1, 2. ¿La kamakgkatsikan xlakskujnin Dios kʼuma kakilhtamaku chu tuku “chiki” kgalhikgo?

¿MAKGKATSIYA pi uma kilhtamaku xtachuna minchik? Komo nichuna, ni kaj miakstu. Chuna la titaxtunit kata, putum tiku xlikana paxkikgonit Jehová makgkatsikgo pi xala atanu kachikinin o tiku kaj makgwilakgolh unu kkakilhtamaku. Akgtum liʼakxilhtit, latamakgolh makgapitsi xlakskujnin Dios, tiku akxni anu anu xlamakgolh kCanaán «tikgalhapalakgolh mpi kaj xalatapulinin, na kaj xaminin kxokgspun tiyat» (Heb. 11:13).

² Nachuna la xlakan, kstalaninanin Cristo tiku kalaksakkanit «tiku tapakgsi[kgo] nkʼakgapun», kaʼakxilhkan la «tiku kaj tsinu makgwilakgolh» kʼuma kakilhtamaku (Filip. 3:20; 1 Ped. 2:11, TNM). Nachuna tiku litaxtukgo «xaʼamakgapitsi borregos» xla Cristo nachuna «ni katuxawat ntapakgsikgoy», chuna la xla (Juan 10:16, TNM; 17:16). Pero xkachikin Dios wilakgolh «kxchikkan». Lu lipaxuwakgo xlakata litamakgtayakgo tlakg xatlan chiki nema anan, nema liʼakxilhkgo xtakanajlakan. Moisés tsokgli: «[Jehová], wix kanikxniwa y wakg kilhtamaku kilitatsekgnikan litaxtunita» (Sal. 90:1). * ¿La litaxtulh Jehová la akgtum “litatsekgni” xpalakata xlakskujni xalamakgasa? ¿La litaxtu la uku la akgtum litatsekgni xpalakata kachikin nema lin xtukuwani? ¿Chu la nalitaxtuku litatsekgni kkilhtamaku nema aku mima?

3. ¿Tiku lichuwinankan, chu tuku liʼakxilhtit tekgsaw kSalmo 90:1 chu tuku akxtum katlawa?

³ Chuna la lhuwa liʼakxilhtit kBiblia, Salmo 91:1 wi tiku lichuwinankan, akgtum liʼakxilhtit chu lhuwa tuku  tamalakxtumikan. Tiku lichuwinankan wa Jehová. Liʼakxilhtit wa litatsekgni, o chiki. Jehová lhuwa tuku litamalakxtumikan la akgtum litatsekgni. Akgtum liʼakxilhtit, Jehová kakuentajtlawa xkachikin, xlakata xla litaxtu tapaxkit (1 Juan 4:8). Na litaxtu Dios xla takaksni, chu xlakskujnin tiku ni makgxtakgkgo “kamakgtakgalha” (Sal. 4:8). Kaʼakxilhwi la kalikatsinilh tiku xpulalinkgo laklanka familias, pulana kalichuwinaw Abrahán.

4, 5. ¿La xaxlikana “putsatekgni” litaxtulh Jehová xpalakata Abrahán?

⁴ Kaj kalakpuwaw la makgkatsilh Abrahán, akxni xwanikan Abrán, Jehová wanilh: «Kataxtu kminkachikin chu xlakgstipankan mimparientes [...] kachikin nema nakmasiyaniyan». Komo Abrahán tiku tlan xlikatsi wi tuku makgapekualh, nialh chuna makgkatsilh akxni Jehová wanilh: «Naktlawa pi akgtum lanka kachikin nalitaxtuya chu naksikulunatlawayan chu xlikana naktlawa pi lanka nawan mintukuwani [...]. Chu xlikana nakkasikulunatlawakgo tiku nasikulunatlawakgoyan, chu tiku nalimawakayan tuku nitlan na naklimawaka tuku nitlan» (Gén. 12:1-3).

⁵ Xlakata uma tachuwin, Jehová wanilh pi la akgtum putatsekgni xʼama litaxtu xpalakata Abrahán chu xkamanan (Gén. 26:1-6). Chu makgantaxtilh tuku xwanit. Akgtum liʼakxilhtit, Jehová ni mastalh talakaskin pi faraón xalak Egipto chu mapakgsina Abimélec xalak Guerar xlikgamanankgolh Sara chu xmakgnika Abrahán. Na kuentajtlawalh Isaac chu Rebeca akxni nachuna xtitaxtumakgolh (Gén. 12:14-20; 20:1-14; 26:6-11). Chu «Dios ni lakaskilh nakatlawanikan tu nitlan, y akxni makgapitsi reyes ni takgaxmatli, y katlawanilh tu nitlan, Dios kamaxkilh tapatin; porque tanks ixkawaninit: “Ni kakatukstit jeé lakchixkuwin ti kkalaksaknit; na ni kakatlawanitit tu nitlan kimprofetas” » (Sal. 105:14, 15).

6. ¿Tuku wanilh Isaac pi xtlawalh Jacob, chu la max makgkatsilh?

⁶ Jacob xtanat Abrahán na xlitaxtu xpalakachuwina Dios. Titaxtulh kilhtamaku akxni xtamakgaxtokgputun Jacob, Isaac, xtlat, wanilh: «Ni natatamakgaxtokga xlaktsuman Canaán. Kataki, chu kapit Padán-aram, kxchik Betuel, xtlat mintse, chu anta katatamakgaxtokgti chatum xtsumat Labán» (Gén. 28:1, 2). Jacob tunkun tlawalh tuku limapakgsilh xtlat. Jacob makgxtakgli xfamilia, tiku xwilakgolh kCanaán, chu xakstu alh, tlawalh lhuwa kilómetros xlakata tlan xchalh kHarán (Gén. 28:10). Max xkgalhskinkan: «¿La xlimakgas kilhtamaku anta naktawila? ¿Tlan nakimakgamakglhtinan kinkuku chu nakimaxki chatum puskat nema kanajlani Dios?». Jacob lhuwa xlilipuwan, pero nialh  lilipuwa akxni chalh kLuz max 100 kilómetros xlimakgat kBeer-seba. ¿Tuku lalh anta?

7. ¿Tuku wanilh Dios Jacob akxni manixnalh?

⁷ Anta kLuz, Jehová tasiyanilh Jacob kʼakgtum tamanixnat chu wanilh: «Chu unu ktawilan xlikana nakkuentajtlawayan ktiji niku pimpat, chu xlikana naktlawa nataspitparaya unu, xlakata ni nakmakgxtakgan asta akxni nakmakgantaxti tuku kwaninitan» (Gén. 28:15). ¡Lu tlan limakgkatsilh Jacob uma lakwan tachuwin! ¿Tlan nalakpuwanaw la tlakg lakapala tsukulh tlawan xlakata tuku wanilh Jehová chu xakxilhputun la xʼama makgantaxti xtachuwin? Komo wix ni wila kminchik, atanu país skujnipat Dios, akgatekgsa la makgkatsilh Jacob. Xlikana max akxilhnita la Jehová kuentajtlawanitan.

8, 9. ¿La litaxtulh Jehová la akgtum “putatsekgni” xpalakata Jacob chu tuku kinkamasiyaniyan uma?

⁸ Akxni Jacob chalh kHarán, xkuku lu tlan makgamakglhtinalh chu alistalh maxkilh Lea chu Raquel xlakata xlakpuskatin xwankgolh. Pero akxni titaxtulh kilhtamaku Labán, asta 10 lakgpalinilh xtaskgaw (Gén. 31:41, 42). Jacob tayanilh tuku nitlan xtlawanimaka, lipawa pi Jehová chuntiyaku xʼama kuentajtlawa. Chu chuna tlawalh, akxni taspitli kCanaán xkgalhi «laklanka rebaños chu skitinin chu lakskujnin, chu camellos chu burros» (Gén. 30:43). Xlakata lu xpaxtikatsininan wanilh Jehová: «Ni kiminini nakmakglhtinan tapaxkit nema ni makgxtakgnan chu xlakata makgantaxti tuku wani miskujni, xlakata kaj kilixtokgo klipatakutli Jordán chu uku kkgalhi akgtiy campamentos» (Gén. 32:10).

⁹ Uma tachuwin kinkamasiyaniyan tuku xlakata Moisés tlan wa: «[Jehová], wix kanikxniwa y wakg kilhtamaku kilitatsekgnikan litaxtunita» (Sal. 90:1). Uma tachuwin na lu kinkamakgtayayan la uku, xlakata Jehová «wanti ni ukxni talakgpaliy ni mpala tsinu», chuntiyaku xapaxkina chu tlan litatsekgkgo tiku ni makgxtakgkgo (Sant. 1:17). Kaʼakxilhwi la likatsi.

10. ¿Tuku xlakata xlikana katsiyaw pi Jehová chuntiya nalitaxtu putatsekgni xpalakata xlakskujnin?

¹⁰ Kalilakpuwanti uma, kxlakatin pumapakgsin makgasiyapat tiku makgninankgo xlikalanka kakilhtamaku, wix katsiya pi tiku kapulalin lu skgalala, kgalhi lhuwa litliwakga, lu xaʼakgsanina chu makgnina. ¿La namakgkatsiya akxni nataxtuya kpumapakgsin? ¿Napekuana? Lhuwa tuku xlakata naskina nakuentajtlawakana. Uma limasiya la wilakgolh xlakskujni Jehová tiku tatayakgo chu ni pekuankgo akxni lichuwinankgo tuku nitlan tlawa Satanás (kalikgalhtawakga Apocalipsis 12:17). Pero ¿tlawanit Satanás pi xkachikin Dios nialhtu nawankgo? ¡Ni chuna! Akinin chuntiyaku mastakamaw kintakanajlakan, uma masiya: Jehová litaxtu «kinputatsekgnikan» chu tlakg chuna litaxtu kʼuma kilhtamaku (kalikgalhtawakga Isaías 54:14, 17). Pero Jehová nila kinkamakgtayayan komo mastayaw talakaskin pi Satanás nakinkaʼakgskgawiyan komo ni anta wilaw kkimputatsekgnikan.

11. ¿Tuku atanu tlan katsiniyaw xlakata lakchixkuwin tiku xpulalinkgo laklanka familia?

¹¹ Atanu tuku kinkamasiyanikgoyan tiku xpulalinkgo laklanka familias. Maski xlakan xlamakgo kxtiyat Canaán, ni xtlawakgo tuku lu nitlan la talakgxtumit chu ni xʼakxilhputunkgo uma (Gén. 27:46). Umakgolh lakchixkuwin ni xmaklakaskinkgo akgtum lista niku xkawanika tuku tlan xtlawakgo chu tuku ni. Kajwatiya xmaklakaskinkgo tuku xkatsikgo xlakata Jehová chu xtayat. Xlakata xla xputatsekgnikan xwanit, xlakan ni xtlawaputunkgo tuku xtlawakgo kakilhtamaku. Laksakkgolh natamakgatlinikgo uma nixatlan tiji. ¡Lu tlan liʼakxilhtit kimpalakatakan! ¿Nachuna tlawaya la  uma lakchixkuwin akxni laksaka tiku nakatalalipina chu tuku nalilakgastanana? Lu nitlan, pero makgapitsi kstalaninanin Cristo ni lu tliwakga wi xtakanajlakan chu tlan limakgkatsikgo tuku masta xkakilhtamaku Satanás. Komo wix tsinu chuna makgkatsiya katlawa oración. Kalakapastakti pi uma kakilhtamaku xla Satanás, limasiya pi ni paxkinan chu pi xalakgkatsana (2 Cor. 4:4; Efes. 2:1, 2).

12. 1) ¿La kakuentajtlawa Jehová xlakskujnin? 2) ¿La makgkatsiya akxni lilakpuwana tuku kinkalimakgtayayan Jehová?

¹² Xlakata Akgskgawini ni nakinkaʼakgskgawiyan, talakaskin nalitamakgtayayaw tuku Jehová kinkamaxkiyan kkintakanajlakan chu uma natlawa pi tlan nalitatsekgaw. Uma tuku tamakgtay kilhchanima tamakxtumit, nakakninaniyaw Dios kfamilia, chu “kinkamaxkinitan lakchixkuwin” o tiku kinkakuentajtlawakgoyan nema Dios kalaksaknit xlakata nakinkamakgtayakgoyan akxni kgalhiyaw taʼakglhuwit (Efes. 4:8-12). Tala George Gangas, tiku akglhuwa kata na litaxtulh kgolotsin tiku Pulalinkgo xTatayananin Jehová wa: «Akxni kkatatawila [xkachikin Dios] kmakgkatsi pi kwi kkinchik chu kkatawi kifamilia, kʼakgtum paraíso xaʼespiritual». ¿Nachuna makgkatsiya?

13. ¿Tuku lu xlakaskinka kinkamasiyaniyan Hebreos 11:13?

¹³ Atanu tuku na tlan katsiniyaw xlakata tiku xpulalinkgo laklanka familias wa pi tanu xlikatsikgo nixawa amakgapitsi latamanin. Chuna la akxilhwi kpárrafo 1,  «tikgalhapalakgolh mpi kaj xalatapulinin, na kaj xaminin kxokgspun tiyat» (Heb. 11:13). ¿Liwana lakapastaknita tanu nalikatsiya? Pero min kilhtamaku tuwa chuna natlawayaw. Pero xlakata xtamakgtay Dios chu xla kinatalankan tlan namakgantaxtiyaw. Kalakapastakti pi ni kajwatiya wix chuna titaxtupat. Putum tiku skujnaniputunaw Jehová tlawayaw litliwakga xlakata ni natlawayaw tuku nitlan (Efes. 6:12). Pero uma talachipat tlan natlajananaw komo nalipawanaw Jehová chu nalitatsekgaw.

14. ¿Tukuya «kachikin» xkgalhkgalhimakgolh xlakskujnin Jehová?

¹⁴ Na xlakaskinka natlawayaw chuna la Abrahán nalilakapastakaw tuku makglhtinanaw (2 Cor. 4:18). Apóstol Pablo tsokgli xlakata Abrahán «xkgalhkgalhiy ajtiyan [kachikin] wa ntu ntlan xtankgaxika nkgalhiy, wa nti xlaklhkana, chu xtlawana, wa Dios» (Heb. 11:10). Uma «kachikin» litaxtulh kxtamapakgsin Mesías chu xtalakaskin pi xla xkgalhkgalhilh uma kachikin. Akinin nitu kgalhkgalhimaw xlakata mapakgsinamaja kʼakgapun. Tuku litasiya wa pi nialh makgas namapakgsinan  kKatiyatni. ¿Akxilha pi xlikana uma tamapakgsin? ¿Limasiyaya kmilatamat, la akxilha uma kakilhtamaku chu tuku tlakg xlakaskinka tlawaputuna? (Kalikgalhtawakga 2 Pedro 3:11, 12.)

15. ¿Tuku nakaʼakgspula tiku kanajlanikgo uma kakilhtamaku?

¹⁵ Akxni atsinu tsankga namasputukan xkakilhtamaku Satanás, tlakg “namin lhuwa takatsanajwat” (Mat. 24:7, 8, Hua Xasasti Talaccaxlan, TXS, 1999). Chu kakilhtamaku tlakg natawila lanka takatsanajwat. Tuku lakkaxwilikgonit latamanin natalakxtlawa chu latamanin lhuwa napekuankgo kxlatamatkan (Hab. 3:16, 17). Xlakata nialh nakatsikgo tuku natlawakgo, nalitatsekgputunkgo «laktlanka lhuku kxtampixtum, xawa klakgstipanin laktlanka chiwix» (Apoc. 6:15-17, TXS, 1999). Nipara lhuku o xtapakgsikan políticos o tuku lakkaxwilikgonit latamanin tlan nakamakgtaya nema la uku tasiya pi tlan nalitatsekgkan.

16. ¿La kiliʼakxilhatkan congregación chu tuku xlakata?

¹⁶ Xlakskujnin Jehová, nalipaxuwakgo xlakata natawilakgo “kputatsekgni”, Jehová Dios. Namakgkatsiya xtachuna la palakachuwina Habacuc, tiku wa: “Xlikana naklipaxuwa Jehová, xlikana naklipaxuwa xpalakata Dios tiku lakgmaxtunan” (Hab. 3:18). ¿La nalitaxtu Jehová «kimputatsekgnikan» akxni naʼan lhuwa tuku nitlan? Talakaskin nakgalhkgalhiyaw xlakata naʼakxilhaw. Tuku xaxlikana: xtachuna la israelitas tiku taxtukgolh kʼEgipto, «lhuwa tachixkuwitat» o latamanin, liwana natalakkaxwiliyaw chu skgalalh nakgalhakgaxmataw tuku Dios nakinkawaniyan (Apoc. 7:9; kalikgalhtawakga Éxodo 13:18). Dios nakinkapulalinan, max nalimaklakaskin congregación. Max, lhuwa mil congregación nema wilakgolh xlikalanka kakilhtamaku tatalakxtumi “xpulakni chiki” xpalakata tuku aku namin Isaías 26:20 (kalikgalhtawakga). ¿Xlakaskinka akxilha tamakxtumit? ¿Lakapala tlawayaw tuku Jehová kinkalimapakgsiyan kcongregación? (Heb. 13:17.)

17. ¿Tuku xlakata Jehová litaxtu la akgtum “putatsekgni” asta xpalakata tiku nikgonitta chu ni makgxtakgkgolh?

¹⁷ Asta tiku nanikgo akxni nina namin lanka talakgaputsit, nitu nakaʼakgspula xlakata Jehová “xputatsekgni”. Lhuwa kata alistalh akxni xnikgonita tiku xpulalinkgo laklanka familia, Jehová wanilh Moisés: «Akit xDios [...] Abrahán, xDios Isaac, chu xDios Jacob» (Éx. 3:6). Akxni Jesús xlichuwinanita uma tachuwin na wa: «Dios, ni wa xDioskan ninin, wampi wa xDioskan nti staknankgoy; xampi wa xpalakata Dios, paks lamakgolhku» (Luc. 20:38). Xlikana, tiku nikgonitta chu ni makgxtakgkgolh Jehová, xtachuna la nitu nimakgolh xlakata xlikana nakamalakastakwani (Ecl. 7:1).

18. Kxasasti kakilhtamaku, ¿la nalitaxtu Jehová akgtum “putatsekgni” xpalakata xkachikin?

¹⁸ Kxasasti kakilhtamaku lakatsu wija, apulaktu la Jehová nalitaxtu akgtum “putatsekgni” xpalakata xkachikin. Apocalipsis 21:13 kinkawaniyan: «Uwi xputawilh Dios, anta wi kxlakgstipankan nchixkuwin; na wa natatawilakgo». Jehová nakatatawila xlakskujni chu nalimaklakaskin Jesucristo, xlakata namapakgsinan kKatiyatni akgtum mil kata . Pero akxni nasputa akgtum mil kata, Jesús namakamaxki Tamapakgsin xTlat, xlakata Dios namakgantaxti xtalakaskin unu kKatiyatni (1 Cor. 15:28). Ama kilhtamaku, Jehová wa nakamapakgsi latamanin latamanin, xlakata nialh nakgalhikgo talakgalhin. ¡Lu tlan tuku kgalhkgalhimaw! Xlakata ni amin uma kilhtamaku talakaskin na natlawayaw chuna la xlakskujnin Jehová xalamakgasa tiku “litatsekgkgolh”.