JESÚS lichuwinalh pi kʼama templo «ni akgtum nchiwix» xʼama tawila, chu tuku xlichuwinanit kgantaxtulh akxni soldados xalak Roma, tiku xkapulalin Tito, malakgsputukgolh kkata 70 akxni xminita Jesús (Mat. 24:2). Lhuwa siglo alistalh, emperador Juliano xkaxtlawaputun templo.

Lichuwinankan pi Juliano, xpuxnimat Constantino el Grande, wa xaʼawatiya emperador xla Roma tiku ni xkanajlani Dios. Maski masiyanika «takanajla xla Cristo», akxni emperador limaxtuka kkata 361 xla wa pi ni kstalanina Cristo xwanit xlakata uma lhuwa xkgalhanamakgolh chu tsukulh kamakgtaya tiku ni xkanajlakgo Dios. Wa xlakata, libros nema lichuwinankgo tuku lanit limapakuwikgo «el Apóstata».

Juliano ni xlakgati takanajla xla Cristo, max xlakata akxni xkgalhi akgchaxan kata akxilhli makgapitsi tiku xwankgo pi kstalaninanin Cristo makgnikgolh xtlat chu makgapitsi xparientes. Makgapitsi historiadores wankgo pi Juliano kawanilh judíos pi xkaxtlawaparakgolh templo, xlakata xlimasiyalh pi Jesús kaj xʼakgsaninan. *

Xlikana pi Juliano xkaxtlawaputumpara templo. Pero ni liwana takatsi komo tsukukgolh skujkgo, komo chuna tlawaka ni takatsi tuku xlakata ni makgalhsputuka. Tuku xaxlikana: Juliano nilh akxni nina xmakgatsi akgtiy kata la xmapakgsinama, chu tuku xtlawaputun na nialh tlawaka.