1, 2. ¿Tuku tlawakgo pusikulan nema wankgo pi kstalaninanin Cristo, chu la akxilhkgo xtatayananin Jehová xtukuwani Dios?

LHUWA pusikulan nema wankgo pi kstalaninanin Cristo nialh limaklakaskinkgo xtukuwani Dios. Akgtum liʼakxilhtit, makgtum Biblia xalak Inglaterra wa uma tuku litsuku: «Nalimaklakaskinaw xtukuwani Dios [...] ni xlilat namaklakaskinkgo pusikulan xla kstalaninanin Cristo» (Revised Standard Version).

² Pero xtatayananin Jehová, lipaxuwayaw pi limaklakaskinaw xtukuwani Dios chu malankiyaw (kalikgalhtawakga Salmo 86:12 chu Isaías 43:10). Nachuna lanka talakgalhaman akxilhaw pi akgatekgsaw tuku kilhchanima uma tukuwani chu pi wa lakgchan namapakgsinan chu natamalanki xtukuwani (Mat. 6:9). Pero uma lanka talakgalhaman nema kgalhiyaw kuenta kilitlawatkan. Wa xlakata naʼakxilhaw akgtutu lu xlakaskinka takgalhskinin: 1) ¿Tuku kilhchani nalakgapasaw xtukuwani Dios? 2) ¿La malanki Jehová xtukuwani? 3) ¿La tlan nalilatamayaw xtukuwani Dios?

3. ¿Tuku kilhchani nalakgapasaw xtukuwani Dios?

³ Nalakgapasaw xtukuwani Dios ni kajwatiya nakgaxmataw chu nawanaw tachuwin Jehová. Kilhchani nalakgapasaw la likatsi Dios Jehová, xtayat, tuku lakpuwanit natlawa chu tuku tlawanit nema talichuwinan kBiblia, chu la kalikatsininit xlakskujnin. Jehová kinkawaniyan tsinu tsinu xlakata nalakgapasaw chuna la xla makgantaxtutilhama xtalakaskin (Prov. 4:18). Jehová kamasiyanilh xtukuwani xapulana latamanin, Eva limaklakaskilh xtukuwani Dios akxni lakachilh Caín (Gén. 4:1). Tiku xpulalinkgo laklanka familia la Noé, Abrahán, Isaac chu Jacob xlakgapaskgo xtukuwani Dios, chu tlakg chuna katsikgolh akxni kasikulunatlawalh, kakuentajtlawalh  chu kawanilh tuku xlakpuwanit natlawa. Alistalh Moisés kgalhilh lanka talakgalhaman nalakgapasa xtukuwani Dios.

4. ¿Tuku xlakata Moisés kgalhskilh Dios xtukuwani chu tuku xlakata kilikatsitkan tuku wamputun xtukuwani?

⁴ Kalikgalhtawakga Éxodo 3:10-15. Akxni Moisés xkgalhi 80 kata, Dios limapakgsilh: «Wix katamakxtu kinkachikin kʼEgipto, xkamanan Israel». Moisés likgalhtinalh akgtum lu xlakaskinka takgalhskinin. Moisés kgalhskininalh ¿tuku xwanikan? Xlakata xtukuwani Dios lu xlakgapaskan, ¿tuku xkatsiputun Moisés xlakata uma takgalhskinin? Litasiya pi tlakg xkatsiputun xlakata tiku xkgalhi uma tukuwani, xlakatsiputun tuku xʼama tlawa xlakata kachikin xkanajlalh pi xlikana xʼama kalakgmaxtulh. Lu tlan tuku xlakaskin Moisés, xlakata israelitas akglhuwata kata kaj lakskujnin xlitaxtukgonit chu uma max xtlawalh pi ni xkanajlakgolh pi xDios xnatlatnikan tlan xkalakgmaxtulh. Makgapitsi asta xkakninanikgo dioses xalak Egipto (Ezeq. 20:7, 8).

5. ¿La limasiyalh Dios tuku xwamputun xtukuwani akxni kgalhtilh xtakgalhskinin Moisés?

⁵ ¿La kgalhtilh Jehová xtakgalhskinin Moisés? Jehová wanilh: «Wa uma nakawaniya xkamanan Israel: “AKIT NAKWAN, wa tiku kimakaminit”. Jehová xDios minatlatnikan [...], kimakaminit». * Dios malaknulh pi tlan xtlawalh tuku xtalakaskilh xlakata xmakgantaxtilh xtalakaskin, pi putum kilhtamaku xʼama makgantaxti xtachuwin. Wa xlakata, anta kversículo 15 kinkawaniyan pi Jehová wa: «Uma kintukuwani putum kilhtamaku, chu chuna nakililakgapasatit xliputum kilhtamaku». Uma lu makgtayalh Moisés uma xlakata xtatliwakglhli xtakanajla chu xpekuanilh Dios.

6, 7. ¿La limasiyalh Jehová pi lilatama xtukuwani?

⁶ Akxni nina lhuwa kilhtamaku xtitaxtunit wi tuku xlakgayawanit Moisés, Jehová limasiyalh pi lilatama xtukuwani xlakgmaxtuna Israel «xlitaxtu». Kalimamaxanilh egipcios 10 tuku nitlan, chu na limasiyalh pi xdioseskan egipcios chu faraón nila tuku tlawakgo (Éx. 12:12). Alistalh Jehová mapitsilh xaspinini pupunu, israelitas patakutkgolh, faraón muxtulh chu nachuna xsoldados (Sal. 136:13-15). Anta «lanka desierto nema lu xmakgapekuanan», “litaxtulh” tiku kalakgmaxtunilh xlatamat: kamaxkilh liwat chu chuchut xkachikin, nema max liwaka akgtiy o akgtutu millón xwankgonit o liwaka. Putum ama kilhtamaku klhakgatkan  chu xtatunukan ni sputnikgolh (Deut. 1:19; 29:5). La akxilhaw ni anan tuku natlawa pi Jehová nialh nalimasiya pi xtukuwani lu lanka. Alistalh wanilh Isaías: «Akit... akit Jehová, chu ni anan atanu lakgmaxtuna» (Isa. 43:11).

⁷ Josué, tiku tawi xlakgxokgo Moisés, na akxilhli tuku Jehová tlawalh kʼEgipto chu kdesierto. Wa xlakata, akxni atsinu xtsankga nani, Josué liwana kawanilh israelitas: «Chu wixin liwana katsiyatit xliputum minakujkan chu xliputum milatamatkan pi ni anan tachuwin xliputum xalakwan tachuwin wantuku kawaninitan Jehová miDioskan nema ni kgantaxtunit. Putum kgantaxtukgonit mimpalakatakan. Ni anan tachuwin nema ni kgantaxtunit» (Jos. 23:14). Xlikana aktanks, tasiyalh pi Jehová makgantaxtilh xtachuwin, chuna «litaxtulh» tuku xwanit.

8. ¿La makgantaxti tuku kilhchani xtukuwani Jehová la uku?

⁸ La uku nachuna Jehová “litaxtu” tuku wamputun xtukuwani. Limaklakaskilh xKgawasa xlakata xaʼawatiya kilhtamaku xʼama talichuwinan xTamapakgsin «xlikatlanka nkatuxawat» (Mat. 24:14). Kajwatiya Dios xalatalhman lichuwinalh pi uma taskujut xʼama kgantaxtu chu xlimaklakaskin latamanin «ni xakgalhtawakganin, kaj xalak chunata» xlakata xtlawakgolh (Hech. 4:13). Chuna, akxni tlawayaw uma taskujut, makgantaxtiyaw tuku Biblia xlichuwinanit. Malankiyaw kinTlatkan chu limasiyayaw pi xlikana tuku wanaw akxni skinaw uma: «Katamasantujlh mintukuwini. Kamilh milimapakgsin. Wa nkatatlawalh ntu mintalakaskin, xtachuna lantla nkakgapun, na chuna kawa nkatiyatna» (Mat. 6:9, 10).

9, 10. Chuna la Dios talalilh Israel, ¿la tlakg masiyalh Jehová tuku xkilhchanima xtukuwani, chu tuku kitaxtulh?

⁹ Akxni israelitas xtaxtukgonita kʼEgipto, wi tuku xasasti tlawalh xpalakata xkachikin. Xpalakata talakkaxlan xla Limapakgsin, xla litaxtulh xtachuna «xchixkukan» chu xla xatapaxuwan makgantaxtilh tuku lakgatayalh (Jer. 3:14). Chu israelitas litaxtukgolh xtachuna «xpuskat», kachikin nema laksakli xlakata nalin xtukuwani (Isa. 54:5, 6). Akxni xatapaxuwan xtapakgsinikgo chu xkgalhakgaxmatkgo, xla xlitaxtu xatlan «Chixku». Xkasikulunatlawa, xkakuentajtlawa chu xkamaxki takaksni (Núm. 6:22-27). Wa xlakata xalanka xtukuwani xtamalanki xlakgstipankan kachikinin (kalikgalhtawakga Deuteronomio 4:5-8 chu Salmo 86:7-10). Akxni xwi kachikin Israel lhuwa tiku xalak alakatanu kachikinin lakgapaskgolh xaxlikana takanajla. Xlakan tlawakgolh chuna la moabita Rut nema wanilh Noemí: «Minkachikin kinkachikin nawan, chu mi Dios na kiDios nawan» (Rut 1:16).

 ¹⁰ Liwaka akgtum mil akgkitsis ciento kata, Jehová lhuwa la kalimasiyanilh israelitas la xlikatsi. Maski israelitas ni xkgalhakgaxmatnankgo, makglhuwa Jehová kalimasiyanilh pi chatum «Dios xalakgalhamana» chu tiku «ni lakapala sitsi» chu lu kgalhkgalhinan (Éx. 34:5-7). Pero maski lu kgalhkgalhinan, uma sputa, chu litasiyalh akxni judíos lakgmakgankgolh chu makgnikgolh Jesús (Mat. 23:37, 38). Xkamanan israelitas nialh xkachikin Dios wankgolh chu nialh linkgolh xtukuwani. Tiku xkachikin Dios xwankgonit xlajwanalh xtakanajlakan xtachuna la akxni xnakga kgantum kiwi (Luc. 23:31). Xlakata tuku kaʼakgspulalh ¿la tsukukgolh akxilhkgo xtukuwani Dios?

11. ¿Tuku xlakata judíos nialh maklakaskinkgolh xtukuwani Dios?

¹¹ Chuna la titaxtulh kilhtamaku judíos tsukukgolh kanajlakgo tuku ni xaxlikana xlakata xtukuwani Dios, chu xlakpuwankgo pi nila xmapakuwikan xtukuwani (Éx. 20:7). Tsinu tsinu nialh maklakaskinkgolh xtukuwani. Uma tlawalh pi Jehová nitlan nalimakgkatsi akxni xakxilha pi nitu xliʼakxilhkgo xtukuwani (Sal. 78:40, 41). Pero Dios, “tiku xalakgkatsana”, ni xʼama masta talakaskin pi xtukuwani xlinkgolh tiku xlakgmakgankgonit chu nialh xkgalhikgo xtasikulunalin (Éx. 34:14). Uma kinkamasiyaniyan pi lu xlakaskinka namaxkiyaw kakni xtukuwani kiMalakatsukinakan.

12. ¿La malakatsukilh Jehová kachikin nema xlichuwinankanit pi nalin xtukuwani?

¹² Jehová limakatsininalh Jeremías pi xʼama tatlawa «xasasti talakkaxlan» akgtum xasasti kachikin, Israel xaʼespiritual. Nachuna, wa pi putum tiku xtapakgsikgolh xlakgapaskgolh «tiku tlakg xaʼaktsina asta tiku tlakg lankata» (Jer. 31:31, 33, 34). Chu uma tuku xwankanit tsukulh kgantaxtu kPentecostés xla kata 33 akxni xminita Jesús. Dios tlawalh akgtum xasasti talakkaxlan. Xasasti kachikin, «xʼIsrael Dios», na makgtanukgo tiku judíos chu tiku ni judíos, chu litaxtukgolh «ntachixkuwitat, na wa naliyankgoy xtukuwini», o, «chixkuwin nti liyankgoy nkintukuwini» (Gál. 6:16; kalikgalhtawakga Hechos 15:14-17; Mat. 21:43).

13. 1) ¿Tuku xlakata wanaw pi xapulana kstalaninanin Cristo maklakaskinkgolh xtukuwani Dios? 2) ¿La akxilha wix talakgalhaman pi nalimaklakaskina xtukuwani Dios akxni pina lichuwinana?

¹³ Xlakata xkalilakgapaskan xtukuwani Jehová, tiku tapakgsikgo kʼuma kachikin xaʼespiritual limaklakaskinkgolh xtukuwani Dios, chuna tlawakgolh akxni lichuwinankgolh tuku tatsokgtawilanit kTatsokgni xaHebreo. * Wa xlakata, akxni apóstol Pedro katachuwinalh tiku judíos chu tiku ni judíos kPentecostés xla kata 33, makglhuwa limaklakaskilh xtukuwani Dios (Hech. 2:14, 20, 21, 25, 34). Xapulana kstalaninanin Cristo xkakninanikgo Jehová, chu xla sikulunatlawalh la xlichuwinankgo. Nachuna la uku sikulunatlawa akxni lichuwinanaw xtukuwani chu kamasiyaniyaw tiku kinkakgaxmatnikgoyan, chu asta limaklakaskinaw xBibliajkan. Chuna kamalakgapaskiniyaw xaxlikana Dios. ¡Lu lanka talakgalhaman... nalakgapaskgo chu nachuna akinin! Chu akxni kamalakgapasniyaw max natlawa pi alistalh tlan natalalinkgo Jehová, natatliwakglha chu xliputum kilhtamaku chuna nawan.

14, 15. Maski ni xaxlikana kstalaninanin Cristo talhuwikgolh, ¿tuku tlawalh Jehová xlakata nakuentajtlawa xtukuwani nema laksaknit nalilakgapaskan?

¹⁴ Alistalh, tiku xmakgxtakgkgonit xaxlikana takanajla tsukukgolh tawilakgo kcongregación akxni nikgolh apóstoles (2 Tes. 2:3-7). Ni xaxlikana makgalhtawakgenanin na tsukukgolh tlawakgo tuku xtlawakgo judíos tiku ni xmaklakaskinkgo xtukuwani Dios.  ¿Xʼama masta talakaskin Jehová pi nialh xmaklakaskinka xtukuwani nema xla laksakli nalilakgapaskan? ¡Ni! Maski xlikana pi niti katsi la xwankan pero uma tukuwani putum kilhtamaku tawilanit. Kʼuma kilhtamaku, kmaklhuwa biblias liminkgo uma tukuwani chu kxtatsokgnikan lhuwa tsokgnanin xalak Biblia. Akgtum liʼakxilhtit, kkata 1757, Charles Peters tsokgli Jehová, ni xtachuna amakgapitsi tuku lilakgapaskan Dios, «xlakata tasiya pi uma tachuwin tlakg limasiya la likatsi». Nachuna Hopton Haynes chuna limatsuki capítulo 7 xla maktum libro xla kata 1797 xlakata la xkakninanikan, chuna wan: «JEHOVÁ wa xtukuwani DIOS xla judíos, tiku kajwatiya xkakninanikgo, nachuna tlawakgolh Cristo chu xʼApóstoles». Henry Grew (1781-1862) ni kajwatiya limaklakaskilh xtukuwani Dios na wa pi xlakgmakgankgonit chu xtalakaskin natasantujtlawa. Chu George Storrs (1796-1879), tiku akxtum taskujli Charles T. Russell, limaklakaskinkgolh xtukuwani Dios, chu Russell na limaklakaskilh.

¹⁵ Kkata 1931 tlakg tasiyalh uma, kʼuma kata xlikgalhtawakgananin Biblia, chuna la xkalilakgapaskan tiku xlitaxtukgo xkachikin Dios, tiyakgolh kBiblia tukuwani xtatayananin Jehová (Isa. 43:10-12). Chuna limasiyakgolh xlikalanka kakilhtamaku pi xlipaxuwakgo naskujnikgo xaxlikana Dios, chu litaxtukgolh kachikin “nti xliyankgoy xtukuwini”, xlakata xmalankikgolh uma tukuwani (Hech. 15:14). Uma makgantaxtilh tuku Jehová wa nema tatsokgnit kMalaquías 1:11: «Lata akxni taxtu chichini chu asta akxni tsankga kintukuwani xalanka nawan xlakgstipankan kachikinin».

16. ¿Tuku xlakata akgtum lanka talakgalhaman nalilatamayaw «xktukuwani Jehová»?

¹⁶ Palakachuwina Miqueas tsokgli: «Putum kachikinin, xlakan nalatamakgo kxtukuwani xdioskan; pero akinin, nalatamayaw kxtukuwani Jehová kiDioskan, xliputum kilhtamaku» (Miq. 4:5). Alistalh Jehová mastalh talakaskin pi xLikgalhtawakgananin Biblia xkalimapakuwika xtatayananin Jehová uma akgtum lu lanka talakgalhaman chu litasiyalh pi Jehová xkasikulunatlawa (kalikgalhtawakga Malaquías 3:16-18). Chu wix ¿la xlilakaskinka akxilha uma talakgalhaman? ¿Tlawaya putum tuku talakaskin xlakata “nalilatapaya xtukuwani Jehová”? ¿Katsiya tuku kilhchani?

17. ¿Tuku kilhchani nalilatamayaw kxtukuwani Jehová?

¹⁷ Lilatamakan xtukuwani Jehová pulaktutu tuku kilhchanima. Xapulana, nakamasiyaniyaw xtukuwani Dios amakgapitsin, xlakata katsiyaw pi kajwatiya tiku «xmapakuwilh xtukuwini nkimPuchinakan [Jehová] naʼakgaputaxtuy» (Rom. 10:13). Xliʼakgtiy, talakaskin nalimasiyayaw pi kgalhiyaw xtayat Jehová, chu tuku tlakg xlakaskinka wa tapaxkit (1 Juan 4:8). Chu xliʼakgtutu, xatapaxuwan nakgalhakgaxmataw xlimapakgsin kinTlatkan xalak akgapun xlakata ni tlan nalichuwinankan xasanto xtukuwani (1 Juan 4:8; 5:3). ¿Liwana lakapastaknita pi xliputum kilhtamaku “nalatapaya kxtukuwani Jehová kiDioskan”?

18. ¿Tuku xlakata ni pekuanaw xlakata tuku aku mima putum kakninaniyaw xtukuwani Jehová?

¹⁸ Nialh makgas, putum tiku lakatayakgo Jehová nakatsikgo tiku xla (Ezeq. 38:23). Umakgolh latamanin nawankgo xtachuna la Faraón tiku wa: «¿Tiku Jehová xlakata akit nakkgalhakgaxmata xtachuwin[?]». ¡Xla nitlan tuku akgspulalh! (Éx. 5:1, 2; 9:16; 12:29). Pero akinin lakgapasaw Jehová xlakata chuna laksakwi. Lu xatapaxuwan linaw xtukuwani chu kgalhakgaxmataw chuna litaxtuyaw kachikin «nti liyankgoy nkintukuwini». Wa xlakata, lipawanaw chuna la wan Salmo 9:10: «Tiku lakgapaskgo mintukuwani nalipawankgoyan, xlakata ni katikamakgxtakgti tiku putsakgoyan, oh Jehová».