Xlikana tlan kakitaxtu kmilatamat
Xlikana tlan kakitaxtu kmilatamat
«Xlakata chuna tlan nakitaxtuniyan kmilatamat chu xaskgalala tuku natlawaya.» (JOS. 1:8)
¿LA XKGALHTINANTI?
¿Tukuya kilhtamaku tlan kitaxtulh Salomón?
¿Tuku xlakata tlan nawanaw pi Pablo tlan kitaxtulh kxlatamat?
¿La tlan xliputum kilhtamaku tlan nakitaxtuyaw?
1, 2. 1) ¿Tuku wankgo makgapitsi xlakata tiku tlan kitaxtu? 2) ¿La tlan nakatsiya tuku wix lakpuwana xlakata tiku tlan kitaxtuma?
¿TUKU kilhchanima tlan nakitaxtuya? Komo nakatlawaniyaw uma takgalhskinin latamanin tanu tanu la nakgalhtinankgo. Akgtum liʼakxilhtit, lhuwa lakpuwankgo pi talakaskin nakgalhiya lhuwa tumin, akgtum lu tlan taskujut o nakgalhtawakgaya. Atanu lakpuwankgo pi akxni tlan katalalinkgo amakgapitsin, xfamilias, amigos o tiku kataskujkgo. Chu chatum tiku skujni Dios, nalakpuwan pi tlan kitaxtuma akxni wi tuku lakgayawakan kcongregación o la lichuwinan Dios.
2 Xlakata nakatsiya tuku lakpuwana xlakata tiku tlan kitaxtu, katsokgwili xtukuwani makgapitsi nema wix lakpuwana pi tlan kakitaxtunima kxlatamat, tiku lu xlakaskinka kaʼakxilha. ¿Tuku nawatiya kgalhikgo? ¿Kgalhikgo tumin o lu kalakgapaskan? ¿Lu xlakaskinka kaʼakxilhkan? Tuku nakgalhtinana nalitasiya tuku wi kminaku, chu uma natlawa wi tuku nalaksaka chu tuku nalakkaxwiliya natlawaya (Luc. 6:45).
3. 1) ¿Tuku xlitlawat xwanit Josué xlakata tlan xkitaxtunilh? 2) ¿Tuku naʼakxilhaw la uku?
3 Tuku tlakg xlakaskinka wa la kinkaʼakxilhan Jehová, xlakata tlan nakgalhiyaw latamat talakaskin tlan nakinkaʼakxilhan Jehová. Akxni Dios liyawalh Josué lanka taskujut pi nakapulalin kTiyat nema xKawanikanit Nakamaxkikan, limapakgsilh pi xlikgalhtawakgalh xLimapakgsin Moisés, «tantaku chu tantaskaka» chu liwana xkgalhakgaxmatli tuku anta xtatsokgnit. Wanilh: «Chuna tlan nakitaxtuniyan kmilatamat chu xaskgalala tuku natlawaya» (Jos. 1:7, 8). Chuna la katsiyaw Josué tlan kitaxtulh. ¿Chu akinin? ¿La tlan nakatsiyaw pi nachuna lakpuwanaw la Jehová xlakata tiku tlan kitaxtuni? Xlakata nakatsiyaw kaʼakxilhwi xlatamat chatiy lakchixkuwin nema lichuwinan Biblia.
¿TLAN KITAXTUNILH SALOMÓN?
4. ¿Tuku xlakata tlan wanaw pi Salomón tlan kitaxtunilh?
4 Salomón pulaklhuwa tuku tlan kitaxtunilh. ¿Tuku xlakata chuna wanaw? Xlakata pulana pekuanilh Jehová chu kgalhakgaxmatli, chu lhuwa sikulunatlawalh. Kalakapastakwi pi akxni Dios wanilh pi kskinilh tuku xlakaskin, mapakgsina skilh liskgalala xlakata tlan xpulalilh kachikin. Chu Jehová ni kaj maxkilh tuku kskinit, na maxkilh lhuwa tumin (kalikgalhtawakga 1 Reyes 3:10-14). «Xliskgalala Salomón tlakg lhuwa xwanit nixawa putum orientales chu xliputum liskgalala xalak Egipto.» Chu talakgapasli «xliputum kachikinin» (1 Rey. 4:30, 31). Chu xlakata xtumin, akgatunu kata xmakglhtinan liwaka 22 toneladas xla oro (2 Crón. 9:13). Tlan xkatalalin amakgapitsi kachikinin, tlawalh chiki chu negocios. Xlikana, Salomón lu tlan kitaxtulh akxni tlan kskujnima Dios (2 Crón. 9:22-24).
5. ¿Tuku wa Salomón xlakata tiku xlikana tlan kakitaxtuni?
5 Tuku Salomón tsokgli klibro xla Eclesiastés limasiya pi ni lakpuwa, pi tuku tlawakan chu tapaxuwan kaj tlan kgalhikgo tiku ricos chu kalakgapaskan. Xla wa: «Kkatsinit pi ni anan tuku tlakg tlan xpalakatakan pi nalipaxuwakgo chu natlawakgo tuku tlan kxlatamatkan; chu nachuna pi putum lakchixkuwin, kawayankgolh chu kalipaxuwakgolh putum tuku lu liskujkgonit. Wa uma tuku kinkamaxkinitan Dios» (Ecl. 3:12, 13). Katsilh pi tiku xlikana lipaxuwakgo uma wa tiku tlan kaʼakxilha Jehová, chu tlan talalinkgo. Uma xaskgalala mapakgsina wa: «Xlakata putum tuku takgaxmatli, xlikgalhsputat wa uma: Kapekuani xaxlikana Dios chu kamaki xlimapakgsin. Xlakata wa tuku xlitlawat chatum chixku» (Ecl. 12:13).
6. ¿La kinkamakgtayayan xliʼakxilhtit Salomón nakatsiyaw tuku kilhchanima tlan nakitaxtuyaw?
6 Akglhuwa kata, Salomón tlan skujnanilh Dios. Biblia wan: «chuntiyaku paxkilh Jehová, chu lilatamalh xlimapakgsin David xtlat» (1 Rey. 3:3). ¿Lakpuwana wix pi tlan kitaxtulh? Xlakata Dios pulalilh tlawalh akgtum lanka templo xlakata xaxlikana takanajla chu tsokgli maktutu libros xalak Biblia. Maski akinin nila natlawayaw tuku tlawalh, xliʼakxilhtit nakinkamakgtayayan naʼakxilhaw tuku kilhchanima xlikana tlan nakitaxtuyaw chu tuku kilitlawatkan. Kalakapastakwi pi Dios malakpuwanilh Salomón natsokga pi tumin, takatsin, nalakgapaskana chu limapakgsin tiku putum lakpuwankgo pi wa kilhchanima tlan nakitaxtuniyan, Salomón wa pi kaj nitu litaxtu chu naputsaya kaj xtachuna la «putsastalanikan un». ¿Akxilhnita pi lhuwa latamanin tiku paxkikgo tumin tlakg lakaskinkgo? Makglhuwa lilakgaputsakgo xlakata tuku kgalhikgo chu kaj xlakata alistalh xtuminkan atanu tiku natatamakgaxtokga (kalikgalhtawakga Eclesiastés 2:8-11, 17 chu 5:10-12).
7, 8. ¿Tuku nitlan tlawalh Salomón, chu tuku kitaxtulh?
7 Na katsiyaw pi Salomón makgxtakgli Dios. Biblia wan: «Chu akxni Salomón kgololh, xlakpuskatin tlawakgolh pi xnaku nastalani atanu dioses chu ni xliputum xnaku skujnilh Jehová xDios chuna la xnaku David xtlat. [...] Salomón tsukulh tlawa tuku nitlan kxlakatin Jehová» (1 Rey. 11:4-6).
8 Jehová lisitsilh chu wanilh: «Xlakata [...], ni makinita kintalakkaxlan chu kilimapakgsin nema klimapakgsin, xlikana nakmakglhtiyan tamapakgsin kmimakan chu xlikana nakmaxki miskujni» (1 Rey. 11:11). ¡Lu nitlan! Maski Salomón pulaklhuwa tuku lu tlan xkitaxtuninit, alistalh makgalipuwa Jehová. Makgxtakgli Dios nema tlakg xlakaskinka xwanit. Chatunu chatunu akinin tlan natlawa uma takgalhskinin: «¿Wi tuku kimasiyani tuku tlawalh Salomón xlakata tlan nakkitaxtu kkilatamat?».
LATAMAT NEMA TLAN KITAXTULH
9. Chuna la lakpuwankgo tiku xalak kakilhtamaku, ¿pi lu tlan xkitaxtunima Pablo?
9 Xlatamat Pablo ni xtachuna la xla Salomón. Pablo ni tawilalh kpumapakgsin chu nipara lipaxuwalh lu lakgkgama liwat xla mapakgsinanin. Wata kgalhtsinksli, kgalhputilh, lonkgli chu ni xkgalhi lhakgat (2 Cor. 11:24-27). Akxni makgamakglhtinalh pi Jesús Mesías, nialh xlakaskinka liʼakxilhka kjudaísmo. Tiku xpulalinkgo takanajla nialh xʼakxilhputunkgo. Tamaknuka kpulachin, makgsnokgka, limakgsnokgka kiwi chu aktalamika. Pablo wa pi xla chu xnatalan xkalikgalhkgamanankan, xkaputsastalanikan chu xkalimawakakan taʼakgsanin. Xla tsokgli: «Xtachuna mpalhma klitaxtunitaw xala katuxawat, chu xtachuna xatalakgmakgan nkaxatu kawa» (1 Cor. 4:11-13).
10. ¿Tuku xlitasiya pi Pablo nitu xliʼakxilha tlan nakitaxtu?
10 Akxni kgawasaku xwanit chu xlilakgapaskan Saulo, lu tlan tuku xʼama kgalhi Pablo. Xfamilia max lu xkgalhi tumin, makgalhtawakgelh Gamaliel, tiku lu xlakaskinka xliʼakxilhkan, chu alistalh tsokgli: «Xaktlajakgoy nti luwa kintastaknin» (Gál. 1:14). Xchuwinan hebreo, griego chu romano xlitaxtu chu xmakgtaya xlakata wi tuku xmakgamakglhtinalh nema lhuwa lu xlakaskinkgo. Komo xtilaksakli tlan nakitaxtu kkakilhtamaku, max lu xlakaskinka xliʼakxilhka chu xtikgalhilh tumin. Pero wata laksakli tuku amakgapitsin xlakpuwankgo pi ni tlan, asta xparientes max chuna xlakpuwankgo. ¿Tuku xlakata chuna tlawalh?
11. ¿Tukuya tasikulunalin chu tuku xlakapastaknit Pablo natlawa nema lu xlakaskinka xakxilha chu tuku xlakata?
11 Pablo xpaxki Jehová chu tlan xtalalimputun, ni xpaxki tumin chu ni xlakaskinka xlitaxtuputun. Akxni liwana katsilh tuku xaxlikana, lu xlakaskinka akxilhli tasikulunalin nema kakilhtamaku nitu liʼakxilha, la talakgmaxtut, nalichuwinankan Dios, chu latamat kʼakgapun. Xʼakgatekgsa pi wi tuku xtalakaskin natalakkaxtlawa, xlakata Satanás xwanit tlan xtlawalh pi putum latamanin nialh naskujnikgo Jehová (Job 1:9-11; 2:3-5). Maski lhuwa tuku nitlan xtitaxtulh, liwana xlakapastaknit ni namakgxtakga Dios chu ni namakgxtakga xaxlikana takanajla. Chu uma tuku xlakpuwanit natlawa ni wa tuku putsakgo xalak kakilhtamaku xlakata tlan nakitaxtukgo.
12. ¿Tuku xlakata wix lipawana Jehová?
12 ¿Nachuna lakapastaknita natlawaya la Pablo? Maski akxni liwana naskujniputuna Dios anan taʼakglhuwit, katsiyaw pi akxni chuna tlawayaw kgalhiyaw tasikulunalin chu Jehová tlan kinkaʼakxilhan. Chu akxni chuna tlawayaw xlikana tlan kitaxtuyaw (Prov. 10:22). La uku lhuwa tasikulunalin makglhtinanaw, chu kilhtamaku nema aku mima na tlan namakglhtinanaw lhuwa tasikulunalin (kalikgalhtawakga Marcos 10:29, 30). Anan lhuwa tuku xlakata «ni wa nalipawankgoy [tuku lhuwa xtapalh] wa ntu nkaj xalan nalakgsputa, chi wampi wa nkalipawankgolh Dios xastakna, wa nti xataxajni nkinkamaxkiyan xlipaks nkatuwa ntu lilatamayaw». Chuna natlawayaw xtastakyaw Pablo: «Chuna namastokgkgoy [tuku lhuwa xtapalh] wa ntu xla naʼan kilhtamaku, lakimpi xalan nchu nakgalhikgoy wa ntu xlipan latamat» (1 Tim. 6:17-19). Liwana katsiyaw pi akxni titaxtunita nawan akgtum ciento kata o akgtum mil, tlan nawanaw: «¡Wa klaksakli tuku xlikana tlan kitaxtu!».
¿NIKU WI TUKU LHUWA XTAPALH AKXILHA?
13. ¿Tuku wa Jesús xlakata namakgstokgwiliyaw tuku xtapalh?
13 Jesús wa: «Ni anta [kamastokgtit tuku xtapalh] nkatiyatna, ntani lakwakan, chu xatsulun wan ntu lakgalhiy, chu ntani ntanukgo nkgalhankgoy nkgalhananin. Wampi anta nkakgalhitit [tuku xtapalh] nkakgapun ntani ni lakwakan, chu ntani ni xatsulun lakgalhiy, chu ntani ni maxtukgoy, chu ni lay kgalhankgoy nkgalhananin. Xampi anta ntani xtawi [tuku xtapalh], na anta natawilay minakukan» (Mat. 6:19-21).
14. ¿Tuku xlakata nitlan makgstokgwiliyaw «[tuku xtapalh] nkatiyatna»?
14 «[Tuku xtapalh] nkatiyatna» ni kaj kilhchanima tumin. Na kilhchanima nakgalhiputuna tuku lichuwinalh Salomón chu tuku kakilhtamaku liʼakxilha pi tlan kitaxtunima, la lu xlakaskinka nalitaxtuya, nalakgapaskana chu nakgalhiya limapakgsin. Jesús na watiya tuku lichuwinalh, chuna la uma lu skgalala mapakgsina nema tsokgli klibro xla Eclesiastés: Tuku lhuwa xtapalh anan kkakilhtamaku ni putum kilhtamaku makgapala. Chuna la max wix akxilhnita, ni lhuwa makgapalakgo chu lakapala makgatsankgakan. Makgalhtawakgana Frederick D. Bruner tsokgli: «Liwana katsiyaw lhuwa nalakgapaskana kaj min chu an. Tiku lakgmaxtuna la uku chali kaj nalakapastakkan. Negocio nema tlan kitaxtuma uma kata, akata nalakla. [...] Jesús kapaxki latamanin wa xlakata kawani pi ni katitaxtukgolh talipuwan nema limin lilanka nema kaj lakapala titaxtu. Ni lakaskin pi kstalaninanin wi tuku nalilipuwankgo. “Chali chali, kakilhtamaku makti chatum tiku tlakg talhman xwi”». Maski lhuwa katsikgo pi uma xlikana, ¿la xlilhuwa latamanin lakgpaliputunkgo la akxilhkgo latamat? ¿Nalakgpaliya wix?
15. ¿Tuku naputsayaw xlakata tlan nakitaxtuyaw?
15 Makgapitsi tiku pulalinkgo takanajla masiyakgo pi nitlan naputsayaw tlan nakitaxtuyaw chu ni kaliskujwi xlakata tlan nakitaxtuyaw. Pero Jesús ni wa pi nitlan naputsayaw tlan nakitaxtuyaw. Wata kawanilh kstalaninanin tanu tuku xliskujkgolh xlakata xmakgstokgkgolh «[tuku xtapalh] nkakgapun», nema ni lakgsputa. Tuku tlakg lakaskinaw wa tlan natawilayaw kxlakatin Jehová. Xlikana, xtachuwin Jesús kinkamalakapastakayan pi tlan nalakaxwiliyaw tuku lakapastaknitaw natlawayaw. Chu naputsayaw kkinakujkan, tuku xlikana lu xlakaskinka akxilhaw.
16. ¿Tukuya tastakyaw tlan namakgantaxtiyaw?
16 Komo kkinakujkan makgapaxuwaputunaw Jehová, nakanajlayaw pi xla nakinkamaxkiyan tuku maklakaskinaw. Max namasta talakaskin pi tsinu natitaxtuyaw tatsinkstat, nakgalhputiyaw, chuna la titaxtulh apóstol Pablo (1 Cor. 4:11). Pero tlan natlawayaw xtastakyaw Jesús: «Ni kalilakgaputsatit chu kawantit: “¿Tuku nawayaw?” o “¿tuku nalikgotnanaw?” o “¿tuku nalilhakgananaw?”. Xlakata wa uma tuku lu putsakgo latamanin. Pero minTlatkan xalak kʼakgapun katsi pi putum uma maklakaskinatit. Pulana kaputsatit xTamapakgsin Dios, chu xtalakaskin, chu putum tuku maklakaskinatit nakamaxkikanatit» (Mat. 6:31-33, NM).
TLAN KAKITAXTU KXLAKATIN JEHOVÁ
17, 18. 1) ¿Tuku kilhchanima tlan nakitaxtuyaw? 2) ¿Tuku ni talakaskin natlawayaw xlakata tlan nakitaxtuyaw?
17 Wa uma tuku tlakg xlakaskinka: xlikana tlan nakitaxtuyaw ni kilhchanima tuku natlawayaw o la natawilayaw kxlakatin kakilhtamaku. Na ni kilhchanima akxni wi tuku nakinkalakgayawakanan kcongregación, wata talakaskin nakgalhakgaxmatnanaw chu ni namakgxtakgaw Dios. Xla kinkawaniyan kxTachuwin: «Wa yuma ntu ntlakg xlakaskinka xpalakata nchatum lantla litamakuintajlinit, wa yama mpi namakgantaxtiy xtaskujut» (1 Cor. 4:2). Chu chuntiya ni namakgxtakgaw Dios xlakata Jesús wa: «Wanti lu [...] akgstitum nakilipawan asta akxni natitaxtukgoy yuma ni tlan kilhtamaku, pus wa xla tama nalakgmaxtuy [xlatamat]» (Mat. 10:22). ¿Ni xlikana pi komo nalakgtaxtuyaw liwana nalitasiya pi tlan kitaxtunitaw?
18 Akxni lilakapastakaw uma, akxilhaw pi ni namakgxtakgaw Dios ni talakaskin lu xlakaskinka nalitaxtuyaw, lhuwa nakgalhtawakgayaw, la xlilhuwa kgalhiyaw tumin o la kinkaʼakxilhkgoyan latamanin, la xliskgalala akinin o tuku tlan tlawayaw. Maski katuwa tuku titaxtuyaw tlan ni namakgxtakgaw Dios. Kxapulana siglo xwilakgolh xlakskujnin Dios tiku lhuwa xkgalhikgo tumin chu tiku ni xkgalhikgo. Chu tiku xkgalhikgo tumin apóstol kawanilh pi xliskujkgolh tuku tlan, lhuwa tuku xmastakgolh chu xmaskiwinakgolh tuku xkgalhikgo. Putum, maski lhuwa o ni lhuwa tuku xkgalhikgo, tlan «nakgalhikgoy wantu xlipan latamat, o ni kgalhi xlisputni» (1 Tim. 6:17-19). Chu nachuna xlitatlawat la uku. Nachuna kilitlawatkan chu watiya tuku lakgayaw. Talakaskin ni namakgxtakgaw Dios chu natlawayaw «lakwan tatlaw». Chuna tlan nakitaxtuyaw kxlakatin kiMalakatsukinakan chu napaxuwayaw xlakata katsiyaw pi makgapaxuwamaw (Prov. 27:11).
19. ¿Tuku liwana lakapastaknita natlawaya xlakata tlan nakitaxtuya kmilatamat?
19 Wix max nila nalakkaxtlawaya putum tuku titaxtupat, pero tlan nalakkaxtlawaya la natitaxtutilhaya. Ni kamakgxtakgti Dios maski tuwa tuku natitaxtuya, xlakata alistalh wi tuku tlan namakglhtinana. Kakanajla pi Jehová namaxkiyan lhuwa tasikulunalin, la uku chu xliputum kilhtamaku. Putum kilhtamaku kalilakpuwaw tachuwin nema Jesús kawanilh kstalaninanin tiku kalaksakkanit naʼankgo kʼakgapun: «Akgstitum xakanajlani kawanti asta naniya, na kit nakmaxkiyan mintatlajan xla latamat» (Apoc. 2:10). ¡Chu wa uma kilhchanima lu tlan nakitaxtuya!
[Takgalhskinin]
[Dibujo xla página 6]
[Dibujo xla página 6]
Chuna la lakpuwankgo latamanin, xtasiya pi Saulo lu tlan xkitaxtuma
[Dibujo xla página 7]
Pablo xlikana lu tlan kitaxtulh
