1, 2. ¿La tlakg lipawanaw akxni lakapastakaw tuku tlawama xkachikin Jehová?

LU TLAN limakgkatsiyaw akxni katsiyaw pi namakgtapakgsiyaw akgtum lanka kachikin kkakilhtamaku. Xlakata tuku tatsokgtawilanit kʼEzequiel capítulo 1 kDaniel capítulo 7 akxilhaw la Jehová pulalin taskujut xlakata putum tlan nakitaxtu. Jesús pulalin xkachikin Jehová nema wi kkatiyatni xlakata chuntiya natalichuwinan xalakwan xalaksasti, nachuna nakuentajtlawa xtakanajlakan tiku lichuwinankgo Dios chu tlakg nastaka xaxlikana takanajla. Wa xlakata, tlan nalipawanaw kxkachikin Jehová (Mat. 24:45).

² Pero ¿akinin nachuna skujmaw la xkachikin Jehová? ¿Tlakg tatliwakglhnit kintakanajlakan o xlajwananit? Akxni lakapastakaw uma takgalhskinin, max naʼakxilhaw pi tlakgwanitawa chu nialh chuna skujmaw la pulana. Xlikana, uma tlan chuna nakinkaʼakgspulayan kimputumkan. Xapulana siglo, apóstol Pablo kawanilh xnatalan pi nachuna xtlawakgolh la Jesús. ¿Tuku xlakata? Xla katsokgnanilh: «Lakimpi ni nalitatlakgajatit mintakgpuwantinkan akxni natalaktuwajatit» (Heb. 12:3). Nachuna, komo liwana nalikgalhtawakgayaw artículo nema titaxtulha nema kinkamasiyanin tuku tlawama xkachikin Jehová, lhuwa kinkamakgtayan xlakata chuntiya naskujaw chu natayaniyaw.

3. ¿Tuku natlawayaw xlakata ni naxlajwananaw chu tuku naʼakxilhaw kʼuma artículo?

³ Pero, Pablo wa pi wi tuku kinkatsankganiyan xlakata ni naxlajwananaw: kiliskujatkan xlakata natlawayaw «ntu ntlan» (Gál. 6:9). Wa xlakata talakaskin pi naliskujaw. Kaʼakxilhwi pulakkitsis tuku nakinkamakgtayayan xlakata tliwakglh natawilayaw chu nataskujaw xkachikin. Uma nakinkamakgtayayan xlakata naʼakxilhaw komo wi tuku talakaskin akinin o kifamiliajkan naliskujaw.

4. ¿Tuku limasiya pi tamakxtumit lu xlakaskinka akxni kakninaniyaw Jehová?

⁴ Tamakxtumit wa tuku lu tlawakgo kskujni Jehová. Kʼakgapun, min kilhtamaku kawanikan ángeles  katamakxtumikgolh kxlakatin Dios (1 Rey. 22:19; Job 1:6; 2:1; Dan. 7:10). Israel xalamakgasa xtalakaskin xtamakxtumikgolh xlakata xkgaxmatkgolh chu xkatsinikgolh xlakata Dios (Deut. 31:10-12). Judíos xla xapulana siglo xlismanikgonit natamakxtumikgo ksinagogas xlakata nalikgalhtawakgakgo xTatsokgni Dios (Luc. 4:16; Hech. 15:21). Chu akxni tatlawalh congregación xla kstalaninanin Cristo chuntiya lu xlakaskinka litaxtukgolh tamakxtumit. La uku na lu xlakaskinka tamakxtumit akxni kakninaniyaw Jehová. Kstalaninanin Cristo na tamakxtumiyaw “lalimakgpuwantiniyaw nchatunu amakgapitsin ktapaxkit, chu kxalakwan tatlaw”. Talakaskin chuntiya «nalamakgpuwantiniyaw; na kax natlawayaw mpi ukxilhaw ntalakatsuwimaja yama ntlanka kilhtamaku» (Heb. 10:24, 25).

5. ¿La tlan nalamatliwakglhaw ktamakxtumit?

⁵ Pulaktum nema la tlan nalamatliwakglhaw chatunu akinin wa akxni mastayaw kintakgalhtinkan ktamakxtumit. Akgtum liʼakxilhtit, tlan nalichuwinanaw kintakanajlakan akxni nakgalhtinanaw akgtum takgalhskinin, o akxni wanaw la nalimaklakaskinkan akgtum texto o akxni lichuwinanaw akgtum experiencia nema limasiya pi lakgachixkuwikan xlimapakgsin Jehová tlan kitaxtu (Sal. 22:22; 40:9). Maski akglhuwata kata anaw ktamakxtumit o ni, putum akinin tlan wanaw pi kinkamakgtayayan xtakgalhtinkan kinatalankan kamanan chu tiku linkgoya kata.

6. ¿La kinkamakgtayayan kintamakxtumitkan kkintakanajlakan?

⁶ ¿Tuku xlakata Jehová kinkaskiniyan pi ni namakgatsankgayaw tamakxtumit? Tamakxtumit chu laklanka tamakxtumit kinkamakgtayayan chuntiya nalichuwinanaw Dios, ni napekuanaw chu natayaniyaw tuku nitlan o xlakata latamanin ni kgaxmatputunkgo xlakata Dios (Hech. 4:23, 31). Nachuna, akxni akxilhaw tuku wan Biblia tatliwakglha kintakanajlakan (Hech. 15:32; Rom. 1:11, 12). Tamasiyat chu la limasiyakan tapaxkit ktamakxtumit kinkamaxkiyan tapaxuwan chu «tlan [kinka]mamakgkatsiniya kilhtamaku akxni titaxtuma[w] tuku nitlan» (Sal. 94:12, 13, TNM). Comité de Enseñanza xla Lakgkgolotsin tiku Pulalinkgo xTatayananin Jehová akxilhkgo la lakkaxwilikan tuku talakaskin xlakata takanajla kxkachikin Jehová xlikalanka kakilhtamaku. ¡Lu paxtikatsiniyaw xlakata tamasiyat nema makglhtinanaw akgatunu semana xla kata!

7, 8. 1) ¿Tuku xlakata anaw ktamakxtumit? 2) ¿La makgtayayan tamakxtumit?

⁷ Pero ni kajwatiya anaw ktamakxtumit xlakata tuku namakglhtinanaw; anaw xlakata xlakaskinka akxilhaw nakakninaniyaw Jehová (kalikgalhtawakga Salmo 95:6). ¡Kakninaniyaw kiDioskan lu tlanka talakgalhaman! (Col. 3:16.) Xla lakgchan nakakninaniyaw akgatunu semana, chu chuna tlawayaw akxni anaw kintamakxtumitkan chu mastayaw kintakgalhtinkan (Apoc. 4:11). Wa xlakata Jehová kinkawaniyan «ni timakgaxtakgaw ntani ntamakgstokgaw lantla ntlawakgo makgapitsin xalismanin» (Heb. 10:25).

⁸ ¿Katsiyaw pi tamakxtumit xla kstalaninanin Cristo kinkamakgtayakgoyan natayaniyaw asta akxni Jehová namalakgsputu uma xalixkajni kakilhtamaku? Komo chuna, naʼakxilhaw la «wa ntu xatlan» chu naputsayaw la natlawayaw xlakata naʼanaw kintamakxtumitkan maski lhuwa taskujut kgalhiyaw kkilatamatkan (Filip. 1:10). Kajwatiya tuku lu tuwa nakinkamachokgoyan ni nakatakakninaniyaw Jehová kinatalankan.

9. ¿Tuku limasiya pi lu xlakaskinka nalichuwinankan xtachuwin Dios?

⁹ Komo xliputum kilitliwakgakan nalichuwinanaw Dios nakinkamakgtayayan chuntiya naskujaw la tlawama xkachikin Jehová. Uma taskujut malakatsukilh Jesús  akxni milh kKatiyatni (Mat. 28:19, 20). Lata ama kilhtamaku xkachikin Jehová na wa pulana wilinit nalichuwinan Tamapakgsin chu naputsakgo tiku nastalanikgo Cristo. Lhuwa tuku lama la uku masiyakgo pi ángeles kinkamakgtayamakgon chu kinkapulalimakgon xlakata natekgskgoyaw «tikanajlakgolh wa nti xlitalaksakkgonit latamat wa ntu xaliʼankgalhin» (Hech. 13:48; Apoc. 14:6, 7). Xkachikin Jehová wi unu kkatiyatni chu talakkaxwilinit xlakata natlawa uma lu xlakaskinka taskujut. ¿Na wa uma taskujut nema tlakg xlakaskinka akxilha?

10. 1) Kalichuwinanti akgtum liʼakxilhtit nema masiya pi chuntiya xlakaskinka naʼakxilhaw xaxlikana. 2) ¿La makgtayanitan nalichuwinana Dios xlakata ni naxlajwanana?

¹⁰ Akxni lhuwa lichuwinanaw Dios kinkamakgtayayan chuntiya xlakaskinka naʼakxilhaw xaxlikana. Kaʼakxilhwi tuku wa Mitchel, tiku lhuwa kata liskujnit la kgolotsin chu precursor wan: «Lu klakgati litachuwinankgo latamanin tuku xaxlikana. Klakpuwan akgtum xasasti artículo xla Makatsinina chu ¡Despertad! chu kaks klilakawan liskgalala, chu taʼakgatekgsni nema limin chu putum tuku lu tlan limin kirevistakan. Akxni kakxilha uma klichuwinamputun Dios chu kakxilhputun la nakgalhtinankgo latamanin chu klakputsanani la nakkatachuwinan. La lichuwinankan Dios tlan kimamakgkatsini. Komo atanu tuku kilitlawat, ni ktlawa akxni lakgchan naklichuwinan Dios». Xlikana, akxni lichuwinanaw Dios na kinkamakgtayayan ni namakgatsankgananiyaw Dios uma  xaʼawatiya kilhtamaku (kalikgalhtawakga 1 Corintios 15:58).

11. ¿Tuku xlakata talakaskin liwana namaklakaskinaw taway xaʼespiritual nema Jehová kinkamaxkiyan?

¹¹ Xlakata natatliwakglhaw, Jehová lhuwa taway xaʼespiritual kinkamaxkinitan klikgalhtawakga. Max kimputumkan lakpuwanaw pi milh kilhtamaku akxni likgalhtawakgaw maktum likgalhtawakga chu waw: «¡Uma xakmaklakaskima! ¡Xtachuna la Jehová xtimatsokgninalh kimpalakata!». Uma ni kaj xakstu la, xlakata Jehová kinkamasiyaniyan chu kinkalipulalinan likgalhtawakga xla kstalaninanin Cristo. Xla kinkawaninitan: «Nakmamakgachakgxiniyan laktlan talakapastakni, y nakmasiniyan tijia latani natlawana» (Sal. 32:8). ¿Maklakaskinaw putum taway xaʼespiritual nema makglhtinanaw? ¿Akxni likgalhtawakgayaw lilakpuwanaw? Komo chuna natlawayaw, chuntiya namakgalayaw lakwan tawakat uma xlikgalhsputni kilhtamaku chu kintakanajlakan ni naxlajwanan (kalikgalhtawakga Salmo 1:1-3; 35:28 chu 119:97).

12. ¿Tuku nakinkamakgtayayan putum namaklakaskinaw taway xaʼespiritual?

¹² Lu xlakaskinka nalakpuwanaw la xlilhuwa taskujut tatlawa xlakata natlawakan taway xaʼespiritual. Wa Comité de Redacción xla Lakgkgolotsin tiku Pulalinkgo xTatayananin Jehová akxilha pi liwana nalakputsakan, tuku tsokgkan, nalakkaxtlawakan, dibujo, chu natamatitaxti atanu tachuwin nema imprimirtlawakan likgalhtawakga o nema wilikan ksitio xla Internet. Sucursales niku tlawakan likgalhtawakga malakgachakgo putum congregaciones maski lakatsu o makgat wilakgo. ¿Tuku xlakata tatlawa uma taskujut? Xlakata xkachikin Jehová nakgalhi taway xaʼespiritual (Is. 65:13). Wa xlakata putum kalimaklakaskiw «taway» nema kinkamaxkiyan xkachikin Jehová (Sal. 119:27).

13, 14. ¿Tiku makgtayanamakgolh kʼakgapun tuku lakkaxwilinit Jehová, chu la tlan nachuna natlawayaw kkatiyatni?

¹³ Akxni wi tuku maʼakxilhnika apóstol Juan akxilhli Jesús xkgewi tantum xasnapapa kawayu xlakata namakgatlajakgo tiku talatlawakgo Jehová (Apoc. 19:11-15). ¿Ni xlikana pi matliwakglha kintakanajlakan akxni katsiyaw pi ángeles chu latamanin tiku ankgonit kʼakgapun chu makglhtinankgonita xtatlajakan makgtayakgo Jesús? (Apoc. 2:26, 27.) ¡Xlakan lu tlan liʼakxilhtit xlakata makgtayamakgo tuku tlawama Dios!

¹⁴ Nachuna tlawamakgolh tiku nalatamakgo unu kKatiyatni chu makgtayamakgolh xnatalan Cristo tiku lamakgolhku unu kkatiyatni chu pulalimakgolh xkachikin Jehová (kalikgalhtawakga Zacarías 8:23). ¿La tlan chatunu akinin namakgtayananaw tuku Jehová lakkaxwilinit? Pulaktum la chuna natlawayaw nalakgachixkuwiliyaw tiku kinkapulalinkgoyan (Heb. 13:7, 17). Talakaskin namatsukiyaw kkincongregacionkan. Akxni lichuwinankgoyaw lakgkgolotsin, ¿tlawayaw pi nakamaxkikan kakni chu taskujut nema tlawakgo? ¿Kawanikgoyaw kinkamanankan pi kamaxkikgolh kakni natalan tiku ni makgatsankgananikgo Dios chu kakaskinikgolh tastakyaw? Apulaktu, ¿lichuwinanaw kkinchikkan la tlan nalimakgtayananaw kintuminkan xlakata nalichuwinankan Dios xlikalanka katiyatni? (Prov. 3:9; 1 Cor. 16:2; 2 Cor. 8:12.) ¿Xlakaskinka akxilha tlan natawila Pukgalhtawakga xla xTatayananin Jehová? Wa xʼespíritu Jehová makgtayanan niku akxtum wilaka chu niku lamaxkikan kakni. Uma espíritu kinkamakgtayayan xlakata ni naxlajwananaw uma xaʼawatiya kakilhtamaku (Is. 40:29-31).

15. ¿Tuku xlakata ni natlawayaw tuku lakaskin Satanás chu natlawayaw xtalakaskin Jehová?

¹⁵ Xaʼawatiya, xlakata natayaniyaw chu chuntiya naskujaw la skujma xkachikin Jehová, kilimasiyatkan pi chuna tlawayaw tuku lichuwinanaw. Uma kilhchani pi liwana nakatsiyaw «wantu lakgatiy nkimPuchinakan» (Efes. 5:10, 11). Xlakata makglakgalhinanin akinin tlakg tuwa makgkatsiyaw ni natlawayaw tuku kinkamatlawiputunan Satanás chu uma xalixkajni kakilhtamaku. Makgapitsin wixin, natalan, chali chali liskujpatit xlakata tlan natalalipinatit Jehová, wa xlakata xla lu kapaxkiyan. ¡Ni kataxlajwanitit! Akxni chuna latamayaw la lakaskin Jehová, lu tlan limakgkatsiyaw chu xlikana katsiyaw pi kintakanajlakan kgalhi xtapalh (1 Cor. 9:24-27).

16, 17. 1) ¿Tuku kilitlawatkan komo tlawanitaw akgtum lanka talakgalhin? 2) ¿Tuku kinkamasiyaniyan tuku akgspulalh Anne?

¹⁶ Pero ¿tuku natlawayaw komo lakgalhinanaw? Tunkun naskinaw tamakgtay. Namatsekgaw kintalakgalhinkan tlakg nitlan nakinkakitaxtuniyan. Akgtum liʼakxilhtit, David tiku matsekgli tuku xtlawanit, wa: «Oh Dios, akxni ni xakkgalhtasij, akxni ni xaklitayaputun kintalakgalhin, kimakni lambara itxnakgma lata xaktasa chali chali» (Sal. 32:3). Akxni matsekgaw kintalakgalhinkan tlawa nitlan namakgkatsiyaw kimaknikan chu kintakanajlakan «pero tiku wan chu nialh chuna tlawa nalakgalhamankan» (Prov. 28:13).

¹⁷ Kalakpuwanti tuku lanilh Anne, * tiku precursora regular xwanit akxni kajku tsumat xwanit. Tsukulh tlawa nema nitlan chu nitlan kitaxtunilh. Xla wan: «Kintalakapastakni xtlawa pi ni tlan xakmakgkatsilh. Putum kilhtamaku xaklipuwan chu xaklilakgaputsa». ¿La tekgsli tamakgtay? Akgtum tamakxtumit niku lichuwinanka Santiago 5:14, 15, chu xla akgatekgsli pi xlakaskin tamakgtay chu kaputsalh lakgkgolotsin xalak congregación. Xla wan: «Ama versículos xtachuna la likuchun nema Jehová kinkamaxkiyan xlakata napaksaw xaʼespiritual. Tuwa makglhtinankan pero mapaksanan. Ktlawalh tuku wan ama texto chu tlan kinkitaxtunilh». Lhuwa kata titaxtunit, chu Anne la uku xliputum xlitliwakga skujnanima Jehová chu tlan talakapastakni kgalhi.

18. ¿Tuku kililakpuwanatkan natlawayaw?

¹⁸ Lu lanka talakgalhaman xlakata lamaw kxaʼawatiya kilhtamaku chu makgtapakgsiyaw lanka xkachikin Jehová. Putum kilhtamaku kalakpuwaw pi xlakaskinka. Wa xlakata akxtum kataskujwi kifamiliajkan xlakata makxtum natawilayaw ktamakxtumit, naputsayaw latamanin tiku kgaxmatputunkgo xlakata Dios chu liwana kalimaklakaskiw taway xaʼespiritual nema makglhtinanaw. Nachuna, kamakgtayakgow tiku kinkapulalimakgon chu kalilatamaw tuku lichuwinanaw. Chuna natlawayaw, ni kajwatiya nakinkamakgtayayan naskujaw la tlawama xkachikin Jehová, nachuna nikxni katixlajwanaw chu natlawayaw tuku xatlan.