«Kakimasini la naktlawa tu lakgatiya»
«Kakimasini la naktlawa tu lakgatiya»
«Wix kiDios, kakimasini la naktlawa tu lakgatiya.» (SAL. 143:10)
TUKU NALILAKAPASTAKAW
¿Tuku titaxtulh David kxlatamat nema limasiyalh pi xlakpuwan la Jehová?
¿Tuku tlawalh pi David xkatsilh xtalakaskin Dios?
¿Tuku nakinkamakgtayayan xlakata tlan natalalinaw Jehová?
1, 2. ¿La kinkamakgtayayan akxni katsiyaw xtalakaskin Jehová chu tuku nakatsiniyaw xlakata mapakgsina David?
¿MINIT kilhtamaku akxni limaklakaskinita akgtum mapa nema makgtayan liwana naʼakxilha niku xpimputuna? Xlakata liwana akxilhti makgtayan xlakata xlaksakti tlakg xatlan tiji xlakata xchipi. Nachuna, kilitlawatkan akxni wi tuku lu xlakaskinka natlawayaw kkilatamatkan. Akxni akxilhaw tuku tlawaputunaw chuna la kiMalakatsukinakan kinkamakgtayayan nalaksakaw tiji nema xla lakgati (Is. 30:21).
2 Atsinu ni putum xlatamat, mapakgsina David xalak Israel litaxtulh akgtum lu tlan liʼakxilhtit xlakata putum kilhtamaku tlawalh xtalakaskin Dios. Kaʼakxilhwi tuku titaxtulh chu kakatsiniw la lilh xlatamat uma chixku tiku xliputum xnaku skujnanilh Jehová (1 Rey. 11:4).
DAVID MAXKILH KAKNI XTUKUWANI DIOS
3, 4. 1) ¿Tuku makgtayalh David xlakata natalachipa Goliat? 2) ¿La xakxilha David xtukuwani Dios?
3 Kalilakapastakwi akxni David talachipalh filisteo Goliat. ¿Tuku tlawalh natalachipa uma lanka chixku tiku atsinu ni akgtutu metro xlilanka chu lhuwa limakgnin xlimin? (1 Sam. 17:4, nota.) ¿Xlakata ni xpekuan? ¿Xlakata xkanajlani Dios? Xlikana pi uma pulaktiy tayat makgtayakgolh. Pero tuku tlakg makgtayalh wa pi lu xmaxki kakni Jehová chu xtukuwani. David lu xsitsinit akxni kgalhskininalh: «¿Tiku uma filisteo incircunciso xlakata lixkajni nakalichuwinan xsoldados Dios xastakna?» (1 Sam. 17:26).
4 Chu akxni xwija kxlakatin Goliat wanilh: «Wix kilakgtampat chu litana akgtum espada chu akgtum lanza chu akgtum jabalina, pero akit klakgaman kxtukuwani Jehová, Dios xsoldados Israel, tiku wix lixkajni lichuwinanita» (1 Sam. 17:45). Xlakata lu xlipawan xaxlikana Dios, kaj akgtum chiwix liʼaktalalh chu makgnilh uma lanka filisteo. Chuna la ama kilhtamaku, David lipawalh Jehová chu lu xlakaskinka akxilhli xtukuwani xliputum xlatamat. Asta kawanilh xnatalan israelitas: «Lu kapaxuwatit kxasanto xtukuwani» (kalikgalhtawakga 1 Crónicas 16:8-10).
5. ¿La max na natitaxtuyaw la David akxni talachipalh Goliat?
5 ¿Lipaxuwaya wix xlakata Jehová mi Dios? (Jer. 9:24.) ¿Tuku tlawaya akxni mintalakatsu, mincompañeros o mi familia nitlan lichuwinankgo Dios chu likgalhkgamanankgo xTatayananin? ¿Tatayaya xtukuwani Jehová chu lipawana pi xla namakgtayayan? Xlikana, pi min kilhtamaku talakaskin «nitu nawanaw», pero ni kalimaxanaw xlakata xtatayananin Jehová akinin chu kstalaninanin Jesús (Ecl. 3:1, 7; Mar. 8:38). Maski talakaskin liwana nalakapastakaw tuku nawanaw chu tlan nakalikatsiniyaw tiku ni kgaxmatputunkgo tuku kawaniyaw, nikxni kalikatsiw la israelitas tiku «lu pekuankgolh» akxni kgaxmatkgolh tuku xwan Goliat (1 Sam. 17:11). Wata ni kapekuaw xlakata nasantujtlawayaw xtukuwani Jehová. Akinin kamakgtayaputunaw latamanin nalakgapaskgo tiku xlikana Dios chu limaklakaskinaw xTachuwin xlakata naʼakxilhkgo pi lu xlakaskinka natalakatsuwinikgo (Sant. 4:8).
6. ¿Tuku xtlawaputun David akxni talachipalh Goliat, chu tuku tlakg xlakaskinka kiliʼakxilhatkan?
6 Akxni David talachipalh Goliat wi atanu tuku na kinkamasiyaniyan. Akxni David tokgoson chalh niku xlatalachipamakgolh, kgalhskininalh: «¿Tuku namaxkikan chixku tiku namakgni uma filisteo chu natlawa pi nialh natamamaxani Israel?». Lakchixkuwin xalak Israel wanikgolh tuku xwankgonita: «Chixku tiku namakgni, mapakgsina lhuwa tuku namaxki, chu na namaxki xtsumat» (1 Sam. 17:25-27). Pero tuku xʼamaka maxkikan ni wa tuku tlakg xlakaskinka akxilhli David. Wi atanu tuku tlakg xlakaskinka xtlawaputun: namalanki xaxlikana Dios (kalikgalhtawakga 1 Samuel 17:46, 47). ¿Chu akinin? ¿Tlakg xlakaskinka akxilhaw nakinkalakgapaskanan kkakilhtamaku xlakata tlajamaw lhuwa tumin o wi tuku lu xlakaskinka lakgatayaputunaw? Xlikana, tlawaputunaw chuna la David tiku kilhtlilh: «Limakxtum kalitliw ixlilanka Kintikukan Dios, limakxtum kamalankiw ixtukuwini» (Sal. 34:3). Wa xlakata kalipawaw Jehová chu pulana kawiliw xtukuwani nixawa kilakan (Mat. 6:9).
7. ¿La tlan namatliwakglhaw kintakanajlakan xlakata chuntiyaku nalichuwinanaw Dios maski latamanin ni xatapaxuwan kgaxmatkgo?
7 David ni pekualh xlakata lu xlipawan Jehová. Uma kgawasa lu tliwakga xwi xtakanajla xlakata xlipawan Dios akxni xkuentajtlawa borregos (1 Sam. 17:34-37). Na talakaskin pi akinin nakgalhiyaw tliwakga takanajla xlakata chuntiyaku nalichuwinanaw Dios, liwaka akxni ni xatapaxuwan kinkakgaxmatnikgoyan. Na tlan nakgalhiyaw uma takanajla komo lipawanaw Dios putum tuku tlawayaw chali chali. Akgtum liʼakxilhtit, komo tiyayaw autobús, tlan natsukuyaw tachuwinanaw xlakata Biblia tiku nakinkapaxtutawilayan. ¿Tuku xlakata ni katachuwinanaw tiku katatanokglhaw ktiji akxni anaw lichuwinanaw Dios akgatunu chiki? (Hech. 20:20, 21.)
DAVID LIPAWAN JEHOVÁ
8, 9. Chuna la David likatsinilh Saúl, ¿la limasiyalh pi kuenta xtlawa xtalakaskin Jehová?
8 Atanu liʼakxilhtit xlakata la David xlipawan Dios wa la likatsinilh Saúl xapulana mapakgsina xalak Israel. Xlakata xsitsini, makgtutu xlilakgxtokgoputun xlanza kpatsaps, pero David tapanulh chu ni malakgaxokgelh. Alistalh nialh la tuku tlawalh chu tsalalh (1 Sam. 18:7-11; 19:10). Wa xlakata, Saúl tsuku putsastalani kdesierto chu lilh akgtutu mil soldados xatalaksakni xlikalanka Israel (1 Sam. 24:2). Makgtum Saúl ni katsilh chu tanulh kwatiya lanka lhuku niku xwi David chu xsoldados. David tlan xtimakgnilh mapakgsina tiku xputsastalanima. Xlakata Dios xlakaskin pi David xtawi xlakgxokgo Saúl (1 Sam. 16:1, 13). Chu komo xtikgaxmatli tuku wanikgolh xsoldados, xtimakgnilh. Pero wata wa: «Lu nitlan, kimpalakata, chuna la akxilha Jehová, pi akit naktlawani uma tuku nitlan kimalana, tiku Jehová laksaknit» (kalikgalhtawakga 1 Samuel 24:4-7). Saúl chuntiyaku xlitaxtu mapakgsina tiku Dios xlaksaknit chu David ni xmakglhtiputun xpumapakgsin, xlakata Jehová nina xmaxki talakaskin namapakgsinan. Akxni kaj chukunilh xlhakgat, limasiyalh pi nitu xtlawaniputun (1 Sam. 24:11).
9 David amakgtum maxkilh kakni tiku Jehová xlaksaknit akxni xʼawatiya akxilhli. David chu Abisai chankgolh niku Saúl xwi chu klhtatama. Maski Abisai lakpuwa pi Dios xkamakamaxkima xtalamakgasitsin chu xlilakgxtokgoputun xlanza ktiyat, David ni maxkilh talakaskin (1 Sam. 26:8-11). Xlakata xputsa napulalin Dios, ni mastalh talakaskin pi tuku xwani xcompañero xtlawalh pi nialh natlawa xtalakaskin Jehová.
10. ¿Tuku max natitaxtuyaw chu tuku nakinkamakgtayayan xlakata ni natlawayaw tuku nitlan?
10 Akinin max na natitaxtuyaw tuku tuwa chu max wi tiku nakinkamatlawiputunan tuku xla lakapastaka chu ni wa tuku lakaskin Jehová. Xtachuna la Abisai, max wi tuku nakinkamatlawiputunkanan chu ni kuenta natlawayaw xtalakaskin Jehová. Xlakata ni natlawayaw tuku lakaskin, talakaskin liwana nakatsiyaw la lakapastaka Jehová chu liwana nalakkaxwiliyaw pi nalatamayaw kxtiji.
11. ¿Tukuya liʼakxilhtit kinkamakgxtakgnin David xlakata nalilakapastakaw xtalakaskin Jehová?
11 David chuna wanilh Dios: «Kakimasini la naktlawa tu lakgatiya» (kalikgalhtawakga Salmo 143:5, 8, 10). Ni lipawa xtalakapastakni o tlawalh tuku xlakaskinkgo amakgapitsin, xla xlakaskin pi Jehová xmasiyanilh xtiji. Chu wa: «Klakapastaka ama makgasa kilhtamaku akxni wix ixkatlawaya laklikuanit taskujut, akit kkalilakpuwantawila wakg mintaskujut nima katlawanita». Akinin tlan katsiniyaw tuku xtalakaskin Dios akxni liwana likgalhtawakgayaw Biblia chu akxni lilakapastakaw tuku likgalhtawakgayaw niku limasiya la Jehová kalikatsini latamanin.
DAVID XʼAKGATEKGSA TASTAKYAW NEMA XTAKILHTI KLIMAPAKGSIN
12, 13. ¿Tuku xlakata David makgalh chuchut nema liminkgolh chatutu xsoldados?
12 Akinin na tlan naʼakgatekgsaw tastakyaw nema takilhtinit kLimapakgsin Dios chu nalilatamayaw chuna la tlawalh David. Kaʼakxilhwi tuku lalh akxni wa «tlan xaklikgotnalh chuchut nema wi kxpozo Belén». Chatutu xsoldados fuerza tanukgolh kkachikin niku xʼakgchipakgonit filisteos chu liminikgolh chuchut. Pero, «David ni walh uma chuchut, wata makamaxkilh Jehová». ¿Tuku xlakata? Xla kinkawaniyan: «¡Ni tlan nawan xlakatin kiDios komo nakwa uma chuchut! ¿Wa xkgalhni uma lakchixkuwin tuku nakwa xlakata xlakan lu katuwa wilikgolh xlatamatkan? Xlakata katuwa wilikgolh xlatamat akxni kitiyakgolh uma chuchut» (1 Crón. 11:15-19).
13 Xlakata xlakgapasa Limapakgsin, David xkatsi pi kgalhni ni wakan, wata makamaxkikan Jehová. Na xkatsi pi Limapakgsin xwan «xlatamat makni wi kkgalhni». Pero uma chuchut xwanit, chu ni kgalhni, ¿tuku xlakata ni waputulh? Xlakata xʼakgatekgsa tastakyaw nema xtakilhti kʼuma limapakgsin: Pi Jehová xasanto akxilha kgalhni. Xlakata umakgolh chatutu lakchixkuwin kalipekua xwilikgonit xlatamatkan, David xkatsi pi komo xwalh uma chuchut ni xasanto xakxilhli xkgalhini umakgolh lakchixkuwin. Wa xlakata ni la xwa. Wata lakapastakli pi xtalakaskin namakgan ktiyat (Lev. 17:11; Deut. 12:23, 24).
14. ¿Tuku makgtayalh David nalikatsi chuna la Jehová?
14 David tlawalh pi xlimapakgsin Jehová xtawilalh kxnaku. Wa xlakata kilhtlilh: «Oh Dios, akit snun klakgati ktlawa tu wix lakgatiya, milimapakgsin kkgalhi nak kinaku xlakata nakmakgantaxtij» (Sal. 40:8). Likgalhtawakgalh xlimapakgsin Dios chu lilakapastakli. Xlakata xlipawan pi lu skgalala xlimapakgsin Jehová, ni kaj xmakgantaxti tuku xwan limapakgsin nema maxkika Moisés, wata na xlilatama chuna la xwan. Akxni likgalhtawakgayaw Biblia, xlakaskinka nalilakapastakaw tuku likgalhtawakgayaw chu namakiyaw kkinakujkan. Chuna tlan nakatsiyaw tuku Jehová lakgati maski katuwa tuku natitaxtuyaw.
15. ¿La limasiyalh Salomón pi ni xmaxki kakni xLimapakgsin Dios?
15 Jehová lhuwa sikulunatlawalh Salomón, xkgawasa David. Pero titaxtulh kilhtamaku nialh kgalhakgaxmatli xLimapakgsin Dios. Akgtum liʼakxilhtit, xla xkatsi pi mapakgsinanin xalak Israel ni «chalhuwa xlakpuskatin» nakgalhikgo, pero ni kgalhakgaxmatli uma limapakgsin (Deut. 17:17). Tatamakgaxtokgli lhuwa lakpuskatin tiku ni xalak Israel. Chu akxni xkgolonita, «xlakpuskatin [...] tlawakgolh pi xnaku kstalanilh atanu dioses». Maski atanu tuku wa, «tsukulh tlawa tuku nitlan xlakatin Jehová, chu ni tlawalh putum tuku tlan chuna la David xtlat» (1 Rey. 11:1-6). ¡Lu xlakaskinka namastayaw talakaskin pi nakinkapulalinan xlimapakgsin chu xtastakyaw xTachuwin Dios! Kawiliw akgtum liʼakxilhtit, lu xlakaskinka natlawaniyaw kuenta akxni lakpuwamaw natamakgaxtokgaw.
16. ¿La kinkamakgtayayan akxni akgatekgsaw tuku kilhchanima limapakgsin pi kaj natatamakgaxtokgaw tiku «kanajlaniy nkimPuchinakan»?
16 Komo chatum tiku ni kstalanina Cristo kinkamasiyaniyan pi kinkalakgatiyan, ¿nalimasiyayaw pi lakpuwanaw la David o la Salomón? Xaxlikana kstalaninanin Cristo makgantaxtiyaw uma tastakyaw, natatamakgaxtokgaw «xman wa lapi kanajlaniy nkimPuchinakan» (1 Cor. 7:39). Komo chatum kstalanina Cristo tamakgaxtokgputun xlakaskinka natatamakgaxtokga tiku tamakamastanit chu tamununit. Komo akgatekgsaw tuku kilhchanima tuku skin Biblia, ni natatamakgaxtokgaw tiku ni kstalanina Cristo, na nipara tsinu kuenta natlawaniyaw akxni nakinkawaniyan pi kinkalakgatiyan.
17. ¿Tuku nakinkamakgtayayan ni naʼakxilhaw tiku ni lhakganankgonit?
17 Xlakata David putsalh napulalin Dios na nakinkamakgtayayan ni naʼakxilhaw tiku nitu lhakganankgonit. Kalikgalhtawakga umakgolh textos chu kalilakapastakti tastakyaw nema limin chu kaʼakxilhti tuku xtalakaskin Jehová xlakata uma (kalikgalhtawakga Salmo 119:37; Mateo 5:28, 29 chu Colosenses 3:5). Akxni lilakapastakaw lu xatlan xlimapakgsin Dios kinkamakgtayayan ni naʼakxilhaw tiku nitu lhakganankgonit.
PUTUM KILHTAMAKU KALILAKAPASTAKWI TUKU LAKPUWAN DIOS
18, 19. 1) Maski xkgalhi talakgalhin ¿tuku xlakata David chuntiyaku tlan talalilh Jehová? 2) ¿Tuku liwana lakkaxwilinita natlawaya?
18 Maski David pulaklhuwa la tlan lilh xlatamat, na tlawalh laklanka talakgalhin (2 Sam. 11:2-4, 14, 15, 22-27; 1 Crón. 21:1, 7). Pero limasiyalh pi nitlan xlimakgkatsi. Tlan nawanaw pi talatamalh Dios «xliputum xnaku» (1 Rey. 9:4). ¿Tuku xlakata? Xlakata putum kilhtamaku tlawaputulh xtalakaskin Dios.
19 Maski lakgalhinanin akinin, tlan natalalinaw Jehová. Wa xlakata kalikgalhtawakgaw xTachuwin, kalilakapastakwi tuku katsiniw chu katlawaw tuku katsininitaw. Chuna tlan nawanaw la salmista tiku skinilh Jehová: «Kakimasini la naktlawa tu lakgatiya».
[Takgalhskinin]
[Dibujo xla página 5]
¿Tuku xlakata David ni makgnilh Saúl akxni tlan xmakgnilh?
[Dibujo xla página 6]
¿Tuku kinkamasiyaniyan xlakata David ni waputulh chuchut nema liminikgolh xsoldados?
