¡Ni kalakpuwanti pi ni katitalakgpalilh!
¿Akglhuwata kata wix xtatayana Jehová chu lakaskina pi tiku tatamakgaxtokgnita na akxtum kataskujnanin Dios?
¿O taxlajwani akxni tiku limakgalhtawakgaya Biblia nema xtasiya pi lu xlakgati nikxni tatayalh Dios?
Ecl. 11:1).
Makgapitsi liʼakxilhtit xalak Gran Bretaña namakgtayayan nakatsiya tuku xlakata ni nataxlajwaniya. Na naʼakxilha tuku tlan natlawaya xlakata «namalakgachaya minkaxtalanchu kxkgalhni chuchut» uma wamputun, nakamakgtayaya tiku nina makglhtinankgo tuku xaxlikana (LU XLAKASKINKA CHUNTIYA NALISKUJA
Lu xlakaskinka chuntiya naliskuja. Xlakaskinka ni namakgxtakga tuku xaxlikana chu Jehová (Deut. 10:20). Wa tlawalh Georgina. Akxni tsukulh katakgalhtawakga xtatayananin Jehová kkata 1970, xchixku wanikan Kyriacos lu sitsilh. Xmamakgxtakgniputun xtakgalhtawakga, ni xkamaxki talakaskin xtatayananin Jehová natanukgo kxchik chu xmakgan likgalhtawakgaka nema xtekgsa.
Akxni Georgina tsukulh an ktamakxtumit, Kyriacos tlakg sitsilh. Akgtum kilhtamaku xla alh ktamakxtumit xlakata xtalatlawanamputun. Akxni chatum tala nema anta xwi akxilhli pi uma chixku tlakg liwana xchuwinan Griego nixawa Inglés, tama tala kilhanilh kteléfono chatum tala tiku xchuwinan Griego xlakata xmilh kamakgtaya. Kyriacos lu lakgatilh la tala stlan makgamakglhtinalh chu asta likgalhtawakgalh Biblia. Pero makgxtakgli xtakgalhtawakga.
Georgina chuntiya akgtutu kata xchixku ni xmaxkilh talakaskin nakgalhtawakga. Kyriacos wanilh pi xʼama makgxtakga komo xtamunulh; akxni xʼamaja tamunu, Georgina tlawanilh oración Jehová chu skinilh pi Kyriacos ni xmakgxtakgli. Akxni natalan chankgolh kxchiki xlakata nalinkgo lanka ktamakxtumit, Kyriacos kawanilh: «Kapulatit wixin. Nakkastalaniyan kkimputlawkan». Xla tamakgtaxkgli xalakatsisa ktamakxtumit ¡chu akxilhli akxni tamunulh xpuskat!
Atsinu ni xchan tipuxum kata lata xlakgapasnit xaxlikana, Georgina akxilhli akxni xchixku tamunulh
Ama kilhtamaku, Kyriacos nialh lu sitsilh xlakata xkgalhtawakgama xpuskat chu tsinu tsinu talakgpalilh. Titaxtulh kilhtamaku, tamunulh. ¿La xlilhuwa kata xtitaxtunit akxni xpuskat xapulana xkatachuwinanit xtatayananin Jehová? ¡Atsinu ni xchan tipuxam! Xla wan: «Lu klipaxuwa pi kimpuskat nitu mamakgxtakgnilh nakakninani Jehová». Georgina wan: «Maski kinchixku ni xkimaxki talakaskin ni xakama makgxtakga Jehová. Putum uma kilhtamaku, xaktlawani oración Jehová chu nikxni klakpuwa pi putum kilhtamaku chuna xʼama tawila».
KAKGALHI XASASTI TAYAT
Atanu tuku nalimakgtayayaw tiku tamakgaxtokgaw wa pi nakgalhiyaw xtayatkan kstalaninanin Cristo. Apóstol Pedro kawanilh lakpuskatin: «Wixin lakchajan, kalakgachixkuwitit minchixkukan; lakimpi na chuna wa minchixkukan nti ni kanajlakgoy xtachuwin Dios, nalitlajakgoyatit nakanajlakgoy ni wa xpalakata mintachuwinkan, wampi xpalakata ntu ntlan milatamatkan wixin xlakchajankan» (1 Ped. 3:1). Christine kgalhakgaxmatli uma tastakyaw, titaxtu lhuwa kkilhtamaku xlakata John xtalakgpalilh. Liwakaya akgpuxam kata akxni xtatayana Jehová wa, John ni xlakaskinka xakxilha nakanajlani Dios. Maski ni xmakgtanuputun ktakanajla, pero xla akxilhli pi Christine lu xlakaskinka xʼakxilha xtakanajla. John wan: «kakxilhli pi tlakg xakpaxuwa. Xla tatliwakglhli, chu uma lu kimakgtayalh akxni xakkgalhi laklanka taʼakglhuwit».
Christine nikxni xafuerza wanilh xchixku pi na xtatayana Jehová xwa. Xchixku wan: «Christine akxilhli pi tlakg tlan xwanit xlakata ni tunkun xkilitachuwinalh xtakanajla, chu xla kimaxkilh talakaskin lakatsuku nakkatsini chu chuna la xaklakaskin». Akxni Christine xakxilha krevista Makatsinina chu ¡Despertad! artículos nema xkatsi pi xlakgatilh John, la tuku xla científicos chu tuku anan kkakilhtamaku, xla xmasiyani chu xwani: «Akit klakpuwan pi lu nalakgatiya nalikgalhtawakgaya uma».
Uma kilhtamaku, John tajubilarlilh chu xlimaxtu kilhtamaku xlakata nakuentajtlawa jardín. Xlakata nialh lu lhuwa tuku xlilakgaputsa, tsukuka tlawanikan makgapitsi takgalhskinin xla latamat. Xla lakpuwa: «¿Kaj akglakgwa lakatsukuw unu o wi tuku xpalakata kinkatlawakan?». Akgtum kilhtamaku, chatum tala tiku xtachuwinama kgalhskilh, komo xlakaskin nalikgalhtawakga Biblia. John wan: «Xlakata xaktsukunit kanajlani Dios, kmakgamakglhtinalh takgalhtawakga».
¡Lu xlakaskinka pi Christine ni taxlajwanilh! Titaxtulh akgpuxam la xtlanima oración Dios xlakata xchixku xmakgamakglhtinalh xaxlikana chu akxilhli akxni tamunulh. La uku xchatiykan xatapaxuwan skujnikgo Jehová. John wan: «Pulaktiy tuku kimakgtayalh nakmakglhtinan xaxlikana. Xapulana, xlakata tlan kilikatsinikgolh xtatayananin Jehová. Xlipulaktiy, xlakata xaktamakgaxtokga chatum xtatayana Jehová, xlakata xla ni akgskgawinan, tlan nalipawana chu xamakgtayana». Christine tlawalh tuku wan 1 Pedro 3:1 chu tlan lichuwinan tuku kitaxtu.
TALHTSI NEMA NACHANA ALISTALH NAMASTA XTAWAKAT
¿Tuku nala komo tiku kgalhtawakgama nialh kgalhtawakgaputun chuna la xapulana? Mapakgsina Salomón tsokgnalh: «Lakatsisa kachanti mintalhtsi, chu asta kakgotanun chuntiya kaliskujti; xlakata ni katsiya niku tlan nakitaxtu, unu o amacha, o akxtum tlan nawan» (Ecl. 11:6). Min kilhtamaku makgapitsi talhtsi xla xaxlikana titaxtu lhuwa kata xlakata namastakgo xtawakat chu lataman naʼakgatekgsa pi lu xlakaskinka natalakatsuwini Jehová (Sant. 4:8). Wa xlakata max namin kilhtamaku naʼakxilha pi nastaka xtakanajla.
Chuna titaxtulh Alice, tiku xlama kIndia chu alh latama kInglaterra chu kkata 1974 tsukulh likgalhtawakga Biblia. Xla chuwinan Hindi, pero tlakg xkatsiniputun inglés. Akglhuwa kata kgalhtawakgalh chu xʼan kmakgapitsi tamakxtumit kcongregación niku xchuwinankan inglés. Xla xkatsi pi tuku xkatsinima xaxlikana pero ni lu xlakaskinka xʼakxilha. Nachuna, lu xkgalhiputun tumin chu lu xlakgati xʼan kpaxkua. Titaxtulh kilhtamaku makgxtakglhli xtakgalhtawakga.
Max puxamakaw kata titaxtulh, Alice tsokgnanilh Stella, tala tiku xlimakaglhtawakganit Biblia. Xcarta xwan: «Lu nalipaxuwaya pi tiku xlimakgalhtawakgaya Biblia kkata 1974, tamunulh kxaʼawatiya tamakxtumit xaʼakgtutu kilhtamaku. Wix lu xlakaskinka litaxtuya kkilatamat. Kimasiyani tuku xaxlikana chu maski ama kilhtamaku nina xaklakpuwan naktamakamastani Dios, kmakilh kkintalakapastakni chu kkinaku».
Carta nema tsokgli Alice chu maxkilh stella xwan: «Lu nalipaxuwaya pi tiku xlimakgalhtawakgaya Biblia kkata 1974, tamunulh kxaʼawatiya tamakxtumit xaʼakgtutu kilhtamaku»
¿Tuku xakgspulanit? Alice wan pi lu xlilipuwa akxni nilh xchixku kkata 1997. Tsukulh tlawa xʼoración, chu max akgkaw minuto titaxtulh, chatiy xtatayananin Jehová tiku xchuwinankgo panjabí tlakgkgolh xmalakcha chu makgaxtakgnikgolh tratado nema wanikan ¿Qué esperanza hay para los seres queridos que han muerto? Xlakata liwana xkatsi pi Dios xkgaxmatninit xʼoración lakpuwa pi xchanit kilhtamaku nakaputsa xtatayananin Jehová. ¿Niku tlan xkatekgsli? Kmaktum xamakgan libreta ktekgsli niku xwi dirección xla congregación xla panjabí nema Stella xmaxkinit. Akxni alh kpukgalhtawakga , natalan lu xatapaxuwan makgamakglhtinankgolh. Xla lakapastaka: «Wa tapaxkit nema kilimasiyanikgolh putum kilhtamaku xaklakapastaka,chu kimakgtayalh nialh lu naklipuwan».
Alice tsukulh an kputum tamakxtumit, tsukupa kgalhtawakga, chu katsinilh liwana chuwinan chu kgalhtawakga panjabí. Tamulh kkata 2003. Xcarta chuna xkgalhputa: «Maski puxamanajatsa kata titaxtunit kimasiyani tuku xaxlikana lu kpaxtikatsiniyan xlakata lu tlan liʼakxilhtit kiwalini».
«Maski puxamanajatsa kata titaxtunit kimasiyani tuku xaxlikana lu kpaxtikatsiniyan xlakata lu tlan liʼakxilhtit kiwilini.» (Alice)
¿Tuku kinkamasiyanikgoyan tuku titaxtukgolh? Pi komo chatum lataman xlikana katsiputun, taktuju chu katsiputun xlakata Dios, Jehová natlawa pi xaxlikana nastaka kxnaku maski tlakg nalin kilhtamaku ni xawa tuku xlakpuwana. Jesús wa kʼakgtum liʼakxilhtit: «Lichanat, puntakxtuy, na staka, wampi ni katsiy xla ntu listaka. Sampi wa ntiyat, wa malaniy xaliwat, xakgasiyaj xatuwan, alistalh talakatsuku nchu mpatumilaj, awatiya ntapuliy nchu wa xaliwat» (Mar. 4:27, 28). Lichanat xakstu staka chu uma lakatsuku chuna lay. Ni kalakpuwanti pi uma ni chatum tiku lichuwinan Dios katsi la nakgantaxtu. Wa xlakata, chuntiya kachanti max xalan natawaka xatawakat.
Chu kalakapastakti pi oración lu xlakaskinka. Georgina chu Christine lhuwa oración tlawakgolh. Komo wix xliʼankgalhin naxakgatlilakapiniya Dios chuna la natitaxtu kilhtamaku max xalan natatanokglha «kaxtalanchu» nema makapi kxkgalhni chuchut (Rom. 12:12).