«Tiku kaj tsinu makgwilakgolh» akxtum skujnikgo xaxlikana Dios
«Tiku kaj tsinu makgwilakgolh» akxtum skujnikgo xaxlikana Dios
«Tiku xalak atanu kachikinin, milakskujnin chu tiku kuentajtlawakgo uvas nawankgo. Chu wixin xsacerdotes Jehová nakalimapakuwakanatit.» (IS. 61:5, 6)
¿LA XKGALHTINANTI?
¿La kalikatsinikgo makgpitsi latamanin tiku xalak atanu kachikin, pero tuku wan Biblia?
¿Tuku invitación kamaxkimaka latamanin xlikalanka katiyatni?
¿Tuku xlakata tlan nawanaw pi xkachikin Dios putum xala watiya kachikin?
1. ¿La kaʼakxilhkgo makgapitsin tiku xalak atanu kachikinin chu tuku xlakata ni tlan tuku lakpuwankgo?
CHUNA akxilhwi artículo nema titaxtulh, wilakgolh tiku nitlan kaʼakxilhkgo o asta kalakgmakgankgo tiku xalak atanu kachikin. Pero tiku tlakg lanka kamakgkatsikan nixawa tiku xalak atanu kachikinin ni kaj limasiyakgo pi ni mastakgo kakni, na litasiya pi nitu katsikgo. Maktum libro wan: «Tanu tanu lakatsukut wa tuku Biblia wani: linatalan» (The Races of Mankind). Tiku linatalan max ni lakxtum tasiyakgo, pero chuntiyaku linatalan.
2, 3. ¿La kaʼakxilha Jehová tiku ni lamakgolh kxpaís?
2 Kputum países wilakgolh tiku xalak atanu kachikinin. Chu chuna xwi xamakgan kachikin Israel, tiku tlan xtalalinkgo Jehová xlakata xkatatlawanit akgtum talakkaxlan xla Limapakgsin. Uma Limapakgsin xwan tuku tlan xmakglhtinankgo tiku xalak atanu kachikin, pero na xkawani Israelitas xaʼakgstitum xkalikatsinikgolh chu xkamaxkikgolh kakni. Nachuna, xaxlikana kstalaninanin Cristo ni laksakpaxkinanaw chu ni kalakpuwaniyaw tuku nitlan amakgapitsin. Katsiyaw pi chuna la wa apóstol Pedro, «Dios, ni [laksakpaxkinan], kxlakgstipan chixkuwin; wampi kaxani kawa xala, wanti mpikuaniy Dios, chu na wantu xlilat ntu ntlaway, tlan tlaway» (Hech. 10:34, 35).
3 Xlakata tiku xalak atanu kachikinin tlan xkatalalinkgo israelitas limasiya la Jehová kaʼakxilha tiku lamakgolh niku ni xpaís. Titaxtulh lhuwa kata apóstol Pablo wa: «[¿]Dios, xman wa xDioskan judíos? ¿Tu na xawa xDioskan xaʼakgmakgat chixkuwin? Pus lu[...] xlikanaj, na xDioskan atanuj chixkuwin» (Rom. 3:29; Joel 2:32).
4. ¿Tuku xlakata tlan wanaw pi «xʼIsrael Dios» ni anan tiku xalak atanu kachikin?
4 Xlakata xasasti talakkaxlan, Jehová lakgmakgalh Israel chu nialh xatalaksakni kachikin litaxtulh chu tsukulh talalin congregación xla kstalaninanin Cristo tiku kalaksakkanit naʼankgo kʼakgapun, nema litalakgapasli «xʼIsrael Dios» (Gál. 6:16). Pablo lichuwinalh pi uma xasasti talakkaxlan «ni anan ntapapitsit mpala akgmakgat chixkuwin, su wa nti lu[...] judío; mpala circuncidarlanit nchatum su ni circuncidarlanit; [...] chu wa nti nkaj xatastan ktaskujut, su wa nti ni xatastan; wampi wa nkin, paks wa nCristo, na wa nti nkinkatawilan nkilipakskan» (Col. 3:11). Wa xlakata, tlan nawanaw pi tiku kalaksakkanit ni anan tiku xalak atanu kachikin.
5, 6. 1) ¿Tukuya takgalhskinin taxtu xlakata tuku wan Isaías 61:5? 2) ¿Tiku «xsacerdotes Jehová» chu «tiku xalak atanu kachikin» nema lichuwinalh Isaías? 3) ¿Tuku akxtum katlawa uma akgtiy grupos?
5 Pero, na kaʼakxilhwi tuku kinkawaniyan capítulo 61 xla Isaías, chu tuku lichuwinan makgantaxti congregación xla kstalaninanin Cristo. ¿Tuku xlakata versículos 5 chu 6 wankgo pi xʼamakgolh tawilakgolh «tiku xalak atanu kachikin» chu nakataskujkgo «xsacerdotes Jehová»?
6 Umakgolh sacerdotes kilhchanima kstalaninanin Cristo tiku kalaksakkanit naʼankgo kʼakgapun, tiku makgtanukgo «xakgasiya ktalakastakwan». Xlakan «[xsacerdotes] Dios nawankgoy, chu xla Cristo, na natamapakgsinankgoy akgtum mil kata» (Apoc. 20:6). Pero na wilakgolh lhuwa kstalaninanin Cristo tiku ni makgxtakgkgo Dios chu kgalhkgalhimakgolh xliputum kilhtamaku nalatamakgo kKatiyatni chu ni kʼakgapun. Wa kilhchanima «tiku xalak atanu kachikin» tiku akxtum kataskujkgo tiku naʼankgo kʼakgapun. Xatapaxuwan kamakgtayakgo «xsacerdotes Jehová», tiku litaxtukgo la “lakskujnin” chu «tiku kuentajtlawakgo uvas». Makgtayanankgo natlawakan tuku matliwakglha takanajla xlakata namalankikan Dios chu lhuwa tiku nakamakgalhtawekgakgo. Wa xlakata, tiku kalaksakkanit chu «atanu borregos» kaputsakgo chu xatapaxuwan kakuentajtlawakgo latamanin tiku tlan likatsikgo chu xliputum kilhtamaku skujniputunkgo Dios (Juan 10:16).
«TIKU KAJ TSINU MAKGWILAKGOLH» LA ABRAHÁN
7. ¿Tuku xlakata wanaw pi xtalakxtum akinin kstalaninanin Cristo la xlakskujnin Dios xala makgasa la Abrahán?
7 Chuna la akxilhwi kʼartículo nema titaxtulha, xaxlikana kstalaninanin Cristo xtachuna la tiku xala alakatanu kachikin, o la tiku kaj makgwilaw xkakilhtamaku Satanás. Uma tlawa pi na nalitaxtuyaw la makgapitsi kskujni Dios xala makgasa, la Abrahán, tiku «kaj xalatapulinin [wankgolh], [...] kxokgspun tiyat» (Heb. 11:13). Maski kgalhkgalhimaw nalatamayaw kʼakgapun o kKatiyatni, putum tlan talalinaw Jehová xtachuna la Abrahán. Santiago wa pi «“Abraham, kanajlanilh Dios, na wa xtakanajla, xtachuna litaʼukxilhli xlitamalulokgni”; na xʼamigo Dios litapakuwilh» (Sant. 2:23).
8. ¿Tuku malaknunilh Dios, chu tuku liwana xkatsi Abrahán?
8 Dios wa pi putum familias kKatiyatni, chu ni kaj akgtum kachikin, xʼama tasikulunatlawa xpalakata Abrahán chu xkamanan (kalikgalhtawakga Génesis 22:15-18). Maski lhuwa kilhtamaku xtsankga xlakata xkgantaxtulh tuku Dios xwaninit, Abrahán putum kilhtamaku kanajlalh pi tuku Dios xwaninit xʼama kgantaxtu. Abrahán liwaka itat xlatamat anu anu lilh xfamilia, chu putum uma kilhtamaku chuntiya tlan talalilh Jehová.
9, 10. 1) ¿Tuku kinkamasiyaniyan xliʼakxilhtit Abrahán? 2) ¿Tuku invitación tlan nakaliniyaw latamanin?
9 Maski ni xkatsi la xlilhuwa kilhtamaku xʼama kgalhkgalhinan, Abrahán nikxni mastalh talakaskin xlajwanalh xtapaxkit chu la xkanajlani Dios. Putum kilhtamaku kanajlalh tuku Dios wanilh wa xlakata nikxni putsalh akgtum kachikin niku putum kilhtamaku xlatamalh (Heb. 11:14, 15). ¿Tuku kinkamasiyaniyan xliʼakxilhtit? Pi lu xlakaskinka ni lhuwa tuku nakgalhiputunaw chu ni lu nalilipuwanaw xlakata tuku kgalhiputunaw, la nakinkaʼakxilhkgoyan amakgapitsin o lu tlan taskujut nakgalhiyaw. ¿Tuku xlakata naliskujaw xlakata nakgalhiyaw akgtum «tlan» latamat kʼuma kakilhtamaku nema nialh makgas namasputukan? ¿Tuku xlakata naliskujaw tuku ni lu xlakaskinka? Xtachuna la Abrahán, kgalhiputunaw tuku tlakg tlan chu nakgalhkgalhiyaw asta akxni nakgantaxtu tuku kgalhkgalhimaw (kalikgalhtawakga Romanos 8:25).
10 Jehová chuntiya kawanima latamanin xliputum kachikinin namakglhtinankgo tasikulunalin xpalakata xkamanan Abrahán. Chu «xsacerdotes Jehová» kstalaninanin Cristo tiku kalaksakkanit naʼankgo kʼakgapun, chuna la «tiku xalak alakatanu kachikin», atanu borregos, limakgolh akgtum invitación xlikalanka Katiyatni kliwaka akgchaxan ciento tanu tanu tachuwin.
AKININ NI KGALHIYAW TUKU KINKAMAPITSIYAN
11. Xlakata xʼoración Salomón, ¿la xkakxilha tiku xalak atanu kachikinin?
11 Kkata 1026 akxni nina xmin Jesús, akxni xmakamastanimaka Dios templo, Salomón wa tuku xmakgkatsi kʼakgtum lu stlan oración. Xlakata tuku Dios xmalaknuninit Abrahán, xtachuwin masiyalh pi putum latamanin xtamakxtumikgolh xlakata xkakninanikgolh Jehová: «Nachuna tiku xala atanu kachikin, tiku ni tapakgsi kminkachikin Israel, chu xlikana xala lakgamakgat namin xlakata mintukuwani (xlakata xlikana nakgaxmatkgo xlakata lanka mintukuwani chu xlakata tliwakga mimakan chu xlakata la kamakgamakglhtinana amakgapitsin), chu naminkgo chu natlawakgo oración xlakata uma chik, wix kakgaxpatti kʼakgapun, niku wix lapat, chu militlawat chuna la tuku naskiniyan tiku xalak atanu kachikin; xlakata putum kachikinin xlikalanka katiyatni nalakgapaskgo mintukuwani xtachuna minkachikin Israel» (1 Rey. 8:41-43).
12. ¿Tuku xlakata makgapitsi lakpuwankgo pi xtatayananin Jehová ni kuenta tlawakgo tuku lama kʼuma kakilhtamaku?
12 Tlan wanaw pi tiku xala atanu kachikin wa tiku lama niku ni xkachikin. Xtatayananin Jehová ni tapakgsikgo kachikinin niku lamakgo. Wankgonit pi nikxni namakgxtakgkgo xtamapakgsin Dios, niku Jesucristo Mapakgsina. Wa xlakata ni makgtanukgo kpolítica, maski makgapitsi lakpuwankgo pi xlakata chuna tlawakgo ni kuenta tlawakgo tuku lama kʼuma kakilhtamaku.
13. 1) ¿Tuku xlakata tlan wanaw pi tuku lakpuwanaw, xlakata tiku xala atanu kachikin kaj xlakata la kaʼakxilhaw? 2) ¿Tuku xlakata katsiyaw pi Jehová ni xlakaskin pi xʼanankgolh tanu tanu kachikinin?
13 Xlikana pi tiku xala atanu kachikin wi tuku litasiyakgo pi ni xala uma kachikin, la xtachuwin, tuku lismanikgo o la lhakganankgo. Pero wi tuku tlawakgo xtachuna la amakgapitsi latamanin, wa uma tuku tlakg xlakaskinka. Wa xlakata, komo wi tiku wan pi tiku xala atanu kachikin ni xtachuna la xla, kaj akxilha tuku tlawa pi ni akxtum natasiyakgo. Pero akxni ni kajwatiya akxilhaw tuku tanu katlawa maski xlikana o ni xlikana, katsiyaw pi putum akinin lakxtum. Tlan chuna wanaw komo kʼakgtum tamapakgsin xkgalhiw xlikalanka katiyatni ni xtawi tiku xala atanu kachikin. Chu wa uma tuku xlakaskin Jehová: pi putum latamanin akxtum xlatamaw la akgtum familia niku kaj akgtum Xtamapakgsin xtawilalh. ¿Tlan nachuna nala uku?
14, 15. ¿Tuku lu xlakaskinka akxilhkgo xtatayananin Jehová?
14 Kʼuma kakilhtamaku niku latamanin tlankajwa likatsikgo chu lu malankikan akgtum kachikin, tlan tamakgkatsi akxni katekgsaw latamanin tiku ni akxilhkgo pi wi tuku kinkamapapitsiyan. Xlikana, lu tuwa chuna nalikatsikan. Ted Turner tiku makilhtsukilh cadena xla televisión CNN, kataskujli latamanin tiku xala tanu tanu kachikinin wa: «Lu klakgatilh akxni kkalakgapasli umakgolh lakchixkuwin chu lakpuskatin. Nialh kkaʼakxilhli la tiku xalak atanu kachikin, ktsukulh kalikatsini la tiku tapakgsinikgo uma katiyatni. Asta tachuwin tiku xalak atanu kachikin nialh tlan xakkgaxmata chu asta kwa pi ni xmaklakaskinka kCNN, kxlakatin o xchakgen cámaras. Wata xmaklakaskinaw tachuwin xlikalanka katiyatni».
15 Kajwatiya xtatayananin Jehová xlikalanka kakilhtamaku nachuna lakapastakkgo la Dios xlakata uma, chu ni kgalhikgo tuku kamapapitsi kxtalakapastakni chu xnaku. Xlakan tlan kalikatsinikgo, kalipawankgo latamanin xalak atanu kachikinin, chu katsikgonit lu xlakaskinka naʼakxilhkgo xtayatkan chu tuku tlan tlawakgo. ¿Lakpuwanita la xlilakaskinka uma chu la tlakg tlan kitaxtu nakatalalipina latamanin?
KAKILHTAMAKU NIKU NIALH NATAWILAKGO «TIKU XALA ATANU KACHIKININ»
16, 17. ¿La nawan kilatamatkan akxni nakgantaxtu tuku wa Apocalipsis 16:16 chu Daniel 2:44?
16 Nialh makgas, akxni xaʼawatiya natalachipakan xkachikin Dios, kʼakgtum guerra nema «lakatum ntani wanikan hebreo Armagedón», putum kachikinin natalatlawakgo Jesucristo chu xʼsoldados xalak akgapun (Apoc. 16:14, 16; 19:11-16). Liwaka akgtiy mil akgkitsis ciento kata, Daniel lichuwinalh pi xʼama masputukan mapakgsinanin nema Dios ni xlakaskin: «Kxkilhtamaku tama mapakgsinanin wa Dios xalak akgapun nawiliy akgtum tamapakgsin nema nikxni katisputli. Chu tama tamapakgsin ni katimatitaxtinika atanu kachikin. Nakalakxpulay chu nakamasputuy putum tamapakgsin chu tama tamapakgsin xliputum kilhtamaku natawilay» (Dan. 2:44).
17 ¿Lakpuwanita la nawan latamat akxni nakgantaxtu uma? Tuku limapapitsinankgo latamanin nialh natawilakgo, chuna nialh natawilakgo tiku xalak atanu kachikin. Ama kilhtamaku, maski tanu natasiyayaw kaj nalitasiya tuku tanu tanu tlawanit Dios. ¡Lu lilakgatit tuku nakgalhiyaw! Xlikana lu tlan kitaxtu akxni liskujaw xlakata namalankiyaw kiMalakatsukinakan Jehová.
18. ¿Tuku limasiya pi tlan lakxtlawakan tuku mapitsi kachikinin?
18 ¿Kaj tamanaxnat uma takgalhkgalhin xlakata xlikana nakgantaxtu? ¡Ni! Anan lhuwa tuku xlakata nakanajlayaw. Xtatayananin Jehová ni kuentajtlawakgo xala tukuya kachikin xnatalan. Akgtum liʼakxilhtit, xlakata tlakg lakapala napulalinkan taskujut chu nalichuwinankan xalakwan xalaksasti, nina makgas lhuwa sucursales makxtum katlawaka (Mat. 24:14). Akxni akxtum katlawaka, ni kuenta tlawaka niku tapitsikgo países niku mapakgsinanin xmastakgo talakaskin. Uma nalimasiya pi Jesucristo, Mapakgsina tiku Jehová wililh, lakxtlawama tuku latamanin tlawakgo pi nakinkamapitsiyan. Chu nialh makgas “natlajanan nak guerra” (Apoc. 6:2).
19. ¿Tuku tlan kitaxtunit xlakata katsinimaw tuku xaxlikana?
19 Xtatayananin Jehová xala lakalhuwa kachikinin chu tanu tanu tachuwin chuwinanaw, pero kimputunkan katsinimaw xtachuwin Dios, chu tlawa pi tlan nalatalalinaw (kalikgalhtawakga Sofonías 3:9). Maski lamaw kʼuma kakilhtamaku niku lu lixkajni, ni makgtanuyaw. Kifamiliajkan xlikalanka katiyatni limasiya tuku nala nialh makgas: kakilhtamaku niku ni katiʼanalh tiku xalak atanu kachikin. Ama kilhtamaku putum chu chatunu chatunu latamanin naʼakxilhkgo pi xlikana tuku lichuwinan libro nema pulana lichuwinaw: «Tanu tanu lakatsukut wa tuku Biblia wani pi: linatalan» (The Races of Mankind).
[Takgalhskinin]
[Dibujo xla página 24]
[Dibujo xla página 25]
Xtachuna la Abrahán, ¿kaj naʼakxilhaw la nakgantaxtu tuku Dios wanit?
[Dibujo xla página 27]
Xlakatin Jehová niti xalak atanu kachikin
[Tuku wan página 28]
¿Akxilhputuna akxni nialh katiʼanalh putum tuku kamapitsi kachikinin chu nialhti xala atanu kachikin nawan?
