Makatsinina knixatuwa tachuwin ¿Tuku xlakata tlawaka?

AKGLHUWATA kata, lakchixkuwin chu lakpuskatin xlikalanka kakilhtamaku litamakgtayakgo uma lu xlakaskinka likgalhtawakga nema takilhtinit kBiblia chu wanikan Makatsinina. Pero kjunio kata 2011, taxtulh xapulana revista knixatuwa inglés nema likgalhtawakgakan ktamakxtumit, akgtum kata xʼama liʼakxilhkan komo xmakgtayanalh.

Pero, lu lipaxuw kkawaniyan pi lakkaxwilinitaw pi chuntiyaku namaxtuyaw uma revista chu na namaxtuyaw kxaʼespañol, francés chu portugués.

LU PAXTIKASININANKGO XLAKATA KGALHIKGO

Akxni makglhtinankgolh knixatuwa inglés, makgapitsi xTatayananin Jehová xalak Pacífico Sur wankgolh: «La uku natalan tlakg akgatekgskgo tuku wamputun revista Makatsinina». Atanu carta wan: «Kilhtamaku nema xlimaxtuyaw xlakata xlakputsananiyaw tachuwin chu liwana xakʼakgatekgswi, la uku limaklakaskimaw xlakata nalikgalhtawakgayaw textos xalak Biblia chu la tatalakxtumi tuku likgalhtawakgamaw».

Anta kʼEstados Unidos chatum tala tiku lhuwa kgalhtawakganit wan: «Liwaka akgkutsayan kata, xakchuwinan chu xaktsokgnan chuna la tiku lu kgalhtawakgakgonit. Chuna la xaklakpuwan chu la xakchuwinan lu tuwa xwanit. Kkatsilh pi xtalakaskin wi tuku xaktlawalh». La uku uma tala tiku lichuwinan Dios wan: «Makatsinina knixatuwa inglés lu kimakgtayanit. Tachuwin nema maklakaskin akgtum liʼakxilhtit xlakata la nituwa nachuwinanaw».

 Chatum tala xalak Inglaterra tiku tamunulh kkata 1972 wa: «Akxni xaklikgalhtawakgama xapulana número revista, kmakgkatsilh xtachuna la Jehová xkilikgalhtawakganima, kiʼakgpixtilh, o kisnatli, xtachuna la akxni chatum tlat wi tuku likgalhtawakgani xtsumat».

Tala puskat xalak Betel kʼEstados Unidos tiku liwaka tipuxam kata tamununit wan pi revista knixatuwa tachuwin makgtayanit xlakata naʼakgatekgsa tuku makgasa ni xʼakgatekgsa. Akgtum liʼakxilhtit, recuadro xla revista 15 xla septiembre kata 2011 lichuwinalh tachuwin «lhuwa kxlakskujnin Dios» nema lichuwinan Hebreos 12:1, wamputun pi lhuwa xtatayananin xwankgonit chu nila xputlakgekan. Xla wan: «Tlakg liwana kʼakgatekgsli tuku xkilhchanima uma versículo». Chu xlakata takgalhtawakga nema kgalhikan kcongregación wa: «Asta akxni lakkamanan mastakgo akgtum takgalhtin chu kaj likgalhtawakgakgo tuku wan revista knixatuwa inglés, putum tiku linaw revista edición normal lu tlan limakgkatsiyaw xlakata xtakgalhtin xlakata aktsu kgawasa tanu tachuwin limaklakakin».

Atanu Betelita wan: «Lu klakgati kgaxmata tuku wankgo kamanan ktamakxtumit. Xasasti likgalhtawakga kamakgtayanit tlakg tlan nawankgo tuku kanajlakgo. Xtakgalhtinkan lu kimatliwekglhkgo».

Chatum tala tiku tamunulh kkata 1984 chuna wa: «Kmakgkatsilh pi tsokgka kimpalakata.  Lu lakapala kʼakgatekgsa tuku klikgalhtawakga chu ni kpekuan akxni kmasta kintakgalhtin ktakgalhtawakga xla Makatsinina».

TUKU LU XLAKASKINKA XLAKATA NATLATNI

Xtse chatum aktsu kgawasa wa: «Akxni xkawaniyaw tuku xkilhchanima makgapitsi tachuwin lu lhuwa kilhtamaku xkinkaliniyan akxni xlakkaxwiliyaw Takgalhtawakga xla Makatsinina». ¿La makgtayanit xasasti takgalhtawakga? Xla wan: «Lu kaks klilakawanaw akxni kʼakxilhaw la kinkgawasa likgalhtawakga párrafos chu liwana akgatekgsa. Xlakata ni maklakaskin lu laktuwa tachuwin chu oraciones ni lu laklhman, tlan limakgkatsi akxni kgalhtawakga. Asta xakstu lakkaxwili tuku nawan ktamakxtumit chu kuenta tlawa putum tamakxtumit».

Chatum tala wa, xpalakata xtsumat nema kgalhi akgnajatsa kata: «Nialh talakaskin nakmakgtaya nalakkaxwili tuku nawan xtakgalhtin. Kaj lakgachunin talakaskin nawaniyaw tuku wamputun akgtum artículo chu nawanitilhayaw tuku kilhchani. Xlakata revista lichuwinan la xla, lu tlan limakgkatsi kTakgalhtawakga xla Makatsinina».

¿CHU TUKU WANKGO KAMANAN?

Lhuwa laktsukamanan lakpuwankgo pi uma xasasti likgalhtawakga tlawaka xpalakatakan. Rebecca, tiku kgalhi 12 kata, wan: «¡Katlawatit litlan chuntiya katlawatit! Lu klakgati recuadros niku lichuwinankgo tuku kilhchanima akgtum tachuwin, xlakata ni tuwa chu akinin laktsu kamanan tlan akgatekgsaw».

Nicolette tiku kgalhi akgtujun kata, nachuna lakpuwan: «Makatsinina lu tuwa xwanit kimpalakata. Pero la uku kiʼakstu tlan tlakg kmasta kintakgalhtin». Emma tiku kgalhi akgnajatsa kata tsokgli: «Akit chu kintala tiku kgalhi akgchaxan kata kinkamakgtayanitan tlakg tlan naʼakgatekgsaw tuku lichuwinan. ¡Paxtikatsinilh!».

Chuna la akxilhaw, lhuwa litamakgtayamakgo xlakata uma revista niku ni maklakaskin laktuwa tachuwin chu oraciones ni lu laktuwa. Liwana tasiya pi xtsankga, chu wa xlakata chuntiya akxtum natatlawakan revista normal nema lhuwa kamakgtayanit lata kata 1879.

[Dibujo xla página 29]

[Dibujo xla página 30]

[Tuku wan página 30]

«Kilhtamaku nema xlimaxtuyaw xlakata xlakputsananiyaw tachuwin chu liwana xakʼakgatekgswi, la uku limaklakaskimaw xlakata nalikgalhtawakgayaw textos xalak Biblia chu la tatalakxtumi tuku likgalhtawakgamaw»

[Dibujo xla página 31]

[Tuku wan página 31]

«Lu kaks klilakawanaw akxni akxilhaw la kinkgawasa likgalhtawakga párrafos chu liwana akgatekgsa»