Akxni nawanatit tlan, tlan
Akxni nawanatit tlan, tlan
«Kajwatiya pi akxni nawanatit Tlan, Tlan chu akxni nawanatit Ni, Ni.» (MAT. 5:37, NM)
¿KATSIYA TAKGALHTIN?
¿Tuku wa Jesús xlakata tiku xlismanikgo wi tuku xmalaknukgo?
¿Tuku lu tlan liʼakxilhtit wililh Jesús xlakata namakgantaxtiyaw kintachuwinkan?
¿Niku talakaskin pi tuku wanaw natlawayaw namakgantaxtiyaw?
1. ¿Tuku wa Jesús xlakata tiku xlismanikgo wi tuku xmalaknukgo, chu tuku xlakata?
XAXLIKANA kstalaninanin Cristo ni talakaskin wi tuku namalaknukgo xlakata nalimasiyakgo pi xlikana natlawakgo, xlakata kgalhakgaxmatkgo Jesús, tiku wa: «Akxni nawanatit Tlan, Tlan. Xwamputun pi talakaskin namakgantaxtiyaw tuku wanaw. Pulana xwanit: «Ni kamalaknutit wi tuku natlawayatit». Chuna limasiyalh pi nitlan xlakata lhuwa latamanin lismanikgonit wi tuku namalaknukgo, chu nipara lakpuwankgo namakgantaxtikgo. Xlikana, kaj talakaskin nawankgo tlan o ni akxni wanaw pi wi tuku natlawayaw. Komo atanu «tuku nawanatit» max nalimasiyayatit pi nila kalipawankanatit chu nalimasiyayatit pi «akgskgawini» kamapakgsiyan (kalikgalhtawakga Mateo 5:33-37, NM).
2. ¿Tuku xlakata ni putum kilhtamaku ni tlan kitaxtu akxni wi tuku malaknukan natlawakan?
2 ¿Wamputulh Jesús pi putum kilhtamaku nitlan akxni wi tuku malaknukan? Ni chuna. Chuna la katsiw kxapulana artículo, Jehová chu kskujni Abrahán wi tuku malaknukgolh akxni akxilhkgolh pi xtalakaskin chuna xtlawakgolh. Nachuna, xLimapakgsin Dios xwan pi xtalakaskin wi tuku xmalaknuka pi xʼamaka tlawakan akxni ni la xlakkaxtlawakgolh akgtum lanka taʼakglhuwit (Éx. 22:10, 11; Núm. 5:21, 22). Wa xlakata, chatum kstalanina Cristo talakaskin namalaknu pi nawan tuku xaxlikana xlakatin mapakgsinanin. O, namin kilhtamaku, talakaskin chuna natlawa xlakata nalitasiya pi xlikana wi tuku tlawaputun o akxni nalakkaxtlawa akgtum taʼakglhuwit. Akgtum liʼakxilhtit, akxni xapuxku sacerdote wanilh Jesús pi xwa tuku xaxlikana, Jesús wa tuku xaxlikana xlakatin Sanedrín (Mat. 26:63, 64). Pero ni xtalakaskin wi tuku xmalaknulh xpalakata achatum. Pero limasiyalh pi xlikana tuku xwan xlakata uma tachuwin: «Lu[...] xlikana ntu kkawaniyan», o chuna la wan nota, «xlikana, xlikana tuku kkawaniyan» (Juan 1:51; 13:16, 20, 21, 38). Kaʼakxilhwi tuku atanu tlan katsiniyaw xlakata xliʼakxilhtit Jesús, Pablo chu atanu latamanin tiku wankgolh tlan chu chuna tlawakgolh.
JESÚS, TLAKG XATLAN LIʼAKXILHTIT
3. ¿Tuku malaknunilh Jesús xTlat xalak akgapun pi xʼama tlawa chu tuku wa Jehová?
3 «Ukwi, lakimpi naktlaway mintalakaskin wix, kiDios.» (Heb. 10:7.) Xlakata uma tachuwin, Jesús xwanima Dios pi xʼama makgantaxti tuku xwankanit xlakata Tiku xwankanit pi xʼama min, chu pi Satanás xma “tsankxkiti” (Gén. 3:15). Ni tawilanit atanu chixku tiku talaknulh xlakata xmakgantaxtilh lu tuwa taskujut. Kʼakgapun Jehová wa pi lu xlipawan pi xKgawasa xʼama makgantaxti tuku xwanit pi xʼama tlawa, chu ni skinilh wi tuku xmalaknulh (Luc. 3:21, 22).
4. ¿La makgantaxtilh Jesús tuku xwan pi xʼama tlawa?
4 Jesús xtlawa tuku xmasiya, wa xlakata akxni xwa tlan chuna xtlawa. Ni mastalh talakaskin wi tuku xtlawalh pi ni xmakgantaxtilh tuku xlakgayawanit xTlat: nalichuwinan xalakwan xalaksasti xlakata Tamapakgsin chu xkamasiyanilh tiku xtalakatsuwinikgo, xlakata Dios chuna xlakaskin (Juan 6:44). ¿La makgantaxtilh Jesús tuku xwanit? Biblia kinkamasiyaniyan akxni wan: «Xampi wa xlipaks xtamalaknun Dios, litatakgsniy nCristo mpi xlikanaj» (2 Cor. 1:20). Xlikana: Jesús kinkawilinin lu xatlan liʼakxilhtit xlakata makgantaxtilh tuku xwaninit xTlat. Chu kalichuwinaw tiku lu liskujli xlakata na xtlawalh la Jesús xtlawa.
PABLO, CHIXKU TIKU XMAKGANTAXTI TUKU XWAN
5. ¿Tukuya liʼakxilhtit kinkawilinin apóstol Pablo?
5 «¿Tu naktlaway [Malana]?» (Hech. 22:10.) Pablo tiku xlilakgapaskan Saulo, wa uma tuku wa akxni Malana Jesús wi tuku matlawilh, tiku tasiyanilh chu wanilh pi nialh xkaputsastalanilh kstalaninanin Cristo. Saulo nitlan xlimakgkatsi xlakata tuku nitlan xtlawanit, tamunulh chu makgamakglhtinalh uma lu tlan taskujut xlakata nalichuwinan Jesús putum amakgapitsi kachikinin. Chuntiya xwani «Tlati» chu kgalhakgaxmatli asta akxni nilh (Hech. 22:6-16; 2 Cor. 4:5; 2 Tim. 4:8). Ni xtachuna la latamanin tiku Cristo kawanilh: «¿Tuwan ankgalhin nkiwaniyatit, “ntlatiʼ, tlati” na ni tlawayatit wa ntu kwan?» (Luc. 6:46). Xlikana, Jesús xlakaskin pi akxni xmakgamakglhtinankgo la xMalana xmakgantaxtikgolh xtachuwin, chuna la tlawalh apóstol Pablo.
6, 7. 1) ¿Tuku xlakata Pablo ni tunkun alh kCorinto? 2) ¿Tuku xlakata ni xlikana tiku xwankgo pi nila xlipawankgo Pablo? 3) ¿La nakalikatsiniyaw tiku Dios kalaksaknit xlakata napulalinkgo congregación?
6 Pablo lhuwa lichuwinalh xTamapakgsin Dios xlikalanka Asia Menor chu makgapitsi kachikinin xla Europa, niku malakatsukilh lhuwa congregaciones chu kalakgapaxialhnampa. Milh kilhtamaku wi tuku malaknulh pi xma tlawa akxni xtsokgwili xcartas (Gál. 1:20). Akxni makgapitsi corintios wankgolh pi nila xlipawankan uma tuku wa: «Stalanka katsi Dios pi kin nichuna kgalhchuwinanaw pala nakwanaw Tlan chu alistalh chu nialh makgantaxtiyaw wantu klitayayaw» (2 Cor. 1:18, Hua Xasasti Talaccaxlan, TXS, 1999). Kʼuma kilhtamaku Pablo aku xtaxtunit kʼÉfeso chu xtitaxtuma Macedonia xlakata alistalh xʼalh Corinto. Pulana xlakpuwanit nalakgapaxialhnan Corinto chu alistalh xʼama an kMacedonia (2 Cor. 1:15, 16). Pero chuna la titaxtukgo superintendentes viajantes, talakaskilh nalakgpali tuku xlakpuwanit natlawa, ni kaj xlakata chuna xlakaskin o wi atanu tuku xtlawalh, chuna tlawalh xlakata lu xtalakaskin. Wa xlakata, Pablo ni lakapala alh Corinto xlakata tlan xkakitaxtunilh uma congregación. Kaʼakxilhwi tuku xlakata.
7 Akxni kʼÉfeso xwijku lakkaxwililh niku xʼama an, Pablo katsilh pi kcongregación xalak Corinto nitu xwankgo maski nitlan xtalalinkgo chu xtlawakan talakgxtumit nema ni xlitatlawat (1 Cor. 1:11; 5:1). Xlakata xlakkaxtlawaka uma, katsokgnanilh xapulana xcarta. Alistalh ni tsaj alh Corinto, xkamaxkiputun kilhtamaku xnatalan xlakata xtlawakgolh tuku xkawaninit kxtastakyaw, chu akxni xchalh, tlakg tlan xkamakgtayalh. Xlakata liwana xkatsikgolh tuku xlakata xlakgpalinit tuku xlakkaxwilinit, katsokgnanilh xliʼakgtiy carta: «Kliwili Dios mpi wa nkimalulokgna nawan mpi kaj xpalakata kalilakgkatsan ni kakakilakglayachan kCorinto» (2 Cor. 1:23). Nikxni katlawaw la tiku ni tlan lichuwinankgolh Pablo; wata kakamaxkiw kakni tiku Dios kalaksaknit xlakata nakinkapulalinkgoyan. Lu tlan nakinkakitaxtuniyan komo natlawayaw la Pablo, xtachuna la xla tlawalh la Cristo (1 Cor. 11:1; Heb. 13:7).
ATANU LU TLAN LIʼAKXILHTIT
8. ¿Tuku liʼakxilhtit kinkawilinin Rebeca?
8 «Nakan.» (Gén. 24:58.) Xlakata uma tachuwin, Rebeca wanilh xtse chu xnatalan pi xʼamputun uma kilhtamaku chu xtaʼamputun 800 kilómetros chatum chixku tiku ni xlakgapasa xlakata xtatamakgaxtokgli xkgawasa Abrahán, Isaac (Gén. 24:50-58). Akxni Rebeca wa pi xʼama an makgantaxtilh, chu nikxni makgxtakgli xchixku chu xkgalhini tlan tapekua Dios. Uma kilhtamaku tsukulh latama klaktsu chiki chu kaj xmakgwi kTiyat nema xKawanikanit pi Nakamaxkikan. Uma tuku tlawalh sikulunatlawaka xlakata na litaxtulh xfamilia Kamanan nema xwankanit pi xʼama min, Jesucristo (Heb. 11:9, 13).
9. ¿Makgantaxtilh Rut tuku wa?
9 «Ni, nakkatataspitan kminkachikin.» (Rut 1:10.) Rut chu Orpá tiku xninita xchixkukan chuna wanikgolh xputiatsi, o xpuwitichat, Noemí tiku na xninita xchixku, akxni taxtukgolh Moab chu xtaspitmakgolh kBelén. Makglhuwa kawanilh Noemí pi xtamakgxtakgkgolh Moab, chu Orpá taspitpa xkachikin. Pero akxni Rut wa pi ni, ni (kalikgalhtawakga Rut 1:16, 17). Ni makgxtakgli Noemí wata makgxtakgli xfamilia chu ni xaxlikana takanajla kMoab. Xlakata ni makgxtakgli Jehová, kgalhilh lanka talakgalhaman xlakata Mateo na tsokgli xtukuwani akxni lichuwinalh xfamilia Cristo (Mat. 1:1, 3, 5, 6, 16).
10. ¿Tuku xlakata Isaías akgtum lu tlan liʼakxilhtit kimpalakatakan?
10 «¡Unu kwi! Akit kakimalakgacha.» (Is. 6:8.) Akxni nina xwan uma tachuwin, Isaías akxilhli tuku lu lanka, Jehová xwi xpumapakgsin xakgspun templo xalak Israel. Isaías kgaxmatli pi Jehová kgalhskininalh: «¿Tiku nakmalakgacha, chu tiku naʼan kimpalakatakan?». Xwanima pi xpalakachuwinalh chu wi tuku xkamakatsinilh kachikin nema xmakgxtakgnit. Isaías makgantaxtilh tuku xwanit: chu akxni wa pi xla xʼama an chuna tlawalh. Palakachuwina litaxtulh liwaka tipuxamachaxan kata, niku lichuwinalh tuku nitlan xʼama katlawanikan kachikinin chu la xʼama lakkaxtlawakan xaxlikana takanajla.
11. 1) ¿Tuku xlakata lu xlakaskinka namakgantaxtiyaw kintachuwinkan? 2) ¿Tuku ni tlan liʼakxilhtit kinkamakgtayakgoyan xlakata ni chuna natlawayaw?
11 ¿Tuku xlakata Jehová tlawalh pi xtsokgwilika uma liʼakxilhtit kxTachuwin? ¿La xlilakaskinka natlawayaw tuku wanaw pi natlawayaw? Biblia liwana wan pi «xatsakatna, ni makgantaxtikgoy xtachuwinkan, [...] wa nti nchuna ntlawakgoy xlilat namakgnikan» (Rom. 1:31, 32). Faraón xalak Egipto, mapakgsina Sedequías xalak Judá, Ananías chu Safira, liʼakxilhtit xla tiku ni tlawakgolh tuku wankgolh. Chu xlakata nitlan kakitaxtunilh kinkamakgtayakgoyan ni chuna natlawayaw (Éx. 9:27, 28, 34, 35; Ezeq. 17:13-15, 19, 20; Hech. 5:1-10).
12. ¿Tuku nakinkamakgtayayan namakgantaxtiyaw tuku wanaw?
12 Kʼuma «xaʼawatiya kilhtamaku» wilakgolh lhuwa latamanin tiku nitu naliukxilhkgoy Dios tiku «kaj wa natlawakgoy xtachuna pi kakninanikgoy Dios natasiyukgoy, maski stalanka nalitasiyukgoy xlipaks wantu lixkajni tlawakgoy» (2 Tim. 3:1-5, TXS, 1999). Wa xlakata ni nakatalalinaw tiku chuna likatsikgo wata nakatalalinaw tiku makgantaxtikgo tuku malaknukgo natlawakgo (Heb. 10:24, 25).
TUKU TLAKG XLAKASKINKA WANITAW PI NATLAWAYAW
13. ¿Tuku tlakg xlakaskinka wan chatum kstalanina Jesucristo pi natlawa?
13 Tuku tlakg xlakaskinka wanitaw pi natlawayaw wa akxni makamaxkiw kilatamatkan Dios. Tiku tamakamastanikgo la kstalaninanin Jesús pulaktutu la limasiyakgo pi xlikana stalaniputunkgo Cristo (Mat. 16:24). Akxni chatiy lakgkgolotsin tlawanikgo takgalhskinin tiku lichuwinamputun Dios chu ni tamununit, kgalhskinkan: «¿Xlikana litaxtuputuna xtatayana Jehová?». Chu alistalh akxni tatliwakglha xtakanajla chu wan pi tamunuputun, lakgkgolotsin tatamakxtumikgo chu kgalhskinkgo: «¿Tlawaninitata akgtum oración Jehová niku waniya pi tamakamastanipat?». Chu xaʼawatiya, kilhtamaku akxni natamunu kgalhskinkan: «Xlakata xtamakamastan Jesucristo, ¿nialh tlawapat tuku nitlan xtlawaya chu tamakamastaninitata Jehová xlakata natlawaya Xtalakaskin?». Chuna chatunu chatunu nalimasiya komo namakgantaxti xliputum kilhtamaku tuku malaknunilh Dios xlakatin amakgapitsin.
14. ¿Tukuya takgalhskinin minkilhtamaku kilitlawatkan?
14 Komo wix aku tamunu o makgasa, tlan natlawanikana umakgolh takgalhskinin: «¿Chuntiya lu xlakaskinka akxilha tuku malaknunilh Dios, chuna la Jesús? ¿Chuntiya kkgalhakgaxmata Jesús chu tlakg xlakaskinka kaʼakxilha naklichuwinan xTamapakgsin Dios chu nakmakgalhtawakgenan?» (kalikgalhtawakga 2 Corintios 13:5).
15. ¿Tuku xlakata namakgantaxtiyaw tuku wanaw pi natlawayaw?
15 Akxni makgantaxtiyaw tuku waniw Jehová na talakaskin namakgantaxtiyaw atanu tuku na xlakaskinka. Kaʼakxilhwi makgapitsi liʼakxilhtit. ¿Tamakgaxtokgnitata? Komo chuna, talakaskin chuntiya namakgantaxtiya tuku xasanto malaknu xlakata napaxkiya chu nakuentajtlawaya tiku tamakgaxtokga. ¿Firmarlinita akgtum contrato o akgtum solicitud xlakata wi tuku naliskuja xkachikin Dios? Komo chuna kamakgantaxti tuku wanita natlawaya. ¿Wanti pi napina wayana xchik chatum tiku nilu kgalhi tumin? Komo chuna, ni kalakgpali tuku lakkaxwilinita kaj xlakata alakatanu niku tlakg tlan napina. ¿O wi tiku wani pi xpimpat lakgapaxialhnamparaya xlakata tlakg namasiyaniya xlakata Dios? Komo chuna kaliskujti xlakata natlawaya tuku wanita chu Jehová nasikulunatlawa mintaskujut (kalikgalhtawakga Lucas 16:10).
LA KINKAMAKGTAYAYAN XAPUXKU SACERDOTE CHU MAPAKGSINA
16. ¿Tuku kilitlawatkan komo ni makgantaxtinitaw tuku wanitaw pi natlawayaw?
16 Biblia wan pi xlakata kgalhiyaw talakgalhin, «paks akgchakgxtayayaw», tlakg chuna tlawayaw akxni chuwinanaw (Sant. 3:2). ¿Tuku tlan natlawayaw komo akxilhaw pi ni makgantaxtimaw kintachuwinkan? Limapakgsin nema Dios maxkilh Israelitas xwi akgtum limapakgsin nema tlan xlitamakgtaya tiku “ni tlan la xchuwinanit” (Lev. 5:4-7, 11). La uku nachuna kalikatsinikan kstalaninanin Cristo tiku wankgo tuku nitlan. Komo waniyaw Jehová tuku nitlan tlawanitaw, xla nakinkatapatiyan xpalakata Xapuxku Sacerdote, Jesucristo (1 Juan 2:1, 2). Xlakata tlanku natalalinaw Dios talakaskin nalimasiyayaw pi nitlan limakgkatsiyaw tuku tlawanitaw. Uma kilhchani pi nialh natlawaparayaw uma talakgalhin chu ni nalismaniyaw chuna natlawayaw chu nalakkaxtlawayaw tuku nitlan tlawanitaw xlakata kintachuwinkan (Prov. 6:2, 3). Pero tlakg tlan liwana nalakapastakaw akxni wi tuku namalaknuyaw xlakata alistalh nila namakgantaxtiyaw (kalikgalhtawakga Eclesiastés 5:2).
17, 18. ¿Tuku lu tlan kgalhkgalhimakgolh tiku makgantaxtikgo tuku wankgo?
17 Kskujni Jehová tiku liskujkgo xlakata namakgantaxtikgo tuku wankgo lu tlan nakakitaxtuni kilhtamaku nema aku mima. 144,000 tiku kalaksakkanit xlakata naʼankgo kʼakgapun, natatawilakgo Jesús kxTamapakgsin chu «na natamapakgsinankgoy akgtum mil kata» (Apoc. 20:6). Nachuna lhuwa millón latamanin nalitamakgtayakgo xlakata xTamapakgsin Cristo akxni katiyatni akgtum paraíso nawan, chu nakamakgtaya xlakata nialh nakgalhikgo talakgalhin (Apoc. 21:3-5).
18 Komo natayaniyaw tuku namin akxni nasputa akgtum Mil Kata akxni namapakgsinan Jesús, nikxni nalakpuwanaw pi wi tiku kinkaʼakgskgawiman (Apoc. 20:7-10). Putum tuku wankan pi natlawakan chuna nawan chu ni, ni. Putum tiku nalatamakgo ama kilhtamaku natlawakgo la tlawa xapaxkina kinTlatikan xalak akgapun, Jehová, «Dios tiku wan tuku xaxlikana» (Sal. 31:5, NM).
[Takgalhskinin]
[Dibujo xla página 28]
Lata kilhtamaku akxni tamunulh asta akxni nilh, Jesús makgantaxtilh tuku xwaninit xTlat
[Dibujo xla página 30]
¿Makgantaxtipat tuku tlakg xlakaskinka malaknunita?
