Kuenta katlawa xlakata tuku kanajlakgo atanu takanajla

APÓSTOL Pablo tsokgli: «Xtachuwin Dios xtachuna ntu xastakna, na kgalhiy xlitliwakga» (Heb. 4:12, Hua Xasasti Talaccaxlan, 1999). ¿Tuku xwamputun? Pi tuku wan Biblia kgalhi litliwakga xlakata nachan xnakujkan latamanin chu kalakgpalini xlatamatkan.

Pero akxni nikgolh apóstoles lakgpalikgolh tuku xkilhchanima, tiku makgxtakgkgolh xaxlikana takanajla maxkajwanikgolh xtakanajlakan kstalaninanin Cristo (2 Ped. 2:1-3). Titaxtulh kilhtamaku, tiku xpulalinkgo takanajla tsukukgolh wankgo pi Biblia xkgalhi akgtum litliwakga nema xmakgtayanan. Makgalhtawakgana Harry Y. Gamble lichuwinalh xlakata «la xlimaklakaskinkgo textos xla kstalaninanin Cristo nema kgalhikgo litliwakga» lichuwinan pi ksiglo III, Orígenes, Tiku na Malakatsukilh Takanajla xla Catolicos, wamputulh «pi akxni takgaxmata xasantu tachuwin makgtayanan: komo tachuwin xla magia lu lakgtliwakga, tlakg tliwakga xTatsokgni Dios». Gamble na wan pi Juan Crisóstomo, tiku xpulalin takanajla akxni xkgalhsputma siglo IV, wa pi tiku xpixtawakakgo makgapitsi textos xla Evangelios xkitaxtu xtachuna la xlinkgolh tuku lu tliwakga nalitamakgtayakgo chu uma tuku wan maktum xlibro: «Demonio ni talakatsuwi kchiki niku wi makgtum Evangelio». Na lichuwinan pi teólogo católico Agustín de Hipona «tlan xʼakxilha natalhtatakan xʼEvangelio Juan xtampin akxtikat chu uma xmakgtayanan xlakata nialh xʼakkatsanti». Chuna la akxilhaw, latamanin xlakpuwankgo pi tlan xlimaklakaskinkgolh xaSanto Tatsokgni la tuku masta litliwakga. Pero ¿ni xlikana pi ni tlan naʼakxilhaw Biblia la akgtum talismán o tuku nalitamakgtayayaw?

La uku, akgtum talismanin nema lu tlawakan wa bibliomancia. ¿Tuku kilhchani bibliomancia? Uma namakgtanu tuku tlawakgo skuwananin, malakkikan maktum libro, atsinu ni putum kilhtamaku Biblia, chu nalikgalhtawakgakgo xapulana texto nema naʼakxilhkgo, chu kanajlakgo pi anta wi tamakgtay nema maklakaskinkgo. Akgtum liʼakxilhtit, la wan makgalhtawakgana Gamble, Agustín de Hipona makgtum kgaxmatli pi chatum aktsu kgawasa xwani: «Katiya chu kalikgalhtawakga, katiya chu kalikgalhtawakga». Xla lakpuwa pi Dios xwanima pi xmalakkilh Biblia chu xlikgalhtawakgalh xapulana capítulo nema xtekgsli.

Max wix katsiya xlakata latamanin tiku akxni xtitaxtumakgolh akgtum taʼakglhuwit tlawanikgolh oración Dios chu alistalh malakkikgolh xBiblia, chu lakpuwankgolh pi xapulana versículo nema likgalhtawakgakgolh xʼama kamakgtaya xlakata xlakkaxtlawakgolh xtaʼakglhuwitkan. Maski tlan tuku tlawaputunkgo, kstalaninanin Cristo nichuna putsakgo nakapulalin xTachuwin Dios.

Jesús kawanilh kstalaninanin pi xʼama kamalakgachani «espíritu santo [...] nakamakgtayayan». Chu wa: «na luwa liwana nakamalakapastakayan xlipaks kintapakgsit wantu kkamaxkinitan» (Juan 14:26). Pero talakaskin nalakgapasa Biblia, tuku max ni katsini tiku lismani bibliomancia.

Xlikana pi uma chu atanu talismanin niku maklakaskinkan Biblia lhuwa wilakgo, xTachuwin Dios wan pi ni nalimaklakaskinaw xlakata nakatsiyaw komo wi tuku tlan o nitlan nakinkaʼakgspulayan (Lev. 19:26; Deut. 18:9-12; Hech. 19:19). Liwana katsiyaw pi «xtachuwin Dios xtachuna ntu xastakna, na kgalhiy xlitliwakga», pero kilikatsinitkan namaklakaskinaw. Xatakgatsin takatsin nema masiya wa tuku kamakgtaya latamanin nalakgpalikgo xlatamatkan chu ni wa litliwakga nema makgapitsi lakpuwankgo pi kgalhi. Lhuwa kamakgtayanit nakatsinikgo lu tlan nalinkgo xlatamatkan, namakgxtakgkgo nixatlan tiji nema xlimakgolh, tlakg tlan natalalinkgo xfamilias chu tlan natalalinkgo tiku xtalakapastakni nema wi kBiblia.

[Dibujo xla página 3]