Kalatapatitit chatunu chatunu
Kalatapatitit chatunu chatunu
«Kalapaxuwanalipinitit, chu na nalamatsankgananiyatit nchatunu amakgapitsin.» (COL. 3:13)
¿TUKU XKGALHTINANTI?
¿Tuku xlakata natapatinanaw?
¿Tukuya liʼakxilhtit maklakaskilh Jesús xlakata xlimasiyalh pi lu talakaskin natapatinanaw?
¿Tukuya tasikulunalin makglhtinanaw akxni katapatiyaw amakgapitsin?
1, 2. ¿Tuku xlakata lu xlakaskinka naʼakxilhaw natapatinanaw?
JEHOVÁ kinkawaniyan kxTachuwin la akxilha talakgalhin chu tuku makgkatsi akxni tlawayaw. Na lhuwa tuku kinkamasiyaniyan xlakata tapatinankan. Kʼartículo nema titaxtulh akxilhwi la lakgalhamalh David chu Manasés akxni makgxtakgkgolh tuku nitlan xtlawamakgolh. Xlakata lu nitlan xlimakgkatsikgo wankgolh tuku nitlan xtlawakgonit, nialh tlawakgolh chu xlikana makgxtakgkgolh. Wa xlakata tlan talalimparakgolh Dios.
2 Chu kaʼakxilhwi apulaktu xlakata tapatinankan. ¿La xmakgkatsi komo Manasés xtitlawanilh tuku nitlan tiku xalak mi familia? ¿Tlan xtapati mapakgsina? Lu xlakaskinka uma takgalhskinin, xlakata lamaw kkakilhtamaku niku nitlan likatsikan chu akstu kapaxkikan. Xlakata uma, ¿tuku xlakata kstalanina Cristo nakatsini tapatinan? Komo wix natlawanikan tuku nitlan, ¿tuku namakgtayayan xlakata ni nasitsiya, natlawaya chuna la lakaskin Jehová chu natapatinana?
TUKU XLAKATA NATAPATINANAW
3-5. 1) ¿Tuku liʼakxilhtit limaklakaskilh Jesús xlakata tiku xkgaxmatmakgo xkatsikgolh pi lu xlakaskinka tapatinankan? 2) ¿Tuku kinkamasiyaniyan parábola nema wi kMateo 18:21-35?
3 Akxni katapatiyaw tiku kinkatlawanikgoyan tuku nitlan, max tiku xalak congregación o ni, lu xlakaskinka xlakata tlan natalalinaw kifamiliajkan, amigos chu amakgapitsin, chu na tlan natalalinaw Jehová. Biblia wan pi chuna xlitlawat kstalanina Cristo, maski makglhuwa nitlan tuku natlawanikan. Xlakata xlimasiyalh la xlilakaskinka uma, Jesús lichuwinalh xliʼakxilhtit chatum skujni tiku xlaklin tumin.
4 Uma skujni xlaklini xmalana xtaskgaw tutupuxam millón jornadas; pero malana tapatilh uma tuku xlaklini. Pero uma skujni tatanokglhli atanu skujni tiku ni lu lhuwa xlaklini: kaj xlaklini xtaskgaw akgtum ciento jornadas. Tiku xlaklini skinilh pi xkgalhkgalhilh, pero achatum skujni tiku xmalana xtapatinit tuku xlaklini tlawalh pi xtamaknuka kpulachin. Uma tlawalh pi lu xsitsinilh malana, tiku kgalhskilh uma skujni: «¿Tu na xmininiyan nakgalhiniya ntalakgalhaman mintaskujni, xtachuna lantla nkit kkgalhinin ntalakalhaman?». Chu Biblia chuntiya wan: «Cha nchu xmalana, mpi sitsilh, pus wa makamaxkikgolh nkuintaj xtlawananin patinanin, asta ni liwaya naxokgoniy wa ntu xliyaniy» (Mat. 18:21-34).
5 ¿Tuku kinkamasiyaniyan uma parábola xla Jesús? Xla xaʼawatiya wa: «Pus na kawa nama nakatlawayan nkinTlat nti wi nkakgapun wa mpalapi ni luwa minakukan xlimatsankgananikgotit nchatunu minatalankan» (Mat. 18:35). Liwana tasiya tuku masiyaputulh. Talakgalhin nema tlawayaw kxliputum kilatamatkan limasiya pi akinin nila makgantaxtiyaw xlimapakgsin Jehová. Pero xla kinkatapatiyan chu tlan nawanaw, pi xla nialh lakapastaka tuku akinin tlawayaw. Wa xlakata, putum tiku talalimputun talakaskin nakatsini natapati amakgapitsin. Uma xtachuna tuku wa Jesús kxtaʼakgchuwin xalak Sipi: «Xampi lapi xmatsankgananikgotit wa nti nkamakgasitsin, chu na nakamatsankgananiyan minTlatkan nti wi nkakgapun. Wampi wa lapi ni xmatsankgananikgotit wa nti nkamakgasitsin, na ni katikamatsankgananin mintalakgalhinkan minTlatkan nti wi nkakgapun» (Mat. 6:14, 15).
6. ¿Tuku xlakata min kilhtamaku tuwa tapatinanaw?
6 Max wix nawana, «uma lu tlan takgaxmata, ni lu tuwa wankan pero tuwa tlawakan». Chuna la xlakata akxni wi tuku kinkatlawanikanan nitlan kinkamamakgkatsiniyan. Max nasitsiyaw, namakgkatsiyaw pi kinkaʼakgskgawikgon o nalakaskinaw namalakgaxokgekan o akinin namalakgaxokgeyaw. Chu wilakgolh tiku lakpuwankgo pi nikxni natapatikgo tiku katlawanilh tuku nitlan. Komo wix chuna makgkatsiya, ¿la tlan natapatinana chuna la Jehová kaskini xlakskujni katlawakgolh?
KAʼAKXILHTI TUKU MAKGKATSIYAW
7, 8. ¿Tuku namakgtayayan natapatinana akxni sitsinita xlakata tuku nitlan tlawakgo amakgapitsin?
7 Chuna la makgkatsiyaw akxni wi tuku nitlan kinkatlawanikanan o kaj lakpuwanaw pi nitlan kinkatlawanikanan, max lu tliwakga nawan. Akxni lakputsananka xlakata tasitsi, chatum kgawasa chuna wa: «Akgtum kilhtamaku [...] lu lamakgasitsiw kkinchik chu ktaxtulh chu kwa pi nikxni xakama taspita. Akgtum lu tlan kilhtamaku xla verano xwanit, chu klatapulilh kkakiwin asta akxni tlan kmakgkatsilh chu tuku lu kastlan xwi anta tsinu tsinu tlawalh skayaj xakmakgkatsilh. Ni lhuwa horas titaxtulh ktaspitli kchiki, nialhtu xaksitsima chu klimaxanalh tuku kwa». Uma liʼakxilhtit limasiya pi akxni limaxtukan kilhtamaku xlakata natakaksaw chu akxni liwana akxilhaw tuku lama nakinkamakgtayayan ni natlawayaw tuku alistalh nitlan nalimakgkatsiyaw (Sal. 4:4; Prov. 14:29; Sant. 1:19, 20).
8 Pero ¿komo chuntiyaku sitsimaw? Kaʼakxilhti tuku xlakata sitsipat. ¿Max xlakata tlawanika tuku nitlan o ni tlan tuku wanikanti? ¿O xlakata lakpuwana pi atanu lakkaxwililh natlawaniyan tuku nitlan? ¿Xlikana lu lanka tuku nitlan tlawanikanti? Akxni akxilhaw chu katsiyaw tuku xlakata sitsimaw, naʼakxilhaw pi textos xalak Biblia kinkamakgtayakgoyan tlakg tlan nalikatsiyaw (kalikgalhtawakga Proverbios 15:28 chu 17:27). Akxni chuna natlawayaw max nakinkamakgtayayan nakatsiyaw tuku xlakata sitsimaw chu nakatapatiyaw amakgapitsin. Max tuwa namakgkatsiya, pero chuna namastaya talakaskin pi xTachuwin Dios nalaktanu «ntalakapastakna» chu nalikatsiyaw chuna la Jehová tiku tapatinan (Heb. 4:12).
¿XLIKANA WI TUKU NALISITSIYA?
9, 10. 1) ¿Tuku militlawat akxni wi tuku nitlan tlawanikana? 2) ¿La namakgtayayan kmilatamat komo lu tlan nalakapastaka chu nalakgalhamanana?
9 Kkilatamatkan lhuwa tuku tlawa pi nitlan nalimakgkatsiyaw. Kalilakpuwanti pi lipimpat min putlaw chu atanu putlaw atsinu wilini mimputlaw. ¿Tuku natlawaya? Max wix kgaxmatnita xlakata makgapitsi lu sitsikgo chu talachipakgo atanu tiku lin xputlaw. Pero chatum kstalanina Cristo nipara tsinu nalakapastaka chuna natlawa.
10 Ni nasitsiyaw, wata tlakg tlan pulana nalakapastakaw tuku natlawayaw. Max na minkuenta xlakata ni kuentajtlawa. O max atanu putlaw wi tuku nitlan lanilh. ¿Tuku kinkamasiniyan uma liʼakxilhtit? Kinkamasiyaniyan pi akxni tlan likatsiyaw, liwana lakapastakaw chu talakgalhaman natlawa pi nialh nasitsiyaw, o atanu tuku nitlan nalimakgkatsiyaw. Eclesiastés 7:9 kinkawaniyan: «Ni lakapala kasitsi, xlakata tiku lakapala sitsi wa tuku tlawakgo tiku xalak tontos». Ni kalakpuwanti pi lakkaxwilikanit natlawanikana tuku nitlan. Makglhuwa akxni lakpuwanaw pi kaj lakkaxwilika nakinkatlawanikan tuku nitlan, nichuna, max kaj xlakata talakgalhin o xlakata wi tuku ni liwana akgatekgswi. Kaliskujti tlakg lhuwa tuku naʼakxilha akxni wi tuku nitlan natlawanikana o nawanikana. Katapatinanti xlakata paxkinana chu tlakg napaxuwaya (kalikgalhtawakga 1 Pedro 4:8).
«MINTASKULUNATLAWANKAN, [...] PUS NAKATAPUSPITNIPALAYAN»
11. ¿La nakgalhtinanaw akxni lichuwinanaw Dios komo nakinkakilhnikanan?
11 ¿Tuku natlawaya xlakata ni nasitsiya akxni pina lichuwinana Dios komo ni tlan nalikatsinikana? Akxni Jesús kamalakgachalh 70 xtamakgalhtawakgen kawanilh pi kʼakgatunu chiki niku xchankgolh ksikulunatlawakgolh. Chu na wa: «Na lapi xanalh anta nchatum nchixku nti ntlan xkatsilh, wa mintaskulunatlawankan, ankgalhin kaʼananikgolh; chi wa lapi ni chuna, pus nakatapuspitnipalayan» (Luc. 10:1, 5, 6). Lipaxuwayaw akxni wi tiku kgaxmata, chuna litamakgtaya tamakatsin nema linaw. Pero min kilhtamaku, nitlan kinkakgalhtikanan. ¿Tuku natlawaya wix akxni chuna nala? Jesús wa pi tasikulunalin nema xmaxkiputuna nataspitniparayan. Maski nakilhnikana wix ni nasitsiya. Komo na nasitsiya natawila taʼakglhuwit.
12. Chuna la wa Pablo kEfesios 4:31, 32, ¿tuku kilitlawatkan?
12 Putum kilhtamaku ni kasitsi, ni kaj akxni pina lichuwinana Dios. Chuna, akxni wi tiku tapatiya ni wamputun pi tlan naʼakxilha tuku nitlan tlawalh o lakpuwana pi amakgapitsin ni katlawani tuku nitlan. Pero kilhchanima namaxtuya tasitsi xlakata tuku nitlan tlawanin achatum chu chuntiya napaxuwaya. Wi tiku putum kilhtamaku lakapastaka tuku nitlan katlawanika, mastakgo talakaskin pi tuku tlawakgo amakgapitsin natlawa pi nialh napaxuwakgo. Ni kamasta talakaskin pi chuna nalakpuwana. Kalakpuwanti pi nila katipaxuwa komo chuntiya sitsiniya achatum. Wa xlakata, kakatapati amakgapitsin (kalikgalhtawakga Efesios 4:31, 32).
KAKGALHTINANTI CHUNA LA JEHOVÁ LAKGATI
13. 1) ¿La wili kstalanina Cristo «jalanat xla lhkuyat» kxakgxakga «[x]talatlawana»? 2) ¿Tuku nakitaxtu komo ni nasitsiyaw akxni wi tiku kinkasitsiniyan?
13 Max tiku nitlan tuku tlawanin, alistalh na kstalanina Cristo nawan. Apóstol Pablo wa: «Chuna mpi lapi wa mintalatlawana, xtsinksli, kamawi; lapi xkgalhputilh, kamakgotni. Xampi lapi xtlawa yuma, wa jalanat xla lhkuyat namamakgstokga kxokgspun xakgxakga. Ni wa ntilitatlajiya wa ntu ni xatlan, wampi wa ntu xatlan nkalitlaja wa ntu ni xatlan» (Rom. 12:20, 21). Akxni tlan kalikatsiniyaw tlawa pi nialh nasitsikgo chu tlan nalikatsikgo latamanin. Komo ni nasitsiniya tiku sitsiniyan, max alistalh tlan namasiyaniya xaxlikana xalak Biblia. Akxni ni nasitsiniya uma natlawa pi nalilakapastaka pi wix tlan likatsini (1 Ped. 2:12; 3:16).
14. Maski nitlan tuku tlawanikanti, ¿tuku xlakata ni chuntiya nasitsiniya?
14 Anan tiku nitlan nakatalalinaw. Wa tiku milh kilhtamaku na xtapakgsikgo kcongregación pero lakgalhinankgolh, chuntiya tlawakgolh chu katamakxtuka. Komo wi tiku nitlan tuku tlawanin, max lu tuwa namakgkatsiya natapatiya maski nialhtu tlawaniman, xlakata makgas lipaksa tuku tlawanin. Akxni chuna nala kaskini Jehová kamakgtayan natapatinana. Wa xlakata, ¿la tlan nakatsiya tuku wi kxnaku achatum? Jehová katsi tuku makgkatsiyaw chu katapati tiku lakgalhinan (Sal. 7:9; Prov. 17:3). Wa xlakata Biblia wan: «Lapi wi mpala ti mpala tu xkatlawanin ntu ni tlan, ni chuna ntitamakgapuspitniyatit. Kana wixin, wa ntu ntlan natlawayatit wa ntu na nalikatsikgoy nchixkuwin mpi tlan. Wa mpala pi tlan, nakgalhinikgoyatit ntapaxuwan xlipaks nchixkuwin, chuna nkatlawatit. Kinatalanin, ni titamakgapuspitnikgoyatit wa nti ni tlan ntu ntlawanikgoyan, wampi anta kxmakan Dios nkamakgaxtakgtit mpi wa naliʼakgastakyawakgoy; xampi chuna ntatsokgnit: “Kila ntamakgapuspitni, kit nakxokgoy, wan nkinTlatikan [Jehová]”» (Rom. 12:17-19). Ni kinkalakgchanan nakamalakgaxokgeyaw amakgapitsin (Mat. 7:1, 2). Pero katsiyaw pi Jehová natlawa tuku akgstitum.
15. ¿Tuku nalakpuwanaw akxni wi tiku kinkatlawaniyan tuku nitlan?
15 Komo tuwa makgkatsiya natapatiya tiku tlawananin tuku nitlan tlawanikanti,pero skiniyan katapati, kalakapastakti pi achatum na nitlan tuku titaxtuma. Xla na lakgalhina (Rom. 3:23). Jehová kalakgalhaman putum latamanin maski lakgalhinanin. Wa xlakata katlawaw oración xpalakata tiku kinkasitsiniyan. Ni tlan chuntiya nasitsiniyaw tiku kapalakaskinaw kʼoración. Jesús wa pi ni nakasitsiniyaw tiku kinkatlawanin tuku nitlan, akxni wa: «Kapaxkitit [mintalamakgasitsinkan], [...] chu na kapalakatlawakgotit oración wa nti xalikgaman katlawakgoyan» (Mat. 5:44).
16, 17. ¿Tuku natlawaya wix komo lakgkgolotsin naʼakxilhkgo pi tiku lakgalhinalh nialh chuna tlawama, chu tuku xlakata?
16 Dios kamaxkinit talakaskin lakgkgolotsin nalakkaxtlawakgo laklanka talakgalhin kcongregación. Umakgolh natalan nila liwana katsikgo tuku lalh la Jehová, pero kapulalin xTachuwin Dios chu espíritu santo akxni lakkaxtlawakgo taʼakglhuwit. Wa xlakata tuku lakkaxwilikgo akxni tlawakgonita oración limasiya pi chuna lakapastaka Jehová (Mat. 18:18).
17 Akxni chuna natitaxtuyaw nalimasiyayaw pi ni makgxtakgaw Jehová. Komo lakgkgolotsin naʼakxilhkgo pi tiku lakgalhinalh nialh chuna tlawama, ¿natapatiya wix chu chuntiya napaxkiya? (2 Cor. 2:5-8.) Max lu tuwa namakgkatsiya komo nitlan tuku tlawanin o mifamilia. Pero komo lipawana Jehová chu la lakkaxtlawakan taʼakglhuwit kcongregación, nalimasiyaya pi skgalala wix chu pi xlikana tapatinana (Prov. 3:5, 6).
18. ¿Tuku namakglhtinana komo xatapaxuwan natapatinana?
18 Kalakpuwanti tuku nitlan kitaxtu akxni sitsiyaw: litatatlayaw, nialh tlan latalalinaw, nitlan makgkatsiyaw, chu nialh tlan latachuwinanaw. Chu katamalakxtupi tuku tlan kitaxtu akxni tapatinankan. Tlawa pi ni nalitatatlayaw kintasitsikan chu tlakg tlan latalalinkan chu paxuwakan. Pero tiku tapatinan makglhtinan lhuwa tasikulunalin: tlan talalin Jehová, kinTlatkan xalak akgapun (kalikgalhtawakga Colosenses 3:12-14).
[Takgalhskinin]
[Dibujo xla página 27]
¿Tuku kinkamasiyanin xparábola Jesús?
[Dibujo xla página 30]
Kstalaninanin Cristo natapatinankgo
