NINA lhuwa kata titaxtunit, Roald chu Elsebeth, akgtum tamakgaxtokgat tiku namakgatsikgo 50 kata, lu xatapaxuwan xlamakgolh kʼBergen, xliʼakgtiy tlakg lanka kachikin nema wi kʼNoruega. Anta kxcongregacionkan xtawilakgolh chatiy xkamanankan, Isabel chu Fabian. Roald kgolotsin xliskujma chu Elsebeth, precursora. Isabel chu Fabian lu tlan xlichuwinankgo Dios.

Uma familia ankgolh lichuwinankgo Dios akgtum semana niku lu makgat chu ni lu xtalichuwinan Dios. Septiembre kata 2009, Roald, Elsebeth chu Fabian tiku xkgalhiya 18 kata ankgolh asta kʼNordkinn, kʼpenínsula nema tapakgsini Finnmark, kʼcírculo polar ártico. Anta wi aktsu kachikin wanikan Kjøllefjord, niku akxtum katalichuwinankgolh Dios amakgapitsi natalan tiku na anta xchankgonit kʼuma lu makgat kachikin xlakata na xlichuwinamputunkgo Dios. Roald wan: «Lu tlan xaklimakgkatsi xlakata xaklakkaxwilinit tuku kilitlawat xwanit, chu tlan xakmakgtayanalh akgtum semana kxtaskujut Dios». Pero wi tuku lalh nema tlawalh pi nila klhtatalh. ¿Tuku uma?

Roald wan: «Akit ni xakkgalhkgalhima, pero Mario, Chatum precursor xalak Finnmark, kinkakgalhskin komo xakamputunaw makgtayananaw kʼakgtum congregación nema lu xlakaskin tamakgtay xalak Lakselv, niku kaj xwilakgolh 23 tiku lichuwinankgo Dios». Roald ni katsilh la nakgalhtinan. Xla wan: «Elsebeth chu akit xaklakpuwanitaw nakmakgtayananaw niku tlakg xtalakaskin nalichuwinankan Dios. Pero ni xaklakpuwanitaw tunkun xakkaw, xaklakpuwanitaw akxni kinkamanankan nialh xkinkatatawilakgon». Pero ni lhuwa kilhtamaku xtitaxtunit akxni xaklichuwinamaw Dios niku lakgamakgat, Roald akxilhli pi umakgolh latamanin lu xkatsiputunkgo xlakata Dios. Tunkun xlakaskinkgo tamakgtay. Roald wan: «Tuku kinkgalhskilh Mario akglhuwa tsisni nila xkimalhtati». Mario kapulilh putlaw Roald chu xfamilia 240 kilómetros kxsur niku wi Kjøllefjord, xlakata xlakaskin pi xlakgapaskgolh ama aktsu congregación xalak Lakselv.

Andreas, chatum kgolotsin xalak congregación, kamasiyanilh kachikin chu niku xtamakxtumikgo. Natalan lu xatapaxuwan kamakgamakglhtinankgolh chu kawanikgolh Roald chu Elsebeth pi lu xpaxuwakgolh komo putum xfamilia xkalilh xlakata xkamakgtayakgolh nalichuwinankgo Dios. Andreas kawanilh Roald chu Fabian pi xkaputsaninita niku max tlan kskujkgolh. ¿Tuku xʼamakgolh tlawakgo?

Fabian lakpuwa: «Akit ni unu klatamaputun». Nipara tsinu xlakpuwan naʼan latama kʼakgtum aktsu kachikin chu nakamakgxtakga putum xʼamigos tiku katastakli kxcongregación. Nachuna, xtsankganijku kilhtamaku namakgalhsputu xtakgalhtawakga xlakata electricista nawan. Pero akxni Isabel, tiku xkgalhi 21 kata, kgalhskinka komo xtamakgxtakgputulh, xla kgalhtinalh: «¡Wa uma tuku xaktlawaputun!». Pero wan: «Akxni tlakg xaklakpuwan xlakata uma kiʼakstu xkinkgalhskinkan. ¿Xakkalakapastakli kiʼamigos? ¿Kilitamakgxtakgat xwanit kkincongregación, niku tlakg tlan xakwi?». Elsebeth wan: «Xakmakgkatsi pi wa Jehová tiku xkinkamaxkiman uma taskujut, pero ni xakmakgxtakgputun kinchikkan nema aku xakkaxtlawanitaw, chu putum tuku xakmastokgnitaw puxamakitsis kata».

Akxni sputli semana xlakata lichuwinankgolh Dios, Road chu xfamilia taspitkgolh kʼBergen. Maski natalan xalak Lakselv xwilakgolh max 2,100 kilómetros xlimakgat, putum kilhtamaku xkalakapastaka natalan. Elsebeth wan: «Makglhuwa xaktlawa oración chu xakkatachuwinan natalan tiku xakkalakgapaskgonitaw. Xaklamalakgachaniyaw fotos chu experiencias». Roald wan: «Xaklakaskin kilhtamaku xlakata naklakpuwan komo tlan xakkaw makgtayananaw. Nachuna kililakapastakat xwanit tuku xakliskujwi. Lhuwa xaktlawa oración chu xakkatachuwinan kifamilia chu natalan tiku tlakg tliwakga xwi xtakanajlakan». Fabian wan: «Akxni tlakg xaklakpuwan, tlakg xakakxilha pi ni xʼanan tuku xkimachokgolh. Makglhuwa ktlawalh oración, chu uma tlawalh pi tlakg xakkamputulh». Chu ¿tuku tlawalh Isabel? Precursora wa kxcongregación xlakata xlakpuwama komo xtaspitparakgolh. Akxni xtitaxtunita akgchaxan papaʼ xlakata xliskujma la precursora chu tlakg xlikgalhtawakga Biblia, xkilhtamaku xwanit xlakata natalakgpalikgo.

Xlakata lu xmakgtayanamputunkgo niku tlakg talakaskin tamakgtay, xputumkan liskujkgolh xlakata xmakgantaxtikgolh tuku xlakaskinkgo. Akgtum liʼakxilhtit, maski Roald lu tlan kxokgonikan kxtaskujut chu lu xlakgati, skilh xmaxkika talakaskin namakgxtakga xtaskujut akgtum kata. Pero xlakata xmalana ni xmakgxtakgputun, wanilh pi xʼama maxki akgtum taskujut niku kaj akgtiy semana kskujli chu akgchaxan semana xjaxli. Roald wan: «Kintatlaja nialh lu lhuwa wa, pero kimaxkika talakaskin».

Elsebeth wan: «Kinchixku kiwanilh pi xakputsalh chiki kʼLakselv chu xakrentarlilh nema xakkgalhiyaw kʼBergen. Lhuwa kilhtamaku kinkalinin chu tuwa kmakgkatsiw, pero tlan kinkakitaxtunin. Titaxtulh kilhtamaku kinkamanankan tekgskgolh taskujut niku ni tantaku kskujkgolh, la uku kinkataxokgokgoyan tuku talakaskin kchiki».

Isabel lakapastaka: «Komo kachikin niku kchaw lu aktsu, lu tuwa kmakgkatsilh xaktekgsli taskujut nema xkimaxkilh talakaskin chuntiya xaktlawalh  kimprecursorado. Lakgachunin lu tuwa xakmakgkatsi». Maski chuna, xʼakchani tumin xlakata xmakglhtinan putum taskujut niku ni tantaku kskujli, xapulana kata kgalhilh asta akgnajatsa taskujut. ¿La kitaxtunilh Fabian? Xla wan: «Xlakata xakmakgalhsputulh kiʼescuela xaklakaskin akgtum taskujut niku tlakg xakkatsinilh, chu anta ktekgsli kʼLakselv. Alistalh ktaxtucha kkiʼexamen chu ktekgsli taskujut la electricista xaʼitat kilhtamaku».

Marelius chu xpuskat Kesia na xmakgtayananputunkgo niku tlakg xtalakaskin tiku nalichuwinankgo Dios. La uku Marelius tiku kgalhi 29 kata, wan: «Entrevistas nema tamatitaxti kʼasambleas chu taʼakgchuwin xlakata precursores lu kimalakpuwanikgolh xlakata tlakg xakliskujli naklichuwinan Dios». Pero Kesia, tiku kgalhi 26 kata, lu tuwa makgkatsilh natamakgatlini xfamilia. Xla wan: «Lu xakpekuani nakkamakgxtakga tiku lu kkapaxki». Atanu taʼakglhuwit wa pi Marelius tantaku kskuja xlakata tlan kxokgotilhalh xchik. Kinkawaniyan: «Lhuwa ktlawaniw oración Jehová xlakata xaklakkaxtlawaw tuku xtalakaskin chu xlakata xkinkamaxkin tamakgtay tlan kkaw alakatanu». Tuku pulana tlawakgolh tlakg limaxtukgolh kilhtamaku xlakata nalikgalhtawakgakgo Biblia. Alistalh stakgolh xchikkan, makgxtakgkgolh xtaskujutkan chu agosto kata 2011, ankgolh latamakgo kʼAlta, kʼnorte xla Noruega, niku uku skujkgo la precursores. Xlakata nakgalhikgo tuku naliwayankgo Marelius contador chu Kesia skuja kʼakgtum pustan.

Knut chu Lisbeth, tamakgaxtokgat tiku liwaka puxamakaw kata kgalhikgo, asta kxnakujkan chalh tuku likgalhtawakgakgolh kʼAnuario xlakata natalan tiku lichuwinankgo Dios niku tlakg talakaskin tamakgtay. Lisbeth wan: «Experiencias nema klikgalhtawakgaw lu kinkamalakpuwanin. ¿Tlan xakkaw kʼatanu país? Xaklakpuwan pi nila xakmakgantaxtilh uma taskujut xlakata ni lhuwa takgalhtawakga xakkgalhi». Maski chuna, tsukukgolh liskujkgo. Knut wan: «Kstaw kinchikkan chu, xlakata nakmakiyaw tumin kkaw tawilayaw kxchik kintse. Alistalh, xlakata xakkatsiw la skujnanikan Dios kʼalakatanu kachikin, akgtum kata kmakgtayanaw kʼakgtum congregación xalak Bergen, niku chuwinankan ingles, anta ktamakgxtakgwi kxchik xtse Lisbeth». Ni lhuwa kilhtamaku titaxtulh Knut chu Lisbeth makgkatsikgolh pi tlan xʼankgolha kʼUganda, África. ¿La tlawakgo xlakata nakgalhikgo tuku namaklakaskinkgo chu chuntiya naliskujkgo la precursores? Kata kata taspitkgo kʼNoruega chu akgtiy papaʼ skujkgo.

¿La kakitaxtunikgonit umakgolh tiku lichuwinankgo Dios chu lu paxuwakgo? Roald wan: «Tlakg kkgalhiyaw kilhtamaku xlakata naktawilayaw la akgtum familia, kʼBergen nichuna xakwilaw. Tlakg tlan klatalalinaw, chu kpaxuwayaw akxni kaʼakxilhaw pi kinkamanankan tlakg tatliwakglhma xtakanajlakan». Nachuna wan: «La uku nialh lu xlakaskinka kaʼakxilhaw lhuwa tuku nakkgalhiputunaw; kaʼakxilhwi pi ni lu xlakaskinka la xaklakpuwanaw».

 Elsebeth akxilhli pi lu xlakaskinka nakatsini atanu tachuwin. ¿Tuku xlakata? Xlakata kalakgchan nalichuwinankgo Dios kʼLakselv chu kʼKarasjok, niku wilakgolh tiku chuwinankgo sami. Samis wilakgolh kxnorte Noruega, kʼSuecia, kʼFinlandia chu kʼRusia. Xlakata tlan nakatachuwinankgo latamanin alh kʼcurso niku masiyakan uma tachuwin, la uku katsiniya tsinu katachuwinan. ¿La kitaxtunima niku lichuwinan Dios? Lu xatapaxuwan wan: «Kgalhchaxan tiku kkamakgalhtawakgema. ¡Nipara klakpuwan pi alakatanu niku xaktawilalh!».

La uku, Fabian precursor chu siervo ministerial. Xla chu xtala Isabel, kamakgtayakgolh kgalhtutu kamanan tiku xlakaskinkgo tamakgtay xlakata tlakg xatapaxuwan kskujkgolh kcongregación. La uku uma kgalhtutu kamanan lichuwinankgo Dios. Chatiy tamunukgolh chu liskujkgolh la precursores auxiliares marzo kata 2012. Chu tsumat kapaxtikatsinilh Isabel chu Fabian xlakata lu makgtayakgolh. Fabian wan: «Chalh kkinaku xtachuwin. ¡Lu tlan limakgkatsikan akxni tlawakan tuku tlan xpalakata amakgapitsin!». Isabel wan: «Kʼuma niku klichuwinama Dios kmakgkatsinit tuku wan Salmo 34:8: “kalikxilhtit xlakata nakatsiyatit la ixlitlan katsi” Jehová». Chu nawan: «Nachuna, ¡skujkan unu lu lipaxuwakan!».

Marelius chu Kesia ni lhuwa tuku kgalhikgo, pero lu lhuwa tuku kamakgapaxuwa; akgtum liʼakxilhtit, congregación nema wi kʼAlta, niku ankgolh tawilakgo, la uku wilakgolha 41 tiku lichuwinankgo Dios. Marelius wan: «Akxni kaʼakxilhaw putum tuku ktlawanitaw lu klipaxuwayaw xlakata lu talakgpalinit kilatamatkan. Kpaxtikatsiniyaw Jehová xlakata kskujnanimaw la precursores unu. Ni anan atanu tuku tlakg xkinkamakgapaxuwan». Chu Kesia na wan: «Kkatsinilh naklipawan Jehová putum kinaku, chu xla lu liwana kinkakuentajtlawanitan. Na kakxilhli pi komo ni akxtum xakkatawi kimparientes lu xakpaxuwayaw akxni makgatunu xaklaʼakxilhaw. Nipara tsinu klakpuwan pi nitlan tuku ktlawaw».

¿La kakitaxtunima Knut chu Lisbeth kʼUganda? Knut wan: «Lilh kilhtamaku klismaniw niku kchaw. Lakgachunin kpakatsanaw chu ni lu anan chuchut chu luz, pero lhuwa tiku kkamakgalhtawakgeyaw». Lisbeth wan: «Kaj itat hora xlimakgat niku kwilaw, wilakgolh kachikinin niku nikxni lichuwinankanit Dios. Akxni kchaw, kkatekgswi latamanin tiku likgalhtawakgakgo Biblia chu kinkawanikgoyan pi nakkamakgalhtawakgeyaw. Lu lhuwa klipaxuwayaw akxni kkamasiyaniyaw latamanin tiku tlakg katsiniputunkgo xlakata Dios».

Liwana katsiyaw pi kiMalanakan Jesucristo, lu lipaxuwa akxni akxilha taskujut nema matsukilh chu kalakgchama latamanin tiku lu makgat wilakgolh. Chu putum xkachikin Dios lu lipaxuwakgo akxni xatapaxuwan skujkgo, xlakata nakgalhakgaxmatkgo xlimapakgsin Jesús akxni wa «kapitit, na kamasiyunikgotit xlipaks akgmakgat chixkuwin» (Mat. 28:19, 20).