Xatapaxuwan ankgolh skujkgo kʼBrasil

NINA makgas, Rúbia (1), chatum tala tiku la uku kgalhi 30 kata, kilakgapaxialhnalh Sandra (2) tiku wi ksur Brasil chu skujma la precursora kʼakgtum aktsu congregación. Akxni anta xwi, wi tuku lalh nema lakgpalinilh xlatamat. ¿Tuku lalh? Kamastaw talakaskin nakinkawaniyan.

«¡NILA XAKKANAJLA!»

«Sandra, kililh xlakata naklakgapaxialhnanaw chatum puskat tiku xmakgalhtawakgama. Akxni xakkgalhtawakgamaw, puskat wanilh: “Kkimputaskujut wilakgolh chatutu laktsuman tiku na katsiniputunkgo xlakata Biblia, pero xlakata kkatsi pi uma kata nialhla atanu tiku namakgalhtawakgaya, kkawanilh pi kakgalhikgolh”. ¡Nila xakkanajla! Xwilakgolh lhuwa latamanin tiku  xlakgapasputunkgo Jehová, chu Sandra xkawaninit pi xkgalhkgalhikgolh. ¡Chu akit nila xaktekgsa tiku xkgalhtawakgaputulh kkincongregación! Ama kilhtamaku kxchik ama puskat, kmakgkatsilh pi xtalakaskin nakkamakgtaya latamanin tiku anta xwilakgolh. Ni makgas kilhtamaku titaxtulh kmakgxtakgli lanka kachikin chu kkalh aktsu kkachikin niku Sandra xmakgtayanama.»

¿La kitaxtulh Rúbia? Xla wan: «Kaj akgtiy papaʼ titaxtulh kgalhkukitsis tiku xakkamakgalhtawakgama. Chu maski nila xakmakanajla, akit na xakkawaninita makgapitsin pi xkgalhikgolh».

AKXILHLI LA SKUJNANIMA DIOS

Diego (3), chatum tala tiku kgalhi liwaka puxam kata, kilakgapaxialhnalh makgapitsi precursores tiku skujmakgolh ksur xla Brasil kʼakgtum kachikin nema wanikan Prudentópolis. Tuku titaxtulh lu makgtayalh, wa xlakata akxilhli la kskujnanima Dios. Diego wampara: «Anta kkincongregación kaj xaktlawa tuku xakmatlani, chu kaj ni lhuwa hora xaklichuwinan Dios akgatunu papaʼ. Pero akxni kilakgapaxialhnalh precursores chu kkgaxmatli tuku xtitaxtukgo, lu xatapaxuwan xlichuwinankgo Dios chu akit ni lu xaklakgati. Akxni kakxilhli pi lu xpaxuwakgo, klakpuwa: “¡Lu tlan xwa pi kilatamat chuna xwa!”». Akxni Diego taspitli kxchik, precursor litaxtulh.

¿Chu wix? ¿Na chatum kgawasa o tsumat xtatayana Jehová tiku lichuwinana Dios, pina ktamakxtumit, pero min kilhtamaku akxilha pi chuna la skujnanipat Dios kaj akgtum talismanin chu nialh xatapaxuwan tlawaya? Komo chuna max natalakaskin nalakgpaliya milatamat xlakata xatapaxuwan napina niku talakaskin tiku nalichuwinankgo xTamapakgsin Dios. Max ni namakgxtakgputuna tuku tlan kgalhiya kminchik. Pero lhuwa tiku na watiya kata kgalhikgo la wix chuna tlawakgonit: lakgpalikgonit tuku xlakaskinkgo, tuku xlakkaxwilikgonit natlawakgo xlakata tlakg liwana naskujnikgo Jehová. Kaʼakxilhwi tuku tlawalh Bruno.

¿TLAKGNA O KSKUJNI DIOS?

Bruno (4), la uku kgalhi 28 kata, kgalhtawakgalh tatlakgni kʼakgtum tlakg xatlan escuela xla tatlakgni.  Xla xpulalimputun akgtum orquesta, lhuwa katsinilh wa xlakata makglhuwa wanika pi xpulalilh akgtum orquesta sinfónica. Xtasiya pi lhuwa tuku xʼama tlawa. Pero xla wan: «Xakmakgkatsi pi wi tuku xkintsankgani. Xakmakamastaninit kilatamat Jehová, pero xakkatsi pi ni xakmaxkima putum tuku xakmatlani chu nitlan xaklimakgkatsi. Kwanilh Jehová tuku xakmakgkatsi chu na kkatachuwinalh tiku lhuwata kilhtamaku skujnanimakgolh Dios. Lhuwa klilakapastakli uma, chu alistalh klakkaxwililh pi tlakg naklichuwinan Dios: kmakgxtakgli escuela xla tatlakgni chu kalh kskujni Jehová niku tlakg xtalakaskin tiku nalichuwinankgo xTamapakgsin». ¿Tlan tuku laksakli natlawa?

Bruno alh kʼakgtum kachikin nema wanikan Guapiara, kgalhi 7,000 latamanin chu 260 kilómetros xlimakgat niku wi São Paulo. Xla kinkawaniyan, lu talakgpalilh kilatamat: «Chiki lu aktsina xwanit, ni xkgalhi refrigerador, televisión nipara Internet. Pero wi tuku xʼanan nema nikxni xakkgalhinit, kiwi nema xmasta xtawakat». Bruno xmakgtayanama kʼakgtum congregación niku ni lhuwa natalan anan. Akgtum kilhtamaku akgatunu semana xwili likgalhtawakga kʼakgtum bolsa, liwat chu tuku xlikgotnalh chu xʼan kxmotocicleta lichuwinan Dios kʼakgtum aktsu kachikinin niku lhuwa latamanin nikxni xkgaxmatkgonit xlakata xalakwan xalaksasti. Xla wan: «Kgalhkutsayan xakkalimakgalhtawakga Biblia. Lu tlan xaklimakgkatsi akxni umakgolh latamanin xlakgpalikgo xlatamatkan. Ama kilhtamaku kkatsilh pi xaktekgsnit tuku xkintsankgani: lu tlan limakgkatsikan akxni pulana wilikan tuku xla xTamapakgsin Dios. Maski lhuwa tuku xakkgalhilh nila xkimakgapaxuwalh». ¿Chu tuku xliskuja kʼGuapiara? Xatapaxuwan wan: «¡Kmasiya la tlakgkan guitarra!». ¡Wa xlakata chuntiyaku tlakgna litaxtu!

«XTALAKASKIN NAKTAMAKGXTAKGA»

Tuku titaxtulh Mariana (5), tiku kgalhi liwaka puxam kata, xtachuna tuku titaxtulh Bruno. Maski lhuwa tumin xtlaja xlakata abogada xwanit. Xla wan: «Kilatamat xwanit la “xakputsastalanima un”» (Ecl. 1:17). Lhuwa natalan wanikgolh pi xlakapastakli precursora xwa. Akxni liwana lakapastakli xla chu kgalhtutu  xʼamigas Bianca (6), Caroline (7) chu Juliana (8) lakkaxwilikgolh pi xʼamakgolh makgtayanankgo kʼakgtum congregación xalak Barra do Bugres, lakatsu kBolivia chu akglhuwa mil kilómetros xlimakgat xwi xchik. ¿Tuku lalh?

Mariana wan: «Kaj akgtutu papaʼ xaktamakgxtakgputun. Pero akxni kmakgatsilh akgtutu papaʼ kgalhkukitsis tiku xakkamakgalhtawakgama, chu xtalakaskin nakamakgtayakan xlakata xtatliwakglhli xtakanajlakan. Wa xlakata, ¿la xakkawanilh pi xakamaja? Nila kkawanilh. Xtalakaskin naktamakgxtakga». Chu chuna tlawakgolh xkgalhtatikan. La uku Mariana tlakg paxuwa: «Lu tlan klimakgkatsi xlakata Jehová kimaklakaskima nakkamakgtaya latamanin xlakata tlakg tlan nalinkgo xlatamatkan chu klimaklakaskima kinkilhtamaku chu kilitliwakga xlakata naktlawa tuku lu xlakaskinka». Caroline uma tuku wan xlakata la makgkatsikgo xkgalhtatikan: «Akgatunu katsisni akxni kan klhtata tlan klimakgkatsi xlakata lhuwa tuku ktlawalh xpalakata xTamapakgsin Dios. Liwana klilakapastaka la nakkamakgtaya tiku kkalimakgalhtawakgama Biblia, chu klipaxuwa akxni kakxilha pi tatliwakglhmakgolh. Liwana kkatsinit pi xlikana tuku wan Biblia: “Kalikxilhtit xlakata nakatsiyatit la ixlitlan katsi Kintikukan”» (Sal. 34:8).

Xlikana, Jehová lu lipaxuwa akxni akxilha pi lhuwa lakgkgawasan chu laktsuman xlikalanka kakilhtamaku xatapaxuwan lichuwinankgo xalakwan xalaksasti tamakatsin xla Tamapakgsin niku lu lakgamakgat (Sal. 110:3; Prov. 27:11). Chu umakgolh lakgkgawasan na makglhtinankgo lhuwa tasikulunalin (Prov. 10:22).

[Recuadro chu dibujo xla página 5]

«Nitu kinkatsankganinitan»

Akxni João Paulo chu xpuskat, Noemi, lichuwinakgolh pi xʼamputunkgo niku talakaskin tiku nalichuwinankgo Dios, ni putum tlan akxilhkgolh. Makgapitsi natalan xkawanikgo: «Komo napinatit kʼakgtum aktsu kachikin, max alistalh nialh nakgalhiyatit tumin», chu: «¿Tuku xlakata alakatanu pimputunatit, unu kcongregación anan lhuwa taskujut?». João Paulo wan: «Xkatsiyaw pi maski chuna xwankgo ni xtlawaputunkgo pi naxlajwananaw, pero tuwa xakmakgkatsiyaw». Akxni xtitaxtunita lhuwa kata xlakata kskujmakgolh niku lu talakaskin tiku nalichuwinankgo Dios xchatiykan lu lipaxuwakgo pi tlakg skujnikgolh Dios chuna la xlakapastakkgonit. João Paulo wan: «Lata kchiw unu nitu kinkatsankganinitan. Chu kgalhiyaw tuku tlakg xlakaskinka, nixawa xapulana». Noemi wan: «Maski wi tuku klimakgxtakgwi tlan kitaxtulh».

Naskuja kʼakgtum aktsu kachikin lu tuwa. ¿Tuku tlawakgo tiku ankgo niku lakgamakgat? Lhuwa tuku lakkaxwilikgo natlawakgo. Makgapitsi masiyakgo inglés o atanu tachuwin, kamakgalhtawakgakgo xchik lakgkgawasan, tsapanankgo, o xtokgonankgo, manikgo chiki o tlawakgo atanu taskujut niku ni putum semana naskujkgo. Putum katsikgo pi tlakg lhuwa tasikulunalin makglhtinankgonit nixawa tuku limakgxtakgonit.

[Recuadro chu dibujo xla página 6]

Tuku tlawakgo akxni lakapastakkgo tuku makgxtakgkgolh

Tiago: «Akxni nina lhuwa kilhtamaku xtitaxtunit anta kxasasti congregación nitlan ktsukulh kmakgkatsi. Kkachikin ni lhuwa tiku xlichuwinankgo Dios chu nilhuwa xʼanan niku tlan xlakgastanankan chu ktsukulh lakapastaka tuku xakmakgxtakgnit. Xakkatsi pi xtalakaskin wi tuku xaktlawalh xlakata naktatliwakglha, klakkaxwililh pi tlakg xakkalakgapasli natalan, ¡chu lu kimakgtayalh! Kkgalhilh xasasti amigos chu ni lhuwa kilhtamaku titaxtulh kpaxuwapa chuna la kkinchik».

[Dibujo xla página 3]

Noemi chu João Paulo kʼAscurra (Santa Catarina)