Tuku katsiputunkgo tiku likgalhtawakgakgo

Akxni Jesús wa tachuwin nema wi kMateo 19:10-12, ¿xwamputun pi tiku ni tamakgaxtokgkgo wi tuku kamaxkikanit nema amakgapitsi ni kgalhikgo?

▪ Kaʼakxilhwi tuku xlichuwinamaka akxni chuna wa Jesús. Makgapitsi fariseos kgalhskinkgolh xlakata lakxtlawakan tamakgaxtokgat, Jesús liwana masiyalh tuku wan xlimapakgsin Dios. Maski Limapakgsin xmasta talakaskin pi chatum chixku xtsokgwililh akgtum certificado niku xlakxtlawa xtamakgaxtokgat komo xtekgsni «tuku nitlan» xpuskat, pero uma ni putum kilhtamaku chuna xwanit (Deut. 24:1, 2). Jesús wa: «Wampi kit kkawaniyan, mpi kaxati kawa nti xmakgalh xpuskat, wa mpala pi ni wa xpalakata ntalakgalhin xla taktsankgatayan, wata tanu nti xtatawi, pus kaj [akgskgwima xpuskat]. Cha nchu wa nti xtatawi xatamakgan mpuskat, kaj [akgskgawima xpuskat]» (Mat. 19:3-9).

Akxni xtamakgalhtawakgen kgaxmatkgolh wankgolh: «Pus palapi xlikana chuna kitaxtuniy chatum chixku tu wix kilhwampat, pi ni xlimakgaxtakgat xpuskat, pus luwa ni pala tsinu [katamakgaxtokgputulh]». Jesús kgalhtinalh: «Xlikana pi wa yuma talakapastakni xpalakata lantla ni natapuchuwaya, tuwa kitaxtuy xampi ni liputum katimakalaw lapi ni Dios chuna malakapastakakgoy. Wampi unu katuxawat lamakgo makgapitsin chixkuwin wanti chuna kgalhikgoy xtiyatliwakan pi ni lay katitapuchuwakgolh, chu makgapitsin wanti kaks chuna laktlawayawanikanit xlatamatkan lakimpi nialh ukxniku natapuchuwakgoy, wampi na lamakgo makgapitsin wanti tlan tapuchuwakgoy, wampi ni tapuchuwaputunkgoy kaj xpalakata xlakan katsikgoy pi chuna atsinu tlan natlawakgoy wantu Dios lakgatiy kxlatamatkan, chu wantu xla lilaksakkgonit. Pus wanti matlaniy pi chuna nalatamay lantla kkawaninitan uku, pus xlikana pi chuna kalitsakgsalh» (Mat. 19:10-12).

Max chatum chixku chuna lakachilh pi ni lay katitamakgaxtokgli o max wi tuku nitlan akgspulalh o chukunika. Pero makgapitsi na akstu xlaksakkgo ni natamakgaxtokgkgo, maski tlan xtamakgaxtokgolh, tlan xmachokgokgo tuku xtlawaputun xmaknikan chu nikxni xtamakgaxtokgkgo xlakata «tlan natlawakgoy wantu Dios lakgatiy». Xtachuna la Jesús, tlan kskujnikgolh Dios putum kilhtamaku. Ni chuna xlakachinkgonit, chu na ni wi tiku xkamaxkinit. Xakstukan laksakkgolh ni natamakgaxtokgkgo chu chuna kgalhikgolh uma tasikulunalin.

Xlakata tuku wa Jesús, apóstol Pablo wa pi putum kstalaninanin Cristo maski tamakgaxtokgkgonit o ni, tlan naskujnikgo Dios, tiku ni tamakgaxtokgnit «nti aktanks lakapastaka kxnaku» ni natamakgaxtokga «tlan ntu ntlaway». ¿Tuku xlakata? Xlakata tiku tamakgaxtokgo xkilhtamaku chu xlitliwakga limaxtukgo nalikuentatlawakgo tiku tatamakgaxtokgonit, pero tiku ni tamakgaxtokgnit tlan putum xlatamat naskujnani Malana. Wa xlakata liʼakxilhkgo la akgtum «tasikulunalin» (1 Cor. 7:7, 32-38).

Wa xlakata Biblia masiya pi uma tasikulunalin, wamputun pi tiku xatapaxuwan latama maski ni tamakgaxtokga, ni kaj wi tiku maxki, wata xakstu laksaka chuna nalatama xlakata tlakg lhuwa naliskuja xTamapakgsin Dios. Lhuwa kstalaninanin Cristo liwana lakkaxwilikgonit kxnakujkan ni natamakgaxtokgkgo chu amakgapitsin tlan namakgtayakgo xlakata tuku laksakli.