Akxni kamakgtayayaw amakgapitsin na tlan limakgkatsiyaw
Putum latamanin lakgalhinanin chu min kilhtamaku tatatlayaw, chu lakgachunin lu snun. ¿Tuku nakinkamakgtayayan ni naxlajwananaw komo kgalhiyaw lu snun tajatat?
Tuku nakinkamakgtayayan xlakata ni nataxlajwaniyaw wa xtamakgtay kifamiliajkan, kiʼamigoskan chu kinatalankan.
Xatlan tachuwin xla chatum amigo tlan mapaksanan (Prov. 16:24; 18:24; 25:11). Pero xlakskujnin Dios ni kajwatiya litakgatsankgayaw namakgamakglhtinanaw takgoxamixit. Akinin pulana katlawaw “na chuna nchu nkin, limakgtsiyajkgoyaw watiya ntakgtsiyajni wantu nkin nkinkalimakgtsiyajnitan Dios” (2 Cor. 1:4; Luc. 6:31). Antonio chatum superintendente xla distrito kʼMéxico, akxilhli la xlikana kgantaxtu uma tachuwin.
Akxni tekgsnika tajatat, nema wanikan linfoma, cáncer xla kgalhni, lu lilipuwa. Maski chuna, ni mastalh talakaskin pi uma lu xmakgalipuwa. ¿La tlawalh? Xlilakapastaka takilhtlin xla Jehová chu xlikilhtli xlakata nalilakapastaka tuku xlichuwinankgo. Chu na makgtayalh xlakata pixlanka xtlawa xʼoración chu xlikgalhtawakga Biblia.
Maski chuna, Antonio wan pi tuku tlakg makgtayalh wa xnatalan tiku na watiya takanajla kgalhikgo. Xla wan: «Akxni kimpuskat chu akit lu nitlan xakmakgkatsiyaw, xakskiniyaw chatum kimparientekan chatum kgolotsin xalak congregación, xmilh chu xtlawalh oración kimpalakatakan. Uma xkinkamakgtayayan chu xkinkamakgoxamixiyan. Paxtikatsiniyaw xtamakgtay kifamiliajkan chu natalan, ni makgas kilhtamaku nialhtu xaklilipuwanaw». ¡Lu paxtikatsinilh xlakata xkgalhikgo amigos tiku lu paxkinankgo chu lakgalhamanankgo!
Atanu tuku kinkamakgtayayan akxni lipuwanaw wa espíritu santo, chuna la wan apóstol Pedro (Hech. 2:38). Uma litasiyalh akxni lhuwa kstalaninanin Cristo kalaksakka kkata 33 akxni xminita Cristo. Pero espíritu santo na tlan namakgamakglhtinanaw la uku, chu tlan naskinaw tuku namaklakaskinaw. ¿Tuku xlakata ni lhuwa skinaw espíritu santo? (Is. 40:28-31.)
KALIMASIYA PI MAKGTAYAPUTUNA TIKU PATINAMAKGOLH
Apóstol Pablo lhuwa tapatin tayanilh, chu makglhuwa atsinu ni nilh (2 Cor. 1:8-10). Pero ni xpekuan maski xnilh, xlakata xkatsi pi Jehová xmakgtaya. Xla tsokgli: «Paxkatsinilh Dios, wa cha xtlat nkimPuchinakan Jesucristo, chu xmakilhtsukina talakgalhaman, chu xmastana xlipaks ntakgtsiyajni, wa nti nkinkamakgtsiyajan lantla xlipaks kkintalakgaputsitkan» (2 Cor. 1:3, 4). Pablo ni mastalh talakaskin pi akstu xlakgalhamanka, wata putum tuku patinalh makgtayalh xlakata xkalakgalhamalh amakgapitsin. Liwana makgtayalh uma xlakata xkamakgoxamixilh amakgapitsin.
Akxni paksli, Antonio superintendente viajante litaxtupa. Putum kilhtamaku xkalilakgaputsa natalan, pero uma kilhtamaku xla chu xpuskat tlakg kalakgapaxialhnankgo chu kamatliwakglhkgo tiku tatatlakgo. Akgtum liʼakxilhtit, akxni kilakglakgolh chatum tala tiku xkgalhi akgtum tuwa tajatat, Antonio katsilh pi tala nialh xʼamputun ktamakxtumit. Xla wan: «Ni wamputun pi nialh xpaxki Jehová chu natalan pero wa tajatat lu xtlawanit pi nitlan namakgkatsi chu xmakgkatsi pi nila tuku xtlawa».
Xlakata xmatliwakglhkgolh, nina makgas Antonio skinilh xlakata xtlawalh oración kʼakgtum kreunión social. Maski xlakpuwan pi ni xlilat natlawa, tlawalh. Antonio lakapastaka: «lu stlan oración, tlawalh chu alistalh tanu tsukulh likatsi. Chu makgkatsilh pi tlan namakgtayanan».
Lu xlakaskinka nalakapastakaw pi maski kaj tsinu o lhuwa putum wi tuku lipatinaw. Pero chuna la wa Pablo, tuku nitlan titaxtuyaw tlan nakalimakgtayayaw amakgapitsin. Wa xlakata kalilakgaputsaw kinatalankan tiku patinamakgolh chu katlawaw la Jehová akxni kamakgtayayaw amakgapitsin.
