolh maski lhuwa taʼakglhuwit titaxtukgo. Akgtum liʼakxilhtit, kpulachin nazi, natalan pulana kaj xkgalhikgo maktum Biblia, wa xlakata skinikgolh Jehová tuku xmaklakaskinkgo xlakata xtakanajlakan. Ni makgas, katsikgolh pi chatum tala tiku aku xtamaknukanit kpulachin xliminit lhuwa xasasti revistas Makatsinina nema xmatsekgnit kxtantukiwi. Tala Ernst Wauer tiku na xatalaksakni chu lakgtaxtulh, alistalh wa: «Jehová kinkamakgtayan xkatsiniw makgapitsin talakapastakni nema xwilakgolh krevistas nema kinkamatliwakglhkgon». Chu na wa: «La uku lakapala tekgsaw tuku nalimatliwakglhaw kintakanajlakan, pero ¿lu xlakaskinka akxilhaw? Akit kkatsi pi Jehová lhuwa kasikulunatlawa tiku lipawankgo, ni makgxtakgkgo chu litatliwakglhkgo tuku kamaxki».
15, 16. ¿Tuku tasikulunalin makglhtinankgolh tamakgaxtokgat tiku ankgolh lichuwinankgo Dios chu tuku kinkamasiyaniyan?
15 Amakgapitsi borregos na tatayakgo xnatalan Cristo akxni lhuwa skujnikgo Malana (Mat. 25:40). Ni xtachuna la «ni tlan skujni [...] chu na lhuwa xalhkitit» xla parábola nema lichuwinalh Jesús, xatapaxuwan makgxtakgkgolh tuku xtalakaskin xlakata pulana xwilikgolh xTamapakgsin Dios kxlatamatkan. Akgtum liʼakxilhtit, Jon chu Masako kawanika pi xʼankgolh lichuwinankgo Dios kKenia niku wilakgolh latamanin tiku chuwinankgo chino. Pulana ni liwana xkatsikgo tuku xʼamakgolh tlawakgo, pero akxni xtlawakgonita oración chu akxilhkgolh la xwi xlatamatkan lakkaxwilikgolh pi xʼamakgolh kʼuma kachikin.
16 Akxilhkgolh lhuwa tasikulunalin xlakata tuku tlawakgolh. Xlakan wankgo: «¡Unu lu tlan la lichuwinankan Dios!». Kgalhtujun tiku tsukukgolh makgalhtawakgekgo chu lhuwa tuku titaxtukgolh nema lipaxuwakgolh. Chuna kinkawanikgoyan: «Chali chali kpaxtikatsiniyaw Jehová pi kinkamaxkin talakaskin unu naktawilayaw». Chuna, lhuwa natalan na limasiyamakgolh pi xlikana lhuwa skujnaniputunkgo Dios maski ni katsikgo akxni namin lisputni. Kalilakpuwaw lhuwa mil kstalaninanin Cristo tiku ankgonit Escuela de Galaad chu misioneros litaxtukgonit. Komo katsiputuna tuku tlawakgo misioneros akgatunu kilhtamaku, kaʼakxilhti artículo «Hacemos todo lo que podemos», xla La Atalaya 15 xla octubre kata 2001. Akxni likgalhtawakgapat kalakpuwanti la tlan tlakg naskujnaniya Jehová chu nalipaxuwaya.
SKGALALH KATAWILA
17. ¿La kinkamakgtayayan xlakata ni katsiyaw tukuya kilhtamaku chu tuku hora namin lisputni?
17 Uma litasiya pi xlakata ni katsiyaw tukuya kilhtamaku chu hora namin lisputni lu kinkamakgtayayan. Ni makgkatsiyaw pi nila tuku tlawayaw chu ni lilipuwanaw, wata tlawayaw xtalakaskin Jehová chu tlakg talakatsuwiniyaw xapaxkina kinTlatkan. Akxni chipayaw «lilakgwaxnat» ni mastayaw talakaskin wi tuku natlawa pi nialh liwana naskujniyaw Malana (Luc. 9:62).
18. ¿Tuku xlakata ni lakaskinaw pi kintakanajlakan naxlajwanan?
18 Lakapala talakatsuwima akxni Dios namalakgaxokgenan, chu ni makgalipuwamputunaw Jehová chu Jesús. Kinkalakgayawakgon laklanka talakgalhaman, nakaskujnaniyaw uma xaʼawatiya kilhtamaku. ¡Lu xlakaskinka akxilhaw xlakata kinkalipawankgoyan! (Kalikgalhtawakga 1 Timoteo 1:12.)
19. ¿La tlan nalimasiyayaw pi skgalalh wilaw?
19 Maski kgalhkgalhimaw nalatamayaw kʼakgapun o kParaíso, liwana kalakkaxwiliw namakgantaxtiyaw taskujut nema Dios kinkalakgayawanitan, nalichuwinanaw chu nakamakgalhtawakgayaw latamanin. La uku ni katsiyaw tukuya kilhtamaku chu tukuya hora namin lisputni, pero ni talakaskin nakatsiyaw. Tlan nalimasiyayaw pi skgalalh wilaw (Mat. 24:36, 44). Komo nalipawanaw Jehová chu tlakg xlakaskinka akxilhaw xTamapakgsin xla nikxni nakinkaʼakgskgawiyan (Rom. 10:11).
[Nota nema wi kpágina]
^ párr. 3 Kaʼakxilhti La Atalaya 1 xla marzo kata 2004, páginas 14 asta 18.
[Takgalhskinin]
[Dibujo xla página 26]
Maski nakgalhiyaw taʼakglhuwit, putum kilhtamaku naputsayaw tuku nalitatliwakglha kintakanajlakan
[Dibujo xla página 27]
Kilhtamaku lakapala natitaxtu komo skujnanimaw Dios
