Akinin mayordomos tiku kalipawankan
Akinin mayordomos tiku kalipawankan
«Kilatamatkan nialh kin mapakgsiyaw.» (1 COR. 6:19, Hua Xasasti Talaccaxlan, 1999)
¿TUKU XKGALHTINANTI?
¿Tuku taskujut xtlawakgo mayordomos xala makgasa?
¿Tuku taskujut lakgayaw putum akinin la mayordomos xla Dios?
¿La kiliʼakxilhatkan taskujut xla mayordomo nema lakgayaw?
1. ¿Tuku lakpuwankgo latamanin xlakata tiku skujni?
TITAXTUNITA akgtiy mil akgkitsis ciento kata, chatum tsokgna wa: «Niti kaj xatapaxuwan skujni litaxtu». Nachuna lakpuwanaw. Skujni kinkamalakapastakayan tiku kamakgalipuwamaka chu kalichikanit cadenas, tuku limakgxtakgkgo chu xtaskujutkan wata talitamakgtayakgo tiku kamaskujuma chu tapakgsinikgo.
2, 3. 1) ¿La xmukiwi nema makgamakglhtinankgo tiku skujni xla Cristo? 2) ¿Tukuya takgalhskinin nakgalhtinanaw xlakata taskujut nema lakgayaw la mayordomos?
2 Jesús wa pi xdiscípulos xʼamakgo litaxtukgo lakskujni tiku ni tlanka kamakgkatsikan, o kskujnin, pero mukiwi nema xmakglhtinankgo xaxlikana kstalaninanin Cristo ni kamaktuju chu ni tlawa pi nitlan nalimakgkatsikgo. Wata kamaxki kakni chu kalipawan. Akgtum liʼakxilhtit, tuku wa Jesús akxni nialh lhuwa kilhtamaku xtsankga xlakata xnilh xlakata chatum «skujni xalipaw chu xaskgalala» tiku xʼama lakgayawakan makgapitsi taskujut (Mat. 24:45-47, NM).
3 Lu xlakaskinka pi kʼatanu texto xalak Biblia uma skujni limapakuwikan «chixku», o mayordomo (kalikgalhtawakga Lucas 12:42-44). Maski la uku, lhuwa kstalaninanin Cristo ni litaxtukgo uma skujni, putum xlakskujnin Dios kinkalakgayawakanitan akgtum taskujut nema lakgchan mayordomo. ¿Tukuya taskujut kgalhiyaw? ¿La kiliʼakxilhatkan? Xlakata nakatsiyaw kaʼakxilhwi tuku xlakgayakgo mayordomo xala makgasa.
TUKU TASKUJUT TLAWA MAYORDOMO
4, 5. ¿Tukuya taskujut xkgalhikgo mayordomos xala makgasa? Kalichuwinanti makgapitsi liʼakxilhtit.
4 Makgasa, chixku nema wi tuku xlakgayawakan chatum skujni nema lu xlipawankan chu xkuenta tlawa chiki o negocios xla xmalana. Xkgalhi limapakgsin xlakata xliyawakan putum tuku xkgalhi xmalana, tumin chu amakgapitsi skujnin xalak chiki. Akgtum liʼakxilhtit wa Eliezer, tiku Abrahán liyawalh putum tuku xkgalhi. Max wa tiku xmalana malakgachalh kMesopotamia xlakata wi tuku lu xlakaskinka xtlawalh, naputsani xpuskat xkgawasa Isaac (Gén. 13:2; 15:2; 24:2-4).
5 José, kxuyatanat, o lhtanat, Abrahán, mayordomo xwanit kxchik Potifar (Gén. 39:1, 2). Chuna la titaxtulh kilhtamaku xla na kgalhilh chatum mayordomo nema xkuentajtlawa xchik chu akgtum kilhtamaku lu tlan kamakgamakglhtinalh kgalhakaw xnatalan José. Chu xlakata chuna mapakgsilh xmalana, lakkaxwililh putum tuku xtalakaskin xlakata xtasiyalh pi xcopa xkgalhankganit. Uma litasiya pi tiku mayordomo xwanit lu xlipawankan (Gén. 43:19-25; 44:1-12).
6. ¿Tukuya taskujut tlawakgo lakgkgolotsin la mayordomos?
6 Lhuwa ciento kata alistalh, apóstol Pablo tsokgli pi tiku xpulalinkgo kstalaninanin Cristo na litaxtukgo «ntamakuintajlinit xtaskujut Dios», o mayordomos (Tito 1:7). Kalaksakkanit xlakata nakuentajtlawakgo «xborregos Dios» nema kamakuentatlawanimaka, wa xlakata pulalinkgo congregaciones chu mastakgo akgtum lu tlan liʼakxilhtit (1 Ped. 5:1, 2, NM). Pero tanu tanu tuku tlawakgo. Lhuwa kaj skujkgo kʼakgtum congregación, pero tiku litaxtukgo superintendentes viajantes kamakgtayakgo lhuwa congregaciones. Chu tiku litaxtukgo Comité de Sucursal kamakgtayakgo congregaciones nema wilakgolh kʼakgtum país. Pero talakaskin pi xputumkan namakgantaxtikgo tuku lakgayakgo xlakata namaxkikgo kuenta Dios (Heb. 13:17).
7. ¿Tuku xlakata tlan wanaw pi putum kstalaninanin Cristo mayordomos litaxtukgo?
7 ¿Tuku tlawakgo lhuwa kstalaninanin Cristo tiku ni makgxtakgkgo Dios chu ni lakgkgolotsin litaxtukgo? Apóstol Pedro kawanilh putum kstalaninanin Cristo: «Wa lantla nchatunu wixin makgamakglhtinanitantit ntalakgalhaman ntu ntlan ntlawayatit kalimakgtayakgotit amakgapitsin, xtachuna nti ntlan liskuja wa ntu xlixla chatunu nkgalhininit xlipaxkatsinit Dios» (1 Ped. 1:1; 4:10). Xlakata xtapaxkit nema ni kinkamininiyan, Dios wi tuku kinkamaxkinitan chu wi tuku tlan tlawayaw xlakata nakamakgtayayaw kinatalankan. Wa xlakata putum tiku skujnaniyaw Dios mayordomos litaxtuyaw, chu uma taskujut tlawa pi nakinkalipawankanan chu wi tuku nalakgatayayaw.
TAPAKGSINIYAW DIOS
8. ¿Tuku tastakyaw lu xlakaskinka nalakapastakaw?
8 Pulaktutu talakapastakni naʼakxilhaw xlakata kintaskujutkan la mayordomos. Xapulana wa uma: putum tapakgsiniyaw Dios chu namaxkiyaw kuenta. Pablo tsokgli: «Chi mpi ni akstu milakan [...]. Xampi xtapalh litatamawanitantit» xkgalhni Cristo nema stajtamakgalh xlakata nakinkalakgmaxtuyan (1 Cor. 6:19, 20). Xlakata tapakgsiniyaw Jehová, kilikgalhakgaxmatatkan xlimapakgsin pero uma ni akgtum lanka takuka (Rom. 14:8; 1 Juan 5:3). Na xlakskujni Cristo litaxtuyaw. Chuna la mayordomos xala makgasa, lhuwa tuku kinkamaxkikanan talakaskin natlawayaw, pero uma ni la natlawayaw putum tuku lakaskinaw. Kilimakgantaxtitkan tuku kilitlawatkan chuna la kinkamapakgsiyan. Maski katuwa tuku kinkalakgayawakanan kcongregación, chuntiya xlakskujnin Dios chu Cristo litaxtuyaw.
9. ¿La kinkamakgtayayan Jesús nakatsiyaw la latalalin malana chu xlakskujni?
9 Kʼakgtum parábola, Jesús kamakgtayalh kstalaninanin nakatsikgo la latalalin chatum malana xlakskujni. Kalitachuwinalh kstalaninanin chatum skujni tiku chalh kchik akxni tantaku kskujnit. «¿Pi wanilh xmalana: “Katanu kchiki, na katawila kpuway”? Ni. Wa, wi tuku limapakgsilh: «Kakaxtlawa nkiliwat, nakwayan; na kalakgpalinanti; kamuju nkiliwat; asta akxniku ni liwaya kwayankgonit nawan, chu kkgotnanit nawan; akxniku nchu wix nawayana, chu nakgotnana». Alistalh, Jesús wa tuku xkilhchanima uma parábola: «Pus na chuna wixin, akxni xlipaks xtlawatit wa ntu nkalimapakgsikantit, nawanatit: “Kin skujnin, ni xatalipawan nkin, xampi ni tu tlakg tlawaw xman wa ntlawaw wa ntu xkinkalimapakgsikanitan”» (Luc. 17:7-10).
10. ¿Tuku litasiya pi Jehová lu xlakaskinka akxilha akxni skujniyaw?
10 Xlikana, Jehová lu lhuwa xtapalh akxilha akxni skujniyaw. Biblia kinkawaniyan: «Dios, makgantaxtina, na ni katipatsankgalh paks ntu ntlawanitantit, chu mintaskujutkan xla tapaxkit wa ntu wixin masiyunitantit kxtukuwini» (Heb. 6:10). Jehová nikxni kinkaskiniyan tuku nila tlawayaw. Nachuna, putum kilhtamaku kilitlankan chu ni akgtum tsinka takuka. Jesús kinkalimasiyaniyan xparábola pi chatum skujni ni akstu makgapaxuwakan chu ni wa pulana wili tuku lakaskin. Uma kilhchanima pi akxni tamakamastaniyaw Dios, lakkaxwiliyaw pi tlakg xlakaskinka naʼakxilhaw naskujnaniyaw.
¿TUKU LAKASKIN JEHOVÁ NATLAWAYAW?
11, 12. Xlakata akinin mayordomos, ¿tukuya tayat talakaskin nalimasiyayaw, chu tuku ni kilitlawatkan?
11 Xlipulaktiy talakapastakni wa uma: xlakata mayordomos akinin, putum watiya limapakgsin kgalhakgaxmataw. Xlikana pi makgapitsi taskujut kaj makgapitsi natalan kalakgayawakan, pero lhuwa taskujut kalakgayawakan putum tiku xalak congregación. Kawiliw akgtum liʼakxilhtit, xlakata kstalaninanin Cristo chu xtatayananin Jehová lu xlakaskinka nalapaxkiyaw. Jesús masiyalh pi tapaxkit wa tuku kalilakgapaskan xaxlikana kstalaninanin Cristo (Juan 13:35). Pero na kapaxkiyaw tiku ni watiya takanajla kgalhikgo. Uma tapaxkit wa nema putum tlan nakgalhiyaw chu nalimasiyayaw.
12 Jehová na lakaskin pi tlan nalinaw kilatamatkan. Ni tlawaputunaw chu limputunaw kilatamatkan chuna la Biblia wan pi ni xlitatlawat. Pablo wa: «Ni mpala wa nti xakgtsankgatayanin, chu xlakata kilhputananin ntu nkaj tatlawamakgxtu, chu ni mpala wa nti makwanankgoy, chu lakchajan nti akxtum lamapakgsiy, chu nti latalakxtumikgoy akxtum nchixkuwin, chu na ni mpala wa nkgalhananin, chu na ni mpala wa xmakglakgatinanin tumin, chu ni mpala wa nkgotnin, chu ni mpala wa nti maxkajwalinanin, chu ni mpala wa akgskgawiminanin, ni katilakgchankgolh kxtapakgsin Dios» (1 Cor. 6:9, 10). Kilikatsitkan pi talakaskin lu naliskujaw nalinaw kilatamatkan chuna la lakaskin Dios. Pero tlan kitaxtu akxni chuna tlawakan. Akgtum tasikulunalin wa pi ni lu tatatlakan, tlan katalalinkan amakgapitsin chu Dios tlan kaʼakxilha (kalikgalhtawakga Isaías 48:17, 18).
13, 14. ¿Tuku lakgayakgo putum kstalaninanin Cristo, chu la kiliʼakxilhatkan?
13 Nachuna, kalakapastakwi pi xtachuna la mayordomos, wi tuku kilitlawatkan. Jehová kinkamaxkinitan tuku lu xlakaskinka: xaxlikana takatsin. Chu la uku lakaskin nakamasiyaniyaw amakgapitsin (Mat. 28:19, 20). Pablo tsokgli: «Man wa nkakinkaliukxilhkgon xlipaks nchixkuwin mpi kskujnin nCristo nkin, chu mpi ktamakuintajlinitaw wa ntu ni tunkan takatakgsa xtalulokgtat Dios» (1 Cor. 4:1). Apóstol wa pi tiku mayordomos xlikuentatlawat «xtalulokgtat» uma kilhchani tuku xlikana masiya Biblia chu namasiyakgo chuna la mapakgsinalh Malana, Jesucristo (1 Cor. 9:16).
14 Masiyakan xaxlikana wa tuku limasiyakan tapaxkit. Xlikana chatunu chatunu kstalanina Cristo tanu tanu tuku titaxtuma. Ni watiya kilhtamaku tlan limaxtukgo xlakata nalichuwinankgo Dios, chu Jehová katsi. Tuku tlakg xlakaskinka wa natlawayaw putum tuku matlaniyaw. Chuna limasiyayaw pi paxkiyaw Dios chu latamanin.
LU XLAKASKINKA NI NAMAKGXTAKGNANAW
15-17. 1) ¿Tuku xlakata lu xlakaskinka pi chatum mayordomo natlawa tuku skinikan? 2) ¿La limasiyalh Jesús pi ni tlan kitaxtu akxni makgxtakgnankan?
15 Xliʼakgtutu talakapastakni nema na lu xlakaskinka la pulaktiy nema lichuwinanitawa: talakaskin ni namakgxtakgnanaw chu tlan nakinkalipawankanan. Chatum mayordomo tlan nakgalhi lakwan tayat chu lhuwa tuku nakatsini tlawa, pero nitu namakgtaya komo ni makgantaxti tuku lakgaya o namakgxtakga xmalana. Xlakata liwana natlawa xtaskujut talakaskin ni namakgxtakgnan. Kalakapastakwi uma tuku wa Pablo: «Ntu ntlakg xlakaskinka xpalakata nchatum lantla litamakuintajlinit, wa yama mpi namakgantaxtiy xtaskujut» (1 Cor. 4:2).
16 Liwana kilikatsitkan pi: Jehová nakinkasikulunatlawayan komo ni makgxtakgaw pero komo ni chuna tlawayaw, napatinanaw. Jesús masiyalh uma kparábola xla talentos. Malana tlan kalichuwinalh chu wi tuku kamaxkilh skujnin tiku ni makgxtakgkgolh chu maskujukgolh xtumin. Pero tiku ni tlawalh xtaskujut limapakuwilh «xalhkitit» chu «nti ni talipaw skujni». Makglhtilh talento nema xmaxkinit chu wa pi xmaxtuka (kalikgalhtawakga Mateo 25:14-18, 23, 26, 28-30).
17 Jesús lichuwinalh atanu tuku nitlan akxni makgxtakgnankan, kʼatanu parábola: «Xwi nchatum nchixku, [...], wa nti xkgalhiy nchatum xapuxku xtasakua, wa cha nti ntistawaka kxmakan [...] xtachuna xmalakgsputuna xmakaʼananat. Cha nchu ntitasanilh, tiwanilh: “¿Tu wa yuma ntu kkgaxmata mimpalakata? Kamasta nkuinta wa ntu xlakgayat ntaskujut milipuxku; xampi nialh makgkatsi katilitawila milipuxku”» (Luc. 16:1, 2). Xlakata mayordomo laktlawalh tuku xkgalhi xmalana, makglhtilh xtaskujut. ¡Lu xlakaskinka tuku kinkamasiyaniyan! Putum kilhtamaku katlawaw tuku Jehová kinkaskiniyan.
¿TLAN KITAXTU AKXNI WI TIKU TAMALAKXTUMIYAW TUKU TLAWAYAW?
18. ¿Tuku xlakata ni tlan natamalakxtumiyaw tuku tlawayaw?
18 Maski chatunu chatunu tlan akxilha la tlawama taskujut xla mayordomo ni tlan natatalakxtumiyaw amakgapitsin. Biblia kinkawaniyan: «Chatunu naʼakstuputsananikan xtatlaw, chuna chi naʼakstukatsiy ntu xlakgasi nkgalhi, na ni wa naliʼukxilhtiy wa ntu ntlawakgoy amakgapitsin» (Gál. 6:4). Tlakg tlan nawan ni natamalakxtumiyaw tuku tlawayaw chu wata naʼakxilhaw tuku akinin natlawayaw. Chu ni lanka nakinkamakgkatsikanan, chu na ni naxlajwananaw. Akxni akxilhaw tuku tlawayaw, kilikatsikkan pi talakgpali la wi latamat. Max natatatlayaw, nakgolonaw o tuku lakgayaw ni namastakgo talakaskin natlawayaw tuku pulana xtlawayaw. O max tlan tlakg lhuwa tuku natlawayaw ni xawa la pulana. Komo chuna, ¿tuku xlakata ni limawakaya la lichuwinana Dios?
19. ¿Tuku xlakata ni naxlajwananaw komo ni makglhtinanaw tuku lakgatayaputunaw?
19 Na ni natatalakxtumiyaw tiku wi tuku lakgayakgo kcongregación nema akinin lakgatayaputunaw. Akgtum liʼakxilhtit, chatum tala max kgolotsin xalak congregación wamputun o mastaputun akgtum taʼakgchuwin klaklanka tamakxtumit. Lu tlan naskujkan xlakata uma, pero komo ni nachinkgo akxni kgalhkgalhiyaw ni kaxlajwanaw. Max wi tuku ni akgatekgsaw, xlakata tlakg natamakgapali. Kalakapastakwi pi xtasiya pi Moisés tlan xkamaxtulh israelitas, pero kgalhkgalhilh tipuxam kata xlakata chuna xtlawalh. Uma kilhtamaku makgtayalh xlakata xkatsinilh tayat nema xʼama maklakaskin xlakata xpulalilh akgtum kachikin nema ni xkgalhakgaxmatnan chu xatsakat xwanit (Hech. 7:22-25, 30-34).
20. ¿Tuku kinkamasiyaniyan xliʼakxilhtit Jonatán?
20 Tuku xaxlikana max pi tuku lakgatayaputunaw pero nikxni nakgalhiyaw. Wa uma tuku akgspulalh Jonatán. Xla xkgawasa Saúl xwanit chu wa xlakata xlakgchan namapakgsinan kʼIsrael. Pero Dios laksakli David, chatum chixku tiku tlakg kgawasa xwanit. ¿La akxilhli uma Jonatán? Tlan akxilhli chu makgtayalh David maski tlan xmakgnika. Chu asta wanilh: «Wix namapakgsinana xlikalanka Israel, chu akit xlichatiy mapakgsina nakwan» (1 Sam. 23:17). Jonatán tatayalh Jehová chu ni sitsinilh David la tlawalh xtlat. ¿Tuku katsiniyaw? Ni nakasitsiniyaw amakgapitsin xlakata tuku lakgayakgo, wata tlakg tlan katlawaw tuku lakgayaw. Liwana kilikatsitkan pi kxasasti kakilhtamaku: Jehová nakamaxki xlakskujnin tuku lakaskinkgo.
21. ¿La kiliʼakxilhatkan tuku tlawayaw la mayordomos?
21 Liwana kilikatsitkan pi maski mayordomos akinin ni patinanaw la lakskujnin tiku kachipakan chu skujnikgo chatum tiku nitlan likatsi. Nichuna. Lakgayaw tuku lu xlakaskinka, xlakata Jehová kinkalakgayawanitan akgtum taskujut nema nialh natatlawapara: nalichuwinanaw xalakwan xalaksasti kʼuma xaʼawatiya kilhtamaku. Nachuna, kinkamaxkiyan talakaskin xlakata natlawayaw tuku lakgayaw. Wa xlakata, kalitaxtuw mayordomos tiku nikxni makgxtakgnankgo chu lu xlakaskinka kaʼakxilhwi naskujniyaw Tiku tlakg lanka xlikalanka kakilhtamaku.
[Takgalhskinin]
[Dibujo xla página 9]
[Dibujos xla página 12]
Liwana katlawaw tuku kinkalakgayawakanitan
