Chuntiya kalatamaw la «tiku kaj tsinu makgwilakgolh»
Chuntiya kalatamaw la «tiku kaj tsinu makgwilakgolh»
«Kkastakyawayan la tiku xala atanu kachikin chu tiku kaj tsinu makgwilakgolh pi ni natlawayatit tuku lakaskin mimaknikan.» (1 PED. 2:11)
¿LA XKGALHTINANTI?
¿Tuku xlakata tlan wanaw pi tiku kalaksakkanit naʼankgo kʼakgapun kaj tsinu makgwilakgolh unu?
¿Tuku xlakata tlan wanaw pi «amakgapitsi borregos» kaj tsinu makgwilakgolh?
¿Tuku lu kgalhkgalhipat?
1, 2. ¿Tiku xlichuwinama Pedro akxni wa «tiku kalaksakkanit» chu akxni lichuwinalh tiku «kaj tsinu makgwilakgolh»?
AKXNI xtitaxtunita puxamakaw kata lata Jesús alh kʼakgapun, apóstol Pedro malakgachalh uma carta «tiku kaj tsinu makgwilakgolh kPonto, Galacia, Capadocia, Asia chu Bitinia, tiku kalaksakkanit» (1 Ped. 1:1). Katsiyaw pi «tiku kalaksakkanit» wa tiku chuna la Pedro xkalilaksakkanit espíritu santo xlakata naʼankgo kʼakgapun chu kamaxkika «xasasti latamat lakimpi nalikgalhkgalhikgo ntamalaknun» chu xtamapakgsinankgolh Cristo kʼakgapun (kalikgalhtawakga 1 Pedro 1:3, 4). Pero ni lhuwa kilhtamaku alistalh apóstol kalimapakuwilh «tiku kaj tsinu makgwilakgolh» (1 Ped. 2:11). ¿Tuku xlakata chuna kawanikan? ¿Chu tuku kilhchanima la uku xlakata 1 lata 650 xtatayananin Jehová xlikalanka kakilhtamaku wankgo pi kalaksakkanit xlakata naʼankgo kʼakgapun?
2 Lu tlan tuku wa apóstol Pedro akxni kalichuwinan kstalaninanin Cristo kxapulana siglo la «tiku kaj tsinu makgwilakgolh», xlakata ni putum kilhtamaku xʼamakgolh tawilakgo kKatiyatni. Nachuna tiku lamakgolhku la uku ni putum kilhtamaku nalatamakgo unu. Apóstol Pablo tiku na xlaksakkanit naʼan kʼakgapun chu xtapakgsi «ni xalhuwa borregos», wan: «Wampi wa nkin, luwa anta ntapakgsiniyaw nkakgapun ntani nakgalhkgalhiyaw makgaputaxtina; wa nkimPuchinakan Jesucristo» (Luc. 12:32; Filip. 3:20). Tiku kalaksakkanit “xtapakgsikgolh kʼakgapun”, akxni nikgo nialh tapakgsikgo katiyatni chu makglhtinankgo tuku tlakg tlan: latamat kʼakgapun chu nikxni nanikgo (kalikgalhtawakga Filipenses 1:21-23). Tlan nawanaw pi xlakan xlikana «kaj tsinu makgwilakgolh» kkatiyatni niku Satanás mapakgsinan.
3. ¿Tukuya takgalhskinin naʼakxilhaw xlakata «amakgapitsi borregos»?
3 ¿Pero tuku tlan nawanaw xlakata «amakgapitsi borregos»? (Juan 10:16, NM.) Biblia wan pi xlakan kgalhkgalhimakgolh nalatamakgo xliputum kilhtamaku kKatiyatni, wa xpulatamat nawan putum kilhtamaku. Pero naʼakxilhaw pi xlakan na kaj tsinu makgwilakgolh unu.
«XLIPAKS NTAMALAKATSUKUN [O LATAMANIN], MAKXTUM JALHPANIKGOY»
4. ¿Tuku nila lakgpalikgo tiku pulalinkgo kakilhtamaku?
4 Xlakata wijku uma xalixkajni xkakilhtamaku, putum asta kstalaninanin Cristo, chuntiyaku napatinanaw xlakata Satanás ni kgalhakgaxmatnilh Jehová. Romanos 8:22 wan: «Katsiyaw mpi xlipaks ntamalakatsukun [o latamanin], makxtum jalhpanikgoy, chu makxtum tatlakgajkgoy asta chu», o la uku. Tiku pulalinkgo kakilhtamaku, científicos, latamanin tiku makgtayanankgo, maski xlikana wi tuku tlan tlawaputunkgo nila masputukgo tapatin.
5. Lata kata 1914, ¿tuku laksakkgonit lhuwa millones latamanin chu tuku xlakata?
5 Lata kata 1914, lhuwa millones laksakkgonit natapakgsinikgo Mapakgsina nema Dios wilinit, Jesucristo. Chu ni tapakgsiniputunkgo xkakilhtamaku Satanás chu ni tatayaputunkgo. Wata maklakaskinkgo xlatamatkan chu tuku kgalhikgo xlakata namakgtayakgo xTamapakgsin Dios (Rom. 14:7, 8).
6. ¿Tuku xlakata tlan wanaw pi xtatayananin Jehová xtachuna la «xala atanu kachikin»?
6 Xlikana, xtatayananin Jehová wilakgolh kliwaka akgtiy ciento países chu makgantaxtikgo limapakgsin. Pero putum xlakan litaxtukgo la «tiku xala atanu kachikin» maski tanu tanu niku wilakgolh chu ni makgtanukgo kpolítica chu kxtaʼakglhuwitkan latamanin xala uku. Asta la uku, xlakan katsikgo pi natapakgsikgo kxasasti kakilhtamaku nema Dios tlawama, chu lipaxuwakgo pi xlakata kaj tsinu makgwilakgolh kʼuma nitlan kakilhtamaku nema lakapala namasputukan.
7. ¿Niku putum kilhtamaku natawilakgo xlakskujni Dios chu tukuya kilhtamaku nala uma?
7 Nialh makgas Cristo namapakgsinan chu namasputu nixatlan xkakilhtamaku Satanás. Chu xatlan xTamapakgsin Cristo namasputu kKatiyatni talakgalhin chu tapatin. Chu nakamasputu tiku wankgo pi Jehová ni lakgchan namapakgsinan, latamanin chu espíritus. Xlakskujni Dios tiku ni makgxtakgkgo tlan xliputum kilhtamaku natawilakgo kParaíso (kalikgalhtawakga Apocalipsis 21:1-5). Tlan nawanaw pi putum latamanin, «nalakgtaxtunikgoy yuma ntu ntliwakglh kgalhikgoy lantla ankgalhin sputtilhay, lakimpi makxtum natalipaxuwakgoy xlakgskgatan Dios wa yuma lilakgatit ntalakgtaxtun ntu namin» (Rom. 8:21).
¿TUKU XLITLAWATKAN XAXLIKANA KSTALANINANIN?
8, 9. ¿Tuku xwamputun Pedro akxni wa tuku «lakaskin mimaknikan»?
8 Anta 1 Pedro 2:11 apóstol wan tuku xlitlawatkan kstalaninanin Cristo, akxni wa: «Kkastakyawayan [...] pi ni natlawayatit tuku lakaskin mimaknikan, xlakata wa uma laktlawa latamat». Uma tastakyaw, pulana kawanikan kstalaninanin Cristo tiku kalaksakkanit, pero na kawanikan atanu xborregos Cristo.
9 Ni putum tuku lakaskin kimaknikan talakgalhin, pero natatlawa la wan xlimapakgsin Dios. Asta uma tlawa pi tlakg napaxuwayaw kkilatamatkan. Akgtum liʼakxilhtit, pulaktum tuku lipaxuwa kimaknikan wa akxni wayanaw o kgotnanaw, akxni wi tuku lilakgastananaw o akxni akxtum katatawilayaw kiʼamigoskan. Chu komo tamakgaxtokgnita ni talakgalhin natatalakgxtumiya tiku tamakgaxtokga (1 Cor. 7:3-5). Pero akxni Pedro lichuwinalh tuku «lakaskin mimaknikan» xkilhchanima tuku «laktlawa latamat». Wa xlakata makgapitsin biblias maklakaskinkgo tachuwin «tuku nitlan tlawaputuna» chu «tlawaputunkan talakgalhin» (Nueva Biblia al Día; Reina-Valera Contemporánea). Lu xlakaskin pi chatum kstalanina Cristo nalakgmakgan nitlan talakapastakni nema lakatsala xtalakaskin Dios chu natlawa pi nialh tlan natalalin. Xlakata uma natlawa pi nialh namakgatsankga xlatamat.
10. ¿Tuku limaklakaskin Satanás xlakata kstalaninanin Cristo namakgtanukgo kkakilhtamaku?
10 Satanás tlawaputun pi kaxlajwanaw chu nialh kalakpuwaw pi “tsinu makgwilaw” kʼuma kakilhtamaku. Kalilakapastakwi xlakata tiku lhuwa tuku nakgalhiputuna, talakgxtumit nema xlitatlawat, putum wix nakgalhiputuna, lu xlakaskinka naʼakxilhkana, chu natatayaya akgtum kachikin, putum umakgolh xliʼakgsiyat Satanás nema kuenta kilitlawatkan. Komo lakgmakganaw uma tuku nitlan lakaskin kimaknikan, liwana limasiyayaw pi ni makgtapakgsiputunaw xalixkajni xkakilhtamaku Satanás niku kaj tsinu makgwilaw. Wantuku xlikana lakaskinaw chu lhuwa liskujmaw wa namakglhtinanaw latamat kxasasti xkakilhtamaku Dios nema xaʼakgstitum.
«LAKATITUM NALATAPAYATIT»
11, 12. ¿La kaʼakxilhkan makgapitsi tiku xalak atanu kachikinin, chu tuku wankan xlakata xTatayananin Jehová?
11 Kversículo 12 Pedro na lichuwinan tuku talakaskin natlawakgo kstalaninanin Cristo «tiku xala atanu kachikin chu kaj tsinu makgwilakgolh». «Wa ntu lakatitum nalatapayatit kxlakgstipankan xaʼakgmakgat chixkuwin; lakimpi maski kaliʼakgsankgoyan xtachuna mpala ni lakwan mintayatkan, wampi wa lantla naʼukxilhkgo milatamatkan ntu ntlan ntlawayatit, nalimaxkikgoy nkakni Dios akxni nachin nkilhtamaku nalakgalhamankgoy». Tiku xalak atanu kachikinin nitlan xtayat kaliʼakxilhkan kaj xlakata tanu tasiyakgo, xtalalismaninkan, la chuwinankgo, la lhakganankgo, chu asta la tasiyakgo tlawa pi tanu natasiyakgo. Pero xlakata la linkgo xtayatkan limasiyakgo pi ni xlikana tuku nitlan xkalichuwinankan.
12 Nachuna lakpuwankan xlakata xaxlikana kstalaninanin Cristo, tanu la likatsikgo ni xtachuna la amakgapitsin. Akgtum liʼakxilhtit, xlakata la chuwinankgo, la lhakganankgo, la takaxtayakgo chu tuku laksakkgo nalilakgastanankgo, tanu katlawa nixawa amakgapitsi latamanin. Chu xlakata tanu la likatsikgo min kilhtamaku makgapitsin latamanin tiku ni liwana katsikgo, kalimawakakgo pi nitlan likatsikgo. Pero amakgapitsi latamanin tlan kalichuwinankgo xlakata la linkgo xlatamatkan.
13, 14. Kalichuwinanti akgtum liʼakxilhtit niku limasiya pi «xliskgalala Dios anta lakatanks kgantaxtuma, chu litasiyuma xtaskujut».
13 Akxni tlan likatsiyaw, nakinkamakgtayayan nialh nitlan nakinkalichuwinankanan. Asta Jesús, chixku tiku ni tlawalh talakgalhin, limawakaka taʼakgsanin. Makgapitsin limawakakgolh pi «lhuwa xawayani, chu na xwana vino, chu na xamigujkan xpukinanin tumin, chu lakgalhina chixkuwin». Pero xlakata lu skgalala xwanit chu nikxni makgxtakgli Dios chuna limasiyalh pi ni xlikana tuku xlimawakamaka. Jesús wa: «Xliskgalala Dios anta lakatanks kgantaxtuma, chu litasiyuma xtaskujut» (Mat. 11:19, Hua Xasasti Talaccaxlan, 1999). Chu wa uma tuku lama la uku. Akgtum liʼakxilhtit, makgapitsi latamanin tiku lakatsu wilakgolh kBetel Alemania nema wi kSelters, nitlan kaʼakxilhkgolh makgapitsi natalan tiku xatapaxuwan kskujmakgolh anta. Pero mapakgsina xalak uma kachikin kakgalhmakgtayalh. Xla wa: «Xtatayananin Jehová tiku anta skujkgo tanu la linkgo xlatamatkan, pero ni katakgalhikgo taʼakglhuwit tiku lamakgolh unu».
14 Nina makgas nachuna wanka xlakata xtatayananin Jehová xalak Moscú, (Rusia), tiku lhuwa tuku nitlan xkalimawakamaka. Pero natalan skinkgolh tamakgtay Tribunal Europeo de Derechos Humanos nema wi kʼEstrasburgo (Francia) chu junio kata 2010 limapakgsinalh: «Tribunal wa pi [Moscú] ni kamaxkima talakaskin pi latamanin tlan nakanajlanikgo tuku lakaskinkgo chu wi niku natapakgsikgo. Tribunales xala uma kachikin ni limasiyakgolh “tuku xlakaskinka o tuku lhuwa” xlakata nalimasiya pi latamanin nema kamalakgsiyamaka pi lakxtlawakgo familias, [...] xakstu nakamakgnikan o ni amputunkgo kpumakuchin. Wa xlakata, tuku tribunales xalak uma kachikinin kalimalakgaxokgema lu malakatsalilh, chuna la wan xlimapakgsinkan».
KAKGALHAKGAXMATWI MAPAKGSINANIN
15. ¿Tukuya tastakyaw xalak Biblia makgantaxtiyaw putum xaxlikana kstalaninanin Cristo?
15 Xtatayananin Jehová xalak Moscú, chu xalak xlikalanka katiyatni makgantaxtiyaw atanu limapakgsin nema Pedro lichuwinalh: «Xpalakata nkimPuchinakan kalilakgachixkuwitit xlipaks lantla ntipatu limapakgsin liwilikgolh nchixkuwin, maski lu[...] wa xapuxku rey, mpi xapuxku malana liwi, chu na chuna amakgapitsin laktlanka mapakgsinanin» (1 Ped. 2:13, 14). Maski xaxlikana kstalaninanin Cristo ni makgtanuyaw tuku xala kakilhtamaku, kgalhakgaxmataw tuku wankgo mapakgsinanin, xlakata chuna la wa Pablo, «wa Dios nti nchuna wililh» (kalikgalhtawakga Romanos 13:1, 5-7).
16, 17. 1) ¿Tuku limasiya pi ni lakatayayaw mapakgsinanin? 2) ¿Tuku wankgonit makgapitsi políticos?
16 Maski xtatayananin lamaw kʼuma kakilhtamaku la «tiku kaj tsinu makgwilakgolh», chuna la linaw kilatamatkan ni wamputun pi lakatayayaw tuku wankgo mapakgsinanin. Xlakata política o taʼakglhuwit nema kgalhikgo latamanin, akinin ni kawaniyaw amakgapitsi tuku xlitlawatkan chu ni makgtanuyaw xlakata tuku tlawaputunkgo. Ni tlawayaw la amakgapitsi takanajla, ni makgtanuyaw kpolítica chu ni tlawayaw pi mapakgsinanin natlawakgo tuku lakaskinaw. Ni xlikana pi malakatsukiyaw taʼakglhuwit o namaktujuyaw xlimapakgsin mapakgsinanin.
17 Akxni tlawayaw tuku kinkaskinikgoyan mapakgsinanin makgantaxtiyaw xtastakyaw Pedro «kamaxkitit nkakni xapuxku rey», kamaxkiyaw kakni xlakata tuku kalakgayawakanit (1 Ped. 2:17). Makgapitsin laklanka mapakgsinanin wankgonit pi ni anan tuku xlakata nalakpuwankan tuku nitlan xlakata xtatayananin Jehová. Chuna wa político alemán Steffen Reiche, tiku na mapakgsina xwanit kʼestado xla Brandeburgo tiku alistalh na tawi kparlamento xla uma kachikin. Xla wa: «Anta campos de cocentración chu pulachin, xtatayananin Jehová limasiyakgolh tayat nema la uku, chu makgasa, lu talakaskin xlakata chuntiya natawila akgtum Estado constitucional democrático, ni makgtayakgolh SS chu tlan kalikatsinikgolh amakgapitsin tiku na xtanumakgolh kpulachin. Xlakata la uku niku latamanin tlakg nitlan likatsinikgo tiku xalak atanu país, chu tiku tanu la lakpuwankgo, lu talakaskin pi latamanin xalak uma kachikin na nakgalhikgo umakgolh tayat».
KAKAPAXKIW KINATALANKAN
18. 1) ¿Tuku xlakata “kapaxkiyaw xlipaks natalanin”? 2) ¿Tuku tlawanit pi kaks nalilakawankgo makgapitsi latamanin?
18 Apóstol Pedro na wa: «Kapaxkikgotit xlipaks natalanin. Kamakpuwanitit Dios» (1 Ped. 2:17). Xtatayananin Jehová kgalhinikgo tlan tapekua Jehová xlakata ni makgalipuwanputunkgo chu uma apulaktu tuku kinkamatlawiyan Xtalakaskin. Nachuna, lu lipaxuwayaw xlakata makgtapakgsiyaw kxkachikin Jehová nema linatalan laʼakxilhaw chu makxtum skujniyaw. Wa xlakata “kapaxkiyaw xlipaks natalanin”. Tapaxkit nema lakgalhiniyaw ni taʼakxilha kkakilhtamaku nema kaʼakstu kapaxkikan chu akxni akxilhkgo kaks lilakawankgo. Akgtum liʼakxilhtit, chatum puskat tiku guía de turistas xalak estados unidos kaks lilakawa akxni akxilhli tapaxkit chu la natalan alemanes kamakgtayakgolh tiku xalak atanu país nema xminkgonit akgtum lanka tamakxtumit xaʼakgtati kilhtamaku kkata 2009. Xla wa pi putum kilhtamaku nema kskujnit nikxni chuna xʼakxilhnit. Alistalh chatum tala wa: «Chuna la xkinkalichuwinaman, xtasiya pi nila xkanajla chu lu xpaxuwa». ¿Akxilhnita chatum tiku nachuna kinkalichuwinanan kʼakgtum lanka tamakxtumit?
19. ¿Tuku liwana lakapastaknitaw natlawayaw, chu tuku takgalhkgalhin kinkamatliwakglhan?
19 Tuku lichuwinanitaw kaj ni pulaklhuwa la xtatayananin Jehová limasiyakgo pi «kaj tsinu makgwilakgolh» xkakilhtamaku Satanás. Lu lipaxuwayaw xlakata chuna wilaw, chu chuntiya latamaputunaw. Akinin liwana kanajlayaw pi nialh makgas xliputum kilhtamaku natawilayaw xasasti kxkilhtamaku Dios. ¿Ni xlikana pi lakaskinaw kachalha kilhtamaku?
[Takgalhskinin]
[Dibujo xla página 19]
[Dibujo xla página 20]
Ni lakgpaliputunaw xkakilhtamaku Satanás...
[Dibujo xla página 20]
... wata lichuwinanaw xasasti xkakilhtamaku Dios
[Dibujo xla página 22]
Xtamasiy Biblia akxtum katlawanit lhuwa familias xalak Rusia la uma
