1, 2. 1) ¿Tuku xwanit «xchik David», chu la xʼamaka lakkaxtlawaparakan? 2) ¿Tiku akxtum skujnikgo Dios la uku?

KATA 49 tiku xpulalinkgo kstalaninanin Cristo tlawakgolh akgtum lu xlakaskinka tamakxtumit kJerusalén. Santiago wa: «Lichuwinanit Simón [Pedro] lantla Dios nkatsiya ukxilhlakachanikgolh xakgmakgat chixkuwin lakimpi wa yama ntachixkuwitat, na wa naliyankgoy xtukuwini. Pus wa yuma na kimalakgchaniy xtachuwinkan xpalakachuwinanin Dios, xtachuna lantla ntatsokgnit, wan: “Akxni ntitaxtunitta nawan yuma, nakmimpalaj, na nakkaxtlaway xchik David ntu nta[le]kgalhinit, chu nakkaxtlaway xapatsaps ntu akgataxtunit, na nakyawapalay. Lakimpi wa xlipaks amakgapitsin nchixkuwin naliputsakgoy nkimPuchinakan, chu xlipaks xakmakgat chixkuwin nti liyankgoy nkintukuwini. Chuna wan nkimPuchinakan nti makatsininanit xlipaks yuma nkatuwaj”» (Hech. 15:13-18).

² Tuku xlichuwinanit palakachuwina Amós nema Santiago na wa «xchik [o xcabaña] David»: putum xkamanan. Uma talakxtlawalh akxni Sedequías nialh mapakgsina litaxtulh (Amós 9:11). Pero Jesús xʼama kaxtlawapara «xchik» David, chatum xkgawasa tiku putum kilhtamaku namapakgsinan (Ezeq. 21:27; Hech. 2:29-36). Kʼuma tamakxtumit Santiago lichuwinalh xlakata kamamakgstokgkan tiku namakgamakglhitinankgo xTamapakgsin Dios, judíos chu tiku ni judíos, tsukulh kgantaxtu uma tuku xwankanit. La uku kstalaninanin Cristo tiku kalaksakkanit naʼankgo kʼakgapun tiku wilakgolhku kkatiyatni chu lhuwa millón nema litaxtukgo «atanu borregos» xla Jesús akxtum lichuwinankgo tuku xaxlikana masiya Biblia la xlakskujni Jehová (Juan 10:16).

3, 4. ¿Tuku kamakgtayalh xkachikin Dios xlakata ni kxlajwanalh xtakanajlakan akxni xwilakgo kBabilonia?

³ Akxni judíos kachilinka kBabilonia, liwana tasiyalh pi  «xchik David» xlakanit. Xlakan chankgolh akgtum kachikin niku xlitsama ni xaxlikana takanajla chu xlakan anta tawilakgolh tutumpuxamakaw kata, lata kata 607 asta 537 akxni nina xmin Jesús. ¿Tuku kamakgtayalh xlakata tliwakga xtawi xtakanajlakan? Watiya tuku kamakgtaya la uku xkachikin Dios kkakilhtamaku nema Satanás akgchipanit: tuku makglhtinanitaw xlakata kintakanajlakan (1 Juan 5:19).

⁴ Biblia na makgtanu tuku makglhtinanitaw xlakata kintakanajla. Xlikana judíos tiku xkachilinkanit kBabilonia ni xkgalhikgo xatakgatsin xTachuwin Dios pero xkgalhikgo xLimapakgsin Moisés nema xkgalhi Akgkaw Limapakgsin. Na xlakgapaskgo «xtakilhtlin Sión» chu tuku tlawakgolh xlakskujnin Dios xala makgasa. Na, tlan xlakapastakkgolh lhuwa proverbios. Wa xlakata ni kaks lilakawanaw xlakata xtasakgo akxni xlakapastakkgo Sión, chu putum kilhtamaku xlakapastakkgo Jehová (kalikgalhtawakga Salmo 137:1-6). Tuku xmakglhtinankgonit xlakata xtakanajla kamakgtayalh lakatsu natawilanikgo Jehová maski kBabilonia xʼanan lhuwa nitlan tamasiyat.

5. ¿Tuku litasiya pi takanajla xla Trinidad xwi kBabilonia chu kʼEgipto?

⁵ Wa takanajla xla Trinidad lu xtalakgatuminit kBabilonia. Anta kBabilonia takanajla xla Trinidad xkakninanikan Sin (dios xla Papaʼ), Shamash (xdios Chichini), chu Ishtar (diosa xla talakgxtumit chu guerra). Kxamakgan Egipto, xkakninanikgo familias niku xʼanankgo chatutu dios nema xkgalhi xatlat, xatse chu xakgawasa. Obra nema wanikan Mitología General wan pi egipcios xmakgtanukgo «tuku lilakgapaskan trinidad xla dioses, niku xatlat, ni putum kilhtamaku xlitaxtu tiku xapuxku, xlakata tiku xapuxku dios xapuskat, uma dios kaj príncipe xlitaxtu». Anta kʼEgipto xwi akgtum Trinidad, dios Osiris, diosa Isis chu Horus, xkgawasa.

6. ¿Tuku Trinidad, chu la kinkamakgtayakanitan xlakata ni nakanajlaniyaw uma nixaxlikana tamasiy?

⁶ Tiku kaj wankgo pi kstalaninanin Cristo na kanajlakgo: Trinidad. Tiku pulalinkgo uma takanajla masiyakgo pi xaTlat, xaKgawasa chu espíritu santo kaj chatum Dios. Pero uma tamasiy tlawa pi nalakpuwankan pi Jehová ni kgalhi litliwakga xlakata xlitliwakga pulaktutu makgpitsikan. Pero xkachikin Jehová ni kanajlakgo uma nixaxlikana tamasiy, kanajlakgo uma tachuwin: «Kakgaxpatti, oh Israel: Jehová kiDioskan xman chatum Jehová» (Deut. 6:4). Xlakata Jesús limaklakaskilh uma tachuwin, ¿tuku xlakata xaxlikana kstalaninanin Cristo xʼama lakgpalikgo uma? (Mar. 12:29.)

7. ¿Tuku xlakata Dios ni makgamakglhtinan xtamakamastan chu xtamunut chatum lataman tiku kanajla Trinidad?

⁷ Jesús kawanilh kstalaninanin: «Kapitit, na kamasiyunikgotit xlipaks akgmakgat chixkuwin, chu nalimunukgotit kxtukuwini xaTlat, chu kxtukuwini xaKam, chu kxtukuwini Spiritu Santo» (Mat. 28:19). Tamasiy xla Trinidad ni tatalakxtumi uma limapakgsin. Xlakata wi tiku tlan namunukan la xaxlikana kstalaninanin Cristo, chu xtatayana Jehová talakaskin nakatsi pi tlakg tliwakga xaTlat, Jehová chu tuku lakgaya chu limapakgsin nema kgalhi xaKgawasa, Jesús. Na xlikanajlat pi espíritu santo wa xlimakgatliwakga Dios, chu ni litaxtu chatum dios xla Trinidad (Gén. 1:2). Chatum lataman tiku kanajlani Trinidad nila tamunu chu nalimasiya pi xlikana skujnaniputun Dios. ¡Lu lipaxuwayaw xlakata kintakanajlakan kinkamakgtayayan ni namaxkajwaniyaw xtamasiyat Dios!

8. ¿Tuku xkanajlakgo babilonios xlakata dioses chu demonios?

⁸ Takanajla xalak Babilonia xlitsama ni xaxlikana tamasiy, dioses, demonios chu taskuwan. Libro Historia Religionum. Manual de Historia de las religiones, «babilonios xkanajlakgo pi putum tuku wi kʼakgapun xlitsama dioses chu espíritus, makgapitsi tlan xlikatsikgo  chu makgapitsi lixkajni xlikatsikgo. [...] Putum tajatat xlimawakakgo uma demonios [...]. Xtalakaskin xkatamakxtuka kʼuma tajatat chu wi tuku xlimaklakaskinkgo, ritos chu exorcismo [...]. Uma demonios lu xmakgtanukgo klatamat, na chuna wanaw xlakata textos xla magia nema xmaklakaskinkan xlakata nakatalatlawakan».

9. 1) Akxni taxtukgolh kBabilonia, ¿la litasiyalh pi lhuwa judíos xkanajlakgo tamasiy xla nixaxlikana takanajla? 2) ¿La kinkamakgtayayan Jehová xlakata nitu nakinkatlawanikgoyan demonios?

⁹ Akxni taxtukgolh kBabilonia, lhuwa judíos tsukukgolh kanajlakgo ni xaxlikana tamasiyat. Chuna la tamasiyat xla griegos xtalakgatumima kkakilhtamaku, tsukukgolh kanajlakgo pi ni putum demonios ni tlan xlikatsikgo, pi xwilakgo tiku tlan xlikatsikgo chuna mastakgolh talakaskin xkaʼakgchipakgolh. Pero tuku makglhtinanitaw xlakata kintakanajlakan kinkamakgtayayan xlakata demonios nitu nakinkatlawanikgoyan xlakata katsininitaw pi Dios nitlan akxilhli taskuwan nema xtatlawa kBabilonia (Is. 47:1, 12-15). Akxni kgaxmataw tuku Dios wan xlakata taskuwan kinkamakgtayayan (kalikgalhtawakga Deuteronomio 18:10-12 chu Apocalipsis 21:8).

10. ¿Tuku tlan wanaw xlakata xtalismanin chu tuku kanajlakgo Babilonia xaLanka?

¹⁰ Taskuwan ni kajwatiya xtlawakgo babilonios xala makgasa, nachuna tiku makgtayakgonit Babilonia xaLanka, uma kilhchanima putum ni xaxlikana takanajla xalak uma kakilhtamaku (Apoc. 18:21-24). Maktum libro masiya pi «Babilonia [xaLanka] ni kaj akgtum lanka kachikin o kaj pulaktum tuku lismanikan. Tlakg lilakapaskan xlakata lu kakninanikgo ídolos ni xawa niku tapakgtay tuku mapakgsi» (The Interpreterʼs Dictionary of the Bible, vol. 1, pág. 338). Babilonia xaLanka litatsamanit taskuwan, lu kakninanikan ídolos chu atanu talakgalhin, chuntiyaku wi pero nialh lhuwa kilhtamaku namakgapala (kalikgalhtawakga Apocalipsis 18:1-5).

11. ¿Tukuya tastakyaw xlakata taskuwan taxtukgonit kkilikgalhtawakgakan?

¹¹ Akgtum kilhtamaku Jehová wa: «Akit ni klakgati nalimaklakaskinatit litliwakga xla magia» (Is. 1:13). Taskuwan, nema na xwanikan espiritualismo, lhuwa xtlawakan ksiglo XIX. Wa xlakata artículo xla Revista Zionʼs Watch Tower (La Torre del Vigía de Sión) xla mayo kata 1885 xwa: «Takanajla pi akxni wi tiku niy an alakatanu ni aku lakatsukunit; xamakgan takanajla lakatsukulh chu wa tuku kanajlakgo putum ni xaxlikana takanajla». Uma revista na xwan pi ni xaxlikana tamasiyat xlakata tiku nikgonit tlan tachuwinankgo tiku lamakgolhku, «akgtlapakgonit chu makgtayanikgonit demonios, nema kaʼakgskgawikgonit latamanin xlakata xlakpuwankgo pi uma espíritus tlan xlikatsikgo. Demonios liwana limaklakaskinkgonit uma xlakata namatsekgkgo tuku xlikana tlawakgo chu chuna tlan kaʼakgskgawikgonit lhuwa latamanin». Folleto What Say the Scriptures About Spiritism? (¿Tuku wan Biblia xlakata taskuwan?), nema alistalh taxtulh, na watiya tastakyaw xlimin. Chu likgalhtawakga nema uku kgalhiyaw na kinkawanikgoyan la taskuwan kinkatlawaniyan tuku nitlan.

12. Xlakata tuku Dios malakpuwanilh, ¿tuku wa Salomón xlakata tiku nikgonitta?

¹² «Xlipaks nti lakgapaskgonit ntalulokgtat» katsikgo la wilakgo tiku nikgonit (2 Juan 1). Wa xlakata nachuna lakpuwanaw la Salomón tiku wa: «Tlakg tlan tantum chichi xastakna ni xawa tantun león xanin. Xlakata wantiku staknankgo liwana katsikgo pi nanikgo, pero wantiku nikgonit, xlakan nialh tuku katsikgo [...]. Putum tuku tlan litlawaya mimakan, katlawa, xlakata ni anan taskujut chu nituku lay lakkaxwilikan talakapastakni chu nipara takatsin nipara liskgalala anta Seol [niku kamaknukan latamanin akxni nikgo] niku pimpat» (Ecl. 9:4, 5, 10).

13. ¿Tuku tlawalh pi judíos xkanajlakgolh tuku xkanajlakgo griegos?

¹³ Judíos liwana xkatsikgo la wilakgolh tiku  nikgonitta. Pero akxni Grecia mapitsikgolh xgenerales Alejandro Magno, tlawaputunka pi Judá chu Siria akxtum tuku xkanajlakgolh chu xlikatsikgolh la griegos. Xlakata uma, judíos tsukukgolh kanajlakgo tuku nixaxlikana takanajla, pi latamanin kgalhikgo akgtum espíritu nema ni niy chu pi anan niku kamapatinikan. Tamasiyat pi wi niku kamapatinikan tiku nikgonit ni malakatsukikgolh Griegos. Babilonios xkanajlakgo pi «xʼanan akgtum pupatin [...] niku lhuwa tuku xalixkajni xʼanan chu niku xmapakgsinankgo dioses tiku nitlan likatsikgo, demonios, tiku lu lakgtliwakga chu laklixkajni likatsikgo» (The Religion of Babylonia and Assyria). Liwana tasiya pi kBabilonia xkanajlakan pi wi tuku kgalhiyaw nema ni niy.

14. ¿Tuku xkatsikgo Job chu Abrahán xlakata tiku ninita chu xlakata talakastakwanat?

¹⁴ Maski Job ni xkgalhi xTachuwin Dios, xkatsi tuku xaxlikana xlakata akxni nikan. Na xkatsi pi Jehová chatum Dios xapaxkina chu xmalakastakwaniputun (Job 14:13-15). Abrahán na xkanajla ktalakastakwanat (kalikgalhtawakga Hebreos 11:17-19). Uma xlakskujnin Dios ni xkanajlakgo pi xkgalhikgo tuku ni niy, xlakata nila malakastakwanikan tiku nina niy. Max xʼespíritu santo Dios makgtayalh Job chu Abrahán xʼakgatekgskgolh la wilakgolh tiku nikgonit chu xkanajlakgolh talakastakwanat. Uma na wa tuku xaxlikana katsiyaw xlakata kintakanajlakan.

15, 16. ¿La kinkalakgmaxtukanitan talakgalhin chu klinin?

¹⁵ Akinin paxtikatsiniyaw Dios xlakata kinkamasiyaninitan tuku tlawanit xlakata kinkalakgmaxtunitan talakgalhin chu linin nema kinkamakgxtakgnin Adán (Rom. 5:12). Katsiyaw pi Jesús «limilh [...] namakgtayakgoy amakgapitsin, chu na namasta xlatamat nalilakgmaxtukgo xlilhuwa ntachixkuwitat» (Mar. 10:45). Lu tlan xlakata katsiyaw «mpi lakgalhamankgokan wa xpalakata lantla lakgmaxtukgolh nCristo Jesús» (Rom. 3:22-24).

¹⁶ Siglo I, tiku judíos chu tiku ni judíos xtalakaskin xlakgmakgankgolh xtalakgalhinkan chu xlimasiyakgolh pi xkanajlakgo xtamakamastan Jesús. Komo ni chuna xtlawakgolh, nila xkatapatika. La uku nachuna (Juan 3:16, 36). Komo wi tiku kanajla tuku ni xaxlikana, la Trinidad o pi wi tuku kgalhiyaw nema ni niy, nila litamakgtaya talakgmaxtut. Pero akinin tlan litamakgtayayaw, xlakata katsiyaw tuku xaxlikana xlakata xKgawasa Dios «nti nkinkalimalakgtaxtinitan xkgalhni lantla nkgalhiyaw xmatsankgananika kintalakgalhinkan» (Col. 1:13, 14).

17, 18. ¿Niku tlan natekgsaw xlakata la lakatsukukgolh xtatayananin Jehová chu la tlan nalitamakgtayayaw tuku nakatsiniyaw anta?

¹⁷ Tlan tlakg lhuwa nalichuwinanaw xlakata xaxlikana tamasiyat nema paxkiyaw, xlakata tuku titaxtunitaw xlakskujnin Dios chu lhuwa tasikulunalin nema makglhtinanitaw. Akglhuwata kata, likgalhtawakgamaw Anuario niku lichuwinan xlakata taskujut nema tlawamaw xlikalanka katiyatni. Video Historia de fe viva (parte 1 chu 2) chu klikgalhtawakga Los testigos de Jehová, proclamadores del Reino de Dios, lichuwinankgo la lakatsukunitaw. Chu kirevistaskan lichuwinan la makgapitsi tsukukgolh kanajlanikgo Dios.

¹⁸ Tuku xaxlikana wa pi akxni akxilhaw la lakatsukulh xkachikin Jehová kinkamakgtayayan chuna la kamakgtayalh Israel akxni xlilakapastakkgo la Jehová xkalakgmaxtunit kʼEgipto (Éx. 12:26, 27). Akxni kgolota xwanit, Moisés tlan xkawanilh amakgapitsin la Jehová lhuwa tuku xtlawanit. Wa xlakata stakyawalh kachikin Israel: «Kalilakapastakti kilhtamaku xalamakgasa, kalilakpuwantit kata nema titaxtunita; kakgalhskinti mintlat, chu xla tlan nawaniyan; kakakgalhskinti tiku kgolonkgonita, chu xlakan tlan nawanikgoyan» (Deut. 32:7). Xlakata wilaw kkachikin Jehová xatapaxuwan malankiyaw chu kalitachuwinanaw amakgapitsin tuku tlawanit makgasa (Sal. 79:13). Lu kinkamakgtayayan akxni katsiyaw tuku lanit makgasa, wi tuku nakatsiniyaw chu nalakkaxwiliyaw tuku natlawayaw kilhtamaku nema aku mima.

19. Xlakata kgalhiyaw xkgakganat xaʼespiritual, ¿tuku kilitlawatkan?

¹⁹ Lipaxtikatsiniyaw xlakata ni kapukswa lamaw chu kgalhiyaw xkgakganat xaʼespiritual nema masta Dios (Prov. 4:18, 19). Pero liwana kilikgalhtawakgatkan xTachuwin Dios chu xatapaxuwan kalichuwinaw tuku xaxlikana. Chuna la salmista tlan namalankiyaw Jehová: «Kintikukan, na naklikgalhchiwinan wakg militliwekge, y wakg tu laklikuanit katlawanita, ¡kaniniwa nakmakatsininan tu tanks kuintatlawanita! KiDios, wix lhuwa tu kimasininita, lata kilikgawasa, y akit kanikxniwa klikgalhchiwinanit milimalakajikuanin asta chij. KiDios, maski akit kgoluta y kkgalhiya aktsasat, ni kakiakgxtakgmakganti; pues klikalhchiwinamputun lhuwa militliwekge nak ixlakatinkan ti talamana chi y ti ya talakawan» (Sal. 71:16-18).

20. ¿Tuku pulaktiy talimasiyaputun pi ni xlikana chu tuku natlawaya wix?

²⁰ Xkachikin Jehová tiku tamakamastaninitaw katsiyaw pi Satanás pulaktiy tuku limasiyaputunkan pi ni xlikana: pi Jehová lakgchan namapakgsinan chu pi latamanin ni makgxtakgkgo. Na lichuwinanaw tuku lu xaxlikana, pi Jehová lakgchan naMapakgsinan xlikalanka kakilhtamaku chu pi xliputum kinakujkan nalikakninaniyaw (Apoc. 4:11). Xlakata kinkamaxkiyan xʼespíritu, lichuwinanaw xalakwan xalaksasti tiku tlan likatsikgo chu tlan nakamamakgkatsiniyaw tiku nitlan makgkatsikgo chu nakamakgoxamixiyaw tiku lipuwamakgolh (Is. 61:1, 2). Maski Akgskgawini kaʼakgchipaputun xkachikin Dios chu latamanin, akinin lu xlakaskinka akxilhaw tuku makglhtinanitaw xlakata kintakanajlakan chu liwana lakapastaknitaw pi ni namakgxtakgaw Jehová chu lichuwinanaw Malana Tiku lakgchan namapakgsinan, la uku chu xliputum kilhtamaku (kalikgalhtawakga Salmo 26:11; 86:12).