1, 2. ¿Tuku guerra nema xaxlikana talakatsuwima, chu tuku ni natlawakgo xlakskujnin Dios akxni namin?

KATSISNI 30 xla octubre kata 1938, lhuwa millón latamanin xla Estados Unidos xkgaxmatkgolh kradio akgtum programa. Uma programa nema tamatitaxtilh xlichuwinana akgtum novela xla ciencia ficción nema xwanikan La guerra de los mundos. Tiku xmatitaxtikgo uma novela xlichuwinankgo pi xchinkgo unu kKatiyatni makgapitsi tiku xalak Marte xʼakgchipakgo chu malakgsputukgo putum tuku xwi kkatiyatni. Maski xwankanit pi uma ni xaxlikana lhuwa latamanin xlakpuwan pi uma xaxlikana xwanit chu pekuankgolh. Makgapitsin wi tuku tlawakgolh xlakata marcianos nitu xkatlawanikgolh.

² La uku, talakatsuwima akgtum lanka guerra. Chu uma xlikana. Pero latamanin nitu tlawamakgo xlakata nalakgtaxtukgo. Uma guerra nema talichuwinanit kxTachuwin Dios, Biblia, ni kʼakgtum novela xla ciencia ficción. Uma guerra wanikan Armagedón niku Dios nakatalatlawa uma nixatlan kakilhtamaku (Apoc. 16:14-16). Akxni nala uma guerra xlakskujnin Dios ni natalachipanankgo, pero kaks nalilakawankgo xlakata tuku nala chu xlakata la Dios namasiya xlitliwakga.

3. ¿Tuku naʼakxilhaw chu tuku xlakata kilikatsitkan?

³ Anta kZacarías capítulo 14 tatsokgtawilanit tuku talichuwinan xlakata guerra xla Armagedón. Maski max tsokgka liwaka akgtiy mil akgkitsis ciento kata, lhuwa tuku nakgantaxtu kkilatamatkan (Rom. 15:4). Lhuwa tuku xwankanit pi xʼama la kgantaxtulh xlakata tuku titaxtulh xkachikin Dios lata kata 1914, akxni xTamapakgsin Mesías tawilalh kʼakgapun, chu tuku aku nala. Pulaktiy tuku lichuwinan wa «lanka kaxtum» chu «chuchut xla latamat» (Zac. 14:4, 8). Xlakskujnin Jehová maklakaskinaw uma niku kaxtum xlakata nalitamakgtayayaw. Chu akxni akgatekgsaw tuku  kilhchanima chuchut, ni kajwatiya lakpuwanaw pi xlakaskinka nawayaw, xlikana waputunaw. lu nalitamakgtayayaw komo kuenta natlawayaw uma tuku wankanit pi nala (2 Ped. 1:19, 20).

4. 1) ¿Tuku kilhtamaku tsukulh «xkilhtamaku nkimpuchinakan» Jehová? 2) ¿Tuku tsukukgolh lichuwinankgo kskujnin Jehová kkata 1914, chu tuku tlawakgolh tiku xpulalinkgo kachikinin?

⁴ Tuku litsuku capítulo 14 xla Zacarías lichuwinan «xkilhtamaku nkimpuchinakan» Jehová (kalikgalhtawakga Zacarías 14:1, 2). ¿Tuku uma kilhtamaku? «Xkilhtamaku nkimPuchinakan» tsukulh akxni «limapakgsin xala katuxawat xlimapakgsin wanit nkimPuchinakan [Jehová chu xla], nCristo» (Apoc. 1:10; 11:15). ¿Tuku kata chuna lalh? Kkata 1914 akxni tsukulh mapakgsina Mesías kʼakgapun. Akxni lhuwa kata xtsankga xtatayananin Jehová tsukukgolh lichuwinankgo «kilhtamaku nema lilhkawilikanit naciones» o xkilhtamaku tiku ni judíos xʼama kgalhsputkgo kkata 1914 chu ama kilhtamaku lhuwa taʼakglhuwit chuna la nikxni tawilanit (Luc. 21:24, TNM). ¿Tuku tlawakgolh kachikinin? Ni kuenta tlawakgolh uma tamakatsin, políticos chu tiku xpulalinkgo takanajla wata tsukukgolh nitlan lichuwinankgo chu kaputsastalanikgo kstalaninanin Cristo tiku kalaksakkanit naʼankgo kʼakgapun. Pero kaj nitlan xwanimakgo Dios tiku kgalhi putum litliwakga, xlakata tiku kalaksakkanit naʼankgo kʼakgapun namakgtanukgo Tamapakgsin xla Mesías, nema nawanikan «Jerusalén xalak akgapun», chu la uku tlawamakgo tuku lakgchan uma Tamapakgsin (Heb. 12:22, 28).

5, 6. 1) Chuna la wa Zacarías, ¿tuku tlawakgolh kachikinin «xkachikin» Dios chu «tiku makgtapakgsikgo»? 2) ¿Tiku kilhchanima «tiku xʼakgataxtukgonit xlakata kachikin»?

⁵ Zacarías xlichuwinanita tuku tlawakgolh kachikinin. Xla tsokgli: «Kachikin [Jerusalén] na akgchipakan». «Kachikin» kilhchani Limapakgsin Mesías xla Dios. «Tiku makgtapakgsikgo» wa kstalaninanin Cristo tiku kalaksakkanit xlakata naʼankgo kʼakgapun chu wilakgolhku kkatiyatni (Filip. 3:20). Akxni lalh xaPulana Guerra Xlikalanka Kakilhtamaku, akgchipaka «kachikin» akxni makgapitsi kstalaninanin Cristo tiku xpulalinkgo xkachikin Jehová kKatiyatni kachipaka chu katamaknuka kpulachin kʼAtlanta, (Georgia, Estados Unidos). “Kgalhanankgoka kchiki” akxni uma kstalaninanin Cristo chu makgapitsi natalan kachipaka maski nitu xtlawakgonit chu lhuwa tuku nitlan katlawanika. Nachuna tiku katlawanikgolh tuku nitlan, ni mastakgolh talakaskin xmakgpitsikgolh xlekgalhtawakgakan chu xmachokgoputunkgo la xlichuwinamaka xTamapakgsin Dios. Litaxtukgolh la xkakgalhanika tuku xkgalhikgo.

⁶ Maski skujnin Dios ni lhuwa xwankgonit chu kalimawakamaka taʼakgsanin, kalakgmakganka chu kaputsastalanika, tiku xtalatlawananin nila malakgsputakgolh xaxlikana takanajla, xlakata wilakgolh kstalaninanin Cristo tiku naʼankgo kʼakgapun chu nikxni makgxtakgkgo Dios. Uma «tiku xakgataxtukgonit» ni mastakgo talakaskin «nakatamakxtukan kʼkachikin».

7. ¿Tuku tlan liʼakxilhtit kinkawilinikgon xtatayananin Jehová tiku naʼankgo kʼakgapun?

⁷ ¿Kgantaxtulh putum nema xlichuwinankanit akxni sputli xaPulana Guerra Xlikalanka Kakilhtamaku? Ni, xlakata kachikinin chuntiya xʼamakgolh tlawanikgo tuku nitlan kstalaninanin Cristo tiku naʼankgo kʼakgapun chu xcompañeros tiku kgalhkgalhimakgolh nalatamakgo putum kilhtamaku kKatiyatni (Apoc. 12:17). Kalakapastakwi, pi xkachikin Dios lu putsastalanika xliʼAkgtiy Guerra Xlikalanka Kakilhtamaku. Tiku nikxni makgxtakgolh Dios kinkamakgtayayan  xlakata natayaniyaw putum taʼakglhuwit, la taputsastalanit, xla familia tiku ni kgalhtawakgakgo, tiku kataskujaw, tiku kataʼanaw kʼescuela (1 Ped. 1:6, 7). Maski kaniwa niku wilakgolh xaxlikana kstalaninanin Cristo liwana lakkaxwilikgonit «mimpalakatakan mpi akgstitum wilatit» chu «na ni tu tilipikuanikgoyatit ntalatlawananin» (Filip. 1:27, 28). Pero ¿niku tlan natamakgtayakgo xtatayananin Jehová kakilhtamaku niku ni kakxilhputunkan? (Juan 15:17-19.)

8. 1) ¿Tuku kilhchanima akxni Biblia lichuwinan sipi? 2) ¿Tuku kilhchanima «sipi nema wanikan olivos»?

⁸ «Kachikin», Jerusalén, kilhchanima xTamapakgsin Dios, «chu sipi nema wanikan Olivos, nema wi kxlakatin Jerusalén», na wi tuku kilhchanima. ¿Tuku kilhchanima uma lanka sipi? ¿Tuku xlakata «kxitat natalakgskgay» chu akgtiy sipi nawan? ¿Tuku xlakata Jehová wan “kisipi”? (Kalikgalhtawakga Zacarías 14:3-5.) Akxni Biblia lichuwinan sipi minkilhtamaku kilhchani tamapakgsin. Chu xsipi Dios kilhchani tasikulunalin chu tamakgtay (Sal. 72:3; Isa. 25:6, 7). Wa xlakata «sipi nema wanikan Olivos», niku Dios wi, kilhchani pi wa lakgchan namapakgsinan xlikalanka kakilhtamaku.

9. ¿Tuku xlakata wanaw pi «sipi nema wanikan Olivos» tapitsilh?

⁹ ¿Tuku xlakata wanaw pi «sipi nema wanikan olivos» xʼama tapitsi? Uma sipi nema xwi kʼeste Jerusalén, tlan nawanaw pi tapitsilh xlakata Jehová wililh xasasti tamapakgsin: wa Tamapakgsin xla Mesías. Uma xliʼakgtiy tamapakgsin na xla Dios, maski xla makamaxki napulalin Jesucristo. Wa xlakata, akxni sipi «nema wanikan Olivos» tapitsi chu akgtiy sipi litaxtukgo, Jehová kawani «kisipi» (Zac. 14:4, nota; 14:5). Pero uma akgtiy sipi xla Dios.

10. ¿Tuku kilhchanima «lanka kaxtum» nema tasiyalh xlakstipan laklanka sipi?

¹⁰ Akxni «sipi nema wanikan Olivos» pulaktiy tapitsi, akgtum tawila knorte chu atanu ksur. Xtantun Jehová wilakgolh xʼakgspun uma akgtiy sipi chu akgtum «lanka kaxtum» tsukulh tawila. ¿Tuku kilhchani uma lanka kaxtum? Kilhchanima la Jehová kinkakuentajtlawayan, tlan tekgsaw niku tamakgtay kxTamapakgsin Dios chu xla xKgawasa. Jehová kinkawaniyan pi nikxni namalakgsputukan xaxlikana takanajla. ¿Tuku kilhtamaku tapitsilh «sipi nema wanikan Olivos»? Uma lalh akxni xTamapakgsin Mesías takaxtawi akxni sputli xkilhtamakukan tiku ni judíos xwankgonit kkata 1914. ¿Chu tuku kilhtamaku skujnin Dios tsukukgolh tatsekgkgo kʼuma «lanka kaxtum»? Kaʼakxilhwi.

11, 12. 1) ¿Tuku kilhtamaku tsukuka ankan lanka kaxtum xla Jehová? 2) ¿Tuku masiya pi xlitliwakga Jehová makgtaya xkachikin?

¹¹ Jesús kawanilh kstalaninanin: «Nakaxkajnikgoyan xlipaks ntachixkuwitat nkaj xpalakata kintukuwani» (Mat. 24:9). Kkata 1914 tsukulh awatiya kilhtamaku chu tlakg nialh kaʼakxilhputunkan xlakskujnin Dios. Xapulana Guerra Xlikalanka Kakilhtamaku tiku ni xkaʼakxilhputunkgo kstalaninanin Cristo tiku kalaksakkanit naʼankgo kʼakgapun chu chuna la akxilhwi makgapitsi katamaknuka kpulachin. Maski chuna nila malakgsputuka xaxlikana takanajla xlakata kkata 1919 uma katamakxtuka. Akxni chuna lalh xkachikin Dios lakgtaxtulh xmakan Babilonia xaLanka, uma kilhchani putum ni xaxlikana takanajla xala kakilhtamaku (Apoc. 11:11, 12). * Wa akxni tsukuka ankan niku lanka kaxtum nema wi xlakgstipan xsipi Jehová.

¹² Uma kata, lanka kaxtum chuntiya  kamakgtakgalhma tiku xlikana kanajlanikgo Dios. Uma akglhuwa kata nema titaxtunita xtatayananin Jehová ni kamaxkikan talakaskin nalichuwinankgo xtachuwin Dios chu namakgpitsikgo likgalhtawakga nema takilhtinit kBiblia. Pero maski katuwa tuku natlawakgo kachikinin, ni katimalakgsputukgolh xaxlikana takanajla. Xlitliwakga Jehová namakgtaya xkachikin (Deut. 11:2).

13. ¿La putsayaw tamakgtay klanka kaxtum xla Jehová, chu tuku xlakata xlakaskinka natawilayaw anta?

¹³ Komo lakatsu natawilaniyaw Jehová chu ni namakgaxtakgaw xaxlikana, xla chu xKgawasa, Jesucristo, nakinkamakgtayakgoyan. Dios ni katimastalh talakaskin wi tuku natlawa natamakgatliniyaw (Juan 10:28, 29). Jehová kinkamakgtayaputunan xlakata ni namakgatsankgananiyaw xtamapakgsin chu xTamapakgsin Mesías. Chu xlakata lanka talakgaputsit lakatsu wi lu xlakaskinka pi nikxni namakgxtakgaw lanka kaxtum xla Jehová.

14, 15. ¿Tuku nakaʼakgspula tiku ni natawilakgo lanka kaxtum xla Jehová akxni nakatalatlawa xtalatlawananin?

¹⁴ Asta akxni nasputa uma kakilhtamaku, Satanás tlakg namaliwaka la nakaputsastalani xkachikin Jehová. Pero namin kilhtamaku akxni xaʼawatiya nakatalatlawa, akxni «Jehová nakatalachipa» tiku ni akxilhputunkgo. Ama kilhtamaku liwana natasiya pi Tiku Lakgchan naMapakgsinan xlikalanka kakilhtamaku lu tliwakga guerrero (Zac. 14:3).

¹⁵ Pero ¿tuku nakaʼakgspula tiku ni natamakgxtakga xalanka kaxtum xla Jehová? Biblia wan pi «ni kitiʼanalh xkgakganat» xpalakatakan, uma wamputun ni katikgalhikgolh xtasikulunalin Dios. Nachuna, uma tuku xwankanit pi nala wan pi «kawayu, mula, camello chu burro chu putum amakgapitsi animales», tuku limaklakaskinkgo latamanin xlakata natlawakgo guerra, natacongelarlikgo uma kilhchani pi nialh nakamaklakaskinkan xlakata natalatlawanankan. Nachuna Jehová namaklakaskin «tuku nitlan» o tajatat. Komo chuna nala o ni, uma natlawa pi kaks nalilakawankgo xtalamakgasitsin. Uma kilhtamaku, lakgastapu chu simakgat tiku natalatlawanankgo «namaskgo». ¿La chuna nala? Xlakata nila tuku natlawanikgo Dios xlakata tuku nawankgo o tuku natlawakgo (Zac. 14:6, 7, 12, 15). Xlikana pi Satanás nakgalhi kKatiyatni lhuwa soldados xlakata natlawakgo guerra, pero maski kaniwa niku natawilakgo, Jehová nakamalakgsputu (Apoc. 19:19-21). Chuna nala la wan Jeremías 25:32, 33: «Chu tiku nakamakgni Jehová ama kilhtamaku natawilakgo xlikalanka katiyatni».

16. Xlakata talakatsuwima xkilhtamaku Jehová, ¿tukuya takgalhskinin nakinkatlawanikanan chu tuku talakaskin natlawayaw?

¹⁶ Kʼguerra putum patinankgo asta tiku tlajanankgo. Wilakgolh latamanin tiku makgatsankgakgo xchikkan, tuku kgalhikgo chu asta tuku kalakgchan. Putum latamanin ni kkgalhikgo tuku maklakaskinkgo chu lhuwa ni kgalhikgo tuku nawakgo. Komo chuna nakinkaʼakgspulayan akxni natawila lanka takatsanajwa ¿tuku natlawayaw? ¿Napekuanaw? ¿Namakgxtakgaw kintakanajlakan komo nakinkaputsastalanikanan? ¿Namakgatsankgayaw kintakgalhkgalhinkan chu nalilipuwanaw? Xlakata ni chuna nakinkaʼakgspulayan, lu xlakaskinka pi natamakgxtakgaw lanka kaxtum xla Jehová chu nalipawanaw pi nakinkalakgmaxtuyan (kalikgalhtawakga Habacuc 3:17, 18).

17, 18. 1) ¿Tuku kilhchanima «chuchut xla latamat»? 2) ¿Tuku kilhchanima «pupunu xla oriente» chu «pupunu xla occidente»? 3) ¿Tuku lakapastaknita natlawaya wix?

¹⁷ Akxni titaxtunita nawan Armagedón,  «chuchut nema masta latamat» chuntiya lhuwa nataxtu Xtamapakgsin Mesías. ¿Tuku kilhchani uma chuchut? Putum tuku Jehová kinkamaxkiyan xlakata nakgalhiyaw latamat nema ni kgalhi xlisputni. ¿Chu tuku kilhchani pupunu nema lichuwinankanit? «Pupunu xla oriente» kilhchanima mar Muerto, chu «pupunu xla occidente» kilhchanima mar Mediterráneo. Chu akgatunu pupunu kilhchani tanu tanu latamanin. Mar Muerto kilhchanima latamanin tiku nikgonitta chu nakamalakastakwanikan. Chu mar Mediterráneo limasiya latamat, chu lu tlan pi limaklakaskinka xlakata nakalimasiyakan «lhuwa latamanin» tiku nalakgtaxtukgo kʼArmagedón (kalikgalhtawakga Zacarías 14:8, 9; Apoc. 7:9-15). Akxni uma pulaktiy grupo nalikgotnankgo «nkgalhtuchokgo nchuchut xla latamat», nalakgtaxtukgo linin nema Adán kamaxkilh (Apoc. 22: 1, 2).

¹⁸ Xlakata Jehová nakinkakuentajtlawayan nalakgtaxtuyaw akxni namasputukan uma nixatlan kakilhtamaku chu tlan natanuyaw kxasasti xkakilhtamaku Dios. Wa xlakata, maski putum kachikin nakinkasitsinikgoyan, ni kamakgxtakgwi xTamapakgsin Dios, kaputsaw tamakgtay lanka kaxtum xla Jehová chu anta katamakxtakgwi.