Kamatliwakglhli «xkilhnikan laktsu kamanan»

Diciembre kata 2009, Tribunal Supremo xalak Rusia wililh akgtum sentencia xtatayananin Jehová. Tlawalh pi akgtum congregación xalak Taganrog nialh xtamakxtumikgolh, kamakglhtika Pukgalhtawakga xla xTatayananin Jehová chu 34 likgalhtawakga kalinka chu wanka pi matlawinan tuku nitlan. Ksitio oficial xla Internet xla xtatayananin Jehová wilika tamakatsin xlakata tuku xlama. Uma página xalak Internet na xkgalhi fotografías niku tasiya pi lhuwa natalan nitlan xwilakgo chu nachuna lhuwa kamanan.

Ni lhuwa papaʼ alistalh, Centro Administrativo xla xTatayananin Jehová xalak Rusia, makglhtinankgolh akgtum paquete chu akgtum carta xla akgtum familia xla xtatayananin Jehová xalak Queensland (Australia) nema xlikgalhtawakgakgonit uma tamakatsin. Kcarta xwan: «Natalan: Kinkamanankan, Cody chu Larissa, kalakchalh xnakujkan akxni katsikgolh xlakata xtakanajlakan chu tuku taʼakglhuwit titaxtukgolh kinatalankan xalak Rusia. Katsokgnikgonit makgapitsi tarjetas chu kamalakgachani tamaskiwin laktsu kamanan xalak Taganrog. Lakaskinkgo pi nakatsikan pi lakgamakgat wilakgo atanu kamanan tiku na skujnimakgo Jehová chu lu kalakapastakkgo. Xlakan kamakatsiniputunkgo pi lu kapaxkikgoyan».

Akxni makglhtinankgolh tamaskiwin, kamanan xalak Taganrog paxtikatsinikgolh tuku xtlawanit uma familia xalak Australia chu na kamalakgachanikgolh cartas niku xwilikgonit dibujos. Lu lipaxuwalh xlakata tuku xwan «xkilhnikan laktsu kamanan», chatum tala tiku skuja sucursal xalak Rusia uma tuku kawanilh Cody chu Larissa: «¿Ni xlikana pi akxni wi tuku kinkalimawakakan chu nitu tlawanitaw, maski aktsinajku o laklanka akinin nitlan limakgkatsiyaw? Natalan xalak Taganrog lul lilakgaputsamakgo, maski nitu tlawakgonit, kamakglhtika xPukgalhtawakgakan. Pero lu napaxuwakgo akxni nakatsikgo pi kʼatanu país niku tlakg lakgamakgat wi natalan tiku kalakapastakkgo. ¡Lu paxtikatsinilh xlakata lu lakgalhamaninanin wixin chu masiyayatit tapaxkit!» (Sal. 8:2, NM).

Xlikana litaxtuyaw lanka familia chu tapaxkit nema lakgalhiniyaw kinkamakgtayayan natayaniyaw taʼakglhuwit nema titaxtuyaw. Mapakgsinanin akxilhmakgo komo kilikgalhtawakgakan tlawakgo kaʼanalh tasitsi, kamanan limasiyakgo pi lilipuwankgo xlakata tuku titaxtumakgo natalan, chuna limasiyakgo pi ni anan akgtum tlakg tlan kachikin o wi tiku tlakg tlan litaxtu chu limasiyakgo pi xlikana tuku wa Jesús: «Wa yuma nakalilakapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit nchatunu chatunu» (Juan 13:35).

[Dibujo xla página 32]

Kamanan xalak Rusia (pakgxwiki) tiku makglhtinankgolh tamaskiwin nema malakgachakgolh kamanan xalak Australia (pakgkana, o pakgastakat)