¿La akxilha wix xlakata Jehová kinkatapatiyan?
¿La akxilha wix xlakata Jehová kinkatapatiyan?
«Jehová, chatum Dios xalakgalhamana chu tlan likatsi, ni lakapala sitsi, [...], tapatinan akxni tlawakan tuku nitlan, ni kgaxmatputunkan chu talakgalhin.» (ÉX. 34:6, 7)
KAPUTSA XTAKGALHTIN
¿Tuku tlawalh Jehová xlakata xtalakgalhinkan David chu Manasés, chu tuku xlakata?
¿Tuku xlakata Jehová ni katapatilh Israel?
¿Tuku kilitlawatkan xlakata Jehová nakinkatapatiyan?
1, 2. 1) ¿La kalikatsinilh Dios kachikin xalak Israel? 2) ¿Tuku nalichuwinanaw kʼuma artículo?
KXKILHTAMAKU Nehemías, makgapitsi levitas wankgolh kʼakgtum oración kxlakatin amakgapitsin pi xnatlatni xala makgasa makglhuwa «ni kgaxmatputunkgolh» xlimapakgsin Dios. Pero makglhuwa, Jehová limasiyalh pi «Dios tiku tapatinan, tlan likatsi chu xalakgalhamana, ni lakapala sitsi, chu lhuwa masiya tapaxkit nema ni makgxtakgnan». Chu chuntiya kalimasiyanilh tapaxkit nema ni xkalakgchan tiku xlamakgolh kxkilhtamaku Nehemías akxni taspitkgolh niku xkachilinkanit (Neh. 9:16, 17).
2 Chatunu akinin tlan natlawa uma takgalhskinin: «¿La kakxilha xlakata Jehová kinkatapatiyan?». Xlakata nakgalhtiyaw uma lu xlakaskinka takgalhskinin, kaʼakxilhwi la kalikatsinilh Dios chatiy lakchixkuwin nema katapatilh: mapakgsinanin David chu Manasés.
LAKLANKA XTALAKGALHIN DAVID
3-5. ¿Tuku xlakata David lanka talakgalhin tlawalh?
3 Maski David xkgalhini xatlan tapekua Dios, tlawalh laklanka talakgalhin. Pulaktiy talakgalhin wa tuku tlawanilh xtamakgaxtokgat, Urías chu Bat-seba. Chu putum lu patinankgolh. Pero chuna la Dios stakyawalh David kinkamasiyaniyan la tapatinan. Kaʼakxilhwi tuku lalh.
4 David xmalakgachanit soldados xalak Israel nastiliwilikgo Rabá, niku xtapakgsi Ammón, nema xwi 80 kilómetros niku taxtu Chichini kJerusalén, chu xpatakutkan kgalhtuchokgo Jordán. Akgtum kilhtamaku akxni xlawaka kxakgstin xchik kJerusalén, akxilhli la xpaxma Bat-seba chu xchixku xʼanit kguerra. Uma tlawalh pi nitlan nalakapastaka chu matasaninalh chu tatalakgxtumilh (2 Sam. 11:1-4).
5 Akxni David katsilh pi Bat-seba xʼama kgalhi skgata, tlawalh pi xchixku xtaspitli kJerusalén xlakata xtatalakgxtumilh xpuskat. Pero Urías nipara tanulh kxchik, maski David wanilh pi xʼalh. Wa xlakata mapakgsina malakgachalh akgtum tamakatsin niku xwani comandante, «kawilitit Urías kxlakatin niku tlakg tuwa wi talachipat» chu soldados kaʼakgxtakgwilikgolh, chuna lakapala xʼamaka makgnikan. Chuna la David xlakkaxwilinit, Urías makgnika kʼguerra (2 Sam. 11:12-17). Chuna mapakgsina ni kaj tlawalh talakgxtumit xalimaxana na makgnilh chatum chixku tiku nitu xtlawanit.
DAVID LAKGPALILH XTALAKAPASTAKNI
6. 1) ¿Tuku tlawalh Dios xlakata xtalakgalhin David? 2) ¿Tuku katsiniyaw xlakata la Jehová lakkaxtlawalh taʼakglhuwit?
6 Jehová putum akxilhli, xlakata nila tuku matsekgnikan (Prov. 15:3). Maski alistalh mapakgsina tatamakgaxtokgli Bat-seba, «tuku tlawalh David lu nitlan akxilhli Jehová» (2 Sam. 11:27). Pero ¿tuku tlawalh Jehová xlakata David tlawalh lanka talakgalhin? Malakgachanilh palakachuwina Natán. Xlakata xla «chatum Dios tiku tapatinan», xputsananima la nalimasiyani xtalakgalhaman. ¿Ni xlikana pi lu tlan limakgkatsiyaw chuna la lakkaxtlawalh taʼakglhuwit? Ni skinilh pi xkgalhapalalh tuku nitlan xtlawanit, kaj tlawalh pi Natán wi tuku litachuwinalh xlakata xlitasiyalh tuku nitlan xtlawanit (kalikgalhtawakga 2 Samuel 12:1-4). Chuna lu tlan lakkaxwililh taʼakglhuwit.
7. ¿Tuku tlawalh David akxni Natán wi tuku litachuwinalh?
7 Tuku Natán wanilh mapakgsina tlawalh pi akgstitum xlakapastakli. David lu sitsinilh uma chixku tiku xkgalhi lhuwa tumin nema xlichuwinamaka chu wanilh palakachuwina: «¡Xlikana pi lama Jehová, chixku tiku chuna tlawalh xlinit!». Nachuna, wa pi tiku nitlan xtlawanikanit xtalakaskin nalakgxokgonikan tuku xmakglhtikanit. Pero kaj xalan wi tuku wanika. Palakachuwina Natán wanilh: «¡Wix ama chixku!». David katsilh pi xlakata tuku xtlawanit xfamilia lhuwa tuku nitlan xʼama titaxtu, xʼamaka kamakgnikan chu atanu tuku nitlan. Nachuna, xʼamaka mamaxanikan xlakatin amakgapitsin xlakata xtalakgalhin. David katsilh pi lu nitlan tuku xtlawanit chu wa: «Klakgalhinanit kxlakatin Jehová» (2 Sam. 12:5-14).
XʼORACIÓN DAVID CHU LA TAPATILH DIOS
8, 9. ¿La kinkamasiyaniyan Salmo 51 xlakata la makgkatsilh David chu tuku kinkamasiyaniyan xlakata Jehová?
8 David xlikana nitlan xlimakgkatsi tuku tlawalh chuna litasiya xlakata tuku tsokgli alistalh kʼakgtum takilhtlin. Anta kSalmo 51 likgalhtawakgayaw tuku skinilh Jehová, niku wan pi nikaj litayalh xtalakgalhin, wata na nitlan limakgkatsilh. Tuku tlakg xlakaskinka xakxilha wa la xtalalin Dios. «Wix kkgaxmatmakganinitan». Chu na skilh: «Oh Dios, kakintlawani kinaku xatlan, xasasti, xasasti tapuwan kakimaxki nak kimpulakni. [...] Kakimaxkipara ama tapaxawan nima xakmakglhkatsi akxni kilakgmaxtu, kakimaxki tlan tapuwan xlakata kanikxniwa nakkgaxmatniyan» (Sal. 51:1-4, 7-12). ¿Wanaw tuku xaxlikana akxni tachuwinanaw Jehová tuku nitlan tlawanitaw?
9 Jehová ni lakgmaxtulh David tuku nitlan xlakata xtalakgalhin, nema xʼama lakgmin xliputum xlatamat. Pero tapatilh akxni akxilhli pi «ixnaku snun lipuwan, akxni tlawa tu nitlan y takgalhtutsuwij» chu akxilhli pi xlikana nitlan xlimakgkatsi (kalikgalhtawakga Salmo 32:5; Sal. 51:17). Dios tiku kgalhi xliputum litliwakga katsi la likatsiyaw chu tuku kinkamatlawiyan talakgalhin. Ni mastalh talakaskin pi jueces xwankgolh pi xkamakgnika tiku xtlawakgonit talakgxtumit xalimaxana chuna la xwan limapakgsin nema xmaxkikanit Moisés, Jehová kalakgalhamalh David chu Bat-seba chu wa lakkaxtlawalh taʼakglhuwit (Lev. 20:10). Chu tlawalh pi Salomón chatum xkgawasakan, mapakgsina xalak Israel litaxtulh (1Crón. 22:9, 10).
10. 1) ¿Tuku max na akxilhli Jehová xlakata tapatilh David? 2) ¿Tuku tlawa pi Jehová nakinkatapatiyan?
10 Atanu tuku max tlawalh pi Jehová xtapatilh David wa xlakata lakgalhamalh Saúl (1 Sam. 24:4-7). Jehová kinkalikatsiniyan chuna la akinin kalikatsiniyaw amakgapitsin. Jesús wa: «Ni tilaputsananiyatit, lakimpi na chuna wixin, ni nakaputsananikanatit. Xampi wa ntaputsan ntu liputsananatit, na wa nakaliputsananikanatit; chu wa lilhka ntu lilhkananatit, na wa nakalilhkakanatit» (Mat. 7:1, 2). ¡Lu tlan limakgkatsiyaw xlakata Jehová kinkatapatiyan kintalakgalhinkan, asta akxni lu lanka talakgalhin la akxni wi tiku akgskgawi xpuskat o xchixku, chu tiku makgninan! Pero nakinkatapatiyan akxni na tapatinanaw, waniyaw kintalakgalhinkan chu limasiyayaw pi lakgpaliyaw kintalakapastaknikan. Akxni lakgalhina xlikana makgxtakga tuku nitlan, Jehová «nakamini[...] ntakgtsiyajna» (kalikgalhtawakga Hechos 3:19).
MANASÉS TLAWA LANKA TALAKGALHIN, PERO NITLAN LIMAKGKATSI
11. ¿Tuku lu lixkajni tlawalh Manasés kxlakatin Jehová?
11 Kaʼakxilhwi atanu liʼakxilhtit xalak Biblia nema limasiya la tapatinan Jehová. Max titaxtulh akgtutu ciento tutupuxum kata akxni David tsukulh mapakgsinan, Manasés na tsukulh mapakgsinan kJudá. Tipuxumakukitsis kata nema mapakgsinalh nitlan wa xlakata lixkajni xlikatsi, chu Jehová malakgaxokgelh xlakata nitlan tuku tlawalh. Tlawalh pumakamastan, kakninanilh «putum tuku anan kʼakgapun», matitaxtilh xkamanan klhkuyat chu tlawalh kaʼanalh taskuwan. Alistalh «lhuwa tlawalh tuku nitlan kxlakatin Jehová» (2 Crón. 33:1-6).
12. ¿La lakgtaspitli Manasés Jehová?
12 Titaxtulh kilhtamaku Manasés tamaknuka kpulachin kBabilonia, lakgamakgat niku xwi xchik. Chu max anta lakapastakli tachuwin nema Moisés kawanilh Israel: «Akxni natitaxtuya tuku lu tuwa chu putum uma tachuwin tlawanita, ama kilhtamaku nalakgtaspitparaya Jehová mi Dios chu nakgaxpata xtachuwin» (Deut. 4:30). Chu xlikana, Manasés lakgtaspitli Jehová. ¿La tlawalh? «Tsukulh lhuwa tataktuju» chu «chuntiya tlawanilh oración» (kaʼakxilhti página 21) (2 Crón. 33:12, 13). Ni liwana takatsi tuku wa Manasés akxni tlawalh umakgolh oraciones, pero tlan nalakpuwanaw pi watiya xmakgkatsi la David tsokgli kSalmo 51. Maski ni liwana katsiyaw tuku lalh, katsiyaw pi Manasés lakgpalilh putum xlatamat.
13. ¿Tuku xlakata Jehová tapatilh Manasés?
13 ¿La kgalhtilh Jehová xʼoraciones Manasés? «Mastalh talakaskin chuntiya xtlawanika oración chu xla kgaxmatli.» Chuna la David, Manasés wa pi lanka talakgalhin xtlawanit chu xlikana nitlan limakgkatsilh. Wa xlakata Dios tapatilh chu maxkipa talakaskin namapakgsinampara kJerusalén. Chuna, «Manasés katsilh pi Jehová wa xaxlikana Dios» (2 Crón. 33:13). ¡Lu tlan limakgkatsiyaw uma xliʼakgtiy liʼakxilhtit xlakata xalakgalhamana kiDioskan katapati tiku makgxtakgkgo tuku nitlan tlawakgo!
¿PUTUM KILHTAMAKU TAPATINAN JEHOVÁ?
14. ¿Tuku talakaskin xlakata Jehová nakinkatapatiyan?
14 La uku, lhuwa xlakskujnin Jehová skinkgo nakatapatikan laklanka xtalakgalhinkan chuna la David chu Manasés. Pero xliʼakxilhtit umakgolh mapakgsinanin limasiya pi Jehová tapati laklanka talakgalhin, tiku xlikana makgxtakgkgo tuku nitlan tlawakgo.
15. ¿Tuku limasiya pi Jehová ni putum katapati xtalakgalhinkan latamanin?
15 ¿Tlan nawanaw pi Jehová katapati putum xtalakgalhinkan latamanin? Ni chuna. Katamalakxtumiw tuku tlawalh David chu Manasés chu tuku tlawakgolh latamanin xalak Israel chu Judá tiku ni xkgalhakgaxmatnankgo. Xlakata David, Dios malakgachalh Natán xlakata lakatanks xtachuwinalh, chuna maxkilh talakaskin xlakgpalilh xtapuwan chu mapakgsina paxtikatsininalh. Akxni Manasés lu tuwa tuku xtitaxtuma, xlikana makgxtakgli tuku nitlan xtlawama. Pero makglhuwa, tiku xlamakgolh kʼIsrael chu kJudá ni makgxtakgkgolh tuku nitlan xtlawamakgolh, wa xlakata Jehová ni katapatilh. Wata Dios makglhuwa kamalakgachalh xpalakachuwinanin xlakata xkawanikgolh tuku xlakpuwan xlakata nitlan xtayatkan (kalikgalhtawakga Nehemías 9:30). Chu asta akxni taspitkgolh kBabilonia, chuntiya kamalakgachanilh makatsininanin tiku nikxni xmakgxtakgkgo, la sacerdote Esdras chu palakachuwina Malaquías. Akxni kachikin xtlawa xtalakaskin Jehová putum lu xpaxuwakgo (Neh. 12:43-47).
16. 1) ¿Tuku akgspulalh Israel xlakata ni makgxtakgli tuku nitlan xtlawama? 2) ¿Tuku tlan namakglhtinankgo chatunu chatunu tiku xlakachinkgolh kʼIsrael?
16 Jehová nialh xmakgamakglhtinan akxni xmakamastanikgo animales akxni xmakaminita xkgawasa unu kKatiyatni chu makamastalh xlatamat nema ni xkgalhi talakgalhin xlakata xkalakgmaxtulh latamanin (1 Juan 4:9, 10). Jesús limasiyalh la makgkatsi xTlat akxni uma tuku lichuwinalh: «Jerusalén, Jerusalén, wix [kachikin] ntani makgnikgoy xpalakachuwinanin Dios, chuna aktalakgoy wa nti malakgachananikana. Kana makglhuwa kmamakxtumiputunkgolh milakskgatan, xtachuna ntantum xtilan lantla mpuskgokgay kxtampin xpakgan xlakgskgatan, na ni ukxni lakaskinti. Kaukxilhti, wa nchu mimputawilh, tsilis natamakgaxtakga» (Mat. 23:37, 38). Wa xlakata, uma kachikin nema ni makgxtakgli xtalakgalhin lakgpalika chu wilika xlakgxokgo Israel xaʼespiritual (Mat. 21:43; Gál. 6:16). Pero ¿tiku xlakachinkgo kʼIsrael? Chatunu chatunu kawanikan pi tlan nakatapatikan chu namakglhtinankgo xtalakgalhaman Jehová pero talakaskin nakanajlanikgo chu xtamakamastan Jesucristo. Na nakamaxkikan uma talakgalhaman tiku nikgolh chu ni kgalhikgolh kilhtamaku xlakata namakgxtakgkgo xtalakgalhinkan pero nalakastakwanankgo kKatiyatni niku ni katiʼanalh tuku nitlan (Juan 5:28, 29; Hech. 24:15).
KALITAMAKGTAYA XLAKATA JEHOVÁ TAPATINAN
17, 18. ¿Tuku kilitlawatkan xlakata Jehová nakinkatapatiyan?
17 ¿La kiliʼakxilhatkan xlakata Jehová kinkatapatiyan? Talakaskin natlawayaw la David chu Manasés. Nawanaw kintalakgalhinkan, namakgxtakgaw tuku nitlan tlawamaw, naskiniyaw Dios nakinkatapatiyan chu kakinkamaxkin akgtum tlan naku (Sal. 51:10). Komo tlawanitaw akgtum lanka talakgalhin, kaskiniw tamakgtay lakgkgolotsin xalak congregación (Sant. 5:14, 15). Maski katuwa tuku natitaxtuyaw, lu tlan limakgkatsiyaw akxni lakapastakaw tuku Jehová, wanilh Moisés: pi «chatum Dios xalakgalhamana chu tlan likatsi, ni lakapala sitsi, lhuwa kgalhi tapaxkit nema ni makgxtakgnan chu xaxlikana, lhuwa mil tiku kalimasiyani tapaxkit, tapatinan akxni tlawakan tuku nitlan, ni kgaxmatputunkan chu talakgalhin». Chu Dios ni talakgpalinit (Éx. 34:6, 7).
18 Akgtum lu tlan liʼakxilhtit, Jehová kawanilh israelitas tiku xmakgxtakgkgonit tuku nitlan pi xʼama kalakgchakgani xtalakgalhinkan chu maski «la escarlata» xwakgolh, xʼama katlawa «snapapa la miki» (kalikgalhtawakga Isaías 1:18). Wa xlakata, ¿tuku kilhchanima akxni Jehová kinkatapatiyan? Wamputun pi masputu putum kintalakgalhinkan chu tuku nitlan tlawayaw, pero talakaskin nalimasiyayaw pi paxtikatsininanaw chu pi makgxtakgnitaw tuku nitlan.
19. ¿Tuku naʼakxilhaw kʼatanu artículo?
19 Xlakata Jehová kinkatapatiyan, ¿la tlan na nakatapatiyaw amakgapitsin? ¿Tuku nakinkamakgtayayan nakatapatiyaw tiku tlawakgolh lanka talakgalhin pero masiyakgo pi nialh natlawaparakgo? Artículo nema aku mima nakinkamakgtayayan naʼakxilhaw kinakujkan xlakata nalikatsiyaw la kintlatkan, Jehová, tiku salmista chuna lichuwinalh: «Wix tlan katsiya y matsankganana» o tapatinana (Sal. 86:5).
[Takgalhskinin]
[Dibujo xla página 24]
Xlakata Jehová tapatilh, Manasés amakgtum mapakgsinampa kJerusalén
