Ni kapekuaw chu katayaniw tuku nitlan titaxtuyaw
Ni kapekuaw chu katayaniw tuku nitlan titaxtuyaw
«Dios kilitatsekgnikan, wa kinkamaxkiyan litliwekge akxni kinkatsankganiyan. Wa kinkamakgtayayan akxni akgxtakajnamanaw o lakgaputsama- naw.» (SAL. 46:1)
¿LA XKGALHTINANTI?
¿Tuku tlan natlawayaw xlakata tuku nitlan titaxtuyaw ni natlawa pi lu nalilakgaputsayaw?
¿Tuku xlakata ni napekuanaw?
¿Tuku kinkalimakgtayayan Jehová xlakata natayaniyaw taʼakglhuwit?
1, 2. ¿Tuku nitlan lama uku, chu tuku kilitlawatkan xlakskujni Dios?
LAMAW kkilhtamaku niku anan lhuwa tuku nitlan. Tachiki tiyat, tsunamis, akxni wi tuku lhku, akxni chuchut malakgatsama akgtum kachikin, volcanes, tornados chu akxni lu tliwakga min un tlawakgo tuku nitlan xlikalanka kakilhtamaku. Nachuna, putum latamanin kgalhikgo lhuwa taʼakglhuwit o kgalhikgo taʼakglhuwit kxfamilia chu uma tlawa pi napekuankgo chu nalilakgaputsakgo. Xlikana tuku wan Biblia akxni lichuwinan pi tuku kaj «xalan lay putum kinkalakgchinan» (Ecl. 9:11).
2 Putum, xlakskujnin Dios titaxtunitaw tuku tuwa chu ni pekuanaw. Pero talakaskin skgalalh natawilayaw xlakata tlan natayaniyaw tuku natitaxtuyaw chuna la talakatsuwima xlisputni uma kakilhtamaku. ¿La tlan natayaniyaw taʼakglhuwit nema titaxtuyaw chu ni naxlajwananaw? ¿Tuku nakinkamakgtayayan ni napekuanaw akxni titaxtuyaw tuku tuwa kkilatamatkan?
KATLAWAW LA TIKU NI PEKUANKGOLH AKXNI TITAXTUKGOLH TUKU TUWA
3. Chuna la wan Romanos 15:4, ¿tuku tlan nakinkamakgtayayan akxni titaxtuyaw taʼakglhuwit?
3 Maski la uku tlakg lhuwa latamanin kgalhikgo taʼakglhuwit, uma makgasa chuna lama. Kaʼakxilhwi la tlan tayanikgolh tuku nitlan titaxtukgolh kxlatamatkan makgapitsi xlakskujni Dios nema lichuwinan Biblia (Rom. 15:4).
4. ¿Tuku titaxtulh David, chu niku tiyalh litliwakga?
4 Pulana, kalichuwinaw David. Lhuwa tuku titaxtulh, makgapitsi wa umakgolh, chatum mapakgsina xsitsini, xtalatlawananin tlawanikgolh tuku nitlan, kachilinka xlakpuskatin, lakchixkuwin tiku xtatayakgo makgxtakgkgolh chu lu lilipuwa (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8). Tuku lichuwinan Biblia xlakata xlatamat limasiya pi lu patinalh. Pero umakgolh taʼakglhuwit ni tlawakgolh pi xlajwanalh xtakanajla. ¿Niku tiyalh litliwakga? Xlakata lu xkanajlani Dios, wa: «Kintiku Dios kimaxki ixtaxkgakget, y wa kilakgmaxtu akxni taskinij, ¿tiku akit nakjikuanij?» (Sal. 27:1; kalikgalhtawakga Salmo 27:5, 10).
5. ¿La tayanikgolh Abrahán chu Sara tuku lu tuwa titaxtukgolh kxlatamatkan?
5 Chu kalakapastakwi Abrahán chu Sara. Xchatiykan tlakg lhuwa kilhtamaku latamakgolh niku ni xkachikin xwanit chu kaj xwilakgo klaktsu chiki. Chu maski xmin kilhtamaku xtitaxtukgo tuku tuwa, tayanikgolh la tatsinkstat chu taʼakglhuwit nema xtakgalhikgo atanu kachikinin (Gén. 12:10; 14:14-16). ¿La tlan chuna tlawakgolh? Xtachuwin Dios wan pi Abrahán «xkgalhkgalhiy [...] [kachikin] wa ntu ntlan xtankgaxika nkgalhiy, wa nti xlakglhkana, chu xtlawana, wa Dios» (Heb. 11:8-10). Xchatiykan ni mastakgolh talakaskin pi uma kakilhtamaku xkaʼakgskgawilh wata kuenta tlawakgolh tuku aku xʼama min.
6. ¿Tuku nachuna natlawayaw la Job?
6 Job natayanilh lhuwa tuku nitlan. Job lu nitlan makgkatsilh akxni tsukulh makgatsankga tuku xkgalhi (Job 3:3, 11). Chu tuku tlakg nitlan ni xkatsi tuku xlakata xakgspulama uma. Pero nikxni xlajwanalh xla chuntiya xlipawan Dios (kalikgalhtawakga Job 27:5). ¡Lu tlan liʼakxilhtit xlakata nikxni makgxtakgli Dios!
7. ¿Tuku titaxtulh Pablo akxni skujnilh Dios, chu tuku matliwakglhli xlakata chuntiya xtlawalh xtaskujut?
7 Chu kaʼakxilhwi xliʼakxilhtit Pablo. Uma apóstol titaxtulh «kachikinin niku xmakgniputunkan», «kxakaskni tiyat» chu «kpupunu». Nachuna tayanilh «tatsinksni xawa takgalhputit», o xkgalhti, «lonkgni, chu lakgachunin asta nitu xaklilhakganan». Nachuna wa pi tawilalh «akgtum katsisni chu akgtum kakuwini [...] niku lu kapulhman», chu max xlichuwinama akxni laklalh barco kpupunu (2 Cor. 11:23-27, NM). Pero nikxni xlajwanalh, chu uma tasiya xlakata tuku wa akxni atsinu ni xmakgnikan xlakata kskujnima Dios: «Wa yuma xpalakata mpi ni kaj kin naʼakstulipawankanaw, wampi wa Dios, naklipawanaw wa nti malakastakwaniy ninin. Wa nti nkintikamalakgtaxtin kkilininkan, na chuna nakinkamalakgtaxtipalayan» (2 Cor. 1:8-10). Ni chalhuwa latamanin titaxtukgonit tuku lu tuwa la Pablo. Pero tlan makgkatsiyaw tuku xla makgkatsilh chu tlan kinkamatliwakglhan xliʼakxilhtit.
NI KAKINKAMAXLAJWANIN TUKU NITLAN TITAXTUYAW
8. ¿Tuku nitlan max natitaxtuyaw? Kalichuwinanti tuku xlikana lanit.
8 Lhuwa latamanin lilipuwankgo akxni min tuku malakgsputunan, taʼakglhuwit chu xlakata tuku nitlan lama la uku. Asta makgapitsi kstalaninanin Cristo chuna titaxtukgo. Lani, * chu xchixku tiku akxtum skujnikgo Dios putum kilhtamaku kʼAustralia, kaj xalan wanika pi xkgalhi cáncer de mama. Xla lakapastaka: «Tuku xkilimakuchikan xtlawa pi tlakg xaktatatlalh chu nitlan xakgmakgkatsilh». Chu atanu tuku nitlan titaxtulh, wa, pi chukuka xchixku kxcolumna vertebral, chu xla makgtakgalhli. ¿Tuku tlan natlawayaw komo nachuna natitaxtuyaw?
9, 10. 1) ¿Tuku ni maxkiyaw talakaskin katlawalh Akgskgawini? 2) ¿La nakinkamakgtayayan tuku wan Hechos 14:22?
9 Kalakapastakwi pi Satanás limaklakaskin taʼakglhuwit nema kgalhiyaw xlakata namaxlajwani kintakanajlakan. Ni kamaxkiw talakaskin natlawa pi nialh nalipaxuwayaw kilatamatkan. Proverbios 24:10 kinkawaniyan: «¿Xlajwananita akxni titaxtunita tuku nitlan? Mi litliwakga ni lhuwa nawan». Komo lakapastakaw liʼakxilhtit xalak Biblia la nema akxilhnitaw, tlan natayaniyaw tuku nitlan natitaxtuyaw kkilatamatkan.
10 Xlikana, ni la lakpuwanaw pi nikxni natitaxtuyaw tuku nitlan; wata nalakpuwanaw pi natitaxtuyaw tuku tuwa (2 Tim. 3:12). Hechos 14:22 kinkawaniyan «napatiya xlakata xlilhuwa tapatin lakimpi chuna nalitanuya kxtapakgsin Dios». Ni namakgxtakgaw Dios, wata talakaskin naʼakxilhaw taʼakglhuwit la tuku nakinkamakgtayayan nalimasiyayaw pi ni pekuanaw chu lipawanaw Dios.
11. ¿La tlan ni lu nalilipuwanaw xlakata tuku nitlan titaxtuyaw?
11 Talakaskin nalilakapastakaw tuku tlan. Xtachuwin Dios kinkawaniyan: «Akgtum naku nema xapaxuwa makgtayanan xlakata tlan natasiya mi lakan, pero akxni wi tuku lilipuwan mi naku, nitlan tuku akgspulayan» (Prov. 15:13). Akglhuwata kata científicos katsikgo pi tlan limakgkatsiyaw akxni lakpuwanaw pi wi tuku tlan tlawayaw. Lhuwa tiku tatatlakgo tlakg tlan makgkatsikgo akxni kamaxkikan tuku wanikan placebo xlakata lakpuwankgo pi likuchun tuku xaxlikana. Na limasiyakanit pi ni tlan kitaxtu xlakata tuku lilakgapaskan nocebo: tiku tatatlakgo tlakg snun makgkatsikgo xlakata wi tiku kawanilh pi likuchun nema wamakgo nakatlawani tuku nitlan. Komo lakkaxtlawaputunaw tuku akinin nila lakgpaliyaw, kaj naxlajwananaw. Xatlan tamakatsin wa pi Jehová nikxni kinkamaxkiyan tuku lilakgapaskan «placebos». Akxni titaxtuyaw tuku nitlan, kinkalimatliwekglhan xTachuwin, kinatalankan chu espíritu santo. Akxni litamakgtayayaw uma pulaktutu, tlan natatliwakglhparayaw. Wa xlakata ni kaj kalakpuwaw tuku nitlan titaxtumaw, kalakputsaw la tlan nalakkaxtlawayaw taʼakglhuwit nema titaxtumaw chu kalakpuwaw tuku tlan kkgalhiyaw kkilatamatkan (Prov. 17:22).
12, 13. 1) ¿Tuku kamakgtayanit xlakskujni Jehová natayanikgo akxni wi tuku masputunan? Kalichuwinanti akgtum liʼakxilhtit. 2) Akxni wi tuku masputunan, ¿la litasiya tuku tlakg xlakaskinka?
12 Kʼuma xaʼawatiya kata, lhuwa kachikin wi tuku malakgsputunalh, chu kstalaninanin Cristo tiku anta lamakgo tayanikgonit uma. Akxni xtsukuma kata 2010 kChile lu tliwakga tachikilh tiyat chu alistalh akgtum tsunami lilh xchikkan lhuwa natalan. Lhuwa makgatsankgakgolh tuku xkgalhikgo, chu makgapitsi makgatsankgakgolh tuku xlitlajakgo tumin. Pero xtakanajla ni xlajwanalh. Samuel, tiku makgatsankgalh xchik wan: «Maski titaxtuw uma tuku lu tuwa kimpuskat chu akit putum kilhtamaku xʼanaw lichuwinanaw Dios chu ktamakxtumit. Klakpuwan pi wa uma tuku kinkamakgtayan xlakata tlan xtayaniw». Xlakan chu amakgapitsi natalan akxtum skujnikgolh Dios Jehová.
13 Kseptiembre kata 2009, lhuwa senalh chu liwaka 80% xla kachikin nema wanikan Manila, xcapital Filipinas litatsamalh chuchut. Chatum chixku tiku xkgalhi lhuwa tumin chu lhuwa makgatsankgalh wa: «Uma chuchut tlawalh pi watiya taʼakglhuwit nakgalhiyaw tiku kgalhikgo tumin chu tiku nitu kgalhikgo». Uma kinkamalakapastakan xtastakyaw Jesús: «Kamastokgwilitit tuku laklanka xtapalh anta kʼakgapun, niku luwa ni naway chu niku kgalhananin ni xafuerza tanukgo chu kgalhankgo» (Mat. 6:20, NM). Tiku limaklakaskinkgo xlatamatkan xlakata lhuwa tuku nakgalhikgo, kaj lakapala lakgsputkgo, chu lilipuwankgo. Tlakg tlan nakuenta tlawayaw la talalinaw Jehová, chu uma nitu nalani maski katuwa tuku natitaxtuyaw (kalikgalhtawakga Hebreos 13:5, 6).
WI TUKU XLAKATA NI NAPEKUANAW
14. ¿Tuku xlakata ni napekuanaw?
14 Jesús kawanilh kstalaninanin pi akxni kinkatawilan nawan xʼama anan taʼakglhuwit, pero alistalh wa: «Ni tipikuanatit» (Luc. 21:9). Xlikana, xlakata kinkatawilan Mapakgsina chu xMalakatsukina putum tuku anan, ni pekuanaw. Pablo wanilh Timoteo: «Dios, ni kaj tapikua nalikgalhiyaw, wampi kaj nalikgalhiyaw ntatliwakglhni, chu ntapaxkit, chu lantla namakgtakgalhliyanaw nkintalakapastaknikan» (2 Tim. 1:7).
15. ¿Tiku limasiyakgolh pi lu xlipawankgo Dios, chu la tlan nachuna natlawayaw?
15 Lhuwa kskujnin Dios lichuwinankgolh pi xlipawankgo. Akgtum liʼakxilhtit, David wa: «Kintiku Dios tliwekge kimakgtayaj, y kilekgawaj. Akxni tu nitlan xakʼakgspulamaj, wa klipawaj, y kimakgtayalh. Wa jee xlakata, paxawa kinakuj» (Sal. 28:7). Pablo na wan: «Xlipaks yuma, lu[...] xkatsit litlajananaw xpalakata yuma nti nkinkapaxkin» (Rom. 8:37). Chu Jesús, akxni akxilhli pi xʼama titaxtu tuku tuwa, liwana limasiyalh pi lu tlan xtalalin Jehová akxni wa: «Ni kaj kakstuwi, xampi wa xaTlat nkintawi» (Juan 16:32). Tuku wankgolh limasiyakgolh pi lu xlipawankgo Jehová. Komo nachuna lakpuwanaw, tlan natayaniyaw katuwa taʼakglhuwit (kalikgalhtawakga Salmo 46:1-3).
JEHOVÁ KINKAMAKGTAYAYAN NI NAPEKUANAW
16. ¿Tuku xlakata lu xlakaskinka nalikgalhtawakgayaw xTachuwin Dios?
16 Kstalaninanin Cristo ni akstu kinkalipawankanan, ni pekuanaw xlakata lakgapasaw Dios chu litamakgtayayaw. Pero talakaskin nalikgalhtawakgayaw Biblia. Chatum tala tiku kgalhi tajatat xla talipuwan wan tuku makgtaya: «Makglhuwa klikgalhtawakga textos nema tlawakgo pi tlan naklimakgkatsi». ¿Chu tastakyaw nema kinkamaxkikanitan xlakata nakakninaniyaw Dios kfamilia? ¿Chuna tlawamaw? Komo chuna, tlan nalakpuwanaw la salmista tiku wa: «Akit snun klakgati tlawa tu wan milimapakgsin, wakg kilhtamaku wa klakapastakmaj» (Sal. 119:97).
17. 1) ¿Tuku nakinkamakgtayayan tlan talakapastakni nakgalhiyaw? 2) Kalichuwinanti akgtum biografía nema makgtayanitan.
17 Na kgalhiyaw likgalhtawakga xalak Biblia nema tlawakgo pi tlakg nalipawanaw Jehová. Lhuwa natalan lu kamakgtaya biografías nema taxtukgo kirevistaskan. Akgtum liʼakxilhtit, chatum tala xalak Asia tiku kgalhi trastorno bipolar likgalhtawakgalh tuku titaxtulh chatum tala tiku misionero xwanit chu na xkgalhi uma tajatat chu xtayanima. Paxtikatsininalh chu tsokgli: «Tlawa pi nakkatsi tuku kkgalhi chu kimatliwakglhi».
18. ¿Tuku xlakata lu nalitamakgtayayaw oración?
18 Nachuna kgalhiyaw akgtum tamakgtay nema kaniwa tlan nalimaklakaskinaw: oración. Apóstol Pablo wa pi lu xlakaskinka akxni mastalh uma tastakyaw: «Nitu xatu ntu ntililakgaputsayatit; chi wampi wata paks kamasiyutit kxlakatin Dios wa ntu lakaskinatit kmiʼoracionkan, chu lantla mpala tu nalixakgatlilakapinatit, su naskinatit, na natamastayatit mpaxkatsinit. Chu wa xkatsit xtatanksni Dios, wa ntu lakatsalaniy xlipaks kintapuwankan, naskgala minakujkan, chu mintapuwankan lantla nkanajlaniyatit nCristo Jesús» (Filip. 4:6, 7). ¿Limaklakaskinaw uma tamakgtay akxni titaxtumaw tuku tuwa? Alex, chatum kgawasa británico tiku makgasa kgalhi tajatat xla talipuwan wan: «Akxni ktachuwinan Jehová chu akxni kkgaxmata tuku wan kxTachuwin lakgmaxtu kilatamat».
19. ¿La kiliʼakxilhatkan naʼanaw ktamakxtumit?
19 Atanu tamakgtay nema kgalhiyaw wa tamakxtumit xla kstalaninanin Cristo. Chatum salmista tsokgli: «Snun klakaskin xaktawi nak ixlakakilhtin [Jehová]» (Sal. 84:2). ¿Nachuna makgkatsiyaw la xla? Lani, nema pulana lichuwinaw, kinkawaniyan la xakxilha tamakxtumit: «Xtalakaskin putum kilhtamaku xakalh. Xakkatsi pi komo xaklakaskin xkimakgtayalh Jehová xtalakaskin xakalh ktamakxtumit».
20. ¿La kinkamakgtayayan akxni anaw lichuwinanaw Dios?
20 Akxni lichuwinanaw xalakwan xalaksasti xlakata Tamapakgsin na kinkamakgtayayan ni napekuanaw (1 Tim. 4:16). Chatum tala puskat xalak Australia tiku titaxtunit lhuwa taʼakglhuwit wan: «Chatum kgolotsin kiwanilh pi xaktaʼalh klichuwinan Dios chu, maski ni xakamputun, kkalh. Chu wa Jehová tiku xkimakgtayaputun, xlakata akxni xaklichuwinan Dios lu xakpaxuwa» (Prov. 16:20). Lhuwa kstalaninanin Cristo akxilhkgonit uma, akxni matliwekglhkgo xtakanajla amakgapitsin, na matliwakglhkgo xtakanajlakan. Nachuna, nialh lakapastakkgo taʼakglhuwit nema kgalhikgo chu lakapastakkgo “nalaksakaw wantu xatlan” (Filip. 1:10, 11).
21. ¿Tuku liwana kilikatsitkan?
21 Jehová lhuwa tuku kinkalimakgtayayan xlakata ni napekuanaw akxni titaxtuyaw tuku tuwa kkilatamatkan. Komo liwana limaklakaskinaw, lilakapastakaw tuku titaxtukgolh makgapitsi xlakskujni Dios chu tlawayaw la xlakan tlawakgolh chu ni pekuanaw, liwana nakatsiyaw pi komo chuna tlawayaw tlan natayaniyaw taʼakglhuwit nema nakgalhiyaw. Xlakata talakatsuwima xlisputni uma kakilhtamaku lhuwa tuku nitlan natitaxtuyaw, pero na tlan nawanaw la Pablo: «Kinkatlajakanan pero ni kinkamasputukanan [...] Wa xlakata ni tamakgxtakgaw» (2 Cor. 4:9, 16, NM). Xlakata Jehová kinkamakgtayayan, ni napekuanaw akxni natitaxtuyaw tuku tuwa kkilatamatkan (kalikgalhtawakga 2 Corintios 4:17, 18).
[Nota nema wi kpágina]
^ párr. 8 Talakgpalikgonit tukuwani.
[Takgalhskinin]
[Dibujos xla página 10]
Akxni natitaxtuya tuku nitlan kmilatamat, kalitamakgtaya tuku Jehová limakgtayayan
