1, 2. ¿Xlakata tuku xlichuwinankanit pi xʼama la xaʼawatiya kilhtamaku tuku tlakg xkatsiputunkgo kstalaninanin Jesús chu tuku xlakata?

PEDRO, Santiago, Juan chu Andrés xakstu xtawilakgo xMakgalhtawakganakan. Kajwatiya xlakpuwamakgolh tuku xkawaninit Jesús xlakata xʼama malakgsputukan templo (Mar. 13:1-4). Wa xlakata kgalhskinkgolh: «¿Tukuya kilhtamaku chuna nala, chu tuku xaliʼukxilhtit naʼanan akxni kinkatawila nawan chu akxni talakatsuwinita xlakata nasputa tuku lama kkakilhtamaku?» (Mat. 24:1-3). Jesús kawanilh tuku xʼama la o tuku xʼama lakgpali xlatamatkan latamanin, nema na xʼama tasiya xaʼawatiya kilhtamaku xla Satanás. Pulaktum tuku tlakg xkatsiputunkgolh kstalaninanin Jesús. Akxni xlichuwinanita laktuwa taʼakglhuwit la guerras, tatsinksni o xlakata tlakg xʼama anan tuku nitlan, Jesús wa pi xaʼawatiya kilhtamaku na xʼama anan tuku tlan: «Na xapulh taliʼakgchuwinanit nawan xlikatlanka nkatuxawat yuma xatlan tamakatsinin xla tapakgsin; lakimpi paks nakgaxmatkgoy [...]; akxniku nchu nachin xlikgatsputni nkatuxawat» (Mat. 24:7-14).

² Jesús chu kstalaninanin akxtum xlichuwinankgonit «xasasti xtapakgsit» Dios (Luc. 8:1; 9:1, 2). Max wa xlakata ama kilhtamaku lakapastakkgolh xtachuwin xMakgalhtawakganakan: «Lhuwa tachananat, pero lakskujnin ni lu chalhuwa. Wa xlakata kaskinitit xMalana tachananat xlakata namakamin lakskujnin» (Luc. 10:2). Pero ¿la tlan xlichuwinankgolh Dios «xlikatlanka nkatuxawat» chu «paks nakgaxmatkgoy»? ¿Niku xʼama taxtukgo tlakg skujni? ¡Lu tlan xtikatsikgolh komo xtilakpuwankgolh tuku aku xʼama la akxni Jesús anta xwi! Lu kaks xtililakawankgolh akxni xlakpuwankgolh la xʼama kgantaxtu  tachuwin nema likgalhtawakgayaw kMateo 24:14.

3. ¿La kgantaxtuma uku Lucas 21:34, chu tuku takgalhskinin nakinkatlawanikanan?

³ Uma tuku xlichuwinanit Jesús kgantaxtuma kʼuma kakilhtamaku, xlakata anankgo lhuwa millón lakchixkuwin chu lakpuskatin tiku akxtum skujmakgo xlakata nalichuwinankgo xalakwan xalaksasti xla xTamapakgsin Dios xlikalanka Katiyatni (Is. 60:22). Pero Jesús lichuwinalh pi makgapitsi kstalaninanin lu tuwa xʼamakgo makgkatsikgo nalichuwinankgo Dios kʼuma xlikgalhsputni kakilhtamaku chu lhuwa xʼama “chuway” tuku xala kakilhtamaku (kalikgalhtawakga Lucas 21:34). Akinin na akxilhmaw la kgantaxtuma uma tachuwin. Makgapitsi xlakskujni Dios tanu tuku tlawamakgo. Uma tasiya xlakata tuku laksakkgo natlawakgo kxtaskujutkan, tuku kgalhtawakgaputunkgo, tuku kgalhiputunkgo o kilhtamaku nema limaxtukgo xlakata nakgamanankgo chu nalilakgastanankgo. Makgapitsi lakgachanikgo taʼakglhuwit nema titaxtumakgo xlatamatkan. Wa xlakata tlan nakinkgalhskinkanan: «¿La kinkitaxtunima? ¿Tuku litasiya pi tlakg xlakaskinka kakxilha xlakata tuku klaksaka?».

4. 1) ¿Tuku skilh Pablo kʼoración xpalakata kstalaninanin Cristo xalak Filipos, chu tuku xlakata? 2) ¿Tuku naʼakxilhaw kʼuma artículo chu atanu, chu tuku xlakata?

⁴ Kxapulana siglo, lhuwa kstalaninanin Cristo xlimasiyakgolh pi “xlichuwinankgo xtachuwin Dios ni xpekuankgo” xtachuna la Pablo (Filip. 1:12-14). Pero xliskujatkan xwanit xlakata chuntiyaku pulana xwilikgolh tuku xla takanajla. Wa xlakata apóstol tlawalh oración xpalakata xnatalan xalak Filipos chu xlakaskinka xʼakxilhkgolh «wa ntu xatlan» (kalikgalhtawakga Filipenses 1:9-11). Chu nachuna kitaxtumaw kʼuma kilhtamaku. Lhuwa akinin ni pekuanaw akxni lichuwinanaw xTachuwin Dios. Maski chuna akxni akxilhaw tuku tlawama kxkachikin Jehová, ¿tlan nakinkamakgtayayan xlakata tlakg xlichuwinaw Dios? Chuna. Uma artículo nakinkamalakpuwaniyan tuku Jehová natlawa xlakata nakgantaxtu tuku lichuwinanit Mateo 24:14. ¿Tuku tlawaputun xkachikin Dios? ¿Chu la tlan nakinkamakgtayayan chu nakamakgtaya kifamiliajkan nakatsiyaw tuku tlawaputun? Atanu artículo naʼakxilhaw tuku nakinkamakgtayayan natayaniyaw chu chuntiya naskujaw la xkachikin Jehová.

5, 6. 1) ¿Tuku xlakata Jehová mastanit talakaskin nalakgapasaw la lakkaxwilinit xkachikin kʼakgapun? 2) ¿Tuku makxilhnika Ezequiel?

⁵ Lhuwa tuku Jehová ni lichuwinanit kBiblia. Akgtum liʼakxilhtit, maski lu tlan xtiwa pi xlichuwinalh la skuja kiʼakskititkan o uma kakilhtamaku, nichuna tlawalh. Wata kinkamaxkin tuku xmaklakaskinaw xlakata xʼakgatekgswi xtalakaskin chu xlakata nalatamayaw la xla lakaskin (2 Tim. 3:16, 17). ¡Chu lu xlakaskinka tuku lichuwinan Biblia xlakata xkachikin Jehová nema tasiya! Lu lipaxuwayaw akxni likgalhtawakgayaw tuku tsokgkgolh Isaías, Ezequiel, Daniel chu Juan xlakata la Dios putum lakkaxwilikgonit kʼakgapun (Is. 6:1-4; Ezeq. 1:4-14, 22-24; Dan. 7:9-14; Apoc. 4:1-11). Xtachuna la Jehová xmalakkilh akgtum cortina chu xtasiyalh putum tuku wi kʼakgapun kilakatinkan. ¿Tuku xlakata tlawalh pi uma tamasiyat xtawilalh kBiblia?

⁶ Xlakata xla lakaskin putum kilhtamaku lakapastakaw pi akinin makgtapakgsiyaw kxkachikin Jehová xlikalanka kakilhtamaku. Xlakata nakgantaxtu xtalakaskin Jehová, lhuwa tuku lama chu nila putum akxilhaw. Akgtum liʼakxilhtit, palakachuwina Ezequiel akxilhli  tuku ni xtasiya xlakata xkachikin Dios nema xlitasiya la tuku xtachuna akgtum lanka carruaje kʼakgapun. Uma lakapala xtlawan chu lakapala alakatanu xʼan (Ezeq. 1:15-21). Xlakata la xtalakgspita xruedas lakgamakgat niku xʼan. Ezequiel naʼakxilhli makgapitsi tuku xkgalhi xMatlawanina ama carruaje: «Chu kaʼakxilhi tuku xtachuna xkgakganat nema taxtu akxni mastalankikan oro, xtachuna lhkuyat kxpulakni [...]. Xtachuna xtasiya la xlilanka Jehová» (Ezeq. 1:25-28). Palakachuwina nila xkanajla tuku akxilhli. Akxilhli la Dios liwana xpulalima xkachikin, akxilhli la Dios xlipulalima xʼespíritu santo. ¡Lu kaks malakawaninan xlakata la tasiya pi skujma xkachikin Jehová kʼakgapun!

7. ¿La kinkamakgtayayan akxilhli Daniel?

⁷ Daniel na lhuwa tuku akxilhli nema matliwakglha kintakanajlakan. Maxkika talakaskin xʼakxilhli la xtasiya Jehová nema xlitasiya la chatum «Kgolotsin» nema tawila akgtum putawilh xla lhkuyat nema kgalhi ruedas (Dan. 7:9). Jehová xlakaskin pi Daniel xʼakxilhli la skujma xkachikin, chu makgantaxtima xtalakaskin. Uma palakachuwina na akxilhli «chatum la xkgawasa chixku», Jesús, tiku xlakgayawamaka xlakata xpulalilh xtaskujut kxkachikin Jehová kKatiyatni. Xtamapakgsin Jesús ni kaj makgapitsi kata makgapala, xlakata «wa xtamapakgsin akgtum tamapakgsin nema nikxni katisputli ni katititaxtulh, xtamapakgsin nikxni katimalakgsputuka» (Dan. 7:13, 14). ¿Xlikana pi uma tlawa tlakg nalipawanaw Jehová chu xlakaskinka naʼakxilhaw tuku tlawama? Xla maxkilh «tamapakgsin, chu lilanka chu  pumapakgsin» xKgawasa, tiku liʼakxilhka chu masiyalh pi nikxni xʼama makgxtakga. Liwana tasiya pi Jehová lipawan xKgawasa. Chu akinin na tlan lipawanaw Jesús, xlakata xla kinkapulaliman.

8. ¿La kamakgtayalh Ezequiel chu Isaías tuku kamakxilhnilh Jehová, chu la kinkamakgtayayan?

⁸ ¿La kinkamakgtayayan tlakg tlan nalakgapasaw tuku ni tasiya xla xkachikin Jehová? Xtachuna la Ezequiel, kaks lilakawanaw chu tlakg taktujuyaw akxni akgatekgsaw tuku tlawama Jehová (Ezeq. 1:28). Akxni lakapastakaw xkachikin Jehová kinkamakgtayayan naskujaw, chuna la makgtayalh Isaías. Akxni wanika pi xkawanilh latamanin tuku Jehová xtlawama, xla xatapaxuwan tlawalh (kalikgalhtawakga Isaías 6:5, 8). Xla liwana xkatsi pi xtamakgtay Jehová xtayanilh putum taʼakglhuwit. ¡Lhuwa kinkamakgtayayan naʼakxilhaw xkachikin Jehová, nema putum kilhtamaku skujma chu tlawama xtalakaskin!

9, 10. ¿Tuku xlakata xlakaskinka pi xkachikin Jehová natawila unu kkatiyatni?

⁹ Xlakata xKgawasa, Jehová lakkaxwililh kKatiyatni akgtum kachikin nema makgtaya kachikin nema lakkaxwilinit kʼakgapun. ¿Tuku xlakata talakaskin akgtum kachikin unu kkatiyatni nema namakgantaxti tuku wan Mateo 24:14? Kaʼakxilhwi pulaktutu.

¹⁰ Xapulana, Jesús wa pi kstalaninanin xʼamakgo lichuwinankgo Dios «asta awatiya kxtankgana tiyat» (Hech. 1:8). Xliʼakgtiy, talakaskin nalakkaxwilikan la namakgpitsikan taway xaʼespiritual chu nakakuentajtlawakan tiku lichuwinankgo Dios (Juan 21:15-17). Chu xaʼawatiya, talakaskin pi tiku lichuwinankgo xalakwan xalaksasti natamakxtumikgo xlakata nakakninanikgo Jehová chu nakamasiyanikgokan la nalichuwinankgo Dios (Heb. 10:24, 25). Putum uma nila xtatlawalh komo nitu xlakkaxwilika. Xlakata kstalaninanin Cristo tlan nakakitaxtuni, liwana talakaskin nalakkaxwilikan la nalichuwinankan Dios.

11. ¿La tlan namakgtayananaw tuku tlawama xkachikin Jehová?

¹¹ ¿La tlan namakgtayayaw tuku Jehová lakkaxwilinit kxkachikin? Pulaktum la tlan natlawayaw wa nalipawankgoyaw latamanin tiku laksakkgonit Jehová chu Jesús xlakata nalichuwinankgo xalakwan xalaksasti. Kkakilhtamaku lhuwa tuku anan nema tlawa pi natalan tanu tuku natlawakgo. Pero ¿tuku tlawama xkachikin Jehová unu kkatiyatni?

12, 13. ¿La makgantaxtikgo xtaskujutkan lakgkgolotsin tiku pulalinkgo la nalichuwinankan Dios niku kalakgchan, chu tuku xlakata makgtayayan uma?

¹² Kaliyawakanit la lakgkgolotsin kstalaninanin Cristo tiku tliwakga wi xtakanajla xlakata napulalinkgo la nalichuwinankan Tamapakgsin kkachikinin niku wilakgo. Akxni wi tuku lakkaxwilikgo, putsakgo tamakgtay kxTachuwin Dios xlakata akxilhkgo “la lampara, nema maxkgakge xtijiakan” (Sal. 119:105). Na skinikgo Jehová kʼoración kapulalilh (Mat. 7:7, 8).

¹³ Xtachuna la tiku xpulalinkgo la xlichuwinankan Dios kxapulana siglo, lakgkgolotsin tiku pulalinkgo la uku tamakamastanikgonit “naskujkgo namastakgo ntachuwin” (Hech. 6:4). Lu lipaxuwakgo xlakata akxilhkgo la lhuwa lichuwinamaka xalakwan xalaksasti ni kajwatiya kxkachikinkan, nachuna xlikalanka kakilhtamaku (Hech. 21:19, 20). Akxni liwana lakkaxwilikgo tuku talakaskin xlakata tlakg natalichuwinan xalakwan xalaksasti, akxilhkgo tuku wan Biblia chu xtamakgtay xʼespíritu santo Dios  chu ni tlawakgo tuku xlakan lakaskinkgo (kalikgalhtawakga Hechos 15:28). Chuna uma natalan lu tlan liʼakxilhtit maxkikgo congregación (Efes. 4:11, 12).

14, 15. 1) ¿Tuku tatlawama xlakata nalichuwinankan Dios xlikalanka kakilhtamaku? 2) ¿La makgkatsiya xlakata tlan makgtayanana nalichuwinankan xTamapakgsin Dios?

¹⁴ Makgapitsi nila akxilhkgo tliwakga taskujut nema tlawakgo tiku mastakgo tawakat xaʼespiritual nema makglhtinanaw kkilikgalhtawakgakan, kintamakxtumitkan chu klaklanka tamakxtumit. Lhuwa tiku ni tlajakgo lhuwa skujkgo xlakata latamanin namakglhtinankgo taway akgchaxan ciento tachuwin xlakata lhuwa nakatsikgo «ntlanka likakni ntu ntlaway Dios» (Hech. 2:7-11). Natalan laktsuman chu lakgkgawasan maskujukgo maquinas nema litlawakan uma likgalhtawakga chu nema mawakani xmakni likgalhtawakga. Alistalh, uma likgalhtawakga na kamalakgachakan asta tlakg lakgamakgat kachikin kkatiyatni.

¹⁵ Lhuwa tuku tatlawama xlakata akinin tlakgku nakatalichuwinanaw xtachuwin Dios tiku xalak kincongregacioneskan. Akgtum liʼakxilhtit, lhuwa mil makgtayanankgo natlawakan xPukgalhtawakakan xla xTatayananin Jehová chu Salones de Asamblea, akxni makgtayakan tiku titaxtumakgo tuku nitlan xlakata wi tuku masputunan o maklakaskinkgo tamakgtay xlakata tatatlakgo, o makgtayanankgo nalakkaxwilikan laklanka tamakxtumit chu escuelas niku masiyakan xlakata Dios. Uma makgapitsin taskujut nema max ni akxilhaw pi tatlawama. Pero ¿tuku xlakata anan lhuwa taskujut? Xlakata tlakg nalichuwinankan xalakwan xalaksasti, xlakata namatliwekglhkan xtakanajlakan tiku lichuwinankgo Dios chu xlakata xaxlikana takanajla chuntiya nastaka. ¿Chuntiya tlawama tlakg xlakaskinka taskujut xkachikin Jehová unu kkatiyatni? Chuna.

16. ¿Tuku takgalhtawakga nakinkamakgtayayan akinin chu kifamiliajkan?

¹⁶ ¿Limaxtuya kilhtamaku xlakata nalakpuwana taskujut nema tlawama xkachikin Jehová? Makgapitsi natalan akxni kakninanikgo Dios kfamilia o akxni xakstu kgalhtawakgakgo lakputsakgo xlakata xkachikin Jehová. Lu stlan akxni likgalhtawakgakan tuku kamakxilhnikgoka Isaías, Ezequiel, Daniel chu Juan. Libro Los testigos de Jehová, proclamadores del Reino de Dios chu atanu likgalhtawakga chu DVD nema anan kkintachuwinkan kinkamakgtayakgoyan tlakg nalakgapasaw xkachikin Jehová.

17, 18. 1) ¿La makgtayanitan uma takgalhtawakga? 2) ¿Tuku takgalhskinin tlan natlawayaw?

¹⁷ Akxni lakpuwanaw tuku Jehová tlawama xlakata xkachikin kinkamakgtayayan. Akxtum taskujkan uma xkachikin Jehová, tlawa kalakpuwaw tuku tlakg xlakaskinka. Chuna natlawayaw la Pablo tiku tsokgli: «Wa lantla kkgalhiyaw yuma ntaskujut ntu nkinkalimaxkinitan xtalakgalhaman Dios, ni kxlajwananaw» (2 Cor. 4:1). Xla kalimakgtayalh xcompañeros uma tachuwin: «Ni anu titlakgwanaw natlawayaw wa ntu ntlan; xampi kxkilhtamaku, namakgalayaw, wa lapi ni natalaktuwajaw» (Gál. 6:9).

¹⁸ ¿Wi tuku talakaskin nalakgpaliyaw xlakata la limaw kilatamatkan, kinchatunukan o putum familia, xlakata natlawayaw tuku tlakg xlakaskinka? ¿Tlan ni lhuwa tuku nakgalhiputunaw kkilatamatkan o ni lhuwa nalakgastanamputunaw xlakata tlakg nalichuwinanaw Dios? Kʼatanu artículo naʼakxilhaw pulakkitsis tuku nakinkamakgtayayan nachuna naskujkgo la xkachikin Jehová.