Tuku xalamakgasa

«Tlakg xatlan tamakatsin nema nikxni xʼatakgaxmata»

KKATA 1923, George Naish xwi kSaskatoon, kkatsu kachikin xalak Saskatchewan (Canadá). Akxni xakxilhma lhuwa kiwi nema xkgalhikgo 18 metros xlilhman kgalhskininalh: «¿Tuku lilaka uma?». Wanika pi wa xlimaklakaskinkan nalitlawakan torre xla señal akxni xtlawamaka xapulana guerra xlikalanka kakilhtamaku. Titaxtulh kilhtamaku tala Naish wa: «Klakpuwa pi tlan xaklimaklakaskiw xlakata xaktlawaw torre xla radio, chu chuna klakpuwaw pi tlan xtlawaw akgtum estación xla radio niku tlan xaklichuwinaw Dios». Kata 1924 tsukulh takgaxmata xapulana estación nema xlichuwinan takanajla kCanadá: kcanal CHUC.

Xlakata Canadá lu lanka kachikin max xtachuna la xlinka Europa, lu tlan anta xmaklakaskinkan radio xlakata xlichuwinankan Dios. Florence Johnson, tiku skujli kradio nema xwi kSaskatoon, wa: «Xlakata kmaklakaskiw radio lhuwa latamanin kgaxmatkgolh xaxlikana. Xlakata ama kilhtamaku, radio aku xkilhtsukuma putum xkgaxmatputunkgokan tuku xlichuwinankan». Chu kkata 1926 xLikgalhtawakgananin Biblia (la xkalilakgapaskan xtatayananin Jehová) kxradiojkan xchuwinankgo klakatati kachikinin xla uma país. *

¿Tuku xtakgaxmata kʼuma estaciones xla radio? Makgapitsi takilhtlin nema natalan xalak congregación xkilhtlikgo, makgapitsi xtlakgnankgo o xlimaklakaskinkgo ni laklanka orquestas. Na xʼakgchuwinankgo chu xmastakgo takgalhtawakga xalak Biblia. Amy Jones, tiku na xmakgtayanan anta kradio xla lakapastaka: «Akxni xaklichuwinan Dios, chu xakwan kintukuwani latamanin xkiwanikgo: “Chuna wix tiku chuwinana kradio”».

Anta kHalifax (Nueva Escocia), xLikgalhtawakgananin Biblia wi tuku limaklakaskinkgolh nema lu tlan kakitaxtunilh: kradio niku latamanin tlan xchuwinankgolh chu xkgalhtikgoka xtakgalhskininkan. Chatum tala tsokgli: «Chuna lantla maklakaskinka uma radio lu tlan kitaxtulh. Lhuwa tiku xchuwinankgo kradio chu asta nialhla xkakgalhtikgokan».

 Xtachuna la xkilhtamaku apóstol Pablo latamanin tanu tanu lantla xmakgamakglhtinankgo xtachuwin Dios (Hech. 17:1-5). Makgapitsi xlakgatikgo tuku xkgaxmatkgo. Akgtum liʼakxilhtit, akxni Hector Marshall kgaxmatli xlakata libro Estudios de las Escrituras, skilh akgchaxan volúmenes. Alistalh xla wa pi tama libros nema makglhtinalh xlimakgalhtawakgananputun kxtakanajla escuela dominical. Pero akxni likgalhtawakgakgolh xapulana volumen liwana xlakapastaknita namakgxtakga ksikulan. Lu lhuwa lichuwinalh Dios asta akxni nilh kata 1998 ni makgxtakgli Jehová. Anta kNueva Escocia, chatum coronel nema xwanikan John A. MacDonald kgaxmatli taʼakgchuwin nema xwanikan «Tamapakgsin, wa tuku namakgtaya kakilhtamaku». Lichali wanilh chatum tala: «Latamanin xalak Cabo Bretón kgotana kgaxmatkgolh tlakg xatlan tamakatsin nema nikxni xʼatakgaxmata unu».

Pero ni paks lakgatikgolh. Akgtum liʼakxilhtit, xpulalinanin takanajla lu sitsikgolh. Anta kHalifax, makgapitsi xalak sikulan kawanikgolh pi xʼamakgolh kamalakgsputuni antena xla radio nema xlimastakgo taʼakgchuwin xLikgalhtawakgananin Biblia. Wa xpulalinanin takanajla skinikgolh mapakgsina wi tuku katlawalh,chu kata 1928 xla makatsininalh pi nialh xʼama kamasastini licencia xla radio xla xLikgalhtawakgananin Biblia. Xlakata chuna katlawanika, natalan makgpitsikgolh tratados nema xwanikan Who Owns the Air? (¿Tiku xmalana ondas xla radio?). Maski chuna nila lakgpalikgolh tuku xlakpuwankgonit mapakgsinanin.

Pero uma ni kamakgalipuwa xlakskujnin Jehová xalak Canadá. Isabel Wainwright wa: «Xtasiya pi xkinkatlajaman kintalamakgasitsinkan. Pero komo chuna xwa xtalakaskin, Jehová xtilakkaxtlawalh. Ama tuku lalh wi tuku xkilhchanima, pi xʼanan atanu tlakg xlakaskinka la xaklichuwinaw xalakwan xalaksasti xla Tamapakgsin». Ni kajwatiya maklakaskinkgolh radio xlakata nalichuwinankgo Dios, xLikgalhtawakgananin Biblia xalak Canadá wata tsukukgolh kalakgankgo akgatanu kxchikkan latamanin. Maski chuna, milh kilhtamaku nema lu tlan kitaxtulh akxni maklakaskinka radio xlakata namastakan «tlakg xatlan tamakatsin nema nikxni xʼatakgaxmata». (Tuku xalamakgasa xalak Canadá)

[Nota nema wi kpágina]

[Tuku wan página 32]

«Lhuwa tiku xchuwinankgo kradio chu asta nialhla xkgalhtikgokan»

[Dibujos xla página 32]

(1) Estación xla radio xalak Edmonton (Alberta) (2) Tala tiku xmaskuju transmisor kToronto (Ontario) (3) Estudio xla estación CHUC kSaskatoon (Saskatchewan)