1. ¿Tukuya lu tlan tamakatsin lu makgapaxuwa Pablo?

UMA tilalh kkata 55 akxni xminita Jesús. Apóstol Pablo wi kTroas lakatsu kpupunu, pero chuntiya kalakapastakma natalan xalak Corinto. Nina makgas katsilh pi xkgalhikgo taʼakglhuwit. Xtachuna la chatum tlat tiku kalilakgaputsa xkamanan, katsokgnanilh maktum carta xlakata xkastakyawalh (1 Cor. 1:11; 4:15). Nachuna, skinilh Tito pi xʼalh kalakgapaxialhnan chu alistalh xmimpa kTroas xlakata Pablo xkatsilh la xwilakgo natalan kCorinto. La uku, Pablo kgalhkgalhima Tito xlakata lu katsiputun tuku kikatsilh. Pero ¡lu nitlan! Tito nikxni chilh. ¿Tuku natlawa Pablo? Tajulh kbarco chu alh kMacedonia. Anta tatanokglhli Tito, chu lu tlan tamakatsin limin: natalan xalak Corinto xatapaxuwan kgalhakgaxmatkgolh xtastakyaw Pablo chu akxilhputumparakgoya. Akxni Pablo kgaxmata tuku wanika, tlakg paxuwalh (2 Cor. 2:12, 13; 7:5-9).

2. 1) ¿Tuku katsokgnilh Pablo natalan xalak Corinto xlakata xtakanajlakan chu xtapaxuwankan? 2) ¿Tukuya takgalhskinin nakgalhtiyaw?

² Ni makgas titaxtulh, Pablo katsokgnipa xlimaktiy xcarta natalan xalak Corinto chu anta kawanilh: «Ni wa xpalakata mpala kaj kilitlankakan [o xmalanakan] [...] mintakanajlakan, wampi kaj kmakgamakgtayaputunaw mintapaxuwankan nkin, xampi wa xpalakata mintakanajlakan, tliwakglh liwilatit» (2 Cor. 1:24). ¿Tuku xkawaniputun? ¿Tuku kamasiyani umakgolh tachuwin lakgkgolotsin xala uku?

3. 1) ¿Tuku xwamputun Pablo akxni tsokgli: «Xampi wa xpalakata mintakanajlakan, tliwakglh liwilatit»? 2) ¿La tlawakgo lakgkgolotsin xala uku chuna la tlawalh Pablo?

³ Apóstol Pablo lichuwinalh pulaktiy xlakata kintakakninkan: takanajla chu tapaxuwan. Xlakata takanajla tsokgli: «Ni wa xpalakata mpala kaj  kilitlankakan [o xmalanakan] [...] mintakanajlakan, [...] xampi wa xpalakata mintakanajlakan, tliwakglh liwilatit». Pablo akxilhli pi natalan xalak Corinto, ni xmakgxtakgkgo Dios xlakata xkanajlanikgo, chu ni kaj xlakata Pablo o amakgapitsi. Xkatsi pi ni xtalakaskin nakamapakgsi kxtakanajlakan xnatalan chu ni chuna xtlawaputun xlakata xkatsi pi xtlawaputunkgo tuku tlan (2 Cor. 2:3). Lakgkgolotsin xala uku nachuna tlawakgo la Pablo, kalipawankgo xnatalankan pi tlan tapuwan kgalhikgo akxni skujnikgo Dios (2 Tes. 3:4). Ni wilikgo tuwa limapakgsin kcongregación, wata tlawakgo chuna la wan Biblia chu la lakkaxwilinit xkachikin Dios. Xlakata ni malanankgo xtakanajlakan amakgapitsin (1 Ped. 5:2, 3).

4. 1) ¿Tuku xwamputun Pablo akxni tsokgli: «Kmakgamakgtayaputunaw mintapaxuwankan»? 2) Chuna la tlawalh Pablo, ¿tuku tlawaputunkgo lakgkgolotsin xala uku?

⁴ Pablo na wa: «Wampi kaj kmakgamakgtayaputunaw mintapaxuwankan». Xlakata tuku wa xakstu xlichuwinamaka chu xmakgtayananin. ¿Tuku likatsiyaw? Kʼuma carta na lichuwinalh chatiy. Xla tsokgli: «Xampi [...] Jesucristo, wa ntu nkin kkaliʼakgchuwinaninitan, kit, chu Silvano, chu nTimoteo» (2 Cor. 1:19). Nachuna, akxni apóstol xmaklakaskin tachuwin makgtayananin xlichuwinama tiku tlakg xkatalalin, la Apolos, Áquila, Prisca, Timoteo o Tito (Rom. 16:3, 21; 1 Cor. 3:6-9; 2 Cor. 8:23). Akxni wa «kmakgamakgtayaputunaw mintapaxuwankan», Pablo xkawaniputun natalan xalak Corinto pi xla chu xmakgtayananin xʼamakgo liskujkgo xlakata xalak congregación tlakg xpaxuwakgolh. La uku nachuna tlawaputunkgo lakgkgolotsin: liskujkgo xlakata nakamakgtayakgo xnatalankan xlakata «lipaxaw kalakgachixkuwi[kgolh]n» Jehová (Sal. 100:2; Filip. 1:25).

5. ¿Tuku naʼakxilhaw kʼuma artículo chu tuku xlakata nalilakpuwanaw uma?

⁵ Nina makgas kakgalhskinka makgapitsi natalan tiku lu lipaxuw lichuwinankgo Dios klakalhuwa kachikinin. Kakgalhskinka: «¿Tuku wa o tuku tlawalh chatum kgolotsin xlakata tlakg xpaxuwa?». Xlakata aku nakatsiyaw tuku kgalhtinankgolh, kalakpuwaw tuku xtikgalhtinaw akinin chu na kalilakpuwaw tuku tlan natlawayaw xlakata tlakg napaxuwakgo natalan xla kincongregacionkan. *

6, 7. 1) ¿La tlan nachuna natlawakgo lakgkgolotsin la tlawakgolh Jesús, Pablo chu amakgapitsi kskujnin Dios? 2) ¿Tuku xlakata tlakg paxuwakgo kinatalankan akxni lakapastakaw xtukuwanikan?

⁶ Lhuwa natalan wankgolh pi tlakg paxuwakgo akxni lakgkgolotsin xlikana limasiyakgo pi kapaxkikgo. Pulaktum la tlan nalimasiyakgo lakgkgolotsin wa nachuna natlawakgo la tlawalh David, Elihú chu Jesús (kalikgalhtawakga 2 Samuel 9:6; Job 33:1 chu Lucas 19:5). Xkgalhtutukan kalimapakuwikgolh amakgapitsi xtukuwanikan. Pablo lu xlakaskinka xakxilha nalakapastaka chu namaklakaskin xtukuwanikan xnatalan. Akxni xmakgalhsputuma xcarta nema kamalakgachanilh natalan xalak Roma, kamakgachipa liwaka puxamakitsis natalan tiku kalimapakuwilh xtukuwanikan. Akgtum liʼakxilhtit, tsokgli: «Kixakgatlinitit Pérsida [wanti paxkiyaw]» (Rom. 16:3-15).

⁷ Makgapitsi lakgkgolotsin tuwa makgkatsikgo nalakapastakkgo xtukuwanikan natalan xalak congregación.  Pero akxni liskujkgo nalakapastakkgo xtukuwanikan, xtachuna la xwanikgolh: «Wix lu xlakaskinka kakxilhan» (Éx. 33:17). Lakgkgolotsin makgtayanankgo xlakata napaxuwakgo xnatalankan akxni kalimapakuwikgo xtukuwanikan ktakgalhtawakga xla Makatsinina akxni mastakgo xtakgalhtinkan o kʼatanu tamakxtumit (katamalakxtupi Juan 10:3).

8. ¿La nachuna tlawalh Pablo la Jehová chu Jesús?

⁸ Atanu tuku tlakg nakalimakgapaxuwayaw natalan wa nakawaniyaw pi tlan tuku tlawamakgolh chuna la tlawalh Pablo. Anta liwana tasiya kxlimaktiy carta nema kamalakgachanilh xalak Corinto, niku tsokgli: «Lhuwa tuku klipaxuwa mimpalakatakan» (2 Cor. 7:4, TNM). Uma tachuwin max lu kamakgapaxuwalh natalan xalak Corinto. Pablo nachuna kawanilh amakgapitsi congregaciones (Rom. 1:8; Filip. 1:3-5; 1 Tes. 1:8). Akxni xmapakuwinita Pérsida kxcarta nema kamalakgachanilh natalan xalak Roma wa: «Wanti lu[...] skujnit kxtukuwini nkinTlatikan» (Rom. 16:12). ¡Xlikana pi kintalakan lu paxuwalh! Akxni Pablo kawanilh amakgapitsi pi tlan tuku xtlawakgo, chuna xtlawama la Jehová chu Jesús (kalikgalhtawakga Marcos 1:9-11 chu Juan 1:47; Apoc. 2:2, 13, 19).

9. ¿Tuku xlakata tlakg anan tapaxuwan kcongregación akxni wanaw chu kinkawanikanan tuku kinkamatliwakglhan?

⁹ Lakgkgolotsin xala uku lu xlakaskinka akxilhkgo nakawanikgo xnatalankan pi lu kapaxkikgo (Prov. 3:27; 15:23). Akxni chuna tlawakgo kitaxtu la xwanikgolh: «Kakxilhli pi lu tlan tuku tlawa». Xlikana, kinatalankan lakaskinkgo pi lakgkgolotsin kakawanikgolh tachuwin tuku nakamatliwakglha. Tuku wa chatum tala puskat tiku kgalhi 55 kata, limasiya pi lhuwa chuna lakpuwankgo: «Ktaskujut ni lu anan tiku naʼakglhchapakgxan. Anta ni lapaxkikan chu kaj latlajaputunkan. Wa xlakata lu kpaxuwa akxni chatum kgolotsin kiwani pi xlakaskinka akxilha tuku ktlawa kcongregación. ¡Lu kimatliwakglha! Chuna kmakgkatsi pi kinTlat xalak akgapun lu kimpaxki». Nina makgas, chatum kgolotsin wanilh laktlan tachuwin chatum tlat tiku kaj xakstu kamakgastakma chatiy xkamanan. ¿Tuku kitaxtulh? Uma tlat wan: «Xtachuwin kimatliwakglhli». Chuna, kamatliwakglhkgo chu tlakg paxuwakgo natalan akxni chatum lakgkgolotsin kawanikgo tuku tlan tlawakgo. Chu uma kamakgtaya tlan natayanikgo taʼakglhuwit nema titaxtukgo kxlatamatkan (Is. 40:31).

10, 11. 1) ¿La tlan lakgkgolotsin nachuna natlawakgo la Nehemías? 2) ¿Tuku nakamakgtaya lakgkgolotsin “nakalitakgalhchuwinankgo lantla Dios lakgalhamanan” akxni nakatachuwinankgo?

¹⁰ ¿Tuku atanu tlan natlawakgo lakgkgolotsin xlakata nalimasiyakgo pi kapaxkikgo xnatalan chu tlakg napaxuwakgo? Xakstukan nalakpuwankgo nakamatliwakglhkgo tiku lakaskin tamakgtay (kalikgalhtawakga Hechos 20:28). Chuna tlawamakgo la lakgkgolotsin xala makgasa. Kaʼakxilhti tuku tlawalh kgolotsin Nehemías akxni akxilhli pi makgapitsi judíos kxlajwanankgonit. Biblia wan pi tsukulh kamatliwakglha (Neh. 4:14). Lakgkgolotsin xala uku nachuna tlawakgo: xakstukan lakpuwankgo nakamatliwakglhkgo xnatalankan. Wa xlakata komo tlan, kalakgankgo kxchikkan, xlakata “nakalitakgalhchuwinankgo lantla Dios lakgalhamanan” (Rom. 1:11, Hua Xasasti Talaccaxlan, 1999). ¿Tuku nakamakgtaya  lakgkgolotsin nakamatliwakglhkgo kxtakanajlakan akxni nakalakgapaxialhnankgo?

¹¹ Akxni lakgkgolotsin aku naʼankgo kalakgapaxialhnankgo natalan, pulana lakpuwankgo tuku maklakaskin tiku natachuwinankgo. Tlan nalakpuwankgo: «¿Tukuya taʼakglhuwit titaxtuma uma tala? ¿Tuku nalimatliwakglhaw? ¿Tukuya textos xalak Biblia namakgtaya? ¿Wi chatum tiku talichuwinan kBiblia nema nachuna titaxtunit?». Takgalhskinin la umakgolh makgtayanan xlakata tuku nawankgo lakgkgolotsin nakalimakgtayakgo natalan. Akxni kalakgapaxialhnankgo lakgkgolotsin kamaxkikgo talakaskin pi natalan nawankgo la makgkatsikgo chu liwana kakgaxmatnikgo (Sant. 1:19). Chatum tala puskat wa: «¡Lu matliwakglhnan akxni chatum kgolotsin liwana kgaxmatniyan!» (Luc. 8:18).

12. ¿Tiku talakaskin nakamatliwakglhkan kcongregación chu tuku xlakata?

¹² ¿Tiku tlan nakamatliwakglhnikan kxtakanajlakan? Pablo kastakyawalh lakgkgolotsin: «Nkuintaj katlawatit xlipaks nkanajlanin». Chuna, putum natalan xalak congregación lakaskinkgo nakamatliwakglhkan, asta tiku lichuwinankgo Dios chu precursores tiku akglhuwata kata lichuwinankgo Dios. ¿Tuku xlakata umakgolh natalan tiku lakgtliwakga chu ni makgatsankgananikgo Dios talakaskin nakamatliwakglhkgo lakgkgolotsin? Xlakan na namakgkatsikgo pi nialh tayanikgo taʼakglhuwit nema kgalhikgo kʼuma xalixkajni kakilhtamaku. Tuku titaxtulh mapakgsina David kinkamasiyaniyan pi asta tiku ni makgatsankgananikgo Dios namin kilhtamaku namaklakaskinkgo xtamakgtaykan natalan.

13. 1) ¿La xwi David akxni xmakgniputun Isbí-benob? 2) ¿Tuku xlakata Abisai tlan lakgmaxtulh David?

¹³ Akxni David aku xlaksakkanit xlakata xmapakgsina Israel xwa, talachipalh chatum lanka chixku wanikan Goliat,  tiku refaím xwanit. David ni pekualh chu makgnilh (1 Sam. 17:4, 48-51; 1 Crón. 20:5, 8). Titaxtulh kata, David talachipapa chatum lanka chixku tiku na refaím xwanit. Xwanikan Isbí-benob (2 Sam. 21:16; nota). Pero uma lanka atsinu ni xmakgni David. ¿Tuku xlakata? Ni wa xlakata David pekualh, wata xtlakgwanita. Biblia wan pi xtlakgwanita, chu Isbí-benob akxilhli pi tlan namakgni. Pero akxni atsinu xtsankga namakgnikan, «Abisai xkgawasa Zeruyá milh makgtaya chu tlajalh filisteo chu makgnilh» (2 Sam. 21:15-17). ¡Atsinu lilakgtaxtulh! David max paxtikatsinilh Abisai xlakata kuenta xtlawama chu lakgmaxtulh. ¿Tuku kinkamasiyaniyan uma?

14. 1) ¿La tlan natayaniyaw laklanka taʼakglhuwit xtachuna la xlilanka Goliat? 2) ¿La nakinkamakgtayakgoyan lakgkgolotsin xlakata natatliwakglhparayaw chu napaxuwaparayaw? Kawanti akgtum liʼakxilhtit.

¹⁴ Maski Satanás chu xmakgtayananin kinkaliminiyan tuku nitlan, xlakskujnin Jehová chuntiya lichuwinamaw xtachuwin xlikalanka katiyatni. Makgapitsi titaxtunitaw laklanka taʼakglhuwit xtachuna la xlilanka Goliat, pero makgatlajanitaw xlakata lu lipawanaw Jehová. Min kilhtamaku xlakata putum titaxtuyaw tuku nitlan kʼuma kakilhtamaku kinkamakgatlakgwanan. Akxni chuna makgkatsiyaw, tlan nakinkatlajayan taʼakglhuwit ni xtachuna akxni tliwakga wilaw. Uma kilhtamaku, chatum kgolotsin tlan nakinkamakgtayayan xlakata napaxuwaparayaw chu natatliwakglhparayaw. Chatum precursora tiku kgalhi 65 kata wan: «Milh kilhtamaku, nitlan xakmakgkatsi chu lu xaktlakgwan akxni xaklichuwinan Dios. Chatum kgolotsin akxilhli pi lu xaktlakgwanit chu kinkgalhskilh tuku xkiʼakgspulama. Lu tlan la kkgalhchuwinaw chu maklakaskilh tuku wan Biblia. Ktlawalh tuku kiwanilh chu tlan kinkitaxtunilh. ¡Lu kpaxtikatsini xlakata akxilhli tuku xkiʼakgspulama chu kimakgtayalh!». Akgtum tasikulunalin xlakata wilakgo lakgkgolotsin tiku lakaskinkgo pi tlan katawilaw, tiku la Abisai skgalalh wilakgo.

15, 16. 1) ¿Tuku xlakata lu xpaxkikgo Pablo natalan? 2) ¿Tuku xlakata kapaxkiyaw lakgkgolotsin xalak congregación?

¹⁵ Lu lhuwa taskujut nakamatliwakglhnikan xtakanajlakan natalan. Min kilhtamaku, lakgkgolotsin ni lhtatakgo, tlawakgo oración xlakata lakaskinkgo pi tlan katawilakgolh kskujnin Dios o akxni kamatliwakglhnikgo xtakanajlakan xnatalan (2 Cor. 11:27, 28). Pero liwana tlawakgo xtaskujutkan chu xatapaxuwan tlawakgo. Tlawakgo chuna la Pablo tiku katsokgnilh xnatalan xalak Corinto: «Xlipaks kintapaxuwan naklimakgasputa wa ntu xakkgalhilh, [...] xpalakata [milatamatkan]» (2 Cor. 12:15). Lu xkapaxki xnatalan asta wi tuku limakgxtakgli xlakata tlan xkamatliwakglhli (kalikgalhtawakga 2 Corintios 2:4; Filip. 2:17; 1 Tes. 2:8). ¡Wa xlakata xlakan lu xpaxkikgo! (Hech. 20:31-38.)

¹⁶ Xlakskujnin Dios xala uku, na lu kapaxkiyaw lakgkgolotsin xalak congregación, chu akxni tlawaniyaw oración Jehová maxkiyaw paxtikatsinit xlakata kinkamaxkinitan. Xlakata kinkakuentajtlawakgoyan tlakg paxuwayaw chu kinkamatliwakglhan akxni kinkalakgapaxialhnankgoyan. Na paxtikatsiniyaw xlakata skgalalh wilakgolh chu akxilhkgo akxni tuwa taʼakglhuwit titaxtumaw. Xlikana pi “kinkamakgtayakgoyan napaxuwayaw”.