¿Lakapastaka?

¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

¿La natlawayaw xlakata kintachuwinkan ni nalimatsukiyaw lhkuyat?

Pulana kaʼakxilhwi tuku wi kkinakujkan. Ni xlilat nitlan tuku nalakpuwanaw xlakata kintalakan, kilikatsitkan tuku xlakata nitlan lichuwinanaw. ¿Xlikana wi tuku tlawanit nema tlawa pi ni nalipawanaw? ¿O max nialh paxkinanaw chuna la tiku lamakgolh kxaʼawatiya kilhtamaku? (15/8, página 21.)

¿Tuku nala akxni atsinu natsankga namin lisputni?

Natsukukan wankan pi «anan ntakaksni, ni tu ntamakpuwan anan». Kachikin natalachipakgo chu namalakgsputukgo «xatlanka Babilonia». Namasputuputunkan xkachikin Dios. Natlawakan guerra xla Armagedón. Satanás chu xdemonios nakamalakgachakan niku kapulhman (15/9, página 4).

¿Tuku nala akxni linin “namasputukan”?

Biblia kinkawaniyan pi «xlikgatsputni, talatlawana nawan, wa linin wa ntu nalaktlaway» (1 Cor. 15:26). Uma pulaktiy tiku nalitamakgtayakgo. Pulana «lhuwa amakgapitsin chixkuwin» tiku la uku lamakgolh tlan natanukgo kxasasti kakilhtamaku chu nikxni nanikgo. Nachuna lhuwa millón tiku nikgonitta tlan nalakastakwanankgo (15/9, páginas 10).

¿La kinkamakgtayayan xlakata ni katsiyaw tukuya kilhtamaku chu tukuya hora namin lisputni?

Akxni ni katsiyaw tukuya kilhtamaku namin lisputni limasiyayaw tuku wi kkinakujkan. Kinkamakgtayayan namakgapaxuwayaw xnaku Jehová. Wi tuku limakgxtakgaw. Kinkamakgtayayan tlakg nalipawanaw Jehová chu nalilatamayaw xTachuwin. Masta talakaskin xlakata taʼakglhuwit nakinkamakgtayayan nakgalhiyaw lakwan tayat (15/9, páginas 24 chu 25).

¿Tuku wamputun pi tiku Malakatsukilh putum kakilhtamaku nila lakapastaka talakgalhin nema katapatinit latamanin?

Tlan nawanaw pi xlikana. Jehová kawani kskujnin: «Naktapati tuku nitlan tlawalh, chu nialh naklakapastaka xtalakgalhin» (Jeremías 31:34). Chuna kinkawaniyan pi akxni tapati makglakgalhinanin tiku nialh tlawakgo talakgalhin, nialh lakapastaka xtalakgalhinkan (1/10, página 18).

¿Tuku kilhchanima «akgtujun staku» nema Jesús kgalhi kxpakgstakat nema lichuwinan Apocalipsis 1: 16, 20?

Uma kilhchanikgo lakgkgolotsin tiku kalaksakkanit naʼankgo kʼakgapun chu na kilhchani putum lakgkgolotsin tiku wilakgo kcongregaciones (15/10 página 14).

¿Tuku nakinkamakgtayayan namakgantaxtiyaw tuku wanaw?

Kʼuma «xaʼawatiya kilhtamaku» wilakgolh lhuwa latamanin tiku nitu naliukxilhkgoy Dios tiku «kaj wa natlawakgoy xtachuna pi kakninanikgoy Dios natasiyukgoy, maski stalanka nalitasiyukgoy xlipaks wantu lixkajni tlawakgoy» (2 Tim. 3:1-5, TXS, 1999). Wa xlakata ni nakatalalinaw tiku chuna likatsikgo wata nakatalalinaw tiku makgantaxtikgo tuku malaknukgo natlawakgo (Heb. 10:24, 25) (15/10 página 30).

¿La limasiyalh Jesús pi ni tlankajwa xlikatsi chuna la xtalichuwinanit Isaías 50:4, 5?

Umakgolh versículos wankgo «nakkgalhakgaxmata la tiku kamasiyaninit» chu «ni alakatanu niku kkalh», chu masiya pi Jesús taktujulh chu kuentajtlawalh tuku xmasiyani Jehová. Jesús liwana akxilhli pi Jehová ni lanka xmakgkatsikan chu akxilhli la tlan kalikatsini latamanin maski lakgalhinanin (15/11, página 11).

¿Tuku xlakata min kilhtamaku tuwa tapatinanaw?

Xlakata akxni wi tuku kinkatlawanikanan nitlan kinkamamakgkatsiniyan. Max nasitsiyaw, namakgkatsiyaw pi kinkaʼakgskgawikgon o nalakaskinaw namalakgaxokgekan o akinin namalakgaxokgeyaw (15/11, página 27).